1, 2. No te aha e hiˈopoa ˈi tatou i te hiˈoraa o na arii e maha no Iuda?

 MAI te peu ua ite oe i te tahi taata tei hee a marua ˈtu ai na te hoê eˈa, e haapao maitai oe a haere ai na taua eˈa ra. Hoê â huru, ma te hiˈopoa i te mau hape ta vetahi ê i rave i roto i to ratou oraraa, e nehenehe tatou e ape i te rave i te hoê â mau hape. Ei hiˈoraa, e nehenehe tatou e haapii mai i te mau hape o te mau taata faahitihia i roto i te Bibilia.

² Ua taio mai tatou i roto i te tumu parau na mua ˈtu no nia e maha arii no Iuda tei tavini ia Iehova ma te aau tia. Tera râ, e hape rahi atoa ta ratou i rave. Ua papaihia to ratou mau aamu i roto i te Bibilia ia feruriruri tatou i te reira a huti atu ai i te mau haapiiraa faufaa. Eaha te nehenehe e haapii mai i te mau tupuraa ta ratou i faaruru? E nafea tatou e nehenehe ai e ape i te rave i te hoê â mau hape?—A taio i te Roma 15:4.

3-5. (a) Noa ˈtu ua tia to Asa aau ia Iehova, eaha te hape ta ˈna i rave? (b) No te aha paha Asa i tiaturi ai i te taata a aro ai oia ia Baasa?

³ E hiˈopoa anaˈe i te hiˈoraa o Asa. Ua tiaturi oia ia Iehova  a haere mai ai hoê mirioni faehau no Etiopia mai e aro i to Iuda. Aita râ oia i tiaturi ia Iehova i to ˈna haereraa ˈtu e aro ia Baasa, te arii o Iseraela. Ua hinaaro Asa ia faaea Baasa i ta ˈna paturaa i Rama, hoê oire faufaa mau i Iseraela i pihai iho i te otia o te faatereraa arii a Iuda. (Par. 2, 16:1-3) Ua manaˈo o Asa e e tano paha ia peta i te arii no Arama no te fanaˈo i ta ˈna tauturu. I to Arama haereraa mai e rave i te mau oire o Iseraela, “ore aˈera” Baasa i “patu i Rama, faaoti aˈera i ta ˈna ohipa.” (Par. 2, 16:5) Peneiaˈe ua manaˈo na mua Asa e ua rave oia i te hoê faaotiraa tano.

⁴ Eaha râ to Iehova huru? Aita Iehova i mauruuru i te mea e aita Asa i tiaturi ia ˈna, e ua tono atura oia i te peropheta Hanani no te aˈo ia ˈna. (A taio i te Paraleipomeno 2, 16:7-9.) Ua parau Hanani ia Asa: “E teie nei, ei tamaˈi â ta oe.” Ua rave mai Asa i te oire o Rama. Tera râ, no te toea o to ˈna oraraa, ua titauhia ia aro o ˈna e to ˈna nunaa i roto e rave rahi tamaˈi.

⁵ I roto i te tumu parau na mua ˈtu, ua haapii mai tatou e ua mauruuru Iehova ia Asa. Noa ˈtu e taata tia ore oia, ua ite Iehova e o ˈna anaˈe ta Asa i haamori. (Arii 1, 15:14) Teie râ, ua rave Asa i te hoê faaotiraa ino, e ua faaruru iho â oia i te mau faahopearaa. No te aha oia i tiaturi ai ia ˈna iho e i te tahi atu mau taata, eiaha râ ia Iehova? Peneiaˈe ua manaˈo Asa e e nehenehe ta ˈna e faaohipa i te tahi mau ravea faehau aravihi ia upootia i te tamaˈi. Aore ra ua faaroo oia i to vetahi ê mau manaˈo tano ore.

6. Eaha te haapii mai i te hape a Asa? A horoa i te hoê hiˈoraa.

⁶ Eaha te haapii mai i te hape a Asa? I roto i te mau tupuraa atoa, mea tia ia tiaturi tatou ia Iehova, eiaha i to tatou iho feruriraa. Mea tia ia ani tatou ia ˈna i te tauturu no te mau huru fifi atoa. Mea maitai ia feruri: I te tahi taime, e tiaturi anei tatou ia tatou iho ma te tamata i te faaafaro i te hoê fifi ma te ravea o ta tatou e manaˈo e mea maitai roa ˈˈe? Aore ra e hiˈopoa noa iho â tatou eaha ta te Bibilia e parau ra, a tamata atu ai i te faaohipa i ta tatou i haapii mai no te faaafaro i te fifi? Ei hiˈoraa, a feruri na e te haafifi ra to utuafare ia oe ia tae i te putuputuraa aore ra tairururaa. E ani anei oe ia Iehova i te tauturu no te ite eaha te rave i roto i tera tupuraa? Aore ra no te hoê taime roa paha, aita i itehia mai ia oe te tahi ohipa e, i teie nei, te hinaaro ra hoê taata ia ohipa oe no ˈna. E parau anei oe ia ˈna e e haere oe i te mau putuputuraa i te mau hebedoma atoa, a ere atu ai paha oe i tera ohipa? Noa ˈtu eaha te fifi, mea tia ia haamanaˈo tatou i teie parau a te papai salamo: “E tuu atu i to parau ia Iehova; e tiaturi ia ˈna, e na ˈna e faatupu i te reira.”—Sal. 37:5.

7, 8. Eaha te mau hape ta Iehosaphata i rave, e eaha te mau faahopearaa? (A hiˈo i te hohoˈa matamua.)

⁷ E hiˈopoa anaˈe i teie nei i te hiˈoraa o te tamaiti a Asa, o Iehosaphata. E rave rahi huru maitatai to ˈna, e ua mauruuru Iehova i te reira. Ia tiaturi Iehosaphata ia Iehova, e rave ïa oia e rave rahi ohipa maitatai. E faaotiraa ino atoa râ ta ˈna i rave. Ei hiˈoraa, ua horoa o ˈna i ta ˈna tamaiti ia faaipoipo i te tamahine o te arii ino ra o Ahaba. I muri aˈe, ua apiti Iehosaphata ia Ahaba no te aro i te nuu Arama, noa ˈtu ua faaara ˈtu te peropheta Mikaia eiaha e haere. I te tamaˈi, ua fariu to Arama e rave ia Iehosaphata e ua tamata i te haapohe ia ˈna. (Par. 2, 18:1-32) I to ˈna hoˈiraa ˈtu i Ierusalema, ua ui atu te peropheta Iehu: “E tauturu â oe i te feia paieti ore, e au â oe i tei ore i au mai ia Iehova?”—A taio i te Paraleipomeno 2, 19:1-3.

⁸ Ua huti anei Iehosaphata i te haapiiraa i te tupuraa ta ˈna i faaruru e i te faaararaa a te peropheta? Aita roa ˈtu. Noa ˈtu ua here iho â oia ia Iehova e ua hinaaro ia mauruuru te Atua ia ˈna, ua faahoa faahou Iehosaphata i te hoê taata o tei ore i hinaaro e haamori ia Iehova. Teie taata, o Ahazia ïa, te tamaiti a Ahaba. Ua hamani Iehosaphata raua Ahazia i te pahi. Ua parari râ te mau pahi hou raua a nehenehe ai e faaohipa i te reira.—Par. 2, 20:35-37.

9. Eaha te tupu ia maiti tatou i te mau hoa haerea ino?

⁹ Eaha te haapii mai i tei tupu no Iehosaphata? Ua rave Iehosaphata i te mea tia e ua “imi ia Iehova ma te aau atoa.” (Par. 2, 22:9) Ua maiti râ oia i te  amuimui i te feia o tei ore i here ia Iehova, no reira oia i faaruru ai i te mau fifi rahi i roto i to ˈna oraraa. Fatata roa hoi oia i te haapohehia. A haamanaˈo i teie parau paari Bibilia: “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” (Mas. 13:20) E hinaaro tatou e faaite ia vetahi ê o vai Iehova. Mea atâta râ ia faahoa rahi roa tatou i te feia o te ore e haamori ia ˈna.

10. (a) Mai te peu e te hinaaro ra tatou e faaipoipo, eaha te haapii mai i te hiˈoraa o Iehosaphata? (b) Eaha te mea maitai ia haamanaˈo?

¹⁰ Mai te peu e te hinaaro ra tatou e faaipoipo, eaha te haapii mai i te hiˈoraa o Iehosaphata? E tupu mai paha te manaˈo faahinaaro no te hoê taata o te ore e here ia Iehova. E manaˈo paha tatou e eita e itehia mai ia tatou te hoê hoa faaipoipo i roto i te nunaa o te Atua. Aore ra e parau noa mai paha to tatou mau fetii ia faaipoipo hou tatou a ruau ai. Parau mau, ua hamani Iehova ia tatou e te hinaaro e here e ia herehia mai tatou. Tera râ, aita anaˈe i itehia mai ia tatou te hoê hoa maitai e faaipoipo, eaha ïa te rave? Mea maitai ia feruriruri i tei tupu no Iehosaphata. Ua ani oia i te aratairaa a Iehova. (Par. 2, 18:4-6) I to ˈna râ faahoaraa ˈtu ia Ahaba, o tei ore i here ia Iehova, aita ˈtura Iehosaphata i tâuˈa faahou i te faaararaa a Iehova. Aita Iehosaphata i haamanaˈo e “te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Par. 2, 16:9) Mea maitai ia haamanaˈo e te hinaaro ra Iehova e tauturu ia tatou. Te taa ra ia ˈna i to tatou tupuraa e te here ra oia ia tatou. Te tiaturi ra anei oe e e haapao Iehova i to oe hinaaro i te here e te auhoaraa? Ia papu ia oe e tera iho â ta ˈna e rave no oe!

11, 12. (a) Eaha te ohipa ta Hezekia i rave, o tei faaite eaha mau to roto i to ˈna aau? (b) No te aha Iehova i faaore ai i te hapa a Hezekia?

¹¹ Eaha te haapii mai i te hiˈoraa o Hezekia? Ua tauturu Iehova ia Hezekia ia ite eaha mau to roto i to ˈna aau. (A taio i te Paraleipomeno 2, 32:31.) I to Hezekia rooraahia i te maˈi rahi, ua parau te Atua ia ˈna e e afaro mai oia e ua horoa ˈtu i te hoê tapao. Ua rave Iehova i te hoê mǎrǔ, ua faahoˈi atura i muri e hoê ahuru aˈera tuuraa avae o te hoê eˈa tei mairi. I muri aˈe, e au ra e ua hinaaro te hui arii o Babulonia e ite hau atu â no nia i tera tapao e ua tono i te tahi mau tane no te ani ia Hezekia no nia i te reira. (Arii 2, 20:8-13; Par. 2, 32:24) Aita Iehova i parau ia Hezekia e nafea ia farii ia ratou. Te parau ra te Bibilia e “i vaiihohia ihora oia” e Iehova no te ite eaha ta ˈna e rave. Ua faaite Hezekia i te mau tane no Babulonia pauroa ta ˈna mau taoˈa. Ua faaite te reira eaha mau to roto i te aau o Hezekia. Mea nafea?

¹² Ua riro mai Hezekia ei taata teoteo.  I te pae hopea, “aita . . . Hezekia i haapao maitai i taua maitai i horoahia mai no ˈna.” Aita te Bibilia e parau ra no te aha to ˈna huru feruriraa i taui ai. Peneiaˈe no to ˈna upootiaraa mai i nia i te nuu Asura aore ra no te mea ua faaora mai Iehova ia ˈna i to ˈna maˈi. Aore ra no to ˈna riroraa mai ei taata taoˈa rahi e tuiroo. Noa ˈtu ua tavini Hezekia ia Iehova ma te aau tia, ua riro mai oia ei taata teoteo i te hoê taime e aita Iehova i mauruuru. I muri aˈe râ, “ua faahaehaa . . . Hezekia” ia ˈna e ua faaore te Atua i ta ˈna hapa.—Par. 2, 32:25-27; Sal. 138:6.

13, 14. (a) Eaha te tahi tupuraa o te nehenehe e faaite eaha mau to roto i to tatou aau? (b) E nafea tatou ia haapopou vetahi ê ia tatou?

¹³ Eaha te haapii mai i te hiˈoraa o Hezekia e te hape ta ˈna i rave? A haamanaˈo e ua haa Hezekia ma te teoteo i muri iti noa ˈˈe i to Iehova tautururaa ia ˈna ia upootia mai i nia i te nuu Asura e i to ˈNa faaoraraa i to ˈna maˈi. No reira, e ohipa maitai anaˈe tei tupu no tatou aore ra ia haapopou vetahi ê ia tatou, eaha te rave? E faaite to tatou huru i mua i te reira eaha mau to roto i to tatou aau. Ei hiˈoraa, ua haa rahi paha hoê taeae no te faaineine i te hoê oreroraa parau e no te vauvau i te reira i mua e rave rahi taata. Mea rahi tei haapopou ia ˈna no te ohipa ta ˈna i rave. E nafea o ˈna?

¹⁴ Mea maitai ia haamanaˈo tatou i ta Iesu i parau: “Ia ravehia e outou te mau mea atoa i faauehia ˈtu ia outou na, e na ô outou, Aita a matou faufaa, a to mau tavini nei i hopoi atu; o tei au mau ia matou ra, o ta matou ïa i rave iho nei.” (Luka 17:10) A haamanaˈo e i to Hezekia riroraa mai ei taata teoteo, aita oia i mauruuru i ta Iehova tauturu. No reira, ia haapopou vetahi ê ia tatou no te hoê oreroraa parau ta tatou i vauvau, eaha ïa te tauturu mai ia faaite noa i te haehaa? E feruriruri tatou i te mau mea ta Iehova i rave no tatou. E e nehenehe tatou e paraparau no nia ia ˈna e e faaite mea nafea oia i te tautururaa mai ia tatou. O ˈna hoi tei horoa mai i te Bibilia e to ˈna varua moˈa ia nehenehe tatou e vauvau i te oreroraa parau.

15, 16. Eaha ta Iosia i rave i pohe ai oia?

¹⁵ Eaha te haapii mai i te hiˈoraa o Iosia? Noa ˈtu e arii maitai o Iosia, ua rave oia i te hoê hape e pohe atura. (A taio i te Paraleipomeno 2, 35:20-22.) Eaha tei tupu? Ua haamata Iosia i te aro ia Neko, te arii no Aiphiti, aita hoi e tumu e na reira ˈi oia. Inaha, ua parau atu Neko ia Iosia e aita oia e hinaaro ra e aro ia ˈna. Te na ô ra te Bibilia e “no ǒ [mai] i te Atua ra” te mau parau a Neko. Ua haere râ Iosia e aro e haapohehia ˈtura oia. No te aha ïa oia i aro ai ia Neko? Aita te Bibilia e parau ra.

 ¹⁶ Te tanoraa, ia imi Iosia e no ǒ mai iho â anei te parau a Neko ia Iehova ra. Mea nafea? E nehenehe oia e ani ia Ieremia, hoê peropheta a Iehova. (Par. 2, 35:23, 25) Oia atoa ia hiˈopoa Iosia i te mau tupuraa. I haere na Neko i Karekemisa no te aro i te hoê nunaa ê atu, e ere no te aro ia Ierusalema. E aita Neko i tamata i te faaino ia Iehova aore ra i to ˈNa nunaa. Aita Iosia i feruri maite i tera mau ohipa hou a rave ai i ta ˈna faaotiraa. Eaha te haapiiraa no tatou? Ia fifihia tatou e ia titauhia ia rave tatou i te hoê faaotiraa, e tia ia hiˈopoa na mua eaha ta Iehova e hinaaro ia rave tatou.

17. Tei roto anaˈe tatou i te fifi, e nafea tatou ia ape i te raveraa i te hoê hape mai ta Iosia i rave?

¹⁷ Ia titauhia ia rave tatou i te hoê faaotiraa, mea tia ia feruri na mua eaha te mau faaueraa tumu Bibilia te nehenehe e tauturu mai e e nafea ia faaohipa i te reira. I roto i te tahi mau tupuraa, e hinaaro paha tatou e rave atu â i te mau maimiraa i roto i ta tatou mau papai aore ra e ani i te hoê matahiapo te tauturu. E nehenehe oia e tauturu ia tatou ia feruri i te tahi atu mau faaueraa Bibilia. A feruri na i teie tupuraa: E ere te tane faaipoipo a te hoê tuahine i te Ite no Iehova. Ua opua teie tuahine i te haere e poro i te hoê mahana taa maitai. (Ohi. 4:20) I tera râ mahana, aita ta ˈna tane i hinaaro ia haere oia e poro. Ua parau atu te tane e mea maoro aita raua i rave i te taime no raua e te hinaaro ra oia e afai ia ˈna i te tahi vahi. Ua hiˈopoa ïa te tuahine i te mau irava Bibilia o te tauturu ia ˈna ia rave i te hoê faaotiraa î i te paari. Ua ite oia e mea tia ia auraro oia i te Atua e ua faaue mai Iesu ia haere e faariro i te taata ei pǐpǐ. (Mat. 28:19, 20; Ohi. 5:29) Ua haamanaˈo atoa râ oia e mea titauhia ia auraro oia i ta ˈna tane e ia faaite atoa te mau tavini a te Atua i te huru au noa. (Eph. 5:22-24; Phil. 4:5) Te tamata ra anei ta ˈna tane i te haafifi ia ˈna ia ore oia e haere e poro aore ra te hinaaro noa ra oia e rave i te taime no raua i tera mahana? Ei Ite no Iehova, e hinaaro tatou e rave i te mau faaotiraa au noa e o te faaoaoa ia ˈna.

18. Eaha te nehenehe e haapii mai ia feruriruri tatou i te mau hiˈoraa o na arii e maha no Iuda?

¹⁸ I te tahi taime, e nehenehe atoa tatou e rave i te hoê â mau hape ta teie na arii e maha no Iuda i rave. E nehenehe tatou (1) e tiaturi i nia i to tatou iho feruriraa, (2) e maiti i te mau hoa haerea ino, (3) e faaite i te hoê huru feruriraa teoteo, aore ra (4) e rave i te mau faaotiraa ma te ore e hiˈopoa na mua eaha te hinaaro o te Atua. Noa ˈtu râ, aita e tumu e manaˈo ai tatou e eita tatou e nehenehe e faaoaoa ia Iehova. Ua ite oia i te mea maitai i roto ia tatou, mai i to ˈna iteraa i te maitai i roto i na arii e maha. Ua ite atoa oia i to tatou here rahi ia ˈna e to tatou hinaaro rahi e tavini maite ia ˈna. No reira oia i horoa mai ai i te mau hiˈoraa o te nehenehe e tauturu mai ia ape i te rave i te mau hape rahi. E feruri maite anaˈe i teie mau aamu Bibilia e e haamauruuru anaˈe ia Iehova i to ˈna horoaraa mai i te reira!