1, 2. (a) Eaha te tuatiraa e vai ra i rotopu i te here e te faaroo? (b) Eaha te mau uiraa ta tatou e hiˈopoa mai?

 UA FAFAU to tatou Metua ra o Iehova i te haamaitai i ta ˈna mau tavini taiva ore. E ravea teie e faaite ai Iehova i to ˈna here ia tatou, e ua here tatou ia ˈna, no te mea o ˈna tei here na mua ia tatou. (Ioa. 1, 4:19) A rahi noa ˈtu â ˈi to tatou here ia Iehova, e puai atu â to tatou faaroo ia ˈna, e hau atu â tatou i te papu e e haamaitai Iehova tei here ia ˈna.—A taio i te Hebera 11:6.

² O Iehova te haamaitai mai! E tuhaa faufaa te reira no to ˈna huru e no te mau mea atoa ta ˈna e rave. No reira, e papu to tatou faaroo mai te peu noa e tiaturi tatou e e haamaitai oia i te feia o te imi papu ra ia ˈna. No te aha? No te mea, “o te faaroo nei, o te tiaturi ïa i te mau mea e tiaihia nei.” (Heb. 11:1) Te faaroo, o te tiaturi-maite-raa ïa e e haamaitai te Atua i ta ˈna mau tavini taiva ore. E nafea râ tatou e faufaahia ˈi i te tiaturiraa i te hoê haamaitairaa? Mea nafea Iehova i  haamaitai ai i ta ˈna mau tavini i tahito ra e i teie tau? Tera ta tatou e hiˈopoa mai.

3. Eaha tei fafauhia i roto i te Malaki 3:10?

³ Ua fafau te Atua ra o Iehova i te haamaitai i ta ˈna mau tavini taiva ore. Te hinaaro nei Iehova ia horoa tatou i te mea maitai roa ˈˈe na ˈna e ia tiaturi e e haamaitai mai oia ia tatou. Ua parau Iehova ia tamata tatou ia ˈna. Te na ô ra oia: “I te oreraa vau i te iritiraa i te mau haamaramarama o te raˈi ra, a ninii atu ai i te taoˈa rahi roa ei maitai no outou.” (Mal. 3:10) E faaite tatou i to tatou mauruuru no ta ˈna i pûpû mai ia farii tatou i ta Iehova aniraa e tamata ia ˈna.

4. No te aha e nehenehe ai e tiaturi i ta Iesu i fafau i roto i te Mataio 6:33?

⁴ Ua fafau Iesu i ta ˈna mau pǐpǐ e ia tuu ratou i te Faatereraa arii i te parahiraa matamua, e turu te Atua ia ratou. (A taio i te Mataio 6:33.) E nehenehe iho â Iesu e parau i te reira no te mea ua ite oia e e tupu iho â ta te Atua i fafau. (Isa. 55:11) No reira, e nehenehe atoa tatou e tiaturi e ia faatupu tatou i te faaroo mau ia Iehova, e tapea oia i teie parau fafau: “E ore roa vau e taiva ia oe, e ore roa vau e faarue ia oe.” (Heb. 13:5) E tauturu mai ta Iehova i fafau ia tiaturi i te mau parau a Iesu i roto i te Mataio 6:33.

5. No te aha mea faaitoito ta Iesu pahonoraa ia Petero no tatou pauroa?

⁵ Ua ani te aposetolo Petero ia Iesu:  “Inaha matou, ua faarue i te mau mea atoa e ua pee mai ia oe; e eaha ta matou nei utua [oia hoi haamaitairaa]?” (Mat. 19:27) Aita Iesu i faaafaro ia Petero i to ˈna uiraa ˈtu ia ˈna. Ua parau râ Iesu i ta ˈna mau pǐpǐ e e haamaitaihia ratou no te mau haapaeraa ta ratou i rave. E faatere te mau aposetolo e te tahi atu feia taiva ore i pihaiiho ia Iesu i te raˈi a muri aˈe. Ua parau atoa Iesu e te vai ra te mau haamaitairaa i teie nei â: “E te taata atoa no to ˈu nei iˈoa i faarue ai i te fare, e te mau taeae, e te mau tuahine, e te metua tane, e te metua vahine, e te vahine iho, e te tamarii, e te fenua, e hanere atu ïa ta ˈna e noaa, e e roaa ia ˈna te ora mure ore.” (Mat. 19:29) E nehenehe te mau pǐpǐ a Iesu e fanaˈo i te mau metua tane, metua vahine, taeae, tuahine e tamarii i roto i te amuiraa i teie mahana. Mea faufaa roa aˈe te reira i te mau haapaeraa atoa ta tatou i rave no te Faatereraa arii a te Atua.

6. No te aha Iehova e fafau ai e e haamaitai oia i ta ˈna mau tavini?

⁶ Hau atu â i te fanaˈoraa e rave rahi haamaitairaa faahiahia i teie nei â, te tiai ru nei tatou i te mau haamaitairaa rahi atu â no a muri aˈe. (Tim. 1, 4:8) Te fafau ra Iehova e e haamaitai oia i ta ˈna mau tavini taiva ore, e e tauturu mai te taaraa i te reira ia faaruru i te mau fifi. Mai te peu e te tiaturi maite nei tatou e na Iehova e haamaitai “i te feia i imi papu ia ˈna,” e vai taiva ore ïa tatou.—Heb. 11:6.

7. Mea nafea to tatou tiaturiraa i au ai i te hoê tutau?

⁷ I roto i te Aˈoraa i nia i te mouˈa, ua parau Iesu: “A oaoa, e ia ouˈauˈa noa i te oaoa; e utua [aore ra haamaitairaa] rahi hoi ta outou i te ao ra: i na reira hoi ratou i te hamani ino i te mau peropheta ra, o mua ïa ia outou.” (Mat. 5:12) E fanaˈo te tahi mau tavini a te Atua i te hoê haamaitairaa i te raˈi. E vetahi atu, e fanaˈo ïa i te haamaitairaa o te ora mure ore i roto i te paradaiso i te fenua nei. E tumu atoa tera ia “oaoa, e ia ouˈauˈa noa i te oaoa.” (Sal. 37:11; Luka 18:30) No tatou pauroa râ, e nehenehe to tatou tiaturiraa e riro ei “tiataro [aore ra tutau] no te varua, e te mahiti ore, e te mau maitai.” (Heb. 6:17-20) Mai te hoê tutau e tapea i te pahi i roto i te hoê vero, e tauturu to tatou tiaturiraa puai ia ore ia aueue. E horoa mai te reira i te puai no te faaoromai i te mau fifi.

8. E nafea te ahoaho e iti mai ai i to tatou tiaturiraa?

⁸ E nehenehe to tatou tiaturiraa e tauturu ia faaiti i te ahoaho. Mai te hoê raau parai e tamǎrû i to tatou iri, e nehenehe ta te Atua i fafau e tamǎrû i to tatou aau horuhoru. Mea tamahanahana ia ite e e aupuru mai Iehova ia tuu tatou i ta tatou hopoia ia ˈna ra. (Sal. 55:22) Ia papu ia tatou e e “hau ê roa ˈtu ta ˈna [te Atua] ia rave, i te mau mea atoa ta tatou e ani  nei.” (Eph. 3:20) E tauturu Iehova ia tatou. Aita te Bibilia e parau ra e e tauturu rahi mai o ˈna, e “hau ê roa ˈtu [râ] ta ˈna ia rave”!

9. E nafea tatou e papu ai e e fanaˈo tatou i ta Iehova haamaitairaa?

⁹ No te fanaˈo i te haamaitairaa, e titauhia i te hoê faaroo mau ia Iehova e ia auraro tatou i ta ˈna mau aratairaa. Ua parau Mose i te nunaa Iseraela: “E haamaitai roa hoi Iehova ia oe i nia i te fenua ta to Atua ra ta Iehova e horoa no oe nei ei parahiraa: ia faaroo maite oe i te reo o to Atua ra o Iehova, e ia haapao oe i te rave i teie atoa nei mau parau ta ˈu e parau atu ia oe na i teie nei mahana. E haamaitai mai hoi to Atua ra o Iehova ia oe, ta ˈna hoi i parau mai ia oe ra.” (Deut. 15:4-6) Ua papu maite anei ia oe e e haamaitai Iehova ia oe ia tamau oe i te tavini ia ˈna ma te taiva ore? Mea maitai roa ia tiaturi oe i te reira.

10, 11. Mea nafea Iehova i te haamaitairaa ia Iosepha?

¹⁰ Ua papaihia te Bibilia no to tatou maitai. E rave rahi hiˈoraa i roto e faaite ra e mea nafea te Atua i te haamaitairaa i ta ˈna mau tavini taiva ore i tahito ra. (Roma 15:4) O Iosepha te tahi hiˈoraa maitai roa. A tahi, ua hoo to ˈna mau taeae ia ˈna ei tîtî. I muri aˈe, ua pari haavare te vahine a to ˈna fatu ia ˈna e ua afaihia oia i te fare tapearaa i Aiphiti. I te fare tapearaa, ua atea ê anei Iosepha ia Iehova? Aita roa ˈtu! Te parau ra te Bibilia: “Tei pihaiiho râ Iehova ia Iosepha, e ua hamani maitai maira ia ˈna” e “tei ia ˈna hoi Iehova, e te mau mea atoa ta ˈna i rave ra, na Iehova ïa i faariro ei mea maitai.” (Gen. 39:21, 23) Noa ˈtu tei roto oia i teie mau fifi, ua tamau Iosepha i te tiai i to ˈna Atua.

¹¹ E rave rahi matahiti i muri aˈe, ua tuu Pharao ia Iosepha i rapae i te fare tapearaa, e ua riro mai teie tavini haehaa te piti o te taata puai roa ˈˈe i Aiphiti. (Gen. 41:1, 37-43) A fanau mai ai Iosepha e ta ˈna vahine e piti tamaiti, “mairi ihora Iosepha i to te matahiapo ra iˈoa, o Manase: ua na ô aˈera hoi oia, Ua moe na to ˈu ra mau ati, e te utuafare atoa o to ˈu ra metua ia ˈu, i te Atua. E mairi ihora oia i te iˈoa o te toopiti ra o Epheraima: ua na ô aˈera hoi oia, Ua hotu vau i te Atua i te fenua i ati ai au nei.” (Gen. 41:51, 52) Ua haamaitai Iehova i to Iosepha taiva ore e ua nehenehe oia e faaora i te mau Iseraela e to Aiphiti i te oˈe. Ua taa ia Iosepha e na Iehova i haamaitai ia ˈna.—Gen. 45:5-9.

12. Mea nafea Iesu i te vai taiva-ore-raa i mua i te tamataraa?

¹² Ua auraro noa atoa Iesu Mesia i te Atua noa ˈtu e rave rahi tamataraa, e ua haamaitai Iehova ia ˈna. Eaha tei tauturu ia Iesu ia vai taiva ore? Te faataa ra te Parau a te Atua: “O tei faaoromai i te satauro [aore ra pou haamauiuiraa], aore i haapao i te haama, i te maitai i tuuhia mai i mua i tana aro.” (Heb. 12:2) Aita e ore e ua oaoa Iesu i te haamoˈa i to te  Atua iˈoa. Ua haamaitaihia Iesu ma te farii maitai a to ˈna Metua e te mau fanaˈoraa taa ê faahiahia mau. Te parau ra te Bibilia no Iesu e “te parahi ra [oia] i teie nei i te pae atau i te terono o te Atua ra.” Te taio atoa ra tatou: “I faateitei roa ˈtu ai te Atua ia ˈna, e ua horoa hoi i te iˈoa i hau ê roa i te mau iˈoa atoa nei no ˈna.”—Phil. 2:9.

13, 14. Eaha to Iehova huru no nia i ta tatou e rave ra no ˈna?

¹³ E nehenehe tatou e tiaturi e e haafaufaa Iehova i te mau mea atoa ta tatou e rave ra no te tavini ia ˈna. Te taa ra ia ˈna aita anaˈe tatou e tiaturi ra ia tatou iho aore ra ia feaa tatou no nia i to tatou aravihi. Te haapao mai ra oia ia haapeapea tatou no ta tatou ohipa aore ra no te aupuru i to tatou utuafare. Te taa ra ia ˈna aita anaˈe tatou e nehenehe faahou e rave mai i na mua ˈˈe i roto i ta ˈna taviniraa no te maˈi aore ra te oto. E nehenehe tatou e tiaturi papu e te haafaufaa ra Iehova i to tatou taiva ore noa ˈtu to tatou mau fifi.—A taio i te Hebera 6:10, 11.

¹⁴ A haamanaˈo atoa e o Iehova “tei faaroo i te pure.” Papu maitai e ia pure tatou ia ˈna, e faaroo mai oia. (Sal. 65:2) E horoa mai “te tumu o te aroha [hamani maitai] e o te Atua no ˈna anaˈe te mahanahana” i te mau mea atoa o ta tatou e hinaaro ra ia vai piri noa tatou ia ˈna. I te tahi taime, e faaohipa oia i to tatou mau taeae e tuahine no te rave i te reira. (Kor. 2, 1:3) E oaoa Iehova ia faatupu tatou i te aumihi no vetahi ê. “O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua [oia hoi, haamaitairaa].” (Mas. 19:17; Mat. 6:3, 4) Ia faaite tatou i te aau horoa noa e ia tauturu tatou i to tatou mau taeae, e faariro Iehova i te maitai ta tatou i rave mai te hoê tarahu ta tatou i horoa na ˈna. E ua fafau oia e haamaitai i to tatou hamani maitai.

15. Eaha te mau haamaitairaa ta oe e tiai ru nei? (A hiˈo i te hohoˈa matamua.)

¹⁵ E fanaˈo te mau Kerisetiano faatavaihia i te “korona o te parau-tia,” te hoê haamaitairaa no ǒ mai ia Iesu ra. (Tim. 2, 4:7, 8) E ere râ te auraa e mea faufaa aˈe ratou ia oe i mua i te Atua, mai te peu, e tiaturiraa ê to oe. Te tiai ru nei e mirioni “mamoe ê atu” a Iesu i te haamaitairaa o te ora mure ore no a muri aˈe i roto i te hoê paradaiso i te fenua nei. I reira, “e oaoa ratou i te rahi o te hau.”—Ioa. 10:16; Sal. 37:11.

16. Eaha te tamahanahanaraa ta tatou e ite i roto i te Ioane 1, 3:19, 20?

¹⁶ I te tahi taime, e manaˈo paha tatou e aita tatou e haa rahi ra i roto i ta Iehova taviniraa aore ra e manaˈo paha tatou e aita Iehova e mauruuru ra i ta tatou e rave ra. E nehenehe atoa tatou e manaˈo e aita tatou e faaî ra i te mau titauraa no te fanaˈo i te tahi mau fanaˈoraa taa ê. Eiaha râ tatou e haamoe e “rahi [aˈe] te Atua i to tatou aau, e ua ite oia i te mau mea atoa nei.” (A taio i te Ioane 1, 3:19, 20.) Ia tavini tatou ia Iehova no to tatou faaroo e here no ˈna, papu roa e e haamaitai mai oia, noa ˈtu e manaˈo tatou e mea iti roa ta tatou i rave.—Mar. 12:41-44.

17. Eaha te tahi mau haamaitairaa ta tatou e fanaˈo ra i teie mahana?

 ¹⁷ I roto atoa i teie anotau hopea o te ao ino a Satani, te haamaitai ra Iehova i to ˈna nunaa. Te haapao ra oia ia noaa ia tatou te ite e te hau e rave rahi, ei mero no te huitaeae na te ao atoa nei. (Isa. 54:13) Mai ta Iesu i fafau, te haamaitai ra Iehova ia tatou i teie nei i te hoê utuafare taeae e tuahine î i te here na te ao atoa nei. (Mar. 10:29, 30) Oia atoa, e haamaitaihia te feia o te imi papu ra i te Atua ma te rahi o te hau o roto, te mauruuru e te oaoa.—Phil. 4:4-7.

18, 19. Eaha te manaˈo o te mau tavini a Iehova no te mau haamaitairaa ta ratou i fanaˈo?

¹⁸ Ua ite te mau tavini a Iehova na te ao atoa nei i te mau haamaitairaa faahiahia mau no ǒ mai i to tatou ra Metua. Ei hiˈoraa, te parau ra Bianca no Heremani: “E tamau noa vau i te haamauruuru ia Iehova no to ˈna tautururaa ia ˈu i roto i to ˈu mau hepohepo e to ˈna vai piri-noa-raa ia ˈu i te mau mahana atoa. Mea huehue e mea peapea teie nei ao. A ohipa piri noa ˈi râ vau e o Iehova, aita vau e haapeapea faahou i roto i to ˈna rima. I te mau taime atoa a rave ai au i te mau haapaeraa no ˈna, e fanaˈo vau hau atu â haamaitairaa.”

¹⁹ A hiˈo atoa na ia Paula, 70 matahiti, i Kanada, o tei roohia i te maˈi spina bifida, te hoê maˈi i roto i te ivi tua. Te parau ra oia e ua taotia to ˈna tupuraa ia ˈna ia haere, e ere râ te auraa e ua taotiahia ta ˈna taviniraa. Te na ô faahou ra oia: “E haafaufaa vau i te tahi atu mau huru taviniraa, mai te pororaa na roto i te niuniu paraparau e ma te faanaho-ore-hia. No te faaitoito ia ˈu, e buka papai ta ˈu e te mau irava e manaˈo no roto i ta tatou mau papai o ta ˈu e hiˈo i te tahi mau taime. Ua pii au i te reira ‘Ta ˈu buka papai faaora.’ E taime poto noa te toaruaruraa ia tiatonu tatou i ta Iehova i fafau. Tei pihaiiho noa Iehova no te tauturu ia tatou, noa ˈtu to tatou tupuraa.” Mea taa ê roa paha to tupuraa i to Bianca e Paula. E feruri râ paha oe mea nafea Iehova i te haamaitairaa ia oe e te feia i pihaiiho ia oe. Mea maitai ia manaˈo e nafea Iehova e haamaitai ai ia oe i teie nei e a muri aˈe!

20. Eaha te nehenehe e tiai ru ia tamau tatou i te tavini ia Iehova ma te taiva ore?

²⁰ Eiaha roa ˈtu e haamoe e e haamaitai-rahi-hia ta tatou mau pure haavare ore. Ia papu e “ua oti anaˈe ia outou te haapao i to te Atua ra hinaaro,” e noaa te haamaitairaa “i parauhia maira.” (Heb. 10:35, 36) E tamau anaˈe ïa i te haapuai i to tatou faaroo e i te rave i te mau mea atoa no te tavini ia Iehova. E haamaitai mai iho â Iehova ia tatou!—A taio i te Kolosa 3:23, 24.