IA AU I TE BIBILIA
Mea tupu noa te mau mea
E parau vetahi, mea tupu noa mai te mau mea mai tera. Area te tahi atu, te tiaturi ra na te Atua noa i haamata i te poiete e muri iho, ua vaiiho i te mau mea ia tauiui. Eaha ta te Bibilia e parau ra?
Mea tupu noa mai anei te ao nui i te paainaraa te tahi mea i roto i te reva?
Teie noa ta te Bibilia e parau ra: “Hamani ihora te Atua i te raˈi e te fenua i te matamua ra.” (Genese 1:1) Aita i faataahia mea nafea te Atua i te poieteraa i te mau mea atoa. Ia au i tei parauhia i roto i te Bibilia, e ere i te mea hape ia tiaturi, ua fa mai te ao nui no te mea ua paaina paha te tahi mea i roto i te reva. Tera râ, te faaite noa ra te Genese 1:1 na vai i faatupu i tera ohipa.
Te tiaturi mau ra e rave rahi aivanaa, ua paaina taue noa te tahi mea i roto i te reva. I muri aˈe i te hoê tau, na te mau huˈahuˈa i faanaho ia ratou iho no te riro mai ei fetia e ei paraneta. Mea hape râ tera manaˈo. Ia au i ta te Bibilia e parau ra, na te Atua i hamani i te ao nui, noa ˈtu ua haapaaina oia i te tahi mea aore ra ua faaohipa i te tahi atu ravea.
“Hamani ihora te Atua i te raˈi e te fenua i te matamua ra.”—Genese 1:1.
Te parau ra anei te Bibilia e riro mai hoê animara ei animara ê i te roaraa o te tau?
Aita. Te na ô ra te Bibilia ua hamani te Atua i te mau raau e animara atoa “ma to ratou ra huru.” (Genese 1:11, 12, 21, 24, 25) E nehenehe anei te tahi mau tauiuiraa e tupu i roto hoê huru animara aore ra raau? E. Ia itehia te reira, te auraa anei ua fa mai hoê huru animara apî? E ere.
A hiˈo na i te mau maimiraa i ravehia no te hoê manu haihai i te mau motu Galapagos i 1970. No te tauiraa o te reva na tera mau vahi, ua itehia ua aano rii te utu o tera manu. Ua parau vetahi e haapapuraa tera no te haapiiraa e tauiui te mau mea i te roaraa o te tau. Tera iho â anei? Tau matahiti i muri aˈe, ua fa faahou mai tera huru manu e te utu haihai aˈe e ua maraa roa to ratou numera i ǒ. E aivanaa Jeffrey Schwartz o te hiˈopoa i te huru o te taata i te roaraa o te tau. Maoti tera maimiraa, ua farii oia e nehenehe te tahi huru animara e taui rii i mua i te tahi tupuraa, “e ere râ te auraa ua fa mai hoê huru animara apî.”
Mea tano anei ia parau mea tupu noa mai te mau mea?
Te parau ra te Bibilia “na [te Atua] hoi i hamani i te mau mea atoa nei.” (Apokalupo 4:11) Aita oia i “faaea” na mua ˈˈe ia oti ta ˈna ohipa poieteraa. (Genese 2:2) Eaha te auraa? Aita te Atua i hamani hoê taoˈa haihai a tiai atu ai ia tauiui te reira. E i muri aˈe mirioni matahiti, ua fa mai e rave rau huru iˈa, urî taata e te pae hopea, te taata. a Ia au i tera haapiiraa, e ere na te Atua poiete i “[hamani] i te raˈi e te fenua, e te tai, e te mau mea atoa i roto” mai ta te Bibilia e parau ra.—Exodo 20:11; Apokalupo 10:6.
“E au te hanahana ia oe, e te Fatu, e te tura, e te mana, na oe hoi i hamani i te mau mea atoa nei.”—Apokalupo 4:11.
No te ite atu â: Te parau ra te Bibilia no te Atua: “Te mau mea hoi no ˈna [aore ra to ˈna mau huru maitatai] e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao.” (Roma 1:20) E oaoa mau te taata ia haapii ratou o vai te Atua. E opuaraa î i te here hoi ta ˈna no te feia atoa e imi ia ˈna ma te aau tae. (Koheleta 12:13; Hebera 11:6) No te ite atu â, a hiˈo i nia www.pr418.com aore ra a farerei i te mau Ite no Iehova. A pata i nia NO NIA IA MATOU > HAAPIIRAA BIBILIA.
a Aita te Bibilia e haapii ra ua hamani te Atua i te fenua e ono mahana 24 hora. No te ite atu â, a hiˈo i te api 24-27 o te buka rairai La vie a-t-elle été créée? Na te mau Ite no Iehova i pia i tera papai e e nehenehe atoa e rave mai i nia www.pr418.com.
E au atoa outou . . .
TUMU PARAU RAU
Mea nafea te ora i te faraa mai?
No e rave rahi taata tei haere i te haapiiraa teitei, oia atoa no e rave rahi aivanaa, mea papu ore te manaˈo e ua tupu noa mai te mau mea atoa.
TE IHI E TE BIBILIA
Manaˈo no nia i te tumu o te ora
Hiˈo na i te manaˈo o e rave rahi, tae noa ˈtu o te mau aivanaa i te pae o te ihiora, no nia i te tumu o te ora a faaau ai ratou i ta ratou i ite mai i ta te Bibilia e parau.
