O TE mau Baka, tei parau-atoa-hia Pygmées, te mau taata tumu no Cameroun. Ua tae atu to Potiti i te mau matahiti 1500. Tau senekele i muri aˈe, ua haru te Peuls, e nunaa Mahometa, i te tuhaa apatoerau o Cameroun. I teie mahana, te parau ra e 40 % taata no Cameroun e e Kerisetiano ratou, e 20 % e Mahometa, e te 40 % e toe ra e haapaoraa taˈere Afirika ïa.

Mea farii maitai roa te taata o te mau mataeinaa. E aroha e e ani ratou i te ratere ia tomo mai i roto i te fare a horoa ˈtu ai i te pape e te maa. Ia farii oe i ta ˈna aniraa e faaoaoa oe i te fatu fare. Ia ore râ, te haavahavaha ra ïa oe ia ˈna.

E haamata te aparauraa ma te aroha i te mau melo o te utuafare e te aniraa eaha to ratou huru. Mea matau-atoa-hia ia ani eaha te huru o te mau animara! Te na ô ra Joseph, te hoê taata tumu no  Cameroun: “Ia faarue te tahi manihini i te fare, eita e navai ia parau ‘Parahi!’” “Mea pinepine e apee e e tauaparau te fatu fare e te manihini maa taime rii i nia i te purumu. I muri roa oia e parau ai, ‘Nana!’ e e hoˈi atu ai i to ˈna fare. Aita anaˈe, e manaˈo te manihini e aita te fatu fare e au ra ia ˈna.”

I te tahi taime ia haere mai te mau hoa e tamaa, hoê noa mereti na te taatoaraa e aita e patia. I Cameroun, e tapao tera no te auhoêraa. I te tahi hoi taime, e ravea atoa tera peu no te faahau i te taata. A tamaa paatoa ˈi, e au e te parau ra oe “Ua hau tatou i teie nei.”