1, 2. (a) Mai te aha râ te oraraa ahani aita te Bibilia? (b) Eaha te tauturu mai ia faufaahia tatou i te Parau a te Atua?

 MAI te aha râ to oe oraraa ahani aita oe i fanaˈo i te Bibilia? Eita ïa oe e fanaˈo i te mau aˈoraa paari no te aratai ia oe i te mahana tataitahi. Eita oe e ite i te parau mau no nia i te Atua, te ora aore ra te tau no a muri aˈe. Eita atoa oe e ite eaha ta Iehova i rave no te huitaata i tahito ra.

² Auaa râ, aita tatou i roto i teie tupuraa peapea mau. Ua horoa mai Iehova i ta ˈna Parau, te Bibilia. Ua fafau atoa oia e e vai noa ta ˈna poroi e a muri noa ˈtu. Ua faahiti te aposetolo Petero i te Isaia 40:8. Parau mau, e ere tera irava no nia i te Bibilia, no te poroi Bibilia râ. (A taio i te Petero 1, 1:24, 25.) E faufaa-mau-hia tatou i te Bibilia mai te peu e taio tatou i te reira na roto i to tatou iho reo. Ua ite iho â te feia o te haafaufaa ra i te Parau a te Atua i te reira. I te mau senekele i mairi, ua tutava te taata i te huri i te Bibilia ia nehenehe vetahi ê e fanaˈo i te reira, noa ˈtu te patoiraa rahi e te fifi. Te hinaaro ra Iehova “ia ora . . . e ia noaa [i te taata]  te ite papu i te parau mau.”—Tim. 1, 2:3, 4.

3. Eaha ta tatou e ite mai i roto i teie tumu parau? (A hiˈo i te hohoˈa matamua.)

³ I roto i teie tumu parau, e ite mai tatou e nafea te Parau a te Atua i vai noa mai ai noa ˈtu (1) te mau tauiraa i roto i te reo, (2) te tauiuiraa o te taiete o tei faataui i te reo paraparau-roa ˈˈe-hia, e (3) te patoiraa i te huriraa o te Bibilia. E nafea teie aparauraa e tauturu ai ia tatou? E haafaufaa ˈtu â tatou i te Bibilia e e puai atu â to tatou here i to ˈna Fatu.—Mika 4:2; Roma 15:4.

4. (a) E nafea te reo e taui ai i te roaraa o te tau? (b) E nafea tatou e ite ai e aita te Atua e maiti i te hoê reo? Eaha ta te reira e faatupu i nia ia oe?

⁴ I te roaraa o te tau, e taui te mau reo. E taui roa paha te auraa o te hoê taˈo aore ra parau ia faaauhia i tei parauhia na mua ˈtu. Peneiaˈe te vai ra te hiˈoraa i roto i te reo ta oe e paraparau ra. Hoê â atoa no te mau reo tahito. Mea taa ê te reo Hebera e Heleni ta te taata e paraparau ra i teie mahana i te reo Hebera e Heleni i te tau a papaihia ˈi te Bibilia. Aita te rahiraa o te taata e taa ra i te Bibilia mea na roto i te mau reo tahito te reira i te papairaahia, e te titau ra ratou i te tahi huriraa. Ua manaˈo vetahi e mai te peu e haapii ratou i te reo Hebera e Heleni tahito, e taa maitai atu â ïa ratou i te Bibilia. Eita râ paha te reira e tauturu atu mai ta ratou e manaˈo ra. * E mauruuru rahi to tatou i te fanaˈoraa i te Bibilia aore ra te tahi mau tuhaa o te reira hurihia na roto piri i te 3 000 reo. O Iehova tera e hinaaro ra ia faufaahia “te mau nunaa e opu e reo atoa” i ta ˈna Parau. (A taio i te Apokalupo 14:6.) Papu maitai e maoti te reira e piri atu â ˈi tatou i to tatou Atua here e paetahi ore.—Ohi. 10:34.

5. No te aha te King James Version i riro ai ei huriraa faufaa?

⁵ E ohipa te mau tauiraa i roto i te reo i nia i te mau huriraa Bibilia. Eita paha te hoê huriraa ohie ia taiohia i te taime a piahia ˈi oia e maramarama faahou i muri aˈe. Te vai ra te hiˈoraa o te King James Version, piahia na mua roa i 1611. Hoê teie o na Bibilia reo Beretane matau-roa ˈˈe-hia. Ua ohipa atoa te tahi mau parau i roto i te King James Version i nia i te reo Beretane. * Tera râ, mea iti roa te taime i faaohipahia ˈi te iˈoa Iehova i roto i teie huriraa. I te rahiraa o te mau vahi e itehia ˈi te iˈoa Iehova i roto i te mau papai tumu o te mau Papai Hebera, e faaohipa teie huriraa i te taˈo papai-orarahi-hia “FATU.” Ua faaohipa atoa te mau piaraa i muri mai, i te taˈo papai-orarahi-hia “FATU” i roto i te tahi mau  irava o te mau papai Heleni Kerisetiano. Na roto i teie raveraa, ua faˈi ïa te feia huri i te King James Version e te vai ra iho â te iˈoa o te Atua i roto i tei parau-noa-hia Faufaa Apî.

6. No te aha e mauruuru rahi to tatou i te fanaˈoraa i te Huriraa o te ao apî?

⁶ I te taime matamua te King James Version i te piaraahia, mea au maitai te mau taˈo reo Beretane faaohipahia i roto. A nuu noa ˈi râ te tau, ua tahito rii te tahi mau parau, e i teie mahana, mea fifi ia taa. Tera atoa tei tupu no te tahi mau huriraa matamua o te Bibilia na roto i te tahi atu mau reo. E mauruuru rahi ïa to tatou i te fanaˈoraa i te Huriraa o te ao apî o te mau Papai Moˈa, o te faaohipa ra i te mau parau no teie tau. Te vai ra teie huriraa i roto i to ˈna taatoaraa aore ra te tahi noa tuhaa na roto hau atu 150 reo. Te auraa ïa e e nehenehe i teie nei te rahiraa o te taata na te ao nei e taio i teie huriraa na roto i to ratou iho reo. Maoti te mau taˈo maramarama e no teie tau ta teie huriraa e faaohipa, e ohie ai no te Parau a te Atua ia haaputapû i te aau. (Sal. 119:97) I taa ê mau ai râ te Huriraa o te ao apî, no te iˈoa ïa o te Atua o tei faahoˈihia i te mau vahi i itehia na te reira i roto i te mau papai tumu.

7, 8. (a) No te aha aita e rave rahi ati Iuda i te senekele toru hou te Mesia i taa faahou i te mau Papai Hebera? (b) Eaha te Septante reo Heleni?

⁷ Ua faataui te mau tauiuiraa i roto i te taiete na te ao nei i te tahi taime i te reo ta te taata i matau na i te paraparau i te hoê tau. Ua haapao râ Iehova ia nehenehe te taata e fanaˈo i te Bibilia na roto i te reo ta ratou e taa. Ei hiˈoraa, ua papaihia na 39 buka matamua o te Bibilia e te ati Iuda, aore ra te mau Iseraela. O ratou tei fanaˈo na mua roa i “ta [te Atua] mau poroi moˈa.” (Roma 3:1, 2) Ua papai ratou i teie mau buka na roto i te reo Hebera aore ra Aramea. I te senekele toru râ hou te Mesia, mea rahi te ati Iuda o tei ore i taa faahou i te reo Hebera. No te aha? I to Alesanedero Rahi upootiaraa i nia i te hoê tuhaa rahi o te fenua, ua rahi atu â te hau emepera Heleni. O te reo Heleni atura ïa tei riro mai ei reo paraparau-roa ˈˈe-hia e te taata i te mau vahi faaterehia e te hau Heleni, e mea rahi tei haamata i te paraparau i te reo Heleni, eiaha faahou i to ratou iho reo. (Dan. 8:5-7, 20, 21) Te vai atoa ra e rave rahi ati Iuda, ua riro ïa ei mea fifi no ratou ia taa i te Bibilia na roto i te reo Hebera. Eaha ïa te ravea?

⁸ Piri i te 250 matahiti hou a fanauhia mai ai Iesu, ua hurihia na pae buka matamua o te Bibilia na roto i te reo Heleni. I muri aˈe, ua huri-atoa-hia te toea o te mau Papai Hebera. Ua matauhia teie huriraa i raro aˈe i te iˈoa Septante reo Heleni. Tera te huriraa matamua o te mau Papai Hebera taatoa tei itehia mai.

9. (a) E nafea te Septante e te tahi atu mau huriraa i tauturu ai i te taata o tei taio i te Parau a te Atua? (b) Eaha te tuhaa ta oe e au roa ˈˈe i roto i te mau Papai Hebera?

⁹ Maoti te huriraa o te Septante i nehenehe ai te ati Iuda paraparau reo Heleni e taio i te mau Papai Hebera na roto i te reo Heleni. A feruri na i to ratou oaoa i te faarooraa aore ra taioraa i te Parau a te Atua na roto i to ratou iho reo! I muri aˈe, ua hurihia te tahi mau tuhaa o te Bibilia na roto i te tahi atu mau reo  paraparau-roa ˈˈe-hia e te taata mai te reo Syriaque, Gotique e Latino. Ua rahi atu â te taata o tei taio e o tei taa i te Parau a te Atua, ua haafaufaa rahi atura ratou i te reira. E ua nehenehe atura ratou e haamanaˈo i te mau irava ta ratou e au roa ˈˈe, mai ia tatou i teie mahana. (A taio i te Salamo 119:162-165.) Papu maitai e ua vai noa te Parau a te Atua noa ˈtu te mau tauiuiraa i roto i te taiete e i roto i te reo paraparau-roa ˈˈe-hia e te taata.

10. I to John Wycliffe tau, no te aha aita te rahiraa i nehenehe e taio i te Bibilia?

¹⁰ I te roaraa o te mau matahiti, ua tamata e rave rahi faatere puai mau i te tapea i te taata ia ore ratou e taio i te Bibilia. Aita râ te tahi mau tane mǎtaˈu i te Atua i faaea i ta ratou ohipa ia nehenehe pauroa te taata e fanaˈo i te Bibilia. O John Wycliffe hoê o ratou, ua ora oia i Beretane i te senekele 14. No ˈna, mea tia ia taio te taata atoa i te Bibilia. I to ˈna tau, mea rahi te taata i Beretane o tei ore i faaroo aˈenei i te poroi Bibilia na roto i to ratou reo. Mea moni roa te Bibilia, e mea papai-rima-noa-hia te reira. Aita ïa i rahi te taata o tei nehenehe e fanaˈo i te hoê Bibilia. I tera ra tau, aita atoa te rahiraa i ite i te taio. Te feia haere i te pureraa, e faaroo ïa ratou i te taioraa Bibilia na roto i te reo Latino. E reo tahito râ te reira ta te rahiraa i ore i taa. Eaha ta Iehova i rave ia nehenehe te taata e fanaˈo i te Bibilia na roto i to ratou iho reo?—Mas. 2:1-5.

11. Eaha tei itehia maoti ta Wycliffe Bibilia?

¹¹ I 1382, ua huri John Wycliffe e te tahi atu mau taata i te Bibilia na roto i te reo Beretane. Ua faaohipa maitai te hoê pǔpǔ piihia te mau Lollards i ta Wycliffe Bibilia. Ua haafaufaa rahi ratou i te Bibilia. Na avae noa ratou i te haere i tera e tera oire iti na te fenua Beretane. I taio na ratou i te Bibilia i te taata a opere atu ai i te tahi tuhaa papai-rima-hia. Ua parare faahou te parau o te Bibilia maoti ta ratou ohipa.

12. Eaha te huru o te pǔpǔ ekalesiatiko i nia ia Wycliffe e ta ˈna ohipa?

¹² Ua riri roa te pǔpǔ ekalesiatiko ia Wycliffe, ta ˈna Bibilia e ta ˈna mau pǐpǐ.  Ua hamani ino ratou i te mau Lollards e ua faaore pauroa ta Wycliffe Bibilia tei itehia mai ia ratou. Noa ˈtu ua pohe ê na o Wycliffe, ua parau te pǔpǔ ekalesiatiko e e tane haireti oia, aore ra e enemi no te ekalesia. Ua tatara ratou i to ˈna mau ivi mai raro mai i te repo, ua tutui ratou i te reira e ua afai e faarue i te rehu i te anavai Swift. Mea rahi râ te taata o tei hinaaro e taio e e taa i te Parau a te Atua, e aita te ekalesia i nehenehe e tapea i te reira. I roto i te mau senekele i muri mai, ua haamata te taata i Europa e te tahi atu mau fenua i te huri e i te nenei i te Bibilia na roto i te mau reo ta e rave rahi e taa.

13. Ua papu ia tatou i te aha? E nafea te reira e haapuai ai i to tatou faaroo?

¹³ Ua papaihia te Bibilia i raro aˈe i te aratairaa a te Atua. E ere râ te auraa e ua aratai tia ˈtu te Atua i te huriraa o te Septante, ta Wycliffe Bibilia, te King James Version aore ra te tahi atu huriraa. Ia hiˈo maitai râ tatou mea nafea teie mau huriraa i te faaineineraahia, mea papu maitai e mai ta Iehova i fafau, ua vai noa ta ˈNa Parau. E haapuai te reira i to tatou faaroo e e tupu iho â te mau mea atoa ta Iehova i fafau.—Ios. 23:14.

14. E nafea ta tatou e haapii ra no nia i te Bibilia e haapuai ai i to tatou here i te Atua?

¹⁴ Ia hiˈo tatou mea nafea Iehova i paruru ai i ta ˈna Parau, e puai atu â to tatou faaroo e here ia ˈna. * No te aha Iehova i horoa mai ai na mua roa i te Bibilia a fafau atu ai i muri mai i te paruru atu i te reira? Mea here hoi na ˈna ia tatou e te hinaaro ra oia e haapii mai e nafea tatou e maitai ai. (A taio i te Isaia 48:17, 18.) E turai te reira ia tatou ia here e ia faaroo ia ˈna.—Ioa. 1, 4:19; 5:3.

15. Eaha ta tatou e hiˈopoa mai i roto i to muri iho tumu parau?

¹⁵ Mea au roa na tatou te Parau a te Atua, e nafea ïa tatou e nehenehe ai e faufaahia i ta tatou iho taioraa Bibilia? E nafea tatou e tauturu ai i te feia ta tatou e farerei i roto i te pororaa ia haafaufaa i te Bibilia? E nafea te feia e horoa ra i te haapiiraa i roto i te amuiraa e papu maitai ai e ua niuhia iho â te mau mea ta ratou e haapii ra i nia i te Parau a te Atua? E pahono mai tatou i teie mau uiraa i roto i to muri iho tumu parau.