IA AU I TE BIBILIA
Te faaipoiporaa
E parau faaau noa anei te faaipoiporaa?
“Ta te Atua i taati ra, eiaha te taata e faataa ê atu.”—Mataio 19:6.
TA TE BIBILIA E PARAU RA
No te Atua, e ere te faaipoiporaa i te hoê noa parau faaau i rotopu i te tane e te vahine, e mea moˈa râ. Te na ô ra te Bibilia: “Area i te matamua ra, i te hamaniraa i te mau mea atoa nei, i hamani ihora te Atua i te taata i te tane hoê, e te vahine hoê. E faarue ai te tane i tana metua tane e tana metua vahine, a ati atu ai i tana vahine; e e riro hoi raua ei hoê . . . ta te Atua i taati râ, eiaha te taata e faataa ê atu.” a—Mareko 10:6-9; Genese 2:24.
Te mau parau “ta te Atua i taati [aore ra, tahoê],” e ere te auraa e na te Atua e faaoti o vai te tano maitai ei hoa faaipoipo no te tahi taata. Te faaite ra râ te reira e o to tatou Atua Poiete te Tumu o te faaipoiporaa. Ia au i te Bibilia, e ere te reira i te ohipa hauti. Mai te peu e no na hoa faaipoipo e mea moˈa e tamau to raua taairaa, e haafaufaahia ïa te faaipoiporaa. E tutava ïa raua i te vai piri noa. Ia haapao raua i ta te Bibilia e faaue ra i te tane e te vahine, e rahi atu â ïa te oaoa.
Eaha ta te Bibilia e faaue ra i te tane?
“O te tane hoi to te vahine ra upoo.”—Ephesia 5:23.
TA TE BIBILIA E PARAU RA
Ia oaoa te utuafare, e mea tia e na te hoê e rave i te faaotiraa hopea. Ia au i te Bibilia, ua horoahia tera hopoia i te tane. E ere râ te auraa e e nehenehe ta ˈna e haavî, e faahepo e e imi i te otoheraa no te ore e amo i ta ˈna hopoia. Ia na reira oia, e teimaha ta ˈna vahine e eita faahou ïa e faatura ˈtu. Te titau ra te Atua i te tane ia rave i te ohipa no te haapao i ta ˈna vahine e ia faatura ia ˈna mai to ˈna hoa piri e papu roa ˈˈe. (Timoteo 1, 5:8; Petero 1, 3:7) Te na ô ra te Ephesia 5:28: “E aroha atoa te mau tane i ta ratou iho mau vahine e tia ˈi mai ta ratou i aroha i to ratou iho tino ra. O tei aroha i tana iho vahine ua aroha ïa ia ˈna iho.”
Ma te here, e farii te tane e mea maramarama e aravihi atoa ta ˈna vahine. Mai te peu e e ravehia te tahi faaotiraa i taaihia i to raua utuafare, ma te faatura, e tâuˈa te tane i to ˈna manaˈo. Eita tera tane e titau ia haapao-noa-hia to ˈna hinaaro no te mea o ˈna te upoo o te utuafare. A ore ai Aberahama i faaroo i te aˈo tano a ta ˈna vahine, ua na ô atu Iehova: “E faaroo oe i te reo o Sara.” (Genese 21:9-12) Ma te haehaa, ua farii to te Atua tavini taiva ore ra o Aberahama i te reira. Ua haamaitai atu ïa te Atua, ua tahoê e ua vai hau noa to ˈna utuafare.
Eaha ta te Bibilia e faaue ra i te vahine?
“E te mau vahine, e auraro maite i ta outou mau tane.”—Petero 1, 3:1.
TA TE BIBILIA E PARAU RA
Hou a poiete ai i te hoê vahine no te tane matamua, ua na ô te Atua: “E ere ïa i te mea maitai ia parahi noa Adamu oia anaˈe ra; e hamani au i te tahi tauturu au na ˈna.” (Genese 2:18) Ia haa amui ïa te tane e te vahine e tia ˈi. I muri iho, ua hamani te Atua i te vahine eiaha no te haru i te tiaraa o te tane aore ra no te tatau e o ˈna, no te tauturu atu râ. Ma te ohipa amui, e nehenehe raua e fanau e e faaî i te fenua i ta raua mau tamarii mai ta te Atua i faaue atu.—Genese 1:28.
Ia nehenehe te vahine e amo i ta ˈna hopoia, ua horoa ˈtu te Atua i te tino, feruriraa faahiahia e huru maitatai. Ia faaohipa oia i te reira ma te paari e te here, e oaoa raua e e tiaturi papu atu ïa ta ˈna tane. No te Atua, e mea tia ia haamaitai i taua vahine ra. b—Maseli 31:28, 31.
a E farii te Bibilia i te faataaraa ia faaturi hoê.—Mataio 19:9.
b E au roa te feia faaipoipo i te mau manaˈo tauturu no nia i te faaipoiporaa e oraraa utuafare i roto te mau tumu parau “Tauturu no te utuafare” o te A ara mai na!
E au atoa outou . . .
E NEHENEHE TO UTUAFARE E OAOA
A tiaturi i te Atua no te oaoa e to hoa faaipoipo
Ma te pahono noa i na uiraa e piti, e nehenehe oe e oaoa ˈtu â e to hoa faaipoipo.
TE PAHONO RA TE BIBILIA
Eaha ta te Bibilia e parau ra no nia i te hoê tane e te hoê vahine o te faaea ma te ore e faaipoipo?
E horoa te Atua i te mau aratairaa no te ite e nafea ia oaoa i roto i te utuafare. Ia pee te mau taata i te mau faaueraa a te Atua, e oaoa iho â ratou.
TE PAHONO RA TE BIBILIA
Eaha te manaˈo o te Bibilia i te faaipoiporaa tane tane e vahine vahine?
O te Atua te tumu o te faaipoiporaa, o ˈna tei ite e nafea na hoa faaipoipo e tamau ai i te here e te oaoa i te tahi e te tahi.
