E RAVE rahi te ore e tiaturi hanoa i ta ratou e taio e e faaroo i roto i te mau vea. E mea tano, papu e mau anei te poroi atoa i roto i te vea, afata teata e radio? I te Hau Amui i 2012, ua ravehia te hoê titorotororaa. E 6 i nia 10 tei pahono “eita” aore ra “eita roa ˈtu.” Mea tano anei tera nau manaˈo?

Mea rahi te taiete haaparare parau e papai vea tei faaî i te parau faaau e haamaramarama i te taata e e horoa atoa i te faatiaraa tano. No to muri nei râ mau tumu, e mea maitai ia feruri hou a tiaturi ai i te tahi poroi. E hiˈopoa anaˈe i te reira:

• E MANA TO VETAHI I NIA I TE TAIETE HAAPARARE PARAU. Noa ˈtu e mea iti ratou, e mana to te mau faatere taiete rahi i nia i te taiete haaparare parau. Na ratou ïa e faaoti teihea poroi e haaparare, e nafea e ehia taime e na reira ˈi. No te rahiraa taiete, e rave ratou i tera mau faaotiraa ia rahi noa mai te moni. Mai te peu e e haafifi te tahi poroi i te mau faatere taiete rahi, eita paha te reira e faaitehia.

• TE FEIA MANA. Te rahiraa o te parau i roto i te mau vea, no te feia mana ïa e ta ratou mau haaraa. E hinaaro hoi ratou ia turu atu te nunaa i ta ratou poritita e faatereraa. I te mea e e faaite te taiete haaparare parau i te poroi no nia ia ratou, e pinepine te mau papai vea i te farerei i to te faatereraa.

•  TE MAU POROI FAATIANIANIRAA. I te fenua e rave rahi, no te mau poroi faatianiani e rahi ai te moni e e tere noa ˈi te tahi taiete haaparare parau. I te Hau Amui, no reira mai e 50 e tae atu 60 i nia i te hanere te apî o te mau papai e matara i te avaˈe, e 80 i nia i te hanere no te vea e piahia i te mau mahana atoa e e 100 i nia i te hanere no te mau afata teata e radio. Eita te mau ona e rave i te parau faaau e te taiete haaparare parau e haafifi i te hooraa o ta ratou taoˈa a topatari atu ai ta ratou taiete. Ia ore vetahi e au i ta te tahi vea e haapuroro, e tuu ratou i te poroi faatianiani i te tahi atu taiete haaparare parau. No reira te tahi mau vea e faaoti ai i te faaore i te hoê poroi.

• E ERE I TE MEA PAPU. E ere te taatoaraa o te mau papai vea i te mea papu roa. Te hamani nei hoi vetahi i ta ratou iho faatiaraa. A tau matahiti aˈenei, ua hinaaro te tahi papai vea i Tapone e faaite e mea nafea te toˈa i ino ai i Okinawa. No te mea râ aita i itea ia ˈna i te haapapuraa, ua pata oia i te hohoˈa o te hoê toˈa ta ˈna iho i tuino. E nehenehe atoa e taui i te tahi mea i nia i te hohoˈa no te haavare i te taata. E faahuru-ê-hia na atoa te reira e te mau ravea apî no te faarahi i te tahi ohipa. E ere atura ïa i te mea ohie ia ite i te mau tauiraa i ravehia.

• TE FAATIAHIA. Noa ˈtu e mea mau te tahi faatiaraa, e nehenehe te poroi e taui i te huru aore ra manaˈo o te papai vea. Eaha te faaite e te ore e faatia? Ei hiˈoraa, ua pau paha te tahi pǔpǔ tue popo. Mea mau tera faaiteraa. E nehenehe râ te papai vea e faatia mai ta ˈna e hinaaro no te faataa i te tumu i pau ai ratou.

• TE ORE E FAAITEHIA. E pinepine te mau papai vea i te ore e faaite i te taatoaraa o te tahi tupuraa ia manaˈohia e e aamu maere mau tera. E nehenehe te tahi faatiaraa e haafaufaa-roa-hia area te tahi atu eita ïa. I te tahi taime, i roto i te afata teata e titauhia ia faaite i te tahi aamu taa ê i roto noa hoê minuti, e pinepine eita te mea faufaa roa e faaitehia.

•  E TATAˈURAA. No te rahi o te mau reni afata teata, e haapuroro vetahi taiete haaparare parau apî i te porotarama taa ê e anaanatae aˈe ia mataitai rahi te taata i te tahi reni i te tahi atu. Teie tei papaihia i roto i te buka Media Bias: “E tataˈuraa [to roto i te afata teata], e maitihia te mau hohoˈa ia maere aore ra ia huru ê te taata, e haapotohia te mau faatiaraa ia mataitai noa te taata” i tera reni.

• E HAPE RATOU. I te mea e taata te mau papai vea, ma te ore e haapao, e hape ratou i roto anei i te tarame, te papairaa i te tahi taˈo e te tuuraa i te toma. E nehenehe ïa te auraa o te poroi e taui roa. Aita atoa paha te reira i hiˈopoa-maitai-hia. Mea ohie roa hoi ia hape e te mau numera. No te ru, e pata paha te papai vea e 10 000 eiaha râ 100 000.

• TE MAU MANAˈO HAPE. E ere i te mea ohie ia horoa i te faatiaraa tano. E nehenehe te tahi manaˈo e fariihia i teie mahana e ananahi e riro ei mea hape. I manaˈohia na e o te mahana te haaati i te fenua. I teie nei râ, ua ite tatou e o te fenua te haaati i te mahana.

Eiaha e tiaturi hanoa i ta tatou e taio i roto i te mau vea, e ere râ te auraa e aita hoê aˈe parau papu. Hou râ a tiaturi ai i te reira, e mea tia ia haapao maitai.

Te na ô ra te Bibilia: “E ere anei na te tariˈa nei e faaroo i te huru o te parau, mai te vaha atoa nei e tamata i te huru o ta ˈna maa?” (Ioba 12:11) Teie te tahi manaˈo no te ite e mea papu anei te mau parau ta tatou e faaroo e e taio:

• NA VAI? Mea papu anei te feia rave ohipa o te taiete i faatia i tera parau? E faatiaraa tano aore ra maere noa anei to roto tera porotarama aore ra papai? Na vai te moni e faatere ra i tera taiete haaparare parau?

• NOHEA MAI? Te haapapu ra anei te mau maimiraa i tei parauhia? Hoê noa anei faatiaraa mai tera? E taata papu anei tei faatia i te parau? Te turu ra anei o ˈna i te tahi ohipa, faatereraa e te vai ra ˈtu â? No te hoê noa taata anei tera manaˈo aore ra no te rahiraa?

• NO TE AHA? A uiui: ‘No te haamaramarama anei aore ra no te faaanaanatae noa te poroi? No te turai anei ia hoo mai aore ra no te turu i te tahi ohipa?’

• MAI TE AHA TE HURU? Ua faaitehia anei te poroi ma te riri e no te faaino? Te turaihia ra ïa te taata ia patoi i te tahi ohipa ma te ore e ite mau i te tumu.

• MEA TANO ANEI? Te tuea ra anei te reira faatiaraa i to roto i te tahi atu mau vea aore ra papai? Ia ore, a haapao maitai!

• UA HOPE ANEI TE TAU? No teie nei anei te reira parau? E tano paha a 20 matahiti aˈenei eiaha râ i teie mahana. Mai te peu râ e mea apî, aita paha te taatoaraa o te faatiaraa e haamaramaramaraa i faaitehia.

E nehenehe anei e tiaturi i te mau poroi atoa? Auê te paari o te aˈoraa a Solomona, ua papai hoi: “Te faaroo ra te ite ore i te mau parau atoa ra; te hiˈo maitai ra râ te taata haapao ra i to ˈna taahiraa.”—Maseli 14:15.