1. (a) No te aha e tano ai ia faatura tatou i te tahi mau taata? (b) Eaha ta tatou e haapii mai i roto i teie tumu parau?

 E NAFEA tatou ia faatura i te taata? Ma te haafaufaa rahi ia ratou e ma te faaite atu i te tura. E pinepine, e faatura tatou i te feia o tei rave i te hoê ohipa e tano atu ai ia ratou te tura. Oia atoa i te feia e hopoia faufaa ta ratou aore ra e tiaraa teitei to ratou. I roto i teie tumu parau, e haapii mai tatou o vai ta tatou e faatura e no te aha.

2, 3. (a) No te aha mea tano iho â ia faahanahanahia Iehova? (A hiˈo i te hohoˈa matamua.) (b) O vai te Arenio tei faahitihia i roto i te Apokalupo 5:13, e no te aha mea tano ia faahanahanahia o ˈna?

² Te parau ra te Apokalupo 5:13 e mea tano ia faahanahanahia “tei parahi i nia iho i te terono” e “te Arenio.” “Tei parahi i nia iho i te terono,” o Iehova ïa. I roto i te Apokalupo pene 4, te horoa mai ra te mau mea ora i te raˈi i te hoê tumu no te aha mea tano ia faahanahana tatou ia Iehova “o te ora e a muri noa ˈtu.” Te parau ra ratou: “E au te hanahana ia oe, e te Fatu [Iehova], e te tura, e te mana, na oe hoi  i hamani i te mau mea atoa nei, e no to oe hinaaro i mau ai, e i hamanihia ˈi ratou.”—Apo. 4:9-11.

³ “Te Arenio” i faahitihia i roto i te Apokalupo 5:13, o Iesu Mesia ïa. Mea nafea tatou i ite ai? I te fenua nei, ua piihia Iesu “te Arenio a te Atua, o tei hopoi ê atu i te hara o te ao.” (Ioa. 1:29) O vai te arii o tei ineine i te horoa i to ˈna ora no to ˈna mau taata? E tumu tano teie no te faahanahana ia ˈna. Mea tano ia faahanahana ia Iesu, o ˈna “te Arii o te hui arii, e te Fatu o te mau fatu ra.” (Tim. 1, 6:14-16) Peneiaˈe te tuea ra to oe manaˈo i to te mau mea ora i te raˈi o tei himene: “E au te Arenio taparahihia ra e, ei ia ˈna te mana e te taoˈa rahi, e te paari, e te puai, e te tura, e te hanahana, e te haamaitai.”—Apo. 5:12.

4. No te aha e haerea paari ia faahanahana tatou ia Iehova e te Mesia?

⁴ Te parau ra te Ioane 5:22, 23 e ua faatoroa Iehova i te Mesia ei haava i nia i te mau taata atoa. Tera ïa te tahi atu tumu matamua e faahanahana ˈi tatou ia Iesu. Ia na reira tatou, te faahanahana atoa ra ïa tatou ia Iehova. Ia maiti tatou i te faahanahana ia Iesu e i to ˈna Metua, e nehenehe tatou e fanaˈo i te ora mure ore.—A taio i te Salamo 2:11, 12.

5. No te aha mea tano ia faatura tatou i te taata atoa?

⁵ Ua poietehia te taata “ma te hohoˈa o te Atua.” (Gen. 1:27) Te auraa ïa e nehenehe te taata e faaite i te hoê â mau huru maitatai i to te Atua. Ei hiˈoraa, e nehenehe te taata e faaite i te here, te hamani maitai e te aumihi. Ua poiete-atoa-hia te taata e te hoê manaˈo haava, te iteraa eaha te mea maitai e te mea ino, te mea mau e te mea haavare, te mea tano e te mea tano ore. (Roma 2:14, 15) Mea au na te taata e rave rahi i te mea mâ e i te mea nehenehe e e hinaaro ratou e ora ma te hau e o vetahi ê. E ere i te mea maere, e Atua naho e te hau hoi o Iehova. Mea papu, ua poietehia te taata atoa e te aravihi e pee i to Iehova hiˈoraa i roto i te mau tupuraa atoa. No reira, mea tano ia faatura tatou i te taata.—Sal. 8:5.

6, 7. Mea nafea te mau Ite no Iehova i taa ê ai i te taata e rave rahi ia faaite ratou i te faatura ia vetahi ê?

⁶ Ua ite tatou e mea tia ia faaturahia te tahi atu mau taata, mea fifi râ paha ia ite eaha te huru faatura ta tatou e faaite atu e i teihea faito. Mea puai te huru feruriraa o te ao a Satani i nia i te rahiraa o te taata. E rave rahi taata o te faariro ra i te tahi mau tane e vahine ei idolo no ratou. Eita ratou e faatura i te tahi atu mau taata mai ta Iehova e titau ra. E rahi roa ˈtu â râ ta ratou faahanahanaraa i tera mau taata, a faariro roa ˈtu ai ia ratou ei atua. E pee atoa paha ratou i te faaahuraa, te haerea e te huru o te feia poritita e te mau aratai haapaoraa, te mau maona, te feia hauti teata e te tahi atu mau taata tuiroo.

⁷ Ua ite te mau Kerisetiano mau e e ere mea tano ia faahanahana i te taata mai tera. I rotopu i te mau taata i ora na, o Iesu anaˈe tei vaiiho mai i te hoê hiˈoraa tia roa ia pee tatou. (Pet. 1, 2:21) Mea titauhia ia haamanaˈo e “ua rave paatoa . . . i te hara, e ua ere i te haamaitai a te Atua.” (Roma 3:23) Eita roa ˈtu e tano ia  haamorihia te taata. Ia faatura tatou i te taata hau atu i tei titauhia, eita te reira e faaoaoa ia Iehova.

8, 9. (a) Eaha te manaˈo o te mau Ite no Iehova no nia i te feia mana? (b) I roto i teihea tupuraa eita tatou e auraro i te feia mana?

⁸ Te vai ra te tahi atu mau taata e tano ia faaturahia no to ratou tiaraa. Ei hiˈoraa, a feruri na i te feia mana e eaha ta ratou e rave ra no oe. Te ohipa nei ratou ia vai te hau i te vahi e ora ˈi te taata e te haapao ra ratou i te hinaaro o te mau tino huiraatira. Mea rahi te maitai e noaa mai i ta ratou ohipa. Ua parau te aposetolo Paulo e mea tia ia auraro tatou i teie “feia mana.” Ua parau atoa oia e mea tia ia pee tatou i ta ratou mau ture: “E tuu atu i te mea e au i te taata atoa ra, e taoˈa aufauhia ta ˈna ra, e aufau atu” e i te titau ra i te faatura, e faatura ˈtu.—Roma 13:1, 7.

⁹ Ei Ite no Iehova, e tutava tatou i te faatura i te feia mana. Parau mau, tera fenua ta ˈna peu tumu, mea taa ê ta te feia mana e titau mai ia tatou i tera e tera vahi. Te ohipa amui nei râ tatou e te feia mana ia rave ratou i ta ratou ohipa. Tera râ, ia ani mai ratou ia rave i te tahi mea o te turai ia tatou ia faaroo ore ia Iehova, eita tatou e nehenehe e na reira. I roto i tera mau tupuraa, o Iehova ta tatou e auraro e e faahanahana, eiaha te taata.—A taio i te Petero 1, 2:13-17.

10. Mea nafea te mau tavini a Iehova i tahito ra i vaiiho ai i te hiˈoraa maitai no tatou i teie mahana?

¹⁰ E nehenehe tatou e haapii mai i te mau tavini a Iehova i tahito ra, o tei faatura i te mau hau faatere e to ratou feia mana. E hiˈoraa maitai o Iosepha raua Maria. I to te faatereraa Roma hinaaroraa e ite ehia taata e ora ra i to ratou tuhaa fenua, ua haere Iosepha raua Maria i Betelehema no te tapao i te iˈoa, noa ˈtu fatata roa o Maria i te fanau. (Luka 2:1-5) E hiˈoraa atoa te aposetolo Paulo no nia i te faaturaraa i te feia faatere. A parihia ˈi oia i te raveraa i te ohipa ino, ua paruru oia ia ˈna ma te faatura i mua i te arii Heroda Ageripa e ia Phesito, te faatere o te mataeinaa Roma no Iudea.—Ohi. 25:1-12; 26:1-3.

11, 12. (a) No te aha eita ˈi tatou e faaite i te faatura taa ê i te mau aratai haapaoraa? (b) Eaha tei tupu i to te hoê Ite no Iehova faaiteraa i te faatura i te hoê taata poritita?

¹¹ E no te mau aratai haapaoraa? E titauhia anei i te tahi faatura taa ê? E faatura tatou ia ratou mai ta tatou e faatura ia vetahi ê. Mea hape ia faaite atu tatou i te faatura taa ê, noa ˈtu te tiai ra ratou i te reira. No te aha? No te mea aita te haapaoraa hape e haapii ra i te parau mau no nia i te Atua e i ta ˈna Parau, te Bibilia. Ua faahapa Iesu i te mau orometua haapaoraa hape e ua parau oia e e haavare e e aratai ino ratou. (Mat. 23:23, 24) I te tahi aˈe pae, e ere i te mea hape ia faaite i te faatura taa ê i te feia mana a te mau hau faatere. Ma te na reiraraa, ua tauturu mai ratou i te tahi taime.

¹² A hiˈo na ia Heinrich Gleissner, te hoê taata poritita Auteteria. I te Piti o te tamaˈi rahi, ua tapeahia oia e te mau Nazi. A tuuhia ˈi oia i roto i te hoê pereoo auahi no te haere i te aua haavîraa, ua farerei o ˈna ia Leopold Engleitner, te hoê Ite no Iehova itoito mau no Auteteria. Ua faataa taeae Engleitner ma te faatura i ta ˈna mau tiaturiraa ia Gleissner, o tei faaroo maite ia ˈna. I te hoperaa te  tamaˈi, ua faaohipa pinepine Gleissner i to ˈna tiaraa no te tauturu i te mau Ite no Iehova no Auteteria. Ua ite atoa paha oe i te tahi atu mau hiˈoraa o te mau ohipa maitatai tei tupu no te mea ua faatura te mau Kerisetiano i te feia mana.

13. O vai iho â râ te tano ia faaturahia e no te aha?

¹³ Mea tano ia faatura tatou i to tatou mau taeae e tuahine. Te mau taeae iho â râ e hopoia ta ratou, mai te mau matahiapo, tiaau haaati, mero o te Tomite amaa e te mau mero o te Tino aratai. (A taio i te Timoteo 1, 5:17.) Te haapao ra ratou i ta te nunaa o te Atua e hinaaro mau ra e te faataa ra te Bibilia e e taata horoahia mai teie mau tavini. (Eph. 4:8) Mea tano ïa ia faatura tatou ia ratou, aita e hiˈoraa i to ratou nunaa, haapiiraa, tiaraa totiare, e feia navai anei i te pae moni aore ra aita. E hiˈoraa maitai te mau Kerisetiano o te senekele matamua no tatou. Ua faatura ratou i te mau tane aratai e te na reira atoa ra tatou i teie mahana. Ia tapiri atu tatou i teie mau tane, eita tatou e faariro ia ratou mai te huru ra e e melahi ratou, oia hoi, mea hau ê ratou i te mau taata. E faatura râ tatou ia ratou no ta ratou haaraa rahi e no to ratou haehaa.—A taio i te Korinetia 2, 1:24; Apokalupo 19:10.

14, 15. E nafea te mau matahiapo Kerisetiano e taa ê ai i te mau aratai haapaoraa e rave rahi?

¹⁴ E au teie mau taeae i te mau tiai mamoe haehaa. Eita ratou e hinaaro ia faarirohia ratou ei feia tuiroo. Mea taa ê roa  ïa ratou i te mau aratai haapaoraa i teie mahana e i to Iesu tau. Ua parau oia no ratou: “Te titau i te vahi teitei i te mau amuraa maa ra, e te parahiraa i hau i te mau sunago ra, e ia arohahia i te vahi taata.”—Mat. 23:6, 7.

¹⁵ Te auraro ra te mau matahiapo Kerisetiano i te mau parau a Iesu: “Eiaha e titau ia parauhia, ia Rabi; hoê roa hoi a outou orometua, o te Mesia; e e taeae anaˈe hoi outou atoa na. E eiaha roa outou e faametua i te hoê taata o teie nei ao, oia anaˈe ra hoi to outou Metua o te parahi i te raˈi ra. Eiaha atoa e titau ia parauhia outou, i te aratai; hoê roa hoi o outou aratai, o te Mesia. E tei rahi ra i roto ia outou na, ei tavini ïa no outou. Te faateitei ia ˈna ihora, e faahaehaahia ïa; e o te faahaehaa ia ˈna ihora, e faateiteihia ïa.” (Mat. 23:8-12) Ia faaite te mau matahiapo o te amuiraa na te ao atoa nei i te haehaa e i te auraro i ta Iesu mau parau, e here e e faatura to ratou mau taeae e tuahine ia ratou.

16. No te aha mea tia ia tamau tatou i te haa rahi no te faaite i te faatura?

¹⁶ E titauhia paha te taime no te haapii e nafea ia faatura ia vetahi ê. Hoê â atoa tupuraa no te mau Kerisetiano o te senekele matamua. (Ohi. 10:22-26; Ioa. 3, 9, 10) E hoona râ te taime. Ia faatura tatou ia vetahi ê mai ta Iehova e hinaaro, e fanaˈo tatou e rave rahi haamaitairaa.

17. Eaha te tahi mau maitai ia faatura i te feia toroa?

¹⁷ Ia faatura tatou i te feia toroa i roto i to tatou tuhaa fenua, e ohie aˈe ratou i te paturu i to tatou tiaraa e poro. E nehenehe ratou e tapea i te hoê manaˈo maitai no nia i ta tatou ohipa pororaa. Tera tei tupu e rave rahi matahiti i teie nei i Heremani a haere ai te hoê pionie o Birgit to ˈna iˈoa, i te horoaraa parau tuite a ta ˈna tamahine. Ua parau te mau orometua ia Birgit e mea oaoa roa ia ite i te hoê tamarii Ite no Iehova i roto i te piha haapiiraa i te roaraa o te mau matahiti. No ratou, e tauturu te mau tamarii Ite no Iehova ia riro te fare haapiiraa ei vahi maitai aˈe. Ua parau atu Birgit ia ratou, “Ua haapiihia ta matou mau tamarii i te mau ture aveia a te Atua no nia i te haerea e pee e ia faatura atoa i te mau orometua.” Ua parau te hoê orometua, ahani te mau tamarii e Ite no Iehova anaˈe, e ohie ïa te haapiiraa. No to ratou manaˈo maitai no nia i te mau tamarii Ite no Iehova, e rave rahi hebedoma i muri aˈe, ua apiti hoê o te mau orometua i te hoê tairururaa.

18, 19. Eaha te haamanaˈo ia faatura tatou i te mau matahiapo?

¹⁸ E tauturu mai te mau faaueraa tumu i roto i te Parau a te Atua ia taa e nafea ia faatura i te mau matahiapo o te  amuiraa. (A taio i te Hebera 13:7, 17.) E tia ia haapopou tatou ia ratou no ta ratou haaraa rahi. Ia pee tatou i ta ratou aratairaa, e tauturu te reira i te mau matahiapo ia tavini ma te oaoa. Te parau ra te Bibilia e e tia ia pee atoa tatou i to ratou faaroo. E ere râ te auraa e e tamata tatou i te faaahu, i te paraparau e i te horoa i te haapiiraa mai te mau matahiapo matau-maitai-hia. Ia na reira tatou, mai te huru ra e te pee ra tatou i te taata, eiaha râ i te Mesia. Eiaha e haamoe e taata tia ore atoa te mau matahiapo.

¹⁹ Ia faatura tatou i te mau matahiapo ma te ore râ e faariro ia ratou ei taata tuiroo, e tauturu te reira ia ratou. E nafea? E ohie aˈe ratou ia faaite i te haehaa e ia ape i te manaˈo e mea maitai aˈe ratou ia vetahi ê aore ra mea tano noa ta ratou e rave.

20. Eaha te mau maitai ia faatura tatou ia vetahi ê?

²⁰ E tauturu te faaturaraa ia vetahi ê ia ore tatou ia riro mai ei taata miimii e ia faaite noa tatou i te haehaa ia haafaufaa-rahi-hia tatou. E paruru atoa te reira no tatou, no te mea e tauturu mai te reira ia ore tatou e hiˈa ia rave hoê o ta tatou e faatura i te tahi mea o ta tatou e ore e au. Te tahi atu maitai e huti mai: e vai hoê noa tatou e te faanahonahoraa a Iehova. Eita te faanahonahoraa e faahanahana i te tahi noa ˈˈe taata, e taata tiaturi i te Atua anei aore ra aita.

21. Eaha te maitai faufaa roa ˈˈe ia faatura ia vetahi ê?

²¹ Ma to tatou faatura ia vetahi ê, e faaoaoa tatou i te Atua. Tera te maitai faufaa roa ˈˈe. E rave tatou i ta ˈna e hinaaro ra e e vai taiva ore tatou ia ˈna. E nehenehe ïa Iehova e pahono i ta Satani i parau e aita e taata e nehenehe e vai taiva ore. (Mas. 27:11) Aita te rahiraa o te taata na te ao nei i taa e nafea ia faatura ia vetahi ê. E mauruuru rahi to tatou i te iteraa e nafea ia faatura ia vetahi ê mai ta Iehova i hinaaro!