TE IMI nei te mau aivanaa i te ravea maitai a‘e no te haaputu i te ito no roto mai i te mahana ia iti mai ta te taata faaohiparaa i te mori arahu. Ua parau te tahi aivanaa, “peneia‘e tei mua noa i to tatou mata te ravea.”

A hi‘o na: Ia mahanahana noa ratou i te tau toetoe, e tarai te mau pěpě i to ratou mau pererau i te mahana. Mea faahiahia mau te pererau o vetahi mau pěpě, e nehenehe hoi te reira e haaputu i te ito no roto mai i te mahana. Eaha te tumu? Mea ereere e taa ê te hamaniraa o to ratou mau pererau. Ia faaohipahia te tahi matini no te hi‘o i te tao‘a nainai roa, e itehia e e au te hamaniraa o te pererau o te pěpě i te ofaaraa manu meli. Maoti te mau area o te reira e faahaerehia ’i te mori o te mahana i roto i te vahi apoopoo. No tera hamaniraa faahiahia, e nehenehe te pěpě e haaputu i te ito no roto mai i te mahana. E ereere roa to ’na nau pererau e ma te maere, e mahanahana noa atoa oia.

Ua papaihia i roto i te tahi vea na te mau aivanaa, “tei roto te hamaniraa o te mau pererau o te pěpě i te mau faanahoraa faahiahia roa ’‘e o te natura. Ua turai râ te reira i te feia îite ia hamani i te tahi ravea apî ia rahi atu â te ito e noaa mai i te faaohiparaa i te pape e te mahana. A muri a‘e, tera te mono i te mori arahu, eita hoi te natura e viivii.” (Science Daily) E tano atoa tera ravea no te hamani i te matini hi‘opoaraa e haaputuraa i te ito no roto mai i te mahana.

Eaha to oe mana‘o? Mea tupu noa anei te hamaniraa o te pererau haaputu ito o te pěpě aore ra mea poietehia?