“O te hiˈo noa ˈtu i t[a] vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.”—Mataio 5:28.

TE FAUFAARAA

I teie mahana, mea pinepine e te ohie ia noaa mai te hohoˈa faufau. Ia au mai te Atua e ia oaoa oe, e mea tia ia ite i to ˈna manaˈo no nia i te reira.

TA TE BIBILIA E PARAU RA

Aita te Bibilia i faahiti noa ˈˈe no te hohoˈa faufau. Noa ˈtu râ, ia au i te mau faaueraa Bibilia mea ino ia mataitai atu.

Ei hiˈoraa, ua parau te Bibilia e e faaturi te tane faaipoipo e “hiˈo noa ˈtu” i ta vetahi ê vahine ma te hinaaro e taati atu. E tano ïa tera faaueraa no te taata faaipoipo aore ra taa noa e “hiˈo noa ˈtu” i te hohoˈa faufau a hinaaro atu ai e taati. Mea riri roa na te Atua taua haerea ra.

“E tena na, uumi [aore ra haavî] iho i to outou mau melo . . . mai te faaturi, te parau faufau ra, te paia ra, te hinaaro tia ore ra, e te nounou taoˈa.”—Kolosa 3:5.

TA TE TAATA E PARAU RA

Aita vetahi mau aivanaa e manaˈo ra e e turai te hohoˈa faufau i te taata ia rave i te peu tia ore. Mea ino mau anei ïa i te aro o te Atua?

TA TE BIBILIA E PARAU RA

Mea ino e te viivii te “faaata rii iino,” aore ra parau hauti faufau. (Ephesia 5:3, 4) Eaha ˈtu â ïa te hohoˈa faufau! I teie mahana, mea pinepine e taviri-roa-hia te taatiraa o te tane e te vahine, tane tane, vahine vahine e e rave rau atu â peu faufau. I te mea e mea ino te parau hauti faufau, mea riri roa ˈtu â ïa na te Atua ia mataitaihia te hohoˈa faufau.

Aitâ te mau aivanaa i papu atura e e faatupu anei te taata i mataitai i te hohoˈa faufau i to ˈna mau hinaaro tia ore. No te Bibilia râ, e tuino te reira ia tatou iho a faaoto atu ai i te Atua. Teie te aˈoraa a te Bibilia: “E tena na, uumi [aore ra haavî] iho i to outou mau melo . . . mai te faaturi . . . [e] te hinaaro tia ore.” (Kolosa 3:5) Aita te taata mataitai i te hohoˈa faufau e na reira ra. Te faatupu e te faarahi ra râ oia i tera mau hinaaro tia ore.

“E imi i te maitai, eiaha te ino . . . Ia riaria . . . i te ino, ia hinaaro râ i te maitai.”—Amosa 5:14, 15.

TA TE BIBILIA E PARAU RA

Ua faahiti te Bibilia i te mau taata taiata, taero ava e eiâ tei taui i to ratou haerea. (Korinetia 1, 6:9-11) Maoti te aha? Maoti te haapaoraa i te aˈoraa paari Bibilia ia riaria i te ino.

Ma te feruri i te mau faahopearaa iino e riaria ˈi tatou i te mataitai i te hohoˈa faufau. Ia au i te tahi hiˈopoaraa piahia e te haapiiraa teitei i Utah, Marite, e rave rau fifi te tupu. “E ahoaho, e faataa ê vetahi taata mataitai i te hohoˈa faufau ia ratou a ino atu ai te taairaa e vetahi ê.” Hau roa ˈtu â, mai te faataahia ˈtu na, e faaoto tera peu i te Atua Poiete a faataa ê atu ai i te taata ia ˈna.

Na te Bibilia e tauturu mai ia hinaaro i te maitai. Rahi atu â tatou i te taio i te reira, rahi atu â ïa tatou i te hinaaro e pee i ta ˈna mau aratairaa. E itoitohia ïa tatou ia haapae i te mataitai i te hohoˈa faufau. Mai te papai salamo, e parau anaˈe: “E ore au e tuu i te hoê mea ino i mua i tau mata; e riri ïa vau i tei rave i te hapa ra; e ore hoi te reira e piri mai ia ˈu.”—Salamo 101:3.