AAMU
Aita to ˈu tariˈa turi i tapea ia ˈu ia haapii ia vetahi ê
Ua bapetizohia vau i 1941, i te 12raa o to ˈu matahiti. I 1946 noa râ to ˈu taa-maitai-raa i te parau mau Bibilia. No te aha? E faatia ˈtu vau to ˈu aamu.
I TE area matahiti 1910, ua faarue to ˈu na metua i te oire o Tbilissi i Géorgie, no te haere i Kanada. I ora na raua i te hoê vahi faaapu e faaamuraa animara i pihai iho ia Pelly, Saskatchewan, i Kanada tooa o te ra. Ua fanauhia vau i 1928. E ono tamarii matou, o vau te hopea. Ua pohe to ˈu papa ono avaˈe hou vau a fanauhia mai ai. E to ˈu mama, e aiû noa â ïa vau i to ˈna poheraa. Aita i maoro i muri mai, ua pohe o Lucy, to matou tuahine matahiapo, i te 17raa o to ˈna matahiti. Na Nick ïa, to ˈu metua fetii, i haapao ia ˈu e to ˈu mau taeae e tuahine.
I te hoê mahana, e tamariirii noa â vau i tera taime, ua ite to ˈu mau fetii ia ˈu te huti ra i te aero o hoê o ta matou mau puaarehenua. Ua riaria roa ratou ia patu o ˈna ia ˈu, tuô atura ratou ia ˈu ia faaea. Tera râ, te hiˈo ra vau i te tahi aˈe pae, aita vau i faaroo i ta ratou tuô. Auaˈe aita vau i pepe. I tera râ mahana, taa aˈera i to ˈu utuafare e tariˈa turi to ˈu.
Ua parau hoê hoa o to ˈu utuafare e mea au aˈe ia haere au i te haapiiraa e te tahi atu mau tamarii tariˈa turi. Ua afai ïa Nick ia ˈu i te hoê fare haapiiraa no te feia tariˈa turi i Saskatoon, Saskatchewan. Mea atea roa teie haapiiraa i to ˈu utuafare, e e pae noa matahiti to ˈu, ua mǎtaˈu roa vau. I te tau faafaaearaa haapiiraa e te tau veavea noa vau i nehenehe ai e haere e hiˈo ia ratou. Ua haapii au i te reo apǎraa rima e ua au roa vau i te hauti e te tahi atu mau tamarii.
HAAPIIRAA I TE PARAU MAU BIBILIA
I 1939, ua faaipoipo to ˈu tuahine matahiapo o Marion ia Bill Danylchuck, e ua haamata raua i te haapao ia ˈu e to ˈu tuahine o Frances. O raua na mua i roto i to matou utuafare tei haamata i te haapii na muri i te mau Ite no Iehova. I te tau faafaaearaa haapiiraa i te tau veavea, ua tutava noa raua i te faaite mai i ta raua i haapii i roto i te Bibilia. Aita i riro ei mea ohie no matou ia aparau inaha aita raua i ite i te reo apǎraa rima. Ua nehenehe râ raua e ite e ua au iho â vau i ta ˈu i haapii no nia ia Iehova. Ua taa ia ˈu e te tuati ra ta raua e rave ra i ta te Bibilia e haapii ra, ua na muri atoa ïa vau ia raua a haere ai raua e poro. I muri iti noa ˈˈe i te reira, ua hinaaro vau ia bapetizohia vau. E i te 5 no Tetepa 1941, ua bapetizo Bill ia ˈu i roto i te hoê farii punu faaîhia i te pape o te hoê apoo. Mea toetoe mau te pape!
O vau e te hoê pǔpǔ feia tariˈa turi i te tairururaa i Cleveland, Ohio, i 1946
I 1946, i to ˈu hoˈiraa i te fare no te tau veavea, ua apiti matou i te hoê tairururaa i Cleveland, Ohio i Marite. I te mahana matamua, ua tapaopao to ˈu na tuahine i te tahi mau nota ia nehenehe atoa vau e pee i te porotarama. I te piti râ o te mahana, ua oaoa roa vau i te iteraa e te vai ra te pǔpǔ feia tariˈa turi e te tahi taata huri na roto i te reo apǎraa rima i te tairururaa. Ua nehenehe atura ïa vau e fanaˈo atoa i teie porotarama, auê te au e! Ua taa maitai ia ˈu eaha ta te Bibilia e haapii ra.
FAAITERAA I TE PARAU MAU IA VETAHI Ê
I tera taime, no hope noa ihora te Piti o te tamaˈi rahi, e ua hinaaro te taata e faaite e mea taiva ore ratou i to ratou fenua. I to ˈu râ hoˈiraa ˈtu mai te tairururaa i te haapiiraa, ua hinaaro roa vau e vai taiva ore ia Iehova. Ua faaea ïa vau i te faahanahana i te reva, himene i te himene aiˈa e apiti i te mau mahana oroa. Ua faaea atoa vau i te haere i te pureraa na muri i to ˈu mau hoa haapiiraa. Aita te feia rave ohipa o te fare haapiiraa i mauruuru, ua tamata ratou i te haamǎtaˈu ia ˈu. Ua haavare atoa mai ia ˈu ia taui au i to ˈu manaˈo. Ua ite to ˈu mau hoa haapiiraa eaha te tupu ra, e maoti te reira, ua nehenehe au e poro ia ratou. Ua farii vetahi o ratou i te parau mau, mai ia Larry Androsoff, Norman Dittrick, e Emil Schneider, e te tamau noa ra ratou i te tavini ia Iehova.
A haere ai au na te tahi mau oire, i tutava noa na vau i te poro i te feia tariˈa turi. Ei hiˈoraa, i Montréal, ua haere au i te hoê vahi e putuputu ai te feia tariˈa turi. I reira, ua poro vau ia Eddie Tager, hoê taurearea no roto mai i te hoê pǔpǔ rave ohipa ino. Tae roa ˈtu i to ˈna poheraa i te matahiti i mairi aˈenei, ua apiti noa oia i roto i te amuiraa reo apǎraa rima i Laval, Québec. Ua farerei atoa vau ia Juan Ardanez. Mai te feia no Berea na mua ˈtu, ua rave oia i te mau maimiraa ia papu maitai ia ˈna e ua niuhia iho â ta ˈna e haapii ra i nia i te Bibilia. (Ohi. 17:10, 11) Ua farii atoa oia i te parau mau, e ua tavini ei matahiapo i Ottawa, Ontario, e tae roa ˈtu i to ˈna poheraa.
Pororaa na te mau aroâ i te omuaraa o te mau matahiti 1950
I 1950, ua haere au e ora i Vancouver. Noa ˈtu mea au roa na ˈu e poro i te feia tariˈa turi, eita roa ˈtu e moˈe ia ˈu hoê tupuraa ta ˈu i farerei e o Chris Spicer, hoê vahine tariˈa maitai, ta ˈu i poro i roto i te hoê aroâ. Ua farii oia ia faataehia ˈtu te vea ia ˈna ra e ua hinaaro oia ia farerei au i ta ˈna tane faaipoipo o Gary te iˈoa. Ua haere au i to raua nohoraa. Mea roa ta matou aparauraa, mea papai noa. Mai tera taime, aita vau i ite faahou ia raua e
tae roa tau matahiti i muri aˈe, ua maere roa vau e ua haere mai raua e aroha ia ˈu i te hoê tairururaa i Toronto, Ontario. Te bapetizohia ra o Gary i tera mahana. Ua haamanaˈo teie tupuraa ia ˈu e mea faufaa roa ia tamau i te poro, no te mea eita tatou e ite e e haere mai anei te taata ta tatou i poro i te parau mau.I muri aˈe, ua hoˈi au i Saskatoon. I reira, ua farerei au i te hoê vahine o tei ani mai ia haapii au i te Bibilia i ta ˈna na tamahine maehaa tariˈa turi, o Jean raua Joan Rothenberger. E piahi raua i te hoê â fare haapiiraa no te tamarii tariˈa turi ta ˈu i haere. Aita raua i haamaoro i te faaite i to raua mau hoa haapiiraa i ta raua e haapii ra. E pae i roto i ta raua piha haapiiraa tei riro atoa mai ei Ite no Iehova. O Eunice Colin hoê. Ua farerei au ia Eunice no te taime matamua i te matahiti hopea vau i te fare haapiiraa no te feia tariˈa turi. I taua taime ra, ua horoa mai o ˈna i te tahi momona na ˈu ma te ani e nehenehe anei mâua e riro ei hoa. I muri aˈe, ua riro roa mai oia ei vahine faaipoipo no ˈu!
Maûa Eunice i 1960 e i 1989
I to Eunice mama iteraa e te haapii ra ta ˈna tamahine i te Bibilia, ua ani oia i te faatere o te fare haapiiraa ia faataui te manaˈo o Eunice ia faaea oia i te haapii. Ua tamata oia i te na reira e ua haru atoa i ta ˈna mau buka haapiiraa. Ua faaoti papu râ Eunice i te ore e taiva ia Iehova. A hinaaro ai oia ia bapetizohia o ˈna, ua parau to ˈna na metua ia ˈna: “Ia riro oe ei Ite no Iehova, eita oe e faaea mai i ǒ nei!” No reira, i te 17raa o to ˈna matahiti, ua faarue Eunice i te fare e ua haere e ora i roto i te hoê utuafare Ite no Iehova. Ua tamau oia i ta ˈna haapiiraa e ua bapetizohia oia i muri aˈe. I to mâua faaipoiporaahia i 1960, aita to ˈna na metua i haere mai i te faaipoiporaa. Tera râ, a mairi noa ˈi te mau matahiti, ua rahi mai to raua faatura ia mâua no ta mâua mau tiaturiraa e te huru haapiiraa ta mâua i horoa i ta mâua mau tamarii.
UA AUPURU IEHOVA IA ˈU
Ta ˈu tamaiti Nicholas e ta ˈna vahine faaipoipo, Deborah, e tavini ra i te Betela no Lonedona
Ei metua tariˈa turi, ua riro ei mea fifi ia haapii e hitu tamaroa tariˈa maitai. Ua haapao râ mâua ia taa ia ratou i te reo apǎraa rima, ia nehenehe matou e aparau e ia nehenehe atoa mâua e haapii i te parau mau ia ratou. Ua tauturu rahi mai te mau taeae e tuahine o te amuiraa. Ei hiˈoraa, ua papai mai hoê metua no te faaara ia mâua e te parau ino ra hoê o ta mâua mau tamaiti i te Piha a te Basileia. Ua nehenehe mâua e faaafaro i te reira i tera iho â taime. E maha tamaiti ta mâua tei riro mai ei matahiapo e te tavini ra ia Iehova ma te taiva ore e ta ratou vahine e utuafare, o James, Jerry, Nicholas e Steven. Te tauturu atoa ra o Nicholas e ta ˈna vahine, Deborah, i roto i te huriraa reo apǎraa rima i te amaa no Beretane, e Steven raua ta ˈna vahine, Shannan, tei roto ïa i te pǔpǔ huriraa reo apǎraa rima i te amaa no Marite.
Ta ˈu mau tamaiti o James, Jerry, e Steven e ta ratou vahine faaipoipo e turu ra i te ohipa pororaa na roto i te reo apǎraa rima na roto e rave rau ravea
Teie râ hoi, hoê avaˈe hou a naea ˈi to mâua 40 matahiti faaipoiporaa, ua pohe o Eunice i te maˈi mariri ai taata. I tera roaraa taime fifi mau, ua haapuai noa to ˈna tiaturiraa i te tia-faahou-raa ia ˈna. Te tiai ru nei au i te mahana e ite faahou ai au ia ˈna.
Faye raua James, Jerry raua Evelyn, Shannan raua Steven
Sal. 10:14) Te haamauruuru nei au pauroa te taata tei ineine i te tapaopao mai i te nota, haapii i te reo apǎraa rima, e o te tauturu mai no te faataa i ta ˈu i hinaaro e parau.
I Fepuare 2012, ua topa e ua pepe au. Taa aˈera ia ˈu e e hinaaro vau i te tauturu. Ua haere ïa vau e ora i ǒ hoê o ta ˈu mau tamaiti e ta ˈna vahine faaipoipo. Tei roto matou i teie nei i te amuiraa reo apǎraa rima no Calgary, i reira vau e tamau ai i te tavini ei matahiapo. A tahi ra vau e riro ai ei mero o te hoê amuiraa reo apǎraa rima! Mea nafea ïa vau i te tapearaa i te auhoaraa puai e o Iehova i tera roaraa matahiti i roto i te hoê amuiraa reo Beretane? Ua tauturu Iehova ia ˈu. Ua tapea oia i ta ˈna parau fafau e aupuru i te mau tamarii otare. (I te hoê haapiiraa pionie reo apǎraa rima, e 79 matahiti to ˈu
Te tahi taime, aita vau i taa i tei parauhia mai, aore ra ua manaˈo vau e eita te taata e taa e nafea ia tauturu i te feia tariˈa turi. I tera mau taime, a hepohepo e a hinaaro ai au e taora i te tauera, ua haamanaˈo noa vau i ta Petero i parau ia Iesu: “E te Fatu, e haere ïa matou ia vai ra? Tei ia oe ra hoi te mau parau o te ora mure ore.” (Ioa. 6:66-68) Mai e rave rahi taeae e tuahine tariˈa turi maoro i roto i te parau mau, ua haapii au i te faaoromai. Ua haapii au i te tiaturi ia Iehova e ta ˈna faanahonahoraa, e ua ite au e rave rahi haamaitairaa. I teie nei, mea rahi te piaraa na roto i to ˈu iho nei reo, e te oaoa nei au e e nehenehe ta ˈu e apiti i te mau putuputuraa e tairururaa na roto i te reo apǎraa rima Marite. E oraraa oaoa î i te haamaitairaa ta ˈu i ite a tavini noa ˈi ia Iehova, to tatou Atua rahi.