1, 2. (a) Eaha te itehia ia ore te taata e haavî ia ratou iho? (b) No te aha mea tia ia tauaparau no nia i te haavîraa ia ˈna iho?

 E HURU maitai te haavîraa ia ˈna iho ta te Atua ra o Iehova e nehenehe e tauturu ia tatou ia faatupu. (Gal. 5:22, 23) E haavî Iehova ia ˈna iho ma te tia roa, e ere râ tatou mai ia ˈna no te mea e taata tia ore tatou. E rave rahi fifi ta te taata e faaruru nei i teie mahana no te mea aita ratou e haavî ra ia ratou iho. E turai paha te reira i te hoê taata ia haamarirau i te rave i te tahi ohipa faufaa roa aore ra ia ore e ohipa maitai i te haapiiraa aore ra i te raveraa ohipa. E turai atoa paha te oreraa e haavî ia ˈna iho ia faahiti i te mau parau tano ore, ia inu hua i te ava, ia haavî uˈana i te tahi atu, ia faataa, ia tarahu faufaa ore i te moni, ia faatupu i te hiaai mâha ore, ia rave i te tahi mea e mau atu ai i te fare auri, e faatupu te reira i te mauiui i te pae huru aau, e mea na reira atoa te taata e roohia ˈi i te maˈi purumu e e hapû ai te vahine ma te hinaaro-ore-hia.—Sal. 34:11-14.

² Mea pinepine te feia o te ore e ite i te haavî ia ratou iho i te haafifi ia ratou iho e ia vetahi ê. E a nuu noa ˈi te tau, te ite maitai ra tatou e te iti noa ˈtu ra te taata i te haavî ia ratou iho. Eita  râ tatou e maere i te reira, ua tohu hoi te Parau a te Atua e e riro te reira ei tapao o “te mau mahana hopea.”—Tim. 2, 3:1-3.

3. No te aha e titauhia ˈi ia haavî tatou ia tatou iho?

³ No te aha e titauhia ˈi ia haavî tatou ia tatou iho? E piti tumu faufaa roa. A tahi, mea iti aˈe te fifi ta te feia o te haavî i to ratou mau manaˈo e huru aau e farerei. Mea ohie aˈe atoa no ratou ia faatupu i te auhoaraa au maitai e ia ape i te riri, te ahoaho aore ra te hepohepo. A piti, no te tapea i to tatou auhoaraa e te Atua, mea tia ia patoi tatou i te faahemaraa e ia haavî i te mau hinaaro tia ore. Tera ta Adamu raua Eva i ore i rave. (Gen. 3:6) Mai ia raua, mea rahi o te û ra i te fifi rahi no te mea aita ratou e haavî ra ia ratou iho.

4. Eaha te nehenehe e faaitoito i te feia o te tutava ra i te haavî i to ratou mau hinaaro tia ore?

⁴ Ua ite Iehova e e taata tia ore tatou e mea fifi atoa no tatou ia haavî ia tatou iho. Te hinaaro nei râ oia e tauturu ia tatou ia haavî i to tatou mau hinaaro tia ore. (Arii 1, 8:46-50) Ei Hoa î i te here, te faaitoito maitai ra oia i te feia mea fifi paha no ratou ia haavî i to ratou mau manaˈo e hinaaro. I roto i teie tumu parau, e haapii mai tatou i te hiˈoraa o ta Iehova haavîraa ia ˈna iho. E hiˈopoa atoa mai tatou i te tahi mau hiˈoraa Bibilia, te mea maitai e te mea ino, a feruri atu ai i te tahi mau manaˈo o te tauturu ia tatou.

5, 6. Eaha te hiˈoraa o te haavîraa ia ˈna iho ta Iehova i vaiiho mai?

⁵ Mea tia roa ta Iehova haavîraa ia ˈna iho inaha i roto i te mau tuhaa atoa, mea tia roa oia. (Deut. 32:4) Area tatou, mea tia ore ïa. Mea titau-noa-hia râ ia hiˈopoa maitai tatou i to ˈna hiˈoraa o te haavîraa ia ˈna iho a nehenehe atu ai tatou e pee maitai aˈe ia ˈna. E tauturu mai te reira ia tatou ia ite eaha te mea maitai ia rave i mua i te hoê tupuraa e riri ai tatou. Eaha te tahi mau hiˈoraa o ta Iehova haavîraa ia ˈna iho?

⁶ A feruri na i te huru o Iehova i to Satani orure-hau-raa i Edene. Eita e ore e ua huru ê, ua riri e ua faaite te taatoaraa o ta te Atua mau tavini taiva ore i te raˈi i to ratou au ore, i te mau parau a te Diabolo. Te manaˈo atoa ra paha oe mai tera ia feruri oe i te mau mauiui atoa ta Satani i faatupu. Aita râ Iehova i iria. Ua horoa noa oia i te pahonoraa tano. Aita Iehova i ru i te riri e ua haa oia ma te parau-tia i mua i ta Satani orure-hau-raa. (Exo. 34:6; Ioba 2:2-6) No te aha? Ua vaiiho Iehova i te taime no te mea eita oia e hinaaro ia haamouhia hoê noa ˈˈe taata, “te hinaaro nei râ ia noaa i te taata atoa te tatarahapa.”—Pet. 2, 3:9.

7. Eaha te nehenehe e haapii mai i te hiˈoraa o Iehova?

⁷ Te haapii mai ra to Iehova hiˈoraa e mea tia ia feruri maite tatou hou a paraparau ai, e ia ore e ru i te riri. No reira, ia rave oe i te tahi faaotiraa rahi, a rave i te taime no te feruri. A pure no te ani i te paari no te parau aore ra no te rave i te  mea tano. (Sal. 141:3) Ia riri aore ra ia inoino tatou, mea ohie roa ia iria. E no reira mea rahi tei tatarahapa i muri aˈe i to ratou parauraa aore ra raveraa i te tahi mea ma te ore e feruri!—Mas. 14:29; 15:28; 19:2.

8. (a) Ihea tatou e ite ai i te mau hiˈoraa maitai o te haavîraa ia ˈna iho? (b) Eaha tei tauturu ia Iosepha ia patoi i te faahemaraa a faahinaaro ai ta Potiphara vahine ia ˈna? (A hiˈo i te hohoˈa matamua.)

⁸ Eaha te mau hiˈoraa Bibilia o te haamahiti maitai ra i te faufaaraa ia haavî ia tatou iho? E haamanaˈo paha oe ia Iosepha te tamaiti a Iakoba. Ua patoi oia i te faahemaraa a tavini ai oia i roto i te fare a Potiphara, te raatira o ta Pharao mau faehau. Ua faahinaaro te vahine a Potiphara ia Iosepha no to ˈna nehenehe, “e purotu hoi Iosepha i te tupu maitai, e te mata maitai.” Eaha tei tauturu ia Iosepha ia patoi i te faahemaraa? Eita e ore e ua feruri atea oia i te mau faahopearaa ia taoto oia i teie vahine. I to te vahine a Potiphara haruraa i to ˈna ahu, ua horo ê Iosepha. Ua parau oia: “Eaha hoi au e tia ˈi ia rave i tena na ino rahi, a hara ˈi i te Atua?”—Gen. 39:6, 9; a taio i te Maseli 1:10.

9. E nafea oe e faaineine ai ia oe iho no te patoi i te mau faahemaraa?

⁹ Eaha ta tatou e haapii mai i to Iosepha hiˈoraa? Mai te peu e turaihia tatou ia ofati hoê o ta te Atua mau ture, mea tia ia patoi atu tatou i te faahemaraa. Hou a riro ai ei Ite no Iehova, te vai ra tei ore i ite i te haavî ia ratou i te pae o te maa, te inuraa i te ava, te puhipuhiraa i te avaava, te rave-hua-raa i te raau taero, te peu taotoraa tia ore, aore ra te tahi atu mau fifi. I muri aˈe atoa i te bapetizoraa, i te tahi taime, e nehenehe ratou e hema i tera mau ohipa. Mai te peu e te farerei ra oe i tera tupuraa, a feruri i te faahopearaa i nia i to oe auhoaraa e o Iehova ia hema oe. E tamata paha oe i te hiˈo eaha te mau tupuraa o te nehenehe e faahema ia oe, a faaoti atu ai e nafea ia ape i te reira. (Sal. 26:4, 5; Mas. 22:3) Mai te peu e faaruru oe i tera mau tamataraa, a ani ia Iehova i te paari e te haavîraa ia oe iho no te patoi i te faahemaraa.

10, 11. (a) Eaha te tupu ra no e rave rahi feia apî i te haapiiraa? (b) Eaha te nehenehe e tauturu i te feia apî Kerisetiano ia patoi i te faahemaraa e ofati i ta te Atua mau ture?

¹⁰ Te farerei ra e rave rahi feia apî Kerisetiano fatata hoê â tupuraa e to Iosepha. O Kim hoê. E pinepine to ˈna mau hoa haapiiraa i te faatia e ua taoto ratou e te tahi apiti i te hopea hebedoma. Aita ta Kim e faatiaraa mai i ta ratou. Te faˈi ra oia e “e moˈemoˈe na” oia i te tahi taime no te mea e ere oia mai ia ratou. E manaˈo to ˈna mau hoa haapiiraa e mea maamaa oia no te mea aita to ˈna e apiti. E faaotiraa paari râ ta Kim i rave. Ua ite oia e mea puai roa no te feia apî te hinaaro e taoto i te hoê apiti. (Tim. 2, 2:22) Mea pinepine te tahi atu mau piahi i te ani e ua taoto aˈena anei o ˈna i te hoê apiti. Ua nehenehe ïa oia e faataa ˈtu ia ratou no te aha oia i maiti ai eiaha e taoto i te hoê apiti. Mea oaoa mau  ia ite i te feia apî Kerisetiano o tei faaoti papu e patoi i te mau peu taotoraa tia ore, e te oaoa atoa ra Iehova ia ratou!

¹¹ Te horoa atoa ra te Bibilia i te hiˈoraa o te feia o tei ore i patoi i te faahemaraa e rave i te peu taotoraa tia ore. E te faaite atoa mai ra te reira i te mau faahopearaa ino ia ore tatou e haavî ia tatou iho. Mai te peu e tei roto oe i te hoê â tupuraa e to Kim, a feruri i te hiˈoraa o te taurearea maamaa o te Maseli pene 7. A feruri atoa i te hiˈoraa o Amanona e te mau faahopearaa ino o te ohipa ta ˈna i rave. (Sam. 2, 13:1, 2, 10-15, 28-32) E nehenehe te mau metua e tauturu i ta ratou mau tamarii ia haavî ia ratou iho e ia faaohipa i te paari ma te tauaparau ia ratou no nia i teie mau hiˈoraa i te haamoriraa utuafare.

12. (a) Mea nafea Iosepha i haavî ai i to ˈna mau huru aau i mua i to ˈna mau taeae? (b) Eaha te mau tupuraa e titauhia ˈi ia haavî tatou i to tatou mau huru aau?

¹² I roto i te hoê tupuraa ê, ua faaite â Iosepha e ua ite oia i te haavî ia ˈna iho. Tei i te taime a haere mai ai to ˈna mau taeae i Aiphiti no te hoo mai i te maa. No te ite eaha mau na ta ratou e manaˈo ra, aita Iosepha i parau atu e o ˈna to ratou taeae. E a uˈana roa ˈi to ˈna mau huru aau, ua vaiiho oia i to ˈna mau taeae e ua haere e taˈi o ˈna anaˈe. (Gen. 43:30, 31; 45:1) Mai te peu e rave hoê taeae aore ra hoê tuahine i te tahi mea e riri ai tatou, e tauturu mai te hiˈoraa o ta Iosepha haavîraa ia ˈna iho ia ore e parau aore ra e rave i te tahi mea ta tatou e tatarahapa i muri aˈe. (Mas. 16:32; 17:27) Aore ra peneiaˈe ua tiavaruhia te tahi mau mero o to oe utuafare. E haavî ïa oe i to oe mau huru aau ia ore oe ia imi i te paraparau ia ratou mai te peu e ere i te mea titauhia. Mea fifi paha ia na reira. E riro râ te reira ei mea ohie aˈe ia rave mai te peu e haamanaˈo oe e te pee ra oe i te hiˈoraa o Iehova e te rave ra oe i ta ˈna i faaue mai.

13. Eaha te haapiiraa e huti mai i te mau tupuraa ta te arii Davida i faaruru i roto i to ˈna oraraa?

¹³ E faufaa-atoa-hia tatou i te hiˈoraa o te arii Davida. I to Saula raua Simei aaraa ia ˈna, aita Davida i riri aore ra i faaohipa i to ˈna mana no te haapohe ia raua. (Sam. 1, 26:9-11; Sam. 2, 16:5-10) Tera râ, aita Davida i haavî ia ˈna iho i te mau taime atoa. E ite tatou i te reira ia taio tatou no nia i te hara ta ˈna i rave e o Bate-seba e to ˈna huru i mua i te nounou o Nabala. (Sam. 1, 25:10-13; Sam. 2, 11:2-4) E nehenehe tatou e huti mai i te haapiiraa faufaa mau i te hiˈoraa o Davida. A tahi, no te mau tiaau i roto i to te Atua nunaa, mea titauhia ia haavî ratou ia ratou iho, eiaha ratou ia faaohipa ma te tano ore i to ratou mana. A piti, eiaha roa ˈtu hoê o tatou e tiaturi rahi roa ia ˈna iho, a manaˈo atu ai e eita roa ˈtu o ˈna e hema.—Kor. 1, 10:12.

14. Eaha ta te hoê taeae i faaruru, e no te aha mea faufaa ia haavî tatou i to tatou huru i roto i te mau tupuraa mai teie?

¹⁴ Eaha te rave no te haavî atu â ia oe? A hiˈo na i tei tupu no Luigi. Ua û hoê pereoo  i nia i te muriraa o to ˈna pereoo. Noa ˈtu no te tahi atu taata faahoro te hape, ua haamata tera taata i te tutuô i nia ia Luigi, e ua hinaaro atoa e moto. Ua pure o Luigi ia Iehova ia vai hau noa oia e ua tamata i te tamǎrû i te tahi atu taata faahoro. Aita râ o ˈna i faaea i te tutuô. Tapao atura ïa Luigi i te mau mea no nia i te taiete paruru a tera taata e reva ˈtura oia. Hoê hebedoma i muri aˈe, ua haere Luigi e farerei i te hoê vahine ta ˈna i poro na mua ˈtu. Ta ˈna tane, o te taata faahoro ïa tei faaû i to ˈna pereoo! Ua haama teie taata e ua tatarahapa no to ˈna huru. Ua parau oia e e paraparau o ˈna i te taiete paruru a Luigi ia vitiviti aˈe to Luigi pereoo i te tataîhia. Ua apiti atoa mai te tane i te aparauraa Bibilia e ua au roa oia. Na roto i teie tupuraa i taa ˈi ia Luigi e auaˈe ua faaea hau noa oia i muri aˈe i te ûraa to ˈna pereoo. Ua taa atoa ia ˈna te faahopearaa ino mau ahani oia i iria.—A taio i te Korinetia 2, 6:3, 4.

15, 16. E nafea te haapiiraa Bibilia e tauturu ai ia oe e to utuafare ia haavî ia outou iho?

¹⁵ E tauturu te hoê haapiiraa Bibilia tamau  e te hohonu i te mau Kerisetiano ia haavî ia ratou iho. A haamanaˈo i ta te Atua i parau ia Iosua: “Eiaha te buka ture na ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi.” (Ios. 1:8) E nafea râ te haapiiraa Bibilia e tauturu ai ia oe ia haavî ia oe iho?

¹⁶ Ua ite mai tatou e te vai ra te mau hiˈoraa i roto i te Bibilia o te faaite ra e e faufaahia tatou ia haavî tatou ia tatou iho, e mauiui râ ia ore tatou e na reira. E tumu Iehova i haapapai roa ˈi i teie mau hiˈoraa. (Roma 15:4) Mea maitai ïa ia taio, ia haapii e ia feruri maite tatou i te reira. A tamata i te ite e nafea te reira e tano ai no oe e to utuafare. A ani ia Iehova ia tauturu ia oe no te pee i te aˈoraa i roto i ta ˈna Parau. Mai te peu e te ite ra oe mea fifi no oe ia haavî ia oe iho i roto i te tahi mau tuhaa, a faˈi atu i te reira. A pure no te reira, e a tutava no te ite e nafea ia haamaitai mai ia oe. (Iak. 1:5) A rave i te mau maimiraa i roto i ta tatou mau papai no te ite mai i te manaˈo maitai o te nehenehe e tauturu ia oe.

17. I roto i teihea mau tuhaa e nehenehe ai te mau metua e haapii i ta ratou tamarii ia haavî ia ratou iho?

¹⁷ E nafea oe e tauturu ai i to tamarii ia faatupu i te haavîraa ia ˈna iho? Ua ite te mau metua e aita ta ratou tamarii i fanauhia mai e teie huru maitai. No reira e titauhia ia haapii te mau metua i te mau huru maitatai i ta ratou tamarii na roto i to ratou iho hiˈoraa. (Eph. 6:4) Mai te peu e te ite ra oe e aita ta oe tamarii i ite i te haavî ia ˈna iho, a ui ïa ia oe iho e te horoa ra anei oe i te hiˈoraa maitai. E horoa oe i te hiˈoraa maitai ma te tamauraa i te poro, i te haere i te mau putuputuraa e i te faatupu i te haamoriraa utuafare. Eiaha atoa e taiâ i te parau ‘Aita’ i te tamarii mai te peu e titauhia. Ua haamau Iehova i te mau taotiaraa no Adamu raua Eva. Ua nehenehe tera mau taotiaraa e tauturu ia raua ia haapii i te faatura i te mana o Iehova. Hoê â huru no te mau metua, ia aˈo ratou i ta ratou tamarii e ia faaite ratou i te hiˈoraa maitai, e nehenehe te reira e haapii i te tamarii ia haavî ia ˈna iho. Te mau mea faufaa roa ˈˈe ta oe e nehenehe e haapii i to tamarii ia faatupu, o te haafaufaaraa ïa i te mana o te Atua e te faaturaraa i ta ˈna mau ture aveia.—A taio i te Maseli 1:5, 7, 8.

18. No te aha mea tia ia maiti tatou i to tatou mau hoa ma te paari?

¹⁸ E metua tatou aore ra eita, mea maitai ia maiti tatou paatoa i to tatou mau hoa ma te paari. Mai te peu e mea here na to oe mau hoa ia Iehova, e faaitoito ïa ratou ia oe ia haamau i te mau fa maitatai a ape atu ai i te fifi. (Mas. 13:20) E turai to ratou hiˈoraa maitai ia oe ia haavî ia oe iho mai ia ratou e haavî ra ia ratou iho. Papu maitai e e faaitoito atoa to oe haerea maitai ia ratou. Ia haavî tatou ia tatou iho, e fanaˈo ïa tatou i te farii maitai a te Atua, e oaoa to tatou oraraa, e e faufaahia tatou e te feia mea here na tatou i te mau mea maitatai.