IA AU I TE BIBILIA
Te veve
E mirioni te ora ra i roto i te veve na te ao noa ˈtu te mau tutavaraa maitai no te faaore i tera fifi.
E nafea te feia veve ia oaoa?
TA TE TAATA E PARAU RA
E rave rahi te tiaturi e itehia te oaoa ia rahi te moni i roto i to oe pute e ia pue te taoˈa. Te manaˈo ra te feia veve eita ratou e oaoa i te hoê mahana. Eaha te tumu? Eita aore ra mea iti roa i rotopu ia ratou tei haere i te haapiiraa, te fanaˈo i te rapaauraa maitai e te tahi atu mau faufaa.
TA TE BIBILIA E PARAU RA
Te haapii ra te Parau a te Atua e oaoa te taata no te mea e auhoaraa maitai to ˈna e te Atua, eiaha râ no te rahi o ta ˈna moni. Te na ô ra te Bibilia: “O tei faaroo â e ua haapao i te parau a te Atua, o ratou tei maitai.” (Luka 11:28) E imi te feia mai tera i te manaˈo o te Atua, mea rahi anei ta ratou moni aore ra eita. E haapii ratou i te pue parau mau Bibilia o te tamahanahana e te tauturu ia vai hau. I reira te taata e oaoa ˈi.
E tia i te feia i taa e i haapao i te aˈoraa Bibilia ia faaruru maitai aˈe i te veve. Te aˈo ra hoi te Bibilia ia haapae i te mau peu iino mai te puhipuhiraa avaava e te inu-rahi-raa i te ava. E pau te moni no te mau peu mai tera e no te rapaau i te mau maˈi e tupu i muri aˈe.—Maseli 20:1; Korinetia 2, 7:1.
Te faaara atoa ra te Bibilia i te mau fifi atâta ta te nounou e te hinaaro mâha ore i te taoˈa e faatupu. (Mareko 4:19; Ephesia 5:3) E tauturu tera aˈoraa ia haapae i te pere moni aore ra te “nounou moni.” Ia au i te Bibilia, tera hoi “te tumu o te mau ino atoa.” (Timoteo 1, 6:10) Te faaara ra te mau Papai: “Rahi noa iho hoi ta te taata nei taoˈa, e ere hoi tei taua taoˈa na ˈna ra to ˈna ora.” (Luka 12:15) Te auraa, eita e nehenehe e hoo mai i te ora. Ma te haapao râ i te aˈoraa Bibilia, e ite te taata i te oaoa mau.
E ere iho â i te mea ohie no te feia veve ia hoo mai i te maa, te ahu e te fare. E nehenehe râ ratou e oaoa ma te mauruuru i te mea iti, ma te rave i te mau ohipa auhia e te Atua poiete, oia atoa to ˈna hinaaro. E ite mau ratou i te tupuraa o te parau fafau Bibilia: “Na Iehova te maitai i taoˈahia ˈi te [taata] taoˈa; e ore hoi e apiti-atoa-hia mai te ino i te reira.”—Maseli 10:22.
IRAVA FAUFAA: “O tei faaroo â e ua haapao i te parau a te Atua, o ratou tei maitai.”—Luka 11:28.
E faaorehia anei te veve i te hoê mahana?
TA TE BIBILIA E PARAU RA
Aita i tia i te taata ia faaore i te veve. I te hoê râ mahana, e faaafaro te Atua i tera fifi ma te faaore te hinaaro tia ore o te taata e to te mau faatereraa ia imi i to ratou anaˈe maitai. Na tera hoi i faatupu i te veve. (Koheleta 8:9) E mono te Atua poiete i te mau faatereraa a te taata arataihia e te miimii. E horoa noa te Basileia, aore ra ta ˈna faatereraa i te raˈi, i te hinaarohia ma te ore e hiˈo i te taata. Te fafau maitai ra te Bibilia e haamâha te Arii o te Basileia o te Atua i te hinaaro atoa o te feia veve. “O tei veve ra e ua tiaoro maira, na ˈna ïa e faaora . . . E faaherehere oia i tei paruparu ra e tei veve, e faaora hoi oia i te feia taoˈa ore ra.”—Salamo 72:12-14.
E riro mau te fenua ei paradaiso e e fanaˈo te taatoaraa i te hoê fare e te maa. E faaore-roa-hia te veve. I roto i te Bibilia, te fafau ra te Atua no to ˈna nunaa, “e patu ratou i te fare, e na ratou e parahi, e e tanu ratou i te ô vine, e na ratou iho e amui tana maâ. . . . E te mau ohipa a to ratou rima e vai maoro noaˈtu ïa.” (Isaia 65:21, 22; Te Bibilia Moˈa V.C.J.S., 1976) Eita ratou e rohirohi faahou i te imi-noa-raa i te ora. E oaoa râ te taata atoa i “te oroa amuraa maa maitatai” e te tahi atu mau haamaitairaa no ǒ mai ia Iehova.—Isaia 25:6.
TE FAUFAARAA IA ITE
E tamahanahanahia te feia veve ia ite i ta te Atua parau fafau ia faaore roa i te veve. E haapapu te reira te tâuˈa mai ra te Atua ia ratou e ua fatata roa te hopea o to ratou mau fifi. E itoitohia te taata i tera tiaturiraa no te faaoromai i te fifi i teie mahana.
IRAVA FAUFAA: “O tei veve ra e ua tiaoro maira, na ˈna ïa e faaora. . . . E faaherehere oia i tei paruparu ra e tei veve, e faaora hoi oia i te feia taoˈa ore ra.”—Salamo 72:12, 13.
