1, 2. No te aha te Atua i faarue ai ia Saula? (A hiˈo i te hohoˈa matamua.)

 I TO Iehova maitiraa ia Saula ei arii, e aau faahaihai to Saula. (Sam. 1, 9:1, 2, 21; 10:20-24) I muri aˈe râ i to ˈna ariiraa mai, ua riro oia ei taata teoteo. I te hoê taime, e tausani Philiseti tei haere mai e aro i te mau Iseraela. Ua parau te peropheta Samuela ia Saula e e haere mai o ˈna e pûpû atu ai i te tusia ia Iehova. Tera râ, hou Samuela a tae mai ai, ua haamata te mau Iseraela i te mǎtaˈu e e rave rahi o ratou tei faarue ia Saula. Aita ˈtura o ˈna i tiai ia tae mai Samuela, ua pûpû o ˈna i te tusia. Aita e tiaraa to Saula no te na reira, e aita Iehova i mauruuru.—Sam. 1, 13:5-9.

² I to Samuela taeraa mai, ua faahapa oia ia Saula no to ˈna faaroo-ore-raa ia Iehova. Aita râ Saula i manaˈo e ua rave oia i te tahi ohipa hape. Ua tamata oia i te imi i te otoheraa, e ua pari ia vetahi ê no ta ˈna hape. (Sam. 1, 13:10-14) Mai reira mai, e rave rahi ohipa teoteo ta Saula i rave. No reira Iehova i faarue ai ia ˈna, eiaha o ˈna ei arii faahou. (Sam. 1, 15:22, 23) Mea maitai te haamataraa o to Saula oraraa, ua ino roa râ i te pae hopea.—Sam. 1, 31:1-6.

3. (a) Eaha te manaˈo o te taata e rave rahi no nia i te aau faahaihai? (b) Eaha te mau uiraa ta tatou e pahono?

 ³ E rave rahi taata i teie mahana e manaˈo ra e eita ratou e nehenehe e faatupu i te aau faahaihai e i te hoê â taime e fanaˈo i te hoê oraraa aore ra toroa maitai roa. E faatietie ratou ia ratou iho ia hau aˈe ratou ia vetahi ê. Ei hiˈoraa, ua parau te hoê taata hauti teata tuiroo e tia poritita: “E ere roa ˈtu no ˈu te parau o te aau faahaihai, eiaha roa atoa ˈtu tera parau ia tano ia ˈu.” No te aha râ mea faufaa ia faatupu te hoê Kerisetiano i te aau faahaihai? Eaha mau te aau faahaihai? I roto i teie tumu parau, e pahono mai tatou i teie mau uiraa. E i roto i te tumu parau i muri nei, e hiˈopoa mai tatou e nafea ia faatupu noa i te aau faahaihai noa ˈtu mea fifi ia na reira.

4. Eaha te hoê ohipa teoteo?

⁴ Te faaite ra te Bibilia e mea taa ê roa te teoteo i te aau faahaihai. (A taio i te Maseli 11:2.) Ua taparuparu Davida ia Iehova: “A paruru mai oe i to tavini nei i te hara teoteo.” (Sal. 19:14, Te Bibilia Moˈa V.C.J.S., 1976) Eaha te hoê “hara,” aore ra ohipa “teoteo”? O te raveraa ïa i te tahi mea, aita râ to tatou e tiaraa aore ra e mana no te na reira. Peneiaˈe no to tatou faaoromai ore aore ra faaoru i na reira ˈi tatou. Ua rave tatou pauroa i te hoê taime i te tahi ohipa teoteo, no te mea e taata tia ore tatou. Mai ta tatou râ i haapii i te hiˈoraa o te arii Saula, ia riro roa te reira ei peu matau na tatou, eita Iehova e mauruuru. Te parau ra te Salamo 119:21 e e aˈo Iehova i te feia teoteo. No te aha oia e na reira ˈi?

5. No te aha e hape ino te ohipa teoteo?

⁵ A tahi roa, ia rave tatou i te tahi ohipa teoteo, aita tatou e faatura ra ia Iehova, to tatou Atua e Faatere. Te piti, ia rave tatou i te mau mea aita e tiaraa to tatou no te na reira, e nehenehe tatou e peapea e te tahi atu mau taata. (Mas. 13:10) Te toru, e au ïa tatou i te maamaa ia taa vetahi ê e ua rave tatou i te tahi ohipa teoteo. (Luka 14:8, 9) Te taa maitai ra ïa tatou no te aha Iehova e hinaaro ai ia faatupu tatou i te aau faahaihai.

6, 7. E nafea te aau faahaihai e tuati ai i te haehaa?

⁶ Mea piri roa te aau faahaihai i te haehaa. Eita te hoê Kerisetiano haehaa e faaoru. No ˈna, ua hau aˈe vetahi ê ia ˈna. (Phil. 2:3) E aau faahaihai atoa to te taata haehaa. Ua ite o ˈna i to ˈna mau taotiaraa e e farii oia ma te haehaa i ta ˈna mau hape. E hinaaro oia e faaroo i to vetahi ê manaˈo e e haapii mai ia ratou ra. E mauruuru roa Iehova i te taata haehaa.

⁷ Te faaite ra te Bibilia e ua ite te hoê taata aau faahaihai i to ˈna iho huru e ua taa ia ˈna e te vai ra te tahi mau ohipa eita ta ˈna e nehenehe e rave aore ra aita o ˈna e faatiahia ia rave. E tauturu te reira ia ˈna ia faatura e ia hamani maitai ia vetahi ê.

8. No te tapea i te aau faahaihai, eaha te huru feruriraa te tia ia haapae?

 ⁸ E nehenehe râ tatou, ma te ore atoa hoi e haapao, e haamata i te feruri ma te teoteo. E nafea? E haamata paha tatou i te manaˈo e mea faufaa aˈe tatou ia vetahi ê no te mea, i roto i te amuiraa, e hopoia ta tatou aore ra ta te feia ta tatou i matau maitai. (Roma 12:16) Aore ra e haamata tatou i te huti rahi roa i te ara-maite-raa o vetahi ê i nia ia tatou. (Tim. 1, 2:9, 10) E haamata atoa paha tatou i te parau ia vetahi ê eaha te rave aore ra eaha te ore e rave.—Kor. 1, 4:6.

9. No te aha vetahi i teoteo ai? A horoa i te hoê hiˈoraa Bibilia.

⁹ Ia ore tatou e haavî i to tatou mau hinaaro tano ore, e nehenehe tatou e haamata i te haa ma te teoteo. E rave rahi o tei riro mai ei taata teoteo no te mea ua hinaaro ratou i te hanahana no ratou iho, ua feii ia vetahi ê aore ra aita i haavî i to ratou riri. Ua faahiti te Bibilia i tei tupu no vetahi, mai ia Abasaloma, Uzia e Nebukanesa. Ua faaite roa ˈtu Iehova e mea titauhia ia faatupu ratou i te haehaa.—Sam. 2, 15:1-6; 18:9-17; Par. 2, 26:16-21; Dan. 5:18-21.

10. No te aha eiaha tatou e haava i te mau manaˈo turai o te taata? A horoa i te hoê hiˈoraa Bibilia.

¹⁰ Te vai ra paha te tahi atu â mau tumu e ore ai te taata e faaite i te aau faahaihai i te tahi taime. A haamanaˈo na i te hiˈoraa o Abimeleka e Petero. (Gen. 20:2-7; Mat. 26:31-35) Mea teoteo anei na tane e piti? Peneiaˈe aita raua i ite pauroa te mau haamaramaramaraa aore ra ua haa ma te ore e feruri? No te mea eita tatou e nehenehe e hiˈo i roto i te aau, eiaha ïa tatou e haava i te mau manaˈo turai o te taata.—A taio i te Iakobo 4:12.

11. Ia taa ia tatou i te aha?

¹¹ Ua taa i te taata aau faahaihai i ta ˈna tuhaa i roto i te faanahoraa a te Atua. E Atua naho o Iehova. Ua horoa oia te hoê tuhaa e rave na te mau mero tataitahi o te amuiraa. Mea faufaa tatou pauroa. Ua horoa mai Iehova na tatou tataitahi i te mau ô e aravihi taa ê e ua vaiiho oia ia tatou ia maiti e nafea ia faaohipa i te reira. Mai te peu e aau faahaihai to tatou, e faaohipa ïa tatou i taua mau ô ra mai ta Iehova e hinaaro. (Roma 12:4-8) Ua taa ia tatou e te tiai ra Iehova ia faaohipa tatou i te reira no te faahanahana ia ˈna e no te tauturu ia vetahi ê.—A taio i te Petero 1, 4:10.

12, 13. Eaha ta tatou e haamanaˈo ia ite tatou i te mau tauiraa i roto i ta tatou taviniraa ia Iehova?

¹² E taui paha te mau mea ta tatou e rave i roto i ta Iehova taviniraa a mairi ai te tau. Ei hiˈoraa, a haamanaˈo i te mau tauiraa e rave rahi ta Iesu i ite. I te omuaraa, o ˈna anaˈe e to ˈna Metua. (Mas. 8:22) I muri iho, ua tauturu oia ia Iehova ia poiete i te mau melahi, te ao nui e te taata. (Kol. 1:16) I muri aˈe, ua tonohia mai oia i te fenua nei. Ua fanauhia mai oia e ua paari roa mai. (Phil. 2:7) I muri aˈe i to ˈna poheraa, ua hoˈi Iesu i te raˈi, e i 1914, ua riro mai oia ei Arii no te Faatereraa a te Atua. (Heb. 2:9) I muri aˈe i na tausani matahiti oia e faatere ai ei Arii, e faahoˈi Iesu i te Faatereraa ia Iehova, “ia riro . . . te Atua i nia iho i te mau mea atoa.”—Kor. 1, 15:28.

¹³ E ite atoa paha tatou e rave rahi tauiraa i roto i te oraraa. I te tahi taime, e nehenehe ta tatou mau hopoia e taui no  ta tatou iho mau faaotiraa. Ei hiˈoraa, ei taata faaea taa noa, ua faaoti tatou e faaipoipo. Aore ra e fanau mai paha tatou i te tamarii. I muri aˈe, e faaoti paha tatou e rave i te tahi mau tauiraa ia nehenehe tatou e tavini ia Iehova ma te taime taatoa. I te tahi atu taime, e taui paha ta tatou mau hopoia ia au i to tatou tupuraa. E nehenehe paha tatou e rave hau atu â aore ra e titauhia ia faaiti mai i te ohipa. Noa ˈtu râ mea apî tatou aore ra mea paari aˈe, e ea maitai to tatou aore ra aita, ua ite Iehova e nafea tatou tataitahi e tutava ˈi i te tavini ia ˈna. Eita oia e titau hau atu â i ta tatou e nehenehe e rave. E oaoa roa oia i ta tatou e rave no ˈna.—Heb. 6:10.

14. E nafea te hoê huru feruriraa aau faahaihai e tauturu ai ia tatou ia mauruuru noa e ia oaoa i roto i te mau tupuraa atoa?

¹⁴ Ua oaoa Iesu i te mau hopoia atoa ta Iehova i horoa ia ˈna, ia oaoa atoa ïa tatou i ta tatou mau hopoia. (Mas. 8:30, 31) E mauruuru noa te taata aau faahaihai i ta ˈna mau hopoia e ohipa i roto i te amuiraa. Eita oia e tamau noa i to ˈna feruriraa i ta vetahi ê e rave ra. E mauruuru râ oia i ta ˈna iho tuhaa i roto i ta te Atua faanahonahoraa. No ˈna, no ǒ mai te reira ia Iehova ra. E faatura atoa te taata aau faahaihai ia vetahi ê e e oaoa oia i te turu ia ratou. Ua taa ia ˈna e ua horoa atoa Iehova i te hoê tuhaa na ratou.—Roma 12:10.

15. Eaha ta tatou e nehenehe e haapii mai i te hiˈoraa o Gideona?

¹⁵ E hiˈoraa maitai o Gideona no nia i te aau faahaihai. I to Iehova parauraa ia ˈna ia faaora ia Iseraela i te ati Midiana, ua na  ô Gideona: “E fetii haehaa to ˈu ia Manase nei, e o vau hoi tei iti roa i te fetii o to ˈu ra metua.” (Tav. 6:15) Ua tiaturi râ o Gideona ia Iehova e ua farii i teie hopoia. Ua hinaaro Gideona i te haapapuraa no te ite e ua taa maitai anei ia ˈna ta Iehova e titau ra ia ˈna e ua ani i ta ˈna aratairaa. (Tav. 6:36-40) E taata puai e te itoito o Gideona, e haerea paari to ˈna e te haapao maitai. (Tav. 6:11, 27) I muri aˈe, a hinaaro ai te nunaa ia faatere oia ia ratou, ua patoi oia. Ua rave oia i ta Iehova i faaue ia ˈna e ua hoˈi i te fare i muri iho.—Tav. 8:22, 23, 29.

16, 17. E nafea te hoê taata aau faahaihai e haere ai i mua?

¹⁶ Ia farii te hoê taata i te hoê hopoia apî aore ra ia hinaaro oia e rave hau atu â i roto i te amuiraa, e ere ïa te auraa e e ere oia i te taata aau faahaihai. Te parau ra te Bibilia e mea maitai no te hoê tavini a Iehova ia hinaaro oia e tavini maite atu â i to ˈna mau taeae e ia haere i mua. (Tim. 1, 4:13-15) Tera râ, mea titauhia anei i te hoê hopoia apî no te haere i mua? Aita. E nehenehe tatou pauroa e haamaitai i to tatou huru Kerisetiano e te aravihi ta Iehova i horoa mai ia nehenehe tatou e tavini maitai atu â ia ˈna, a tauturu atoa ˈtu ai ia vetahi ê.

¹⁷ Hou oia a farii ai i te hoê hopoia, e imi te taata aau faahaihai eaha te titauhia ia ˈna. E pure oia no nia i te reira e e hiˈopoa maitai oia e nehenehe anei ta ˈna e rave i tera ohipa. E toe ra anei te taime e te puai no te rave i te tahi atu mau ohipa faufaa? Mai te peu e aita, e nehenehe anei te tahi ohipa ta ˈna e rave ra i teie nei, e ravehia e te tahi atu taata? I muri aˈe i te feruriraa i te reira, e faaoti paha te taata aau faahaihai e eita ta ˈna e nehenehe e amo i teie hopoia apî. Mai te peu e aau faahaihai to tatou, e parau atu paha ïa tatou, aita.

18. (a) Eaha ta te taata aau faahaihai e rave ia horoahia ˈtu te hoê hopoia apî? (b) E nafea te Roma 12:3 e tauturu ai ia tatou ia riro ei taata aau faahaihai?

¹⁸ Te hinaaro mai ra Iehova ia tatou ia “haere ma te haehaa” e o ˈna. (Mika 6:8) No reira, ia horoahia mai te hoê hopoia apî, e imi tatou i ta ˈna aratairaa e e ani tatou i ta ˈna tauturu, mai ia Gideona i na reira. Mea titauhia ia feruri maite tatou eaha ta Iehova e parau mai ra na roto i te Bibilia e ta ˈna faanahonahoraa. E haamanaˈo anaˈe e te mau mea atoa ta tatou e rave i roto i ta ˈna taviniraa, e ere maoti to tatou aravihi, no to Iehova râ haehaa e to ˈna hinaaro e tauturu ia tatou. (Sal. 18:35) No te taata aau faahaihai, “eiaha ia hau te manaˈo ia ˈna iho.”—A taio i te Roma 12:3.

19. No te aha mea tia ia faatupu tatou i te aau faahaihai?

¹⁹ Ua ite te taata aau faahaihai e no Iehova anaˈe te hanahana atoa no te mea o ˈNa te Atua poiete e te Teitei i roto i te ao taatoa. (Apo. 4:11) Mai te peu e aau faahaihai to tatou, e oaoa tatou i te rave i te mau mea atoa i roto i ta Iehova taviniraa. E faatura tatou i te mau manaˈo e huru aau o to tatou mau taeae e tuahine. Ma te na reira, e hoê tatou pauroa. E feruri maite te taata aau faahaihai hou oia a rave ai i te tahi mea, eita ïa oia e rave i te tahi mau hape ino. E mauruuru roa Iehova i te feia aau faahaihai. No reira, mea faufaa te aau faahaihai no te nunaa o te Atua. I roto i to muri mai tumu parau, e hiˈo mai tatou e nafea ia faatupu noa i te aau faahaihai noa ˈtu mea fifi ia na reira.