UA FANAUHIA vau i Wichita, Kansas, Marite i te 10 no Titema 1936, o vau te matahiapo o na tamarii e maha. E mau tavini taiva ore ia Iehova to ˈu na metua, William raua Jean. E tavini o te amuiraa to ˈu papa, e parauhia i teie nei, tiaau o te tino matahiapo. Ua haapii to ˈu mama i te parau mau i to ˈna mama ra, o Emma Wagner. Ua haapii Emma i te parau mau i e rave rahi taata, mai ia Gertrude Steele, o tei tavini ei mitionare i Porto Rico. * E rave rahi ïa hiˈoraa maitai ta ˈu.

I te hoê po mahana maa, i te paeraa o to ˈu matahiti, ua pûpû mâua to ˈu papa Te Pare Tiairaa e te vea Tamahanahanaraa (A ara mai na! i teie mahana) na te taata e haere ra na te aroâ. I tera tau, ua ô atoa to matou fenua i roto i te Piti o te tamaˈi rahi. Area to ˈu papa, ua tapea oia i to ˈna tiaraa amui ore. Ua taero roa te hoê taote, ua tapiri mai ia matou e ua faaooo oia i to ˈu papa ei taata mǎtaˈu hanoa. Ua pari oia ia ˈna i te imiraa i te otoheraa eiaha o ˈna e afaihia i te tamaˈi. Ua tapiri roa ˈtu te taote i to ˈna hohoˈa mata i te hohoˈa mata o to ˈu papa e ua parau, “No te aha eita ˈi oe e tupai mai ia ˈu,  taata mǎtaˈu hanoa!” Ua riaria vau, ua faahiahia roa râ vau i to ˈu papa. Aita oia i faaea i te opere i te mau vea na te mau taata e hiˈo noa ra ia raua. Te haere noa ra te hoê faehau, tuô atura te taote ia ˈna: “E hiˈo noa ïa oe teie taata mǎtaˈu hanoa?” Ua ite teie faehau e ua taero teie taata, parau atura oia: “A hoˈi i te fare, haere e haapee i to oe taero!” Haere atura raua toopiti. Te mauruuru nei au ia Iehova no te itoito ta ˈna i horoa i to ˈu papa. E piti fare hahuraa huruhuru taa ta ˈna i Wichita. E haere atoa teie taote e hahu i to ˈna huruhuru taa i ǒ!

I te vaˈuraa o to ˈu matahiti, ua hoo to ˈu na metua i to raua fare e ua hamani raua i te hoê fare tavere nainai. I muri iho, ua haere matou i Colorado, aita i atea noa ˈˈe i te Grand Junction, no te haere e poro i te vahi e hinaarohia ra te feia poro. E pionie to ˈu na metua e e ohipa ta raua, eiaha râ ma te taime taatoa, te faaapu e te vahi faaamuraa animara. Maoti te haamaitairaa a Iehova e ta raua ohipa pororaa itoito, ua mau mai ïa te hoê amuiraa. I te 20 no Tiunu 1948, ua bapetizo to ˈu papa ia ˈu i roto i te hoê anavai iti i nia i te mouˈa, oia atoa te feia o tei farii i te parau mau, mai ia Billie Nichols e ta ˈna vahine. Ua haere raua i muri aˈe i roto i te tuhaa haaati e ua na reira atoa ta raua tamaiti e ta ˈna vahine.

E rave rahi hoa to matou o tei haa rahi ra i roto i te taviniraa ia Iehova, mai te utuafare Steele: Don raua Earlene, Dave raua Julia e Si raua Martha. Ua oaoa roa matou i te paraparau i nia i te Bibilia e o ratou e ua ohipa mau â to ratou hiˈoraa i roto i to ˈu oraraa. Ua faaite ratou ia ˈu e e faufaahia te oraraa e e oaoa atoa ia tuuhia te Faatereraa arii i te parahiraa matamua.

I te 19raa o to ˈu matahiti, ua ani mai Bud Hasty, hoê hoa o te utuafare, ia apiti i roto i te taviniraa pionie i te Hau amui no Marite i te pae Apatoa. Ua ani mai te tiaau haaati ia haere i Ruston, i Louisiane. I reira, e rave rahi Ite no Iehova tei faaea i te haere i te mau putuputuraa e i te pororaa. Ua parau mai oia ia faatere pauroa te mau putuputuraa i te mau hebedoma atoa noa ˈtu aita e taata e haere mai. Ua faaineine mâua i te hoê vahi ta mâua i ite mai. Ua faatere mâua i te mau putuputuraa atoa. I te omuaraa, o mâua anaˈe i te putuputuraa. E taui noa mâua, e faatere hoê i te hoê tuhaa o te putuputuraa, e na te tahi ïa e pahono i te mau uiraa atoa. Mai te peu e e faahiˈoraa, e haere mâua i nia i te tahua, aita e taata i nia i te parahiraa! I muri iho, ua haamata te hoê tuahine ruhiruhia i te apiti i te mau putuputuraa. Ua haamata atoa te tahi mau piahi Bibilia e te tahi feia aita i haere faahou i te mau putuputuraa e i te pororaa i te na reira. Oioi roa ˈtura matou i te riro mai ei amuiraa.

I te hoê mahana, ua farerei mâua Bud i te hoê perepitero o te Ekalesia a te Mesia, ua paraparau oia i nia i te mau irava aita vau i ite. Ua huru ê au e ua feruri hohonu vau i ta ˈu i haapiihia mai. Hoê hebedoma, ua haapii au e tae roa ˈtu te maororaa po no te imi i te mau pahonoraa i ta ˈna mau uiraa. Ua tauturu mau â te reira ia ˈu ia haapuai i to ˈu auhoaraa e o Iehova e ua hinaaro vau e farerei i te tahi atu â perepitero.

I muri iti noa ˈˈe i te reira, ua ani mai te tiaau haaati ia haere i El Dorado i Arkansas, no te tauturu i te hoê amuiraa. A faaea noa ˈi au i ǒ, ua titau-pinepine-hia vau ia haere i Colorado i mua i te hoê tomite no te faaoti o vai te faaôhia no te tau faehau. I te hoê taime a tere ai au e te tahi mau pionie, ua û matou i Texas, e ua ino roa to ˈu pereoo. Ua taniuniu matou i te hoê taeae, ua haere mai oia e tii ia matou e ua haere matou i to ˈna fare e i te putuputuraa. I reira, ua faaarahia te amuiraa no nia i to matou ati purumu, e ua horoa mai te mau taeae i te tahi moni. Ua hoo atoa te taeae i to ˈu pereoo no te hoê tino moni fatata 2 500 farane.

 Ua haere matou i Wichita. I ǒ, ua tavini hoê hoa piri no matou ei pionie, o McCartney to ˈna iˈoa. E pii noa matou ia ˈna Doc. E hoa rahi matou ta ˈna na tamaiti maehaa, Frank raua Francis. Ua hoo mai ratou i to ratou pereoo tahito ia ˈu fatata 2 500 farane, hoê â tino moni e to ˈu pereoo ino. A tahi ra vau a ite papu ai e i to ˈu tuuraa i te Faatereraa arii i te parahiraa matamua i roto i to ˈu oraraa, ua horoa mai Iehova i te mau mea ta ˈu i hinaaro mau. I tera tere, ua haafarerei te utuafare McCartney ia ˈu i te hoê tuahine nehenehe, o Bethel Crane to ˈna iˈoa. Ua tavini to ˈna mama, o Ruth, i Wellington, Kansas, ei pionie e tae roa i te 90raa o to ˈna matahiti. Ua faaipoipo mâua Bethel aita i naea hoê matahiti i muri aˈe, i 1958, e ua haamata mâua i te taviniraa pionie i El Dorado.

Ua hinaaro mâua e pee i te mau hiˈoraa maitatai a paari mai ai, ua faaoti ïa mâua e farii i te mau titau-manihini-raa atoa no ǒ mai i ta Iehova faanahonahoraa. Ua tonohia mâua ei pionie taa ê i Walnut Ridge i Arkansas. I muri aˈe, i 1962, ua oaoa roa mâua i te titau-manihini-raahia mai no te 37raa o te piha haapiiraa no Gileada. Ua oaoa roa mâua e tei roto atoa Don Steele i ta mâua piha haapiiraa. I muri aˈe i te faatuiteraahia matou, ua tonohia mâua Bethel i Nairobi, i Kenya. Ua oto mâua i te faarueraa ia New York. I to mâua râ tapaeraa i te tauraa manureva no Nairobi, a ite ai i to tatou mau taeae o tei haere mai e farerei ia mâua, ua oaoa roa mâua!

Aita i maoro, ua au roa mâua i Kenya e i te poro i reira. O Chris raua Mary Kanaiya ta mâua mau piahi Bibilia matamua tei farii i te parau mau. Tei roto noa â raua i te taviniraa taime taatoa i Kenya. I te matahiti i muri aˈe, ua anihia mâua ia haere i Kampala, i Uganda. O mâua na mitionare matamua i tera fenua. Mea au roa i tera mau taime no te mea e rave rahi o tei hinaaro e haapii i te mau pue parau mau Bibilia, e ua riro mai ratou ei taeae e tuahine no tatou. Tera râ, i muri aˈe toru matahiti e te afa i Afirika, ua hoˈi mâua i Marite no te  haamau i te hoê utuafare. Ua rahi aˈe to mâua oto i to mâua faarueraa i te fenua Afirika i te mahana a faarue ai mâua ia New York. Ua here roa mâua i te feia i Afirika e ua manaˈo mâua e hoˈi i reira ia tae i te hoê mahana.

Ua haere mâua i te pae tooa o te râ o Colorado, i reira to ˈu na metua i te oraraa. Tau taime i muri aˈe, ua fanau mai ta mâua e tamahine, o Kimberly to ˈna iˈoa, e 17 avaˈe i muri aˈe, ua fanauhia mai o Stephany. Mea faufaa roa no mâua ta mâua hopoia apî ei metua. Ua haa rahi mâua no te haapii i te parau mau i ta mâua na tamahine nehenehe mau. Ua hinaaro mâua e pee i te mau hiˈoraa maitatai ta vetahi i vaiiho mai. Ua ite mâua e e nehenehe te hiˈoraa maitai e ohipa i nia i te tamarii, aita râ i papu e e tavini ratou ia Iehova a paari mai ai. Teie râ hoi, ua faarue hoê taeae e tuahine to ˈu i te parau mau. Mea maitai e e pee faahou raua i te mau hiˈoraa maitai o tei vaiiho-atoa-hia mai ia raua.

Ua oaoa roa mâua i te aupuru i ta mâua na tamahine, a tutava noa ˈi i te rave amui i te tahi mau ohipa. I te mea hoi e ua faaea matou piri ia Aspen, i Colorado, ua haapii matou i te faahee i nia i te hiona, ia nehenehe matou e haere e faahee i te tahi taime. E taime ïa teie no mâua no te tauaparau e ta mâua na tamahine a paiuma ˈi matou na nia i te mau matini utaraa taata. E haere atoa matou e to matou fare tavere, mea anaanatae te mau aparauraa a parahi noa ˈi i mua i te auahi. Noa ˈtu mea apî â raua, ua ui raua i te mau uiraa mai teie, “Eaha ta ˈu e rave ia paari au?” e “Teihea huru taata ta ˈu e faaipoipo?” Ua tutava mâua i te haapii i ta mâua na tamahine ia here ia Iehova. Ua faaitoito noa mâua ia raua ia riro te taviniraa taime taatoa ei fa na raua e ia faaipoipo noa i te hoê taata hoê â fa e ta raua. Ua tutava atoa mâua i te tauturu atu ia taa ia raua e mea au aˈe eiaha e faaipoipo oioi. E pinepine mâua i te parau atu, “A faaea taa noa e tae roa i te taime a naea ˈi to orua 23 matahiti.”

Ua pee mâua i te hiˈoraa o to mâua nau metua e ua haa rahi no te apiti i te mau putuputuraa e no te haere tamau i roto i te taviniraa e te utuafare. Ua rave mâua i te faanahoraa ia faaea mai vetahi i roto i te taviniraa taime taatoa i te fare. Pinepine atoa mâua i te tauaparau i te oaoa ta mâua i ite ei mitionare. Ua tiaturi mâua e ia tae i te hoê mahana, e haere matou e maha i te fenua Afirika. Ua hinaaro roa ta mâua na tamahine e haere.

E haapiiraa utuafare tamau noa ta matou. E faaohipa matou i te mau tupuraa o te nehenehe e tupu i te fare haapiiraa e na ta mâua na tamahine e rave i te tuhaa o te Ite no Iehova tei pahono i te mau uiraa. Ua au roa raua e haapii mai te reira, e ua rahi atu â to raua tiaturiraa. A paari mai ai râ, ua amuamu raua i te tahi taime no nia i te haapiiraa utuafare. I te hoê taime, ua toaruaru roa vau, parau atura vau ia raua ia haere i roto i to raua piha e aita te haapiiraa e  ravehia. Ua huru ê roa raua, haamata ˈtura raua i te taˈi e te parau mai e e hinaaro raua e haapii. I muri iho, ua taa ia mâua e ua tauturu mau â mâua ia raua ia haafaufaa i te haapiiraa no nia ia Iehova. A mairi ai te tau, ua au roa raua e haapii e ua ohie atoa no raua ia faaite mai i to raua mau manaˈo e huru aau. I te tahi taime, ua riro ei mea fifi roa ia faaroo ia raua ia parau mai e aita raua e farii i te hoê haapiiraa Bibilia. Tera râ, ua ite maitai mâua i to raua huru. I muri aˈe a haaferuri ai mâua ia raua, e farii raua i te mau ture aveia a Iehova.

Ua hemo oioi te mau matahiti a aupuru ai mâua i ta mâua na tamahine. Maoti te tauturu e te aratairaa a te faanahonahoraa a te Atua, ua rave mâua i ta mâua hopoia e haapii i ta mâua tamarii ia here ia Iehova. Ua mauruuru roa mâua a haamata ˈi raua i te tavini ei pionie i te otiraa ta raua haapiiraa tuarua. Ua haapii atoa raua i te ohipa no te aufau i ta raua mau haamâuˈaraa. Ua haere raua i Cleveland, i Tennessee e e piti atu â tuahine, no te tavini i te vahi e hinaaro-rahi-hia te feia poro. Ua mihi roa mâua ia raua. Ua oaoa râ mâua i te iteraa e ua faaohipa raua i to raua oraraa i roto i te taviniraa taime taatoa. Ua haamata faahou mâua Bethel i te tavini ei pionie, e maoti te reira i ohipa ai mâua i muri aˈe ei mono i roto i te tuhaa haaati e i te mau tairururaa.

Hou ta mâua na tamahine a haere ai i Tennessee, ua haere raua i Lonedona i Beretane, e mataitai i te amaa. Ua farerei mai ia Stephany, 19 matahiti to ˈna i tera taime, hoê taeae apî mero o te Betela, o Paul Norton to ˈna iˈoa. I te tahi atu tere, ua farerei o Kimberly, hoê o to ˈna hoa ohipa, Brian Llewellyn. I te 23raa o to ˈna matahiti, ua faaipoipo Stephany ia Paul. E te matahiti i muri aˈe, i te 25raa o to ˈna matahiti, ua faaipoipo Kimberly ia Brian. Ua faaea taa noa ïa raua e tae roa i te faito 23 matahiti. Ua oaoa roa mâua i te hoa faaipoipo ta raua i maiti.

Ua parau mai ta mâua na tamahine e ua tauturu te mau hiˈoraa ta mâua e ta to raua papa e mama ruau i vaiiho mai ia ‘mata i te imi i te Faatereraa arii na mua roa,’ noa ˈtu te fifi ra raua i te pae moni. (Mat. 6:33) I Eperera 1998, ua titau-manihini-hia o Paul raua Stephany i te 105raa o te piha haapiiraa no Gileada, e ua tonohia raua i Malawi, i Afirika. I te hoê â taime, ua titau-manihini-hia Brian raua Kimberly ia ohipa i te Betela no Lonedona e i muri aˈe, ua tonohia raua i te Betela i Malawi. Ua oaoa roa mâua no te mea ua rave ta mâua na tamahine i te ohipa maitai roa ˈˈe i to raua oraraa.

I Tenuare 2001, mai ta ˈu i faahiti i te omuaraa, ua taniuniu mai taeae Marais, tiaau o te mau tuhaa huriraa. Ua faataa mai oia e ua faanaho te mau taeae i te hoê faaineineraa o te tauturu i te feia huri na te ao atoa nei ia taa maitai atu â i te mau papai reo Beretane. Noa ˈtu e 64 matahiti to ˈu i tera taime, ua hinaaro ratou e faaineine ia ˈu ia riro vau ei taeae e horoa i te haapiiraa. Ua pure mâua Bethel no nia i te reira e ua paraparau mâua i to mâua na metua vahine no te ite i to raua manaˈo. Noa ˈtu e ua paari raua e aita raua e nehenehe e tauturu mai, ua hinaaro raua ia haere mâua. Ua taniuniu atu vau e ua parau e e oaoa roa mâua i te farii i teie titau-manihini-raa faahiahia mau.

Ite atura to ˈu mama e e maˈi mariri ai taata to ˈna. Parau atura vau ia ˈna e e faaea mâua e tauturu i to ˈu tuahine Linda ia haapao ia ˈna. Ua patoi mama e ua parau, “E ino roa ˈtu â paha ia vau, mai te peu e aita orua e haere.” Tera atoa to Linda manaˈo. Ua mauruuru roa mâua e ua ineine raua i te rave i tera huru haapaeraa, no te tauturu atoa a te mau taeae e tuahine no tera vahi. Hoê mahana i muri aˈe i to mâua haereraa i te Pu haapiiraa a te mau Ite no Iehova i Patterson, ua taniuniu mai Linda no te faaite e ua pohe mama. Mai ta ˈna i faaitoito  ia mâua ia rave, ua haa rahi mâua i roto i teie hopoia apî.

Ua oaoa roa mâua i te faarooraa e ua tonohia mâua na mua roa i te amaa no Malawi, i reira ta mâua na tamahine e ta raua tane i te taviniraa. Mea oaoa ia ite faahou te tahi i te tahi. I muri aˈe, ua haere mâua i Zimbabwe e i Zambie no te horoa i tera faaineineraa. I muri aˈe e toru matahiti e te afa to mâua horoaraa i tera faaineineraa, ua hoˈi mâua i Malawi no te papai i te aamu o te mau Ite no Iehova o tei hamani-ino-hia no to ratou tiaraa amui ore Kerisetiano. *

I 2005, ua oto faahou mâua i te faarue i te fenua Afirika. Ua hoˈi mâua i te fare i Basalt, i Colorado. Te tamau râ mâua Bethel i te tavini ei pionie i reira. I 2006, ua hoˈi mai Brian raua Kimberly e ora i pihaiiho noa i ǒ mâua no te aupuru i ta raua na tamahine e piti, Mackenzie raua Elizabeth. Tei Malawi noa â o Paul raua Stephany, tei roto Paul i te Tomite amaa i te taviniraa. I teie nei, fatata 80 matahiti to ˈu, mea oaoa roa na ˈu ia ite i te mau tane apî, o tei ohipa e o vau, e amo i te mau hopoia o ta ˈu i amo na. No te maitai o ta mâua mau tamarii e ta mâua nau mootua, ua tutava mâua i te pee i te mau hiˈoraa o ta vetahi i vaiiho mai. Ua hopoi mai te reira i te oaoa rahi.