TUMU PARAU MATAMUA | NO TE AHA E FAAOROMAI AI?
No te mea te vai ra te tauturu
“E huri i to outou atoa na ahoaho i nia [i te Atua], no te mea te tiai nei oia ia outou.”—PETERO 1, 5:7, Te Bibilia Moˈa V.C.J.S. (1976)
Aita anaˈe ta oe e ravea no te taui i to oe tupuraa, e manaˈo paha oe e mea maitai aˈe ia pohe. A hiˈo na râ i te nehenehe e tauturu ia oe.
Te pure. E ere teie i te ravea no te tamǎrû noa e no te tauturu i te feia o te ore e taa faahou e nafea ra. A pure ai, e nehenehe oe e faatupu i te taairaa e te Atua ra o Iehova o tei tâuˈa ra ia oe. Te hinaaro ra Iehova ia faaite atu oe i te haapeapea ra ia oe. Te faaitoito ra ïa te Bibilia ia “tuu oe i ta oe hopoia ia Iehova ra, e na ˈna oe e tauturu mai.”—Salamo 55:22.
No te aha e ore ai e pure i te Atua i teie mahana? A faahiti i to ˈna iˈoa, Iehova, e a haamahora i to aau. (Salamo 62:8) Te hinaaro ra Iehova e riro ei hoa no oe. (Isaia 55:6; Iakobo 2:23) E nehenehe oe e pure i te mau taime e vahi atoa.
Ia au i te pu arairaa no Marite no te feia e haapohe ia ratou, “e pinepine ua faaite te mau hiˈopoaraa e e 90 i nia i te hanere aore ra hau atu tei fifihia i te pae o te roro i te taime ratou i haapohe ai ia ratou. E pinepine, aita i itehia e e maˈi roro to tera taata, aita i farerei i te taote aore ra aita i rapaauhia”
Te feia e haapeapea ra no oe. Mea faufaa oe no e rave rahi, mai te mau melo o to oe utuafare aore ra te mau hoa tei faaite ê na i to ratou tâuˈa ia oe. I rotopu i tei haapeapea ra no oe, te vai atoa ra te feia ta oe i ore aˈenei i matau. I te tahi taime, e farerei te mau Ite no Iehova i te feia i hepohepo roa e tei opua e haapohe ia ratou. A haere ai i tera e tera fare, ua nehenehe te mau Ite no Iehova e tauturu i tera mau taata. Ma te pee i to Iesu hiˈoraa, te here mau nei te mau Ite no Iehova i to ratou taata tupu. Te haapeapea ra ratou no oe.—Ioane 13:35.
Te tauturu i te pae rapaauraa. E pinepine, ia hinaaro te tahi taata e haapohe ia ˈna, te vai ra te fifi i roto i to ˈna roro mai no te feia e hepohepo noa. Eiaha e manaˈo e no te mea e ere to oe tino te maˈihia ra, e mea haama roa ïa. Ua faaitehia hoi e e nehenehe te taata atoa e hepohepo roa. Te vai ra râ te ravea no te rapaau i te reira. a
A HAAMANAˈO: Ia hepohepo roa oe, e au e tei roto oe i te hoê apoo hohonu roa. Ma te farii ia tauturuhia oe, e nehenehe oe e haere mai i rapae i te reira.
TA OE E NEHENEHE E RAVE I TEIE MAHANA: A farerei i te hoê taote papu o te rapaau i te mau fifi rau o te maˈi roro, mai to te feia e hepohepo noa.
a Mai te peu e te puai e te pinepine noa ˈtura to oe hinaaro e haapohe ia oe, a ani i te tauturu, peneiaˈe ma te taniuniu i te tahi numera faataahia e te hoê taatiraa aore ra e te piha utuuturaa i te mau fifi rau o te maˈi roro. E mea faaineine-maitai-hia tera mau taata no te tauturu ia oe.
E au atoa outou . . .
A ARA MAI NA!
A faaoromai no te mea te vai ra te tiaturiraa
E nehenehe te tiaturiraa e tauturu ia oe ia faaoromai.
TE PAHONO RA TE BIBILIA
Ia pure au i te Atua e tauturu mai anei oia?
Te tâuˈa ra anei te Atua ia fifi tatou?
