“Aita iho â oe e faaroo ia ˈu!” ta ta oe ïa vahine e parau. I roto râ ia oe, te manaˈo ra ïa oe “Oia hoi.” E au ra e, mea ê roa ta oe i taa i tei parauhia ˈtu. E tatamaˈi ïa te hopearaa.

E nafea râ ia ore te reira ia tupu faahou? Na mua, mea faufaa ia ite i te tumu i ore ai oe i taa i ta to hoa faaipoipo i parau atu noa ˈtu e no oe, te faaroo atura oe.

Tei te vahi ê to feruriraa e ua rohirohi atoa paha. Te tutuô ra te tamarii, mea puai te afata teata e te feruri ra oe i te fifi i tupu i te ohipa. I tera taime, paraparau mai nei ta oe vahine no te mau taata e haere atu i te fare i teie po. Aita paha oe i tâuˈa maitai i ta ˈna i parau, tairi noa ˈtu râ oe i to upoo no te faaite e te “e” atura oe! Ua faaroo mau anei râ oe i tei parauhia ˈtu? Aita paha.

E manaˈo ino oe. Te manaˈo ra oe e e ohipa to muri mai i te mau parau atoa a ta oe vahine. Ma te na reira, te faatupu ra ïa oe i te fifi. Ei hiˈoraa, ia parau atu oia: “Mea rahi te hora hau ta oe i rave i teie hebedoma.” Manaˈo ino aˈera oe ma te na ô: “Eaha, no ˈu ïa te hape? O oe hoi tera e hue noa ra ta tâua moni!” Pahono mai nei ta oe vahine ma te parau: “Aita hoi vau e faahapa ra ia oe!” Ta to hoa i hinaaro e parau i te omuaraa, ia tamǎrû ïa orua i teie hopea hebedoma, tia ra ˈtu ai.

Oioi noa oe i te imi i te ravea. Te na ô ra Marcie a: “I te tahi taime, ta ˈu noa e hinaaro, ia faaroo mai ïa Mike. E parau noa mai râ o ˈna e nafea ia faaafaro i te fifi. E ere tera ta ˈu e hinaaro, ia ite râ o ˈna i to ˈu mau manaˈo. Oti atu ai!” Te fifi râ, oioi noa Mike i te imi i te ravea, aita râ i faaroo maite i ta Marcie i parau.

Noa ˈtu eaha te fifi, e nafea ia faaroo maite?

A haapao maite i te parauhia ˈtura. Mea faufaa te parau ta ta oe vahine e hinaaro e faaite atu, ua ineine anei oe i te faaroo? Peneiaˈe, aita. I tera taime, te feruri ra paha oe i te tahi mea, eiaha ïa e faahua faaroo. Ia nehenehe, a vaiiho i te ohipa ta oe e rave ra e a faaroo atu. Eita anaˈe, a ani atu ia tiai maa taime iti.—Aratairaa Bibilia: Iakobo 1:19.

Ia paraparau te tahi, a faaroo atu. Eiaha e tâpû i te parau aore ra e faaite e aita oe e farii ra i to ˈna manaˈo. E tae iho â i te taime e nehenehe oe e paraparau. I tera râ taime, a faaroo noa.—Aratairaa Bibilia: Maseli 18:13.

A aniani atu. Ma te na reira e taa roa ˈi paha oe i ta to hoa faaipoipo i parau atu. Ua na ô Marcie tei faahitihia ˈtu na: “Mea au roa na ˈu ia aniani mai anaˈe Mike. E tapao faaite ïa e ua tâuˈa o ˈna i ta ˈu i parau atu.”

A feruri i ta ˈna i hinaaro e parau. A haapao i to ˈna huru, hohoˈa mata e toparaa reo. Ia ani atu oe eaha to ˈna huru, i te toparaa o to ˈna reo, e taa ia oe e mea maitai anei aore ra eita. Ia na ô atu o ˈna: “Aita roa oe e tauturu maira ia ˈu,” ta ˈna i hinaaro e parau, e au ra e no ˈna, aita oe e tâuˈa ra ia ˈna. Noa ˈtu e aita o ˈna i parau atu, tera râ te poroi ta ˈna e hinaaro ia taa oe. No reira, eiaha ïa e tatamaˈi no tei parauhia, e feruri râ i te auraa o tei parauhia.

A faaroo noa. A tâuˈa i te parauhia ˈtura e noa ˈtu e eita oe e au ra i te reira, eiaha e taie. E nafea oe ia faahapa ˈtu to hoa? Te na ô ra Gregory tei faaipoipohia hau atu e 60 matahiti: “A faaroo noa, a haapao maite i ta to hoa e parau atura. Te faaite ra ïa oe e taata paari oe. O oe iho â te maitai i muri aˈe.”—Aratairaa Bibilia: Maseli 18:15.

A tâuˈa mau i to hoa faaipoipo. Ia faaroo anaˈe oe, te faaite ra ïa oe i to here. Ia tâuˈa mau oe i to oe hoa, e hinaaro noa iho â ïa oe e faaroo i ta ˈna e parau. Ma te na reira, te pee ra ïa oe i teie aˈoraa a te Bibilia: “Eiaha hoi te taata atoa e haapao i ta ˈna anaˈe ihora, e haapao atoa râ i to vetahi ê ra maitai.”—Philipi 2:4.