ARATAIRAA BIBILIA: “E faahope te maamaa i to ˈna manaˈo i rapae; area te taata paari e tapeapea ïa e ia maoro iti aˈe.”—Maseli 29:11.

TE MAU MAITAI: Eita e nehenehe e papai pauroa ˈtu. E maitaihia râ to tatou ea i te faaoromai. Te parau ra te Bibilia: “Tei te maˈi ore to te aau, o to te tino ïa ora.” Te na ô atoa ra: “E maitai to te aau rearea mai te raau maˈi atoa ra.” (Maseli 14:30; 17:22) Ia au i te tahi mau maimiraa, o te feia riri hanoa e te ino te roohia i te maˈi, te maˈi mafatu iho â râ. E ere râ tera anaˈe te maitai o te faaoromai!

E 30 tiahapa matahiti to Cassius i teie nei. Te haamanaˈo ra oia: “E taata iria, riri hanoa e imi peapea vau na mua ˈˈe. E ere atoa i te mea tâuˈa roa i to ˈu huru. Ua taui roa râ a haapao ai au i te mau aratairaa Bibilia. Ua haapii au i te haavî ia ˈu iho, te faaite i te haehaa e te faaore oioi i te hapa a vetahi ê. Ahiri aita, tei roto vau i te fare tapearaa aore ra ua pohe au i teie nei!”