TA TE TAATA E PARAU RA

No te taata e rave rahi, tae noa ˈtu te feia haapaoraa ta ratou, ua riro te haavîraa uˈana ei ravea tano no te patoi i tei faatupu i te peapea. E mirioni tei farii e faaanaanataeraa au mau te mau porotarama e hohoˈa teata o te faaite i te haavîraa uˈana.

TA TE BIBILIA E PARAU RA

I pihaiiho i te oire no Mossoul, i te pae apatoerau o Irakia, te tia noa ra te mau huˈahuˈa o te oire rahi tahito Nineve, te oire pu ruperupe o te Hau emepera Asura. I tera ra tau, ua tohu te Bibilia e faariro te Atua “ia Nineve ei oire pau.” (Zephania 2:13) Ua parau te Atua: “E faariro [vau] ia oe ei hiˈoraa.” No te aha? E oire Nineve tei “viivii i te toto.” (Nahuma 1:1; 3:1, 6) Ia au i te Salamo 5:6, mea au ore roa na te Atua i te haavîraa uˈana mai ‘te taparahiraa taata.’ Te faaite ra te mau huˈahuˈa o Nineve ua faatupu te Atua i ta ˈna i parau.

Na te enemi rahi o te Atua e o te taata i faatupu i te haavîraa uˈana i te haamataraa, oia hoi Satani te Diabolo, ta Iesu Mesia i pii te “taparahi taata.” (Ioane 8:44) I te mea “te vai noa nei to te ao atoa i raro aˈe i taua varua ino ra,” te itehia ra to ˈna huru i nia i te haerea o te rahiraa o te taata i mua i te haavîraa uˈana. No reira te ao e au roa ˈi i te mau porotarama e hohoˈa teata o te faaite i te haavîraa uˈana. (Ioane 1, 5:19) No te faaoaoa i te Atua, e mea tia ia haapii i te au ore i te reira e te hinaaro i ta te Atua e au ra. a E nehenehe anei?

“Te rave parau ino ra, ua riri roa [to Iehova] aau ia ˈna.”—Salamo 11:5.

TA TE TAATA E PARAU RA

Mai tera iho â te huru o te taata, eita te reira e taui.

TA TE BIBILIA E PARAU RA

E haapae i “te riri, te tairoiro, te feii, te faaino, e te parau tiaâ.” Te parau atoa ra: “Haapae hoi outou i te taata tahito e ta ˈna atoa ra mau parau; e ua faa-taata-apî.” (Kolosa 3:8-10) Mea fifi roa anei ia rave i ta te Atua e ani mai ra? E ere. E nehenehe te taata e taui. b E nafea?

E tia na mua ia haapii o vai mau te Atua. (Kolosa 3:10) Ia ite hoê taata aau tae i te  mau huru maitatai o to tatou Atua poiete e ta ˈna mau aratairaa, e here o ˈna i te Atua a hinaaro atu ai e faaoaoa ia ˈna.—Ioane 1, 5:3.

Te piti, e maiti maitai i ta tatou mau amuimuiraa. “Eiaha e faataua ˈtu i te taata iria; e eiaha e faaau atoa ˈtu i te haerea o te taata riri noa ra; o te haapii atoa ˈtu hoi oe i ta ˈna parau, e fifi ihora to aau i te marei.”—Maseli 22:24, 25.

Te toru, e tia ia feruri na mua ˈˈe a haa ˈtu ai. E faatupu te taata i te haavîraa uˈana no to ˈna paruparu i te haavî ia ˈna. Area te taata hau, mea puai ïa, e noaa hoi ia ˈna te faaoromai. Te na ô ra te Maseli 16:32: “Tei ore e ru i te riri ra e maitai rahi to ˈna i to te feia puai.”

“E tapi i te hau i te taata atoa nei.”—Hebera 12:14.

TA TE TAATA E PARAU RA

Mai te tau e te tau mai â te haavîraa uˈana e eita e taui.

TA TE BIBILIA E PARAU RA

“No parahirahi aˈe te paieti ore, e aita ra . . . Area te feia mǎrû ra, e parahi ïa i te fenua, e oaoa ratou i te rahi o te hau.” (Salamo 37:10, 11) No te faaora i te feia mǎrû e te hau, e haamou te Atua i te feia mea au na ratou te haavîraa uˈana, mai ia Nineve i tahito. Ia oti, eita roa ˈtu te haavîraa uˈana e haafifi faahou i te hau o te fenua.—Salamo 72:7.

E imi anaˈe ïa i teie nei â i te farii maitai a te Atua ma te faatupu i te hau. Te na ô ra te Petero 2, 3:9: “E faaoromai rahi râ to [Iehova] ia tatou, aita roa i hinaaro e ia pohe atu te hoê, ia noaa paatoa râ te tatarahapa.”

“E tiapai ratou i ta ratou ˈoˈe ei auri arote, e ta ratou mau mahae ei tipi tope raau.”—Isaia 2:4.