TA TE TAATA E PARAU RA

No te tahi mau nunaa taata, e ere i te mea ino ia faaturi na hoa faaipoipo, te tane iho â râ. No te tahi atu, e ere te faaipoiporaa i te tahi taairaa e vai maoro.

TA TE BIBILIA E PARAU RA

I roto i te Bibilia, e faaturi ia taoto hoê o na hoa faaipoipo e te tahi atu tane aore ra vahine. (Ioba 24:15; Maseli 30:20) Mea au ore roa na Iehova tera peu. I Iseraela i tahito, e haapohehia te taata faaturi. (Levitiko 18:20, 22, 29) Ua haapii Iesu i ta ˈna mau pǐpǐ eiaha roa e faaturi.—Mataio 5:27, 28; Luka 18:18-20.

TE FAUFAARAA IA ITE

Eita te feia faaturi e haapao i ta ratou euhe i to ratou apiti a faaipoipo ai. Ua hara atoa ratou i te Atua. (Genese 39:7-9) E faataa ê mau te faaturi i te mau tamarii i to ratou metua. E te faaara atoa ra te Bibilia e ‘e haava te Atua i te faaturi.’—Hebera 13:4.

“Ia haamaitaihia te faaipoiporaa i te taata atoa ra, e te viivii ore hoi te roi.”—Hebera 13:4.

TA TE BIBILIA E PARAU RA

Te faatia ra te Bibilia i te feia faaipoipo ia faataa ia rave to ˈna apiti i te peu faufau. (Mataio 19:9) Te auraa, na te hoa faaipoipo hapa ore e faaoti e faaea noa anei o ˈna i to ˈna apiti tei faaturi aore ra e faataa ia ˈna. Na ˈna iho e rave i tera faaotiraa.—Galatia 6:5.

I te aro râ o te Atua, e taairaa moˈa te faaipoiporaa o te hope ia pohe hoê. (Korinetia 1, 7:39) Mea au ore roa na te Atua ia faataa te tahi no te mau tumu iti haihai. Ei hiˈoraa, aita anaˈe o ˈna i mauruuru i to ˈna apiti. E ere ïa te faataaraa i te ohipa hauti.—Malaki 2:16; Mataio 19:3-6.

“Te parau atu nei râ vau ia outou. O te haapae noa i tana vahine e ere i to te faaturi, ua faariro ïa oia ia ˈna ei faaturi.”—Mataio 5:32.

TA TE BIBILIA E PARAU RA

E. Te parau ra te Bibilia ua faaore te Atua i te hara a te feia i tatarahapa e tei fariu ê mai i ta ratou mau hara mai te faaturi. (Ohipa 3:19; Galatia 5:19-21) Te faahiti ra te Bibilia no vetahi tane e vahine tei faaea i tera peu e tei riro ei hoa no te Atua i muri aˈe.—Korinetia 1, 6:9-11.

Ua faaite te Atua i to ˈna hamani maitai i nia i te arii o Iseraela i tahito ra o Davida. Ua faaturi o ˈna e te vahine faaipoipo a te hoê faehau o to ˈna nuu. (Samuela 2, 11:2-4) Te parau maitai ra te Bibilia e “taua mea i ravehia e Davida ra, e mea ino ïa i mua i te mata” o te Atua. (Samuela 2, 11:27) I te aˈoraahia o ˈna, ua tatarahapa Davida e ua faaore te Atua i ta ˈna hara. E mauiui râ Davida i te mau faahopearaa peapea mau o ta ˈna i rave. (Samuela 2, 12:13, 14) Ua haapapu iho â te arii î i te paari ra o Solomona i muri aˈe: “O tei moiheuo [aore ra faaturi] râ, e maamaa rahi ïa.”—Maseli 6:32.

EAHA TE RAVE?

Mai te peu ua faaturi oe, a ani i te Atua e to hoa faaipoipo ia faaore i ta oe hara. (Salamo 51:1-5) Ia au ore oe i te faaturi mai te Atua. (Salamo 97:10) A faaoti papu eiaha e hiˈo i te hohoˈa faufau, e manaˈo noa i te mau peu faufau, e faahinaaro i te tahi atu taata aore ra e rave i te tahi atu mau mea o te turai ia oe ia faaturi.—Mataio 5:27, 28; Iakobo 1:14, 15.

Mai te peu ua faaturi to apiti, ia papu ia oe te taa ra te Atua i to oe huru. (Malaki 2:13, 14) A ani ia ˈna i te tamahanahanaraa, aratairaa e “na ˈna oe e tauturu mai.” (Salamo 55:22) Ia faaoti oe e faaore i te hara a to hoa faaipoipo e e ore e faataa, e titauhia ia tutava orua toopiti ia maitai faahou to orua taairaa.—Ephesia 4:32.

Ua parau te peropheta Natana ia Davida, tei tatarahapa i muri aˈe i te faaturiraa: “Ua faataa-ê-hia e Iehova ta oe hara.”—Samuela 2, 12:13.