1, 2. (a) Eaha te re ta te mau tavini a te Atua e tiai nei? (b) Eaha te tauturu ia tatou ia tamau noa i te tiatonu i te re? (A hiˈo i te hohoˈa matamua.)

 E TIATURIRAA faufaa rahi roa to te mau Kerisetiano faatavaihia. Te tiai ra ratou i te ora i nia i te raˈi. Ua pii te aposetolo Paulo i teie tiaturiraa “te re, oia hoi te oraraa i te raˈi i titau-manihini-hia ˈi [oia] e te Atua.” (Phil. 3:14) I nia i te raˈi, e faatere ratou i pihai iho ia Iesu Mesia i roto i ta ˈna Faatereraa arii a ohipa ˈtu ai e o ˈna no te tauturu i te huitaata ia riro ei huitaata tia roa. (Apo. 20:6) Auê ïa tiaturiraa faahiahia mau! Te tiai ra te mamoe ê atu i te tahi atu re. Te tiaturi nei ratou e ora e a muri noa ˈtu i roto i te paradaiso i nia i te fenua, e te mauruuru mau ra ratou i teie tiaturiraa!—Pet. 2, 3:13.

² Ua hinaaro Paulo e tauturu i to ˈna mau hoa Kerisetiano faatavaihia ia vai taiva ore noa a noaa ˈtu ai ia ratou te re. Ua  parau atu oia ia ratou: “A manaˈo noa i te mau mea no nia ra.” (Kol. 3:2) Ua titauhia ia tiatonu ratou i ta ratou tiaturiraa faufaa rahi e ora i te raˈi. (Kol. 1:4, 5) E tauturu te feruriraa i ta Iehova mau haamaitairaa i te taatoaraa o te mau tavini a te Atua ia tiatonu i te re. E parau mau teie, e tiaturiraa e ora i te raˈi anei to ratou aore ra e tiaturiraa e ora i te fenua nei.—Kor. 1, 9:24.

3. Ua faaara Paulo i te mau Kerisetiano no nia i te aha?

³ Ua faaara atoa Paulo i te mau Kerisetiano no nia i te mau fifi atâta o te nehenehe e faaere ia ratou i te re. Ei hiˈoraa, ua papai oia i to Kolosa no nia i te mau Kerisetiano haavare o tei hinaaro ia mauruuru te Atua ia ratou na roto i te peeraa i te ture a Mose, eiaha râ na roto i te faatupuraa i te faaroo i te Mesia. (Kol. 2:16-18) Ua faahiti atoa Paulo i te mau fifi atâta e ite-atoa-hia ra i teie mahana e o te nehenehe e faaere ia tatou i te re. Ua faataa oia e nafea ia patoi i te mau hinaaro tia ore e eaha te rave ia tupu te fifi i roto i to tatou utuafare aore ra e to tatou mau taeae i roto i te amuiraa. E tauturu mai ta Paulo mau aˈoraa ia tatou i teie mahana. E hiˈopoa anaˈe ïa te tahi mau faaararaa î i te here ta tatou e ite nei i roto i ta ˈna rata i to Kolosa.

4. No te aha e nehenehe ai te mau hinaaro tia ore e faaere ia tatou i te re?

⁴ I muri aˈe i to Paulo haamanaˈoraa i to ˈna mau taeae i to ratou tiaturiraa faahiahia mau, ua papai oia: “No reira, a haapohe i te mau mero o to outou tino no te fenua nei, to roto hoi te mau peu taotoraa tia ore, te peu viivii, te hinaaro faufau vî ore, te hinaaro ino, e te nounou.” (Kol. 3:5) E nehenehe te mau hinaaro tia ore e puai roa mai a faaere atu ai ia tatou i to tatou auhoaraa e o Iehova e to tatou tiaturiraa no a muri aˈe. Te parau ra te hoê taeae o tei rave na i te tahi peu tia ore e o tei hoˈi mai i roto i te amuiraa i muri aˈe e ua puai roa mai to ˈna mau hinaaro tia ore e “ua taere roa i to ˈna fariu-ê-raa ˈtu i te reira.”

5. E nafea tatou e paruru ai ia tatou iho i te mau tupuraa atâta?

⁵ Mea titauhia ia vai ara tatou mai te peu e tei roto tatou i te hoê tupuraa o te nehenehe e aratai ia tatou ia ore e faaroo i ta Iehova mau ture aveia morare. Ei hiˈoraa, e haerea paari ia tauaparau na mua te hoê tane e te hoê vahine o te haamatau ra e nafea raua e faaohipa ˈi i ta te Bibilia e haapii mai ra no nia i te mau mea mai te tapeapearaa, te apaparaa, e te faaearaa o raua anaˈe. (Mas. 22:3) E nehenehe te tahi mau fifi e fa mai i roto i te hoê tere ohipa aore ra ia ohipa tatou e te hoê taata mero ê. (Mas. 2:10-12, 16) Eaha ta oe e nehenehe e rave no te paruru ia oe? A faaite e e Ite no Iehova oe. Ia tura noa to oe haerea, e a haamanaˈo e e nehenehe te faahinaaro e aratai i te ati. Mea titau-atoa-hia ia vai ara tatou mai te peu e te oto ra aore ra te moˈemoˈe nei tatou. E hinaaro paha tatou ia haafaufaa mai te tahi taata ia tatou. No te rahi o te toaruaru e fariu atu ai paha tatou i nia i te taata o te tâuˈa mai ia tatou. Mea atâta te reira. Mai te peu e e ite noa ˈtu oe i tera tupuraa, eiaha e vaiiho i te tahi noa ˈˈe mea ia faaere ia oe i te re. A ani ia Iehova e to oe mau taeae e tuahine i te tauturu.—A taio i te Salamo 34:18; Maseli 13:20.

6. Eaha te tia ia haamanaˈo ia maiti tatou i te faaanaanataeraa?

 ⁶ No te haapohe i te mau hinaaro tia ore, mea titauhia ia patoi tatou i te mau faaanaanataeraa tia ore. I teie mahana, te haamanaˈo mai ra te rahiraa o te faaanaanataeraa i te mau mea tei tupu na i Sodoma e Gomora. (Iuda 7) Te faaô ra te taata i te mau peu taotoraa tia ore i roto i te mau faaanaanataeraa mai te mea ra e e ere te reira i te mea ino. Mea tia ïa ia ara noa tatou. Eita ta tatou e nehenehe e farii i te mau faaanaanataeraa atoa ta teie nei ao e pûpû mai. Mea tia râ ia maiti tatou i te faaanaanataeraa o te ore e faaere ia tatou i te re o te ora.—Mas. 4:23.

7. Eaha te mau fifi e nehenehe e tupu mai i roto i te amuiraa Kerisetiano?

⁷ Te oaoa nei tatou i te mea e tei roto tatou i te amuiraa Kerisetiano. Te haapii ra tatou i te Parau a te Atua i te mau putuputuraa, e te turu ra tatou te tahi i te tahi ma te here. E tauturu te reira ia tatou ia tiatonu noa i te re. Tera râ, i te tahi taime, e tupu te tahi mau taa-ore-raa o te nehenehe e faatupu i te peapea e to tatou mau taeae e tuahine. Mai te peu e eita tatou e faaafaro i teie mau peapea, e ohie roa tatou i te faatupu i te inoino.—A taio i te Petero 1, 3:8, 9.

8, 9. (a) Eaha te mau huru maitatai o te tauturu mai ia noaa ia tatou te re? (b) Eaha te tauturu mai ia vai hau noa mai te peu ua rave hoê hoa Kerisetiano i te tahi mea e riri ai tatou?

⁸ Eita tatou e nehenehe e vaiiho i te inoino ia faaere ia tatou i te re. Ua faataa Paulo eaha tei titauhia i te mau Kerisetiano ia rave: “Ia ahu mai outou i te here rahi, te aumihi, te hamani maitai, te haehaa, te mǎrû e te faaoromai, mai tei au i te feia maitihia e te Atua, e te moˈa e te herehia. A faaoromai noa i te tahi e te tahi, e ia hapa noa mai te tahi ia oe, a faaore noa ˈtu ïa i ta ˈna hapa. Mai ia Iehova i faaore noa mai i ta outou ra, ia na reira atoa ˈtu outou. Hau atu â râ i taua mau mea nei, a ahu mai i te here, o te taamu tia roa ïa e tahoê ai te taata.”—Kol. 3:12-14.

⁹ E tauturu mai te here e te hamani maitai ia faaore i te hapa a vetahi ê. Mai te peu e te mauiui nei tatou no ta te tahi taata i parau aore ra i rave, e feruri anaˈe i te mau taime i parau aore ra i rave ai tatou i te tahi mea tano ore i nia ia vetahi ê e ua faaore mai ratou i ta tatou hapa. Eita e ore e ua mauruuru roa tatou i to ratou here e hamani maitai! (A taio i te Koheleta 7:21, 22.) Te mauruuru nei tatou e te tahoê ra te Mesia i te feia haamori mau. (Kol. 3:15) Te here nei tatou paatoa i te hoê â Atua, te poro nei tatou i te hoê â poroi, e hoê â fifi ta tatou e faaruru nei. Mai te peu e here e e hamani maitai tatou te tahi i te tahi a faaore atu ai i te hapa, e tahoê atu â ïa te amuiraa e e tamau tatou i te tiatonu i te re.

10, 11. (a) No te aha mea atâta ˈi te pohehae? (b) E nafea tatou e patoi ai i te pohehae ia ore te reira ia faaere ia tatou i te re?

¹⁰ E faaere te pohehae ia tatou i te re. Te faaite mai ra te tahi mau aamu Bibilia e mea atâta roa te pohehae. Ei hiˈoraa, ua pohehae Kaina ia Abela e taparahi pohe atura ia ˈna. Ua pohehae Kora, Datana e Abirama ia Mose e orure hau atura ratou ia ˈna. Ua pohehae Saula ia Davida e tamata ˈtura i te taparahi pohe ia ˈna. E parau mau iho â ta te Parau a te Atua e faaite ra: “I te mau vahi . . . te vai ra te pohehae e te  imi hara, tei reira atoa ïa te faahuehueraa e te mau mea iino atoa.”—Iak. 3:16.

¹¹ Mai te peu e tutava tatou i te faatupu i te here e te hamani maitai, eita tatou e pohehae ohie noa. Te na ô ra te Parau a te Atua: “E faaoromai e e hamani maitai te here. Eita te here e pohehae.” (Kor. 1, 13:4) Ia ore te pohehae ia riro mai ei tuhaa o to tatou huru taata, mea tia ia hiˈo tatou i te mau mea mai ta Iehova e hiˈo ra. Mea tia ia hiˈo tatou i to tatou mau taeae e tuahine ei mero o te hoê â tino, te amuiraa. Te parau ra te Bibilia: “Ia haapopouhia te hoê, o te mau mero atoa ïa o te tino te oaoa.” (Kor 1, 12:16-18, 26) Mai te peu e ohipa maitai te tupu no te hoê taeae, e oaoa tatou no ˈna, eita tatou e pohehae atu. A feruri na i te hiˈoraa o Ionatana, te tamaiti a Saula. Aita Ionatana i pohehae i te maitiraahia Davida no te riro mai ei arii. Ua faaitoito râ e ua turu noa oia ia Davida. (Sam. 1, 23:16-18) E nehenehe anei tatou e faaite i te hamani maitai e te here mai ia Ionatana?

12. Eaha te aˈoraa Bibilia te tauturu i to tatou utuafare ia noaa i te re?

¹² Ia pee te mau mero atoa o to tatou utuafare i te mau aratairaa Bibilia, e hau ïa e e oaoa to tatou utuafare, e e noaa ia tatou te re. Ua horoa Paulo i teie aˈoraa î i te paari i te mau utuafare: “Outou te mau vahine faaipoipo, a auraro i ta outou iho tane mai tei au i te Fatu. Outou te mau tane faaipoipo, a here noa i ta outou iho vahine e eiaha e iria ˈtu ia ratou. Outou te mau tamarii, a faaroo i to outou na metua i te mau mea atoa, e mauruuru hoi te Fatu i te reira. Outou te mau metua tane, eiaha e faariri i ta outou mau tamarii, a toaruaru roa ˈtu ai ratou.” (Kol. 3:18-21) Te ite ra anei tatou e nafea teie aˈoraa e tauturu ai i to tatou utuafare?

13. E nafea te hoê tuahine Kerisetiano e horoa ˈi i ta ˈna tane e ere i te Ite no Iehova, i te hinaaro e tavini ia Iehova?

 ¹³ Peneiaˈe e tuahine oe e aita ta oe tane faaipoipo e tavini ra ia Iehova. Eaha ta oe e rave mai te peu aita o ˈna e haa ra ma te tano i nia ia oe, mai tei titauhia i te hoê tane faaipoipo? E iria paha oe, a tatamaˈi atu ai e o ˈna. E maitai râ anei te tupuraa? E noa ˈtu o oe te upootia mai, e turai anei te reira ia ˈna ia hinaaro e tavini ia Iehova? Eita paha. Ia faatura râ oe ia ˈna ei upoo o te utuafare, e tauturu oe i to utuafare ia faatupu atu â i te hau e e faahanahana oe ia Iehova. E turai atoa paha to oe hiˈoraa maitai i ta oe tane ia tavini ia Iehova. I reira, o orua toopiti ïa te nehenehe e fanaˈo i te re.—A taio i te Petero 1, 3:1, 2.

14. Eaha te titauhia i te hoê tane faaipoipo Kerisetiano mai te peu e aita ta ˈna vahine e ere i te Ite no Iehova e faatura ra ia ˈna?

¹⁴ Peneiaˈe e taeae oe e aita ta oe vahine faaipoipo e tavini ra ia Iehova. Eaha ta oe e rave mai te peu aita o ˈna e faatura ra ia oe? Mai te peu e tamata oe i te faaite atu ia ˈna na vai e faatere ma te tutuô i nia ia ˈna, e faatura anei o ˈna ia oe? Eita roa ˈtu! Te tiai ra te Atua ia riro oe ei tane here o te pee i to Iesu hiˈoraa. (Eph. 5:23) Mea faaoromai noa e mea here o Iesu, te upoo o te amuiraa. (Luka 9:46-48) Mai te peu e pee oe i to Iesu hiˈoraa, e hinaaro atoa paha ïa ta oe vahine i muri aˈe e tavini ia Iehova.

15. E nafea te hoê tane Kerisetiano e faaite ai i ta ˈna vahine e mea here na ˈna ia ˈna?

¹⁵ Te haapii ra Iehova i te mau tane faaipoipo: “A here noa i ta outou iho vahine e eiaha e iria ˈtu ia ratou.” (Kol. 3:19) E faatura te hoê tane î i te here i ta ˈna vahine. E nafea? E faaroo o ˈna i to ˈna mau manaˈo e e faaite atoa o ˈna e mea faufaa no ˈna ta ˈna e parau ra. (Pet. 1, 3:7) Noa ˈtu aita ta te tane e nehenehe e rave i te  mau mea atoa ta ta ˈna vahine e parau, e nehenehe te faarooraa ia ˈna e tauturu atu ia rave i te faaotiraa maitai aˈe. (Mas. 15:22) Eita te hoê tane î i te here e titau ia faatura ta ˈna vahine ia ˈna. E tutava râ o ˈna ia noaa mai ia ˈna te faatura a ta ˈna vahine. Ia here te hoê tane i ta ˈna vahine e ta ˈna mau tamarii, e oaoa aˈe ratou a tavini ai ia Iehova, e e noaa ia ratou te re o te ora.

16, 17. Ei taata apî, eaha te rave ia ore oe e iria i to oe na metua?

¹⁶ Peneiaˈe e taurearea oe e te manaˈo ra oe e aita to oe na metua e taa ra ia oe aore ra mea etaeta roa ratou i nia ia oe. E riri paha oe e e turai te reira ia oe ia uiui ia oe e te hinaaro ra iho â anei oe e tavini ia Iehova. Ia faarue râ oe ia Iehova, e ite oe e aita ˈtu e taata te here mau ra ia oe maori râ to oe na metua Kerisetiano e to oe mau hoa i roto i te amuiraa.

¹⁷ A feruri na: ahani aita to oe na metua i aˈo ia oe, e nafea ïa oe e ite ai e mea here anei na raua ia oe? (Heb. 12:8) Parau mau, e feia tia ore raua, e nehenehe iho â oe e riri i ta raua huru aˈoraa. Eiaha râ e tamau i to oe feruriraa i nia i te reira. A tamata i te taa i te mau tumu e na reira ˈi raua. A faaea hau noa, e eiaha e iria. Te na ô ra te Parau a te Atua: “O tei ore e ru i te parau, ua noaa ia ˈna te ite; e te taata i noaa ia ˈna te ite ra e aau maitai to ˈna.” (Mas. 17:27) Ia riro mai oe ei taata feruriraa paari o te farii i te aˈoraa a huti atu ai i te haapiiraa, aita e hiˈoraa mea nafea te aˈoraa i te horoaraahia mai. (Mas. 1:8) Eiaha e haamoˈe e e ô faufaa rahi te mau metua o te here ra ia Iehova. Te hinaaro ra ratou e tauturu ia oe ia ora e a muri noa ˈtu.

18. No te aha oe e faaoti papu ai i te tamau noa i te tiatonu i te re?

¹⁸ E tiaturiraa e ora e a muri noa ˈtu i te raˈi anei to tatou aore ra i nia i te fenua paradaiso, e nehenehe tatou tataitahi e tiai ru i te hoê a muri aˈe faahiahia mau. Mea mau ta tatou tiaturiraa. Ua niuhia te reira i nia i te parau fafau a te Atua poiete o te ao taatoa, o te faaite ra: “E î hoi te fenua i te ite ia Iehova.” (Isa. 11:9) Fatata roa te mau taata atoa i nia i te fenua i te haapiihia e te Atua. Mea hoona ia ohipa tatou ia noaa ia tatou i teie re. A haamanaˈo noa ïa eaha ta Iehova i fafau ia oe, e eiaha e vaiiho i te tahi noa ˈˈe mea e faaere ia oe i te re!