Te ani atura ta oe tamarii e ono matahiti: “E pohe anei oe hoê mahana?” Ua maere oe i ta ˈna uiraa e ua feruri: ‘E taa anei ta ˈu tamarii ia faataa ˈtu vau? Nafea ia paraparau ia ˈna no nia i te pohe?’

Ua ite te tamarii i te parau o te pohe. I roto vetahi mau hautiraa, e haavare pohe te tahi taata. No reira, eiaha ia taiâ i te aparau no nia i tera tumu parau e te pahono i te mau uiraa atoa a to tamarii. Ma te na reira, te tauturu ra oe ia ˈna ia ite nafea ia faaoromai ia pohe tei herehia.

Eita to tamarii e riaria ia aparau oe ia ˈna no nia i te pohe. Ua hape anaˈe râ to ˈna manaˈo, e titauhia ia faataa maitai i te parau mau. Ua na ô vetahi feia îite e manaˈo e rave rahi tamarii i raro aˈe ono matahiti e tamau noa te feia pohe i te ora. I roto i ta ratou mau hauti, ua pohe anaˈe hoê tamarii, e ora faahou mai oia i muri aˈe.

Ia paari rii aˈe ratou, e haamata te tamarii i te taa mea mauiui mau ia pohe te taata. Mea rahi ïa ta ratou uiraa, haapeapearaa peneiaˈe atoa e mǎtaˈu ratou, ia pohe iho â râ tei herehia. Mea faufaa roa ïa ia aparau no nia i te reira? Te faaite ra te taote i te pae feruriraa o Marion Haza te iˈoa: “Ia ite te tamarii eita e nehenehe e aparau no nia tera tumu parau i te fare, e riaria o ˈna i te pohe.”

Eiaha e haapeapea roa ino no nia i ta oe e parau. Ia au i te tahi hiˈopoaraa, e hinaaro noa te tamarii ia “faaitehia ˈtu te parau mau ma te mǎrû.” Ua ui anaˈe atu ta oe tamarii, ua ineine ïa oia i te faaroo i te pahonoraa.

A aparau no nia i te pohe ia au i te tupuraa. Ia ite to tamarii ua pohe hoê manu i te pae purumu aore ra hoê animara ta outou i faaamu, a faaohipa i te mau uiraa ohie no te faaitoito ia ˈna ia faaite i to ˈna manaˈo. Ei hiˈoraa, e ani paha oe: “Te mauiui ra anei tera animara? Te toetoe aore ra te poia ra anei oia? Nafea ia ite ua pohe iho â te animara aore ra taata?”—Aratairaa Bibilia: Koheleta 3:1, 7.

A faaite i te parau mau. Ia pohe hoê taata ta outou i matau aore ra fetii, eiaha e faahiti i te mau parau mai teie te huru: “Ua haere oia.” E manaˈo paha te tamarii e hoˈi mai oia i te fare. A faaohipa i te mau parau ohie ia taa e eiaha e haavare atu. E na ô paha oe: “I to mama ruau poheraa, ua faaea o ˈna i te huti i to ˈna aho. Eita e nehenehe faahou e paraparau ia ˈna, eita râ o ˈna e moehia e tatou.”—Aratairaa Bibilia: Ephesia 4:25.

A tamahanahana i ta oe tamarii. E manaˈo paha oia e o ˈna te tumu i pohe ai te taata. Eiaha e pahono noa: “E ere oe te tumu.” A ui atu râ: “No te aha oe e manaˈo ai mai tera?” A faaroo maitai i ta ˈna pahonoraa, eiaha e haafaufaa ore i ta ˈna e faaite atu no nia i to ˈna huru. I te mea e nehenehe te tamarii e manaˈo e pohe atoa te tahi atu, a tamahanahana ia ˈna ma te parau eita o ˈna e faaruehia e to ˈna utuafare.

A turai i to tamarii ia paraparau. Eiaha e taiâ i te paraparau no te mau taata herehia tei pohe noa ˈtu aita oia i farerei aˈenei ia ratou. E faahiti paha oe ta oe e haamanaˈo ra no nia i te tahi fetii piri e e faatia atoa paha i te tahi mau ohipa arearea no nia ia ratou. E taa to tamarii aita i anihia eiaha ia aparau aore ra ia manaˈo ia ratou. Ia ore râ o ˈna ia hinaaro ia paraparau, e nehenehe e faataa i te tahi atu taime no te na reira. E ite iho â oe eaha te taime maitai aˈe no ˈna.—Aratairaa Bibilia: Maseli 20:5.