TE TUPU RA I TEIE MAHANA

Ua rahi roa te feia na te ao o te hiˈo ino i te taata e te uˈana noa ˈtura. Te tumu, te manaˈo ino i te tahi nunaa taata e ta ratou mau peu, te here aiˈa, te faateiteiraa i te tahi pǔpǔ taata e te mau haapaoraa etaeta roa.

TA TE BIBILIA E PARAU RA

I roto i ta ˈna ohipa pororaa, ua haaatihia Iesu Mesia i te mau ati Iuda e Samaria o tei hiˈo ino te tahi e te tahi. (Ioane 4:9) E haafaufaa-ore-hia na te mau vahine i te tane. Mea hiˈo ino atoa te mau tia haapaoraa ati Iuda i te feia riirii. (Ioane 7:49) Mea ê roa râ te huru o Iesu Mesia. Ua parau to ˈna mau enemi no ˈna: “Te ite nei teie nei taata i te feia rave hara, e te amu atoa nei i ta ratou amuraa.” (Luka 15:2) Mea hamani maitai, faaoromai e faatura Iesu i te mau taata atoa. Aita oia i haava ˈtu, ua tauturu râ ia ratou ia ite o vai te Atua. No to ˈna here oia i na reira ˈi.—Ioane 3:17; 13:34.

Na te here e tauturu mai ia ore ia hiˈo ino e ia farii maitai i te taata atoa noa ˈtu to ratou huru e taa-ê-raa. Te na ô ra te Kolosa 3:13: “E faaoromai te tahi i te tahi, e e faaore te tahi i ta te tahi hapa, ia pariraahia ta te tahi i te tahi.”

“O te aroha, ia uˈana maite ïa ia outou outou iho: e moe hoi te hapa e rave rahi i te aroha.”—Petero 1, 4:8.

TE TUPU RA

E rave rahi nunaa taata o tei haamau i te mau ture e faatureraa. Ua matau ïa te taata e otia tano noa te tia ia haapao.

TA TE BIBILIA E PARAU RA

“Eita [te here] e rave i te mea au ore.” (Korinetia 1, 13:5) Ua horoa mai Iesu i te hiˈoraa. Noa ˈtu aita Iesu i hiˈo ino i te taata, aita oia i farii i te peu au ore, te huru haavarevare e te tahi atu mau haerea iino. Aita oia i taiâ i te faautua i te reira. (Mataio 23:13) Ua na ô oia: “O tei mau i te parau ino ra, aore oia i hinaaro i te maramarama [o te parau mau].”—Ioane 3:20.

Ei Kerisetiano, ua papai te aposetolo Paulo: “Ia riaria i te ino; ia ati atu i te maitai.” (Roma 12:9) Ua ora oia ia au i tera mau parau. Ei hiˈoraa, ua faataa ê vetahi Kerisetiano ati Iuda ia ratou i te mau hoa faaroo no te mau nunaa ê. Ei ati Iuda atoa hoi, ua faaite Paulo ma te papu e ma te mǎrû atoa i to ˈna manaˈo. (Galatia 2:11-14) Ua ite oia e farii te Atua i te mau huru taata atoa, eita ïa oia e hinaaro ia hiˈo ino te tahi i te tahi i roto i to ˈNa nunaa.—Ohipa 10:34.

Ei Kerisetiano, e hiˈopoa te mau Ite no Iehova i te Bibilia no te aratai i to ratou oraraa. (Isaia 33:22) No reira, eita ratou e vaiiho i tei rave i te hara ia faaea noa i rotopu ia ratou. Eiaha te amuiraa Kerisetiano ia viivii i te feia o te ore e haapao i te mau faaueraa a te Atua. E haapao ïa te mau Ite no Iehova i te faaueraa papu: “E faataa ê atu outou i taua taata parau ino i roto ia outou.”—Korinetia 1, 5:11-13.

“O outou o tei hinaaro ia Iehova ra, ia riaria outou i te ino.”—Salamo 97:10.

TE MANAˈO O TE RAHIRAA

E ite-noa-hia te ino no te huru o te taata.

TA TE BIBILIA E PARAU RA

Ua pure te peropheta Habakuka i te Atua ra o Iehova ma te na ô: “Eaha ra . . . ia hiˈo hoi au i te oto ra? te vai nei hoi te haru e te rave aroha ore i mua ia ˈu nei: e te vai nei hoi te feia e faatupu i te mârô e te tamaˈi.” (Habakuka 1:3) Aita te Atua i huna i te parau mau i ta ˈna peropheta o tei haapeapea. Ua haapapu atu oia ia ˈna e faautuahia te feia e rave i te ino. E parau fafau tera o te “tae mau mai” e ua faaite te Atua “e ore e haamaoro hua.”—Habakuka 2:3.

E nehenehe râ te feia i rave i te hara e taui. Ua papaihia i roto i te Bibilia: “Huru mauruuru iti aˈe anei to ˈu i te pohe o te taata ino, te na reira maira te Fatu ra o Iehova? e eiaha oia ia fariu mai i tana eˈa ia ora?” (Ezekiela 18:23) E nehenehe te feia e imi ia Iehova ma te faaea i te rave i te ino e fanaˈo i te hoê oraraa papu a muri aˈe. Te na ô ra te Maseli 1:33: “O tei faaroo mai râ ia ˈu ra, e parahi noa ïa ma te ora, e faaea noa oia ma te mǎtaˈu ore i te ino.”

“No parahirahi aˈe te paieti ore, e aita ra . . . Te feia mǎrû ra, e parahi ïa i te fenua, e oaoa ratou i te rahi o te hau ra.”—Salamo 37:10, 11.