1, 2. (a) Eaha to Iesu manaˈo no nia i te ture a te Atua? (b) Mea nafea to te mau papai parau e Pharisea faaohiparaa i te ture a Mose ma te tano ore?

 UA HAAFAUFAA Iesu i te ture a Mose. E ere mea maere no tatou, no ǒ mai teie ture i to ˈna Metua ra ia Iehova, o ˈNa hoi ta Iesu i here roa ˈˈe. I te Salamo 40:8, ua tohu te Bibilia e e haafaufaa Iesu i te ture a te Atua: “E mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau.” Ua faaite Iesu na roto i ta ˈna mau parau e haaraa e mea tia roa te ture a te Atua, e faufaahia te taata atoa, e mea papu e tupu iho â te reira.—Mat. 5:17-19.

² Eita e ore e ua mauiui Iesu i to te mau papai parau e Pharisea faaohiparaa i te ture a to ˈna Metua ma te tano ore, a faariro atu ai i te reira ei mea teimaha roa ia pee. Ua parau oia ia ratou: “Te horoa nei outou i te tuhaa ahuru o te mineta, te aneto e te kumina,” te auraa ïa e mea haapao roa ratou i te auraro i te mau tuhaa iti roa ˈˈe o te ture a Mose. Eaha ïa te fifi? Ua faataa Iesu: “Ua haapae râ [outou] i te mau mea faufaa aˈe o te ture a Mose, oia hoi te parau-tia, te aroha hamani maitai e te taiva ore.” (Mat. 23:23) Aita te mau Pharisea i ite i te faufaaraa mau  o te ture a Mose, e ua manaˈo e mea maitai aˈe ratou ia vetahi ê. Ua taa râ ia Iesu te faufaaraa o te ture a Mose e eaha ta te faaueraa tataitahi i faaite no nia ia Iehova.

3. Eaha ta tatou e hiˈo mai i roto i teie tumu parau?

³ Ei Kerisetiano, aita e titauhia ia auraro tatou i te ture a Mose. (Roma 7:6) No te aha ïa Iehova i tuu ai i te reira i roto i ta ˈna Parau, te Bibilia? Te hinaaro nei oia ia taa e ia faaohipa tatou i “te mau mea faufaa aˈe o te ture a Mose,” oia hoi te mau aratairaa tumu no ǒ mai i taua ture ra. Ei hiˈoraa, eaha te mau aratairaa tumu ta tatou e haapii mai i te faanahoraa o te mau oire haapuraa? I roto i to na mua ˈtu tumu parau, ua huti mai tatou i te tahi mau haapiiraa na roto i te hiˈopoaraa i te mau mea tei titauhia ia rave te hoê taata horo ê. I roto i teie tumu parau, e hiˈo mai tatou eaha ta te mau oire haapuraa e haapii mai no nia ia Iehova e e nafea tatou e pee ai i to ˈna mau huru maitatai. E pahono mai tatou i teie na toru uiraa: E nafea te mau oire haapuraa e faaite ai e mea aroha hamani maitai o Iehova? Eaha ta tera mau oire e haapii mai ra no nia i to te Atua manaˈo i nia i te ora? E e nafea tera noa â mau oire e faaite ai i ta ˈna parau-tia? I roto i te tuhaa tataitahi, a tamata i te hiˈo e nafea oe e nehenehe ai e pee i te hiˈoraa o to Metua i te raˈi.—A taio i te Ephesia 5:1.

4, 5. (a) Eaha tei ravehia ia ohie noa no te taata horo ê te haereraa i te hoê oire haapuraa, e no te aha? (b) Eaha ta te reira e haapii mai ra no nia ia Iehova?

⁴ Ua haapao Iehova ia ohie noa te haereraa i na ono oire haapuraa. Ua faaue oia i te mau Iseraela ia maiti e toru oire i te pae tataitahi o te anavai Ioridana. No te aha? Ia nehenehe te hoê taata horo ê e tapae oioi e ma te ohie i roto hoê o na ono oire. (Num. 35:11-14) E atuatu-noa-hia te mau purumu o te aratai i tera mau oire. (Deut. 19:3) Ia au i te taˈere ati Iuda, i tuuhia na te tahi mau tapao i nia i te mau purumu ia itea mai i te feia horo ê taua mau oire ra. Inaha ua faanahohia te mau oire haapuraa i Iseraela, aita ïa i titauhia ia haere te hoê Iseraela o tei haapohe i te hoê taata ma te opua ore, i te hoê fenua ê no te imi i te paruru, aˈunei hoi oia e turaihia ˈi ia haamori i te mau atua haavare.

⁵ A feruri na: ua faaue Iehova ia haapohehia te feia taparahi taata. Ua haapao atoa râ oia ia fanaˈo te taata o tei haapohe i te tahi atu ma te opua ore i te aroha hamani maitai, te aumauiui e te paruru. Ua parau te hoê aivanaa Bibilia e ua faaohie-roa-hia te mau mea atoa no ratou. E ere Iehova i te  haava ino o te imi i te ravea no te faautua i ta ˈna mau tavini. E Atua “aroha hamani maitai rahi” râ oia.—Eph. 2:4.

6. Ua pee anei te mau Pharisea i to Iehova aroha hamani maitai? A faataa.

⁶ Taa ê atu ia Iehova, aita te mau Pharisea i hinaaro e faaite i te aroha hamani maitai ia vetahi ê. Ei hiˈoraa, te faaite ra te taˈere ati Iuda e ua patoi te mau Pharisea i te faaore i te hapa a te hoê taata o tei rave i te hoê â hape hau atu e toru taime. No te faaite e e ere roa ˈtu mea tano to ratou huru feruriraa, ua faaohipa Iesu i te tahi hiˈoraa no nia i te hoê Pharisea e pure ra i pihai iho i te hoê titau tute. Ua parau te Pharisea: “E te Atua e, te haamauruuru atu nei au ia oe i te mea e ere au mai te tahi atu mau taata, e eiâ hoi, e feia parau-tia ore, e faaturi. E ere atoa vau mai tera titau tute.” Eaha ta Iesu i hinaaro e haamahiti? No te mau Pharisea, “e mea faufaa ore vetahi ê,” e aita ratou i manaˈo e mea titauhia ia faaite ratou i te aroha hamani maitai.—Luka 18:9-14.

7, 8. (a) E nafea e pee ai i to Iehova aroha hamani maitai? (b) No te aha mea titauhia ia faatupu i te haehaa no te faaore i ta vetahi ê mau hapa?

⁷ A pee i to Iehova hiˈoraa, eiaha i to te mau Pharisea. A faaite i te aroha hamani maitai e te aumauiui. (A taio i te Kolosa 3:13.) A haamâmâ ia vetahi ê ma te farii i ta ratou aniraa ia faaore i ta ratou hapa. (Luka 17:3, 4) A ui ia oe iho: ‘E faaore oioi e ohie anei au i ta vetahi ê hapa noa ˈtu mea pinepine ratou i te hapa i nia ia ˈu? E ru anei au i te faatupu i te hau e te taata o tei hapa i nia ia ˈu, aore ra o tei haamauiui mai?’

⁸ No te faaore i te hapa, mea tia ia faatupu tatou i te haehaa. Ua manaˈo te mau Pharisea e mea maitai aˈe ratou ia vetahi ê, no reira aita ratou i hinaaro e faaore i te hapa. Ei Kerisetiano râ, ia “haamanaˈo” tatou ma te haehaa “e mea hau aˈe vetahi ê” ia tatou, e ia faaore noa tatou i ta ratou hapa. (Phil. 2:3) E nehenehe tatou e ui ia tatou iho, ‘Te pee ra anei au ia Iehova a faaite atoa ai i te haehaa?’ Mai te peu e mea haehaa tatou, e ohie aˈe ïa no vetahi ê ia ani mai ia farii tatou i te tatarahapa e e ohie aˈe no tatou ia faaore i ta ratou hapa. Ia oioi tatou i te faaite i te aroha hamani maitai, eiaha atoa e ru i te inoino.—Koh. 7:8, 9.

9. Mea nafea Iehova i te tautururaa i te mau Iseraela ia taa e mea moˈa te ora?

⁹ Hoê o na tumu matamua roa i haamauhia ˈi te mau oire haapuraa, no te paruru ïa i te mau Iseraela ia ore ratou ia riro mai ei taparahi taata ma te haamaniiraa i te toto o te taata hara ore. (Deut. 19:10) Mea haafaufaa roa na Iehova te ora, mea riri na ˈna te haapoheraa taata. (Mas. 6:16, 17) Ei Atua parau-tia e te moˈa, aita ta ˈna e nehenehe e tapiri noa i to ˈna mata i mua i te hoê haapoheraa noa ˈtu mea opua-ore-hia. Mea papu e e nehenehe te hoê taata o tei haapohe i te tahi atu ma te opua ore e fanaˈo i  te aroha hamani maitai. Na mua râ, e titauhia ia faataa oia i to ˈna tupuraa i te mau matahiapo. Mai te peu e faaoti te mau matahiapo e aita iho â te pohe i opuahia, e titauhia ïa ia faaea tei horo ê i roto i te oire haapuraa e tae roa ˈtu i te mahana e pohe ai te tahuˈa rahi o te oire. Te auraa paha ïa e e tia ia faaea mai oia i roto i te oire haapuraa no te toea o to ˈna oraraa. Ua haapapu teie faanahoraa i te mau Iseraela atoa e mea moˈa te ora. No te faatura i tei horoa mai i te ora, ua titauhia ia rave ratou i te mau mea atoa ia ore te tahi taata ia pohe ia ratou.

10. Ia au i te parau a Iesu, mea nafea te mau papai parau e Pharisea i faaite ai e aita ratou i haafaufaa i to vetahi ê ora?

¹⁰ Taa ê atu ia Iehova, ua faaite te mau papai parau e Pharisea e aita ratou i haafaufaa i to vetahi ê ora. Ua parau Iesu ia ratou: “Ua hopoi ê outou i te taviri e noaa ˈi te ite. Aita outou iho i tomo atu, e ua tapea outou i te feia i hinaaro e tomo atu!” (Luka 11:52) Eaha ta Iesu i hinaaro e parau? Te tanoraa, ia faataa te mau papai parau e Pharisea i te Parau a te Atua i te taata a tauturu atu ai ia ratou ia fanaˈo i te ora mure ore. Ua tamata râ ratou i te tapea i te taata ia ore ratou ia pee ia Iesu, “te Aratai rahi tei faatoroahia no te horoa i te ora.” (Ohi. 3:15) Na roto i teie raveraa, ua aratai ïa ratou i te taata i te haamouraa. Ua faaite te mau papai parau e Pharisea i te teoteo e te miimii, e aita ratou i tâuˈa aˈe i te ora o te taata. Mea ino mau ratou!

11. (a) Mea nafea te aposetolo Paulo i faaite ai e te haafaufaa ra o ˈna i te ora, mai ia Iehova? (b) Eaha te tauturu ia tatou ia pee i te itoito rahi o Paulo no te pororaa?

¹¹ E nafea tatou e pee ai ia Iehova a ape atu ai i te riro mai mai te mau papai parau e Pharisea? Mea na roto ïa i te faaturaraa e te haafaufaaraa i te ora. Ua na reira te aposetolo Paulo ma te poro i te parau apî oaoa no nia i te Faatereraa arii i te mau taata atoa ta ˈna i farerei. No reira i tano ai to ˈna parauraa e aita roa o ˈna i viivii i te toto o te taata atoa. (A taio i te Ohipa 20:26, 27.) Ua poro noa anei râ Paulo no te mea aita o ˈna i hinaaro e faahapa ia ˈna iho aore ra no te mea ua faaue Iehova ia ˈna ia na reira? Aita. Mea here na Paulo te taata. No ˈna, mea faufaa roa to ratou ora, e ua hinaaro oia ia noaa ia ratou te ora mure ore. (Kor. 1, 9:19-23) Mea tia ia haafaufaa atoa tatou i te ora mai ia Iehova. Te hinaaro nei oia ia tatarahapa te mau taata atoa, a nehenehe atu ai e fanaˈo i te ora. (Pet. 2, 3:9) No te pee i to Iehova hiˈoraa, mea titauhia ia here tatou i te taata. E turai mai te hoê huru feruriraa aroha hamani maitai ia poro ma te itoito rahi e e horoa mai te reira i te oaoa a poro ai tatou.

12. No te aha mea faufaa ˈi no te nunaa o te Atua te parururaa?

¹² No te haafaufaa i te ora mai ia Iehova, ia tano atoa ïa to tatou manaˈo no nia i te parururaa. Mea titauhia ia haapao maitai tatou ia faahoro e ia ohipa tatou, ia patu, ia atuatu aore ra ia haere tatou i te hoê vahi haamoriraa. Te mea faufaa roa ˈˈe, o te taata ïa, te parururaa e te ea, e ere te taime aore ra te moni. E rave noa te Atua i te mea tano e te hinaaro nei tatou e pee i to ˈna hiˈoraa. O te mau matahiapo iho â râ te tano ia haamanaˈo i te parururaa, to ratou iho e to vetahi ê atoa. (Mas. 22:3) Mai te peu e haamanaˈo atu te hoê matahiapo ia oe te mau aratairaa no nia i te parururaa, a faaroo ia ˈna. (Gal. 6:1) A haafaufaa i te ora mai ia Iehova, “ia ore hoi ia iri te toto taata i nia ia oe.”

13, 14. Mea nafea te mau matahiapo Iseraela i pee ai i ta Iehova parau-tia?

¹³ Ua faaue Iehova i te mau matahiapo  Iseraela ia pee i ta ˈna parau-tia. A tahi, ua titauhia ia ite te mau matahiapo i te mau mea atoa tei tupu. I muri mai, ua titauhia ia hiˈopoa maite ratou i te manaˈo turai o te taata tei haapohe i te tahi atu, to ˈna huru, e te mau ohipa ta ˈna i rave na hou a faaoti ai i te faaite i te aroha hamani maitai. Ua titauhia ia tuatapapa te mau matahiapo e mea riri anei na te taata faahapahia te taata ta ˈna i haapohe e ua hinaaro roa ˈtura e haapohe ia ˈna. (A taio i te Numera 35:20-24.) Mai te peu e te vai ra te feia tei ite i te ohipa i tupu, tei te parau ïa a e piti aˈe ite e nehenehe ai e faautuahia te hoê taparahi taata.—Num. 35:30.

¹⁴ Ia itea mai ia ratou eaha mau na tei tupu, e titauhia ia feruri te mau matahiapo i te taata hapa, eiaha noa i te mea ta ˈna i rave. Ua titauhia i te mau matahiapo te haroˈaroˈa ia nehenehe ratou e hiˈo eiaha noa te ohipa ravehia, oia atoa râ te mau tumu i tupu ai tera ohipa. Te mea faufaa roa ˈˈe tei titauhia ia ratou, o to Iehova varua moˈa ïa, no te tauturu ia ratou ia pee i to ˈna haroˈaroˈa, aroha hamani maitai, e parau-tia.—Exo. 34:6, 7.

15. Mea nafea te huru o Iesu i nia i te feia rave hara i taa ê ai i to te mau Pharisea?

¹⁵ Aita te mau Pharisea i haava ma te aroha hamani maitai. Ua haapao noa ratou i te mea ta te hoê taata rave hara i rave, aita râ i feruri i to ˈna huru taata. I to te tahi mau Pharisea iteraa ia Iesu i te tamaaraa i te fare o Mataio, ua ui ratou i te mau pǐpǐ: “Eaha ta outou orometua e tamaa ˈi e te feia titau tute e te feia rave hara?” Pahono atura Iesu: “E ere te taote no te feia oraora maitai, no te feia maˈi râ. A haere na ïa a haapii i te auraa o teie parau: ‘O te aroha hamani maitai ta ˈu e hinaaro eiaha te tusia.’ Ua haere mai hoi au e titau i te feia rave hara ia tatarahapa, eiaha râ te feia parau-tia.” (Mat. 9:9-13) Ua tamata anei Iesu i te paruru i te feia rave hara? Aita roa ˈtu. Ua hinaaro oia ia tatarahapa ratou. E tuhaa faufaa roa teie o te poroi ta ˈna i poro. (Mat. 4:17) Ua ite Iesu e ua hinaaro te tahi “feia titau tute e . . . feia rave hara” e taui. E ere no te tamaa te tumu matamua i haere ai ratou i te fare o Mataio, no te pee râ ia Iesu. (Mar. 2:15) Tera râ, aita te rahiraa o te mau Pharisea i hiˈo i te taata mai ia Iesu i hiˈo ia ratou. Aita ratou i tiaturi e e nehenehe te taata e taui, e ua hiˈo ratou i taua mau taata rave hara ra mai te mea ra e aita e ravea faahou no te tauturu ia ratou. Mea taa ê roa ratou ia Iehova, te Atua parau-tia e te aroha hamani maitai!

16. Ia tamata te tomite haavaraa i te ite i te aha?

¹⁶ Mea tia i teie mahana ia pee te mau matahiapo i to Iehova hiˈoraa, “mea au hoi na Iehova te parau-tia.” (Sal. 37:28) A tahi, e titauhia ia “imi maite,” aore ra ia tuatapapa ratou i te tupuraa, no te haapapu e e hara iho â tei ravehia. Mai te peu e tera iho tei tupu, e pee ratou i te mau aratairaa Bibilia no te faaoti eaha te rave. (Deut. 13:12-14) Mai te peu e tei roto ratou i te tomite haavaraa, mea titauhia ia ara maitai ratou e te tatarahapa mau ra iho â anei te taata o tei rave i te hara rahi. E ere te reira i te mea ohie noa ia ite. I roto i te tatarahapa, e ô mai te parau o te huru feruriraa o te taata rave hara no nia i te ohipa ta ˈna i rave e te mea e vai ra i roto i to ˈna aau. (Apo. 3:3) Mea tia ia tatarahapa te hoê taata rave hara no te fanaˈo i te aroha hamani maitai. *

17, 18. E nafea te mau matahiapo e ite ai e ua tatarahapa mau iho â anei te hoê taata? (A hiˈo i te hohoˈa matamua.)

¹⁷ Ua ite Iehova e Iesu eaha mau na ta te hoê taata e manaˈo ra no te mea e ite raua i  roto i te aau. Aita râ te mau matahiapo e ite ra i roto i te aau. No reira, mai te peu e matahiapo oe, e nafea ïa oe e ite ai e ua tatarahapa mau iho â te hoê taata? A tahi, a ani i te paari e te haroˈaroˈa na roto i te pure. (Arii 1, 3:9) A piti, a faaohipa i te Parau a te Atua e te mau papai Bibilia no ǒ mai i te tavini haapao maitai e te paari no te tauturu ia oe ia ite i te taa-ê-raa i rotopu i “te oto ia au i teie nei ao” e “te oto ia au i te hinaaro o te Atua,” oia hoi te tatarahapa mau. (Kor. 2, 7:10, 11) A hiˈo e nafea te Bibilia e faataa ˈi i te feia o tei faaite i te tatarahapa e te feia o tei ore i na reira, e a feruri i to ratou mau huru aau, manaˈo, e ta ratou mau haaraa.

¹⁸ A toru, a feruri i te taata iho, eiaha noa i te mea ta ˈna i rave. No te aha mai tera ˈi oia? No te aha oia i rave ai i tera aore ra tera faaotiraa? Eaha to ˈna mau fifi e taotiaraa? Ua tohu te Bibilia no nia ia Iesu, te upoo o te amuiraa Kerisetiano, e “e ore . . . ta ˈna parau e faaauhia i tei itea e tana mata; e ore hoi oia e aˈo i ta to ˈna tariˈa i faaroo ra: e haava râ oia i te taata rii ma te parau-tia ra; e tuu hoi oia i te parau au i te feia mamahu [aore ra haehaa] o te fenua nei.” (Isa. 11:3, 4) E te mau matahiapo, ua faatoroa Iesu ia outou no te aupuru i ta ˈna amuiraa, e e tauturu oia ia outou ia haava ma te parau-tia e te aroha hamani maitai. (Mat. 18:18-20) Te mauruuru nei tatou e te vai ra te mau matahiapo o te aupuru nei ia tatou! Te tauturu atoa mai ra ratou ia tatou ia faaite i te parau-tia e te aroha hamani maitai i nia ia vetahi ê.

19. Eaha te haapiiraa no nia i te mau oire haapuraa ta oe e opua nei i te faaohipa?

¹⁹ Te vai ra “te hohoˈa o te ite e o te parau mau” i roto i te ture a Mose. Te haapii mai ra te reira no nia ia Iehova e ta ˈna mau aratairaa. (Roma 2:20) Te haapii ra te mau oire haapuraa i te mau matahiapo e nafea ia haava ma te parau-tia mau, e te haapii mai ra te reira ia tatou paatoa e nafea ia faaite i te here taiva ore e te “aroha” hamani maitai te tahi i te tahi. (Zek. 7:9) Noa ˈtu aita tatou e titauhia mai ra ia pee i te ture a Mose, aita Iehova i taui. Mea faufaa noa â no ˈna te parau-tia e te aroha hamani maitai. E fanaˈoraa taa ê mau to tatou i te haamoriraa i te hoê Atua mai ia ˈna. E pee anaˈe i to ˈna mau huru maitatai nehenehe mau, a imi atu ai i ta ˈna paruru!