1, 2. No te aha te mau Kerisetiano faatavaihia e haafaufaa ˈi te Roma pene vaˈu?

 UA TAIO paha oe i te Roma 8:15-17 i te tau o te Oroa haamanaˈoraa o te pohe o Iesu. Te faataa ra tera mau irava e nafea te mau Kerisetiano faatavaihia e ite ai e e tiaturiraa to ratou e ora e a muri noa ˈtu i te raˈi. Te faataa ra te Roma 8:1 i tei faatavaihia mai te “feia i roto i te Mesia.” No ratou noa anaˈe râ tei papaihia i roto i te Roma pene vaˈu? Aore ra e tauturu atoa te reira i te feia e tiaturiraa to ratou e ora e a muri noa ˈtu i te fenua nei?

² Ua papaihia te Roma pene vaˈu na mua roa no te feia faatavaihia. E noaa ia ratou “te [v]arua” ei feia o te tiai ra “i te faatamarii-tavai-raa, oia te faaoraraa i to [r]atou nei tino” taata. (Roma 8:23) I muri aˈe, e riro mai ratou ei tamaiti a te Atua i te raˈi. Ua faaore Iehova i ta ratou hara  maoti te hoo. Ua faariro oia ia ratou ei feia parau-tia, ia nehenehe ratou e riro mai ei mau tamaiti no ˈna.—Roma 3:23-26; 4:25; 8:30.

3. No te aha te feia e tiaturiraa to ratou e ora e a muri noa ˈtu i te fenua nei e haapii atoa ˈi te Roma pene vaˈu?

³ I te omuaraa râ o te buka Roma, ua papai Paulo no nia i te hoê taata o tei ore i faatavaihia, o tei faarirohia râ ei taata parau-tia e Iehova. O Aberahama teie taata. Ua ora tera tane taiva ore e rave rahi matahiti hou Iesu a horoa ˈi i to ˈna ora ei hoo. (A taio i te Roma 4:20-22.) I teie mahana, e nehenehe atoa Iehova e faariro i te mau Kerisetiano taiva ore e tiaturiraa to ratou e ora e a muri noa ˈtu i te fenua nei ei feia parau-tia. E nehenehe atoa ratou e faufaahia i te aˈoraa o te Roma pene vaˈu.

4. Ia taio tatou i te Roma 8:21, eaha te tia ia ui?

⁴ I roto i te Roma 8:21, e ite tatou i ta Iehova haapapuraa e e tae mai ta ˈna ao apî e e faatiamâhia te huitaata i te hara e te pohe. Te parau ra te irava e e ite ratou “te tiamâ maitai [aore ra hanahana] o te [mau] tamarii a te Atua.” Te ite ra anei oe ia oe i roto i tera ao apî? E hiˈopoa mai tatou eaha te titauhia ia rave tatou no te ora i reira.

5. Eaha te tupuraa ta Paulo i faataa i roto i te Roma 8:4-13?

⁵ A taio i te Roma 8:4-13. I roto i te Roma pene vaˈu, ua faataa Paulo e piti  huru taata, te feia o te ora ia “au i ta te tino” e te feia o te ora ia “au i ta te [v]arua.” Te manaˈo ra te tahi mau taata e te faataa ra Paulo i te feia e ere ratou i te Kerisetiano e te feia e Kerisetiano ratou. I ǒ nei râ, ua papai Paulo i te mau Kerisetiano, te feia o tei piihia no te riro “ei feia moˈa.” (Roma 1:7) E mau Kerisetiano ïa te feia o tei ora ia “au i ta te tino” e te feia o tei ora ia “au i ta te [v]arua.” Mea nafea ratou i taa ê ai te tahi i te tahi?

6, 7. (a) Eaha te auraa o te taˈo “tino” i roto i te Bibilia? (b) Mea nafea te taˈo “tino” i faaohipahia i roto i te Roma 8:4-13?

⁶ E rave rahi auraa to te taˈo “tino” i roto i te Bibilia. I te tahi taime, e faaohipahia no to tatou iho tino taata. (Roma 2:28; Kor. 1, 15:39, 50) E nehenehe atoa te reira e faaohipahia no te auraa fetii. Ei hiˈoraa, ua parau te Bibilia o Iesu “te huaai o Davida, i te haapaoraa i te tino ra,” e ua pii Paulo i te mau ati Iuda, to ˈna “fetii i te haapaoraa i te tino nei.”—Roma 1:3; 9:3.

⁷ Eaha ïa ta Paulo i hinaaro e parau no te feia e ora ra ia “au i ta te tino” i roto i te Roma 8:4-13? No te ite i te pahonoraa, e hiˈo anaˈe i te Roma 7:5. Ua papai Paulo: “Tei nia tatou i ta te tino ra, te mau hinaaro iino i raro aˈe i te ture ra, te puai ra ïa i roto i to tatou tino.” I ǒ nei, ua faataa Paulo e te feia o te ora ra ia “au i ta te tino,” o te feia ïa o te tiatonu e o te pee ra i to ratou iho mau hinaaro tia ore, ma te rave i ta ratou e au.

8. No te aha i titauhia ˈi ia faaara Paulo i te mau Kerisetiano faatavaihia no nia i te oraraa ia “au i ta te tino”?

 ⁸ No te aha Paulo i faaara ˈi i te mau Kerisetiano faatavaihia no nia i te oraraa ia “au i ta te tino”? E no te aha mea faufaa no te mau Kerisetiano atoa i teie mahana teie faaararaa? No te mea e nehenehe te tahi tavini taiva ore a Iehova e haamata i te haafaufaa na mua i to ˈna mau hinaaro i roto i to ˈna oraraa. Ei hiˈoraa, ua papai Paulo e ua riro te tahi mau taeae no Roma ei tîtî “no to ratou iho opu.” Te parau ra paha ïa o ˈna e ua riro te taotoraa i to ˈna apiti, te maa aore ra te tahi atu â mau mea navenave ei mea faufaa roa ˈˈe i roto i to ratou oraraa. (Roma 16:17, 18; Phil. 3:18, 19; Iuda 4, 8, 12) I te hoê taime, ua itehia i roto i te amuiraa no Korinetia i te hoê taeae o tei rave ma te tia ore i “te vahine a to ˈna . . . metua tane.” (Kor. 1, 5:1) Mea papu, ua titauhia ta Paulo faaararaa no nia i te oraraa ia “au i ta te tino” no te mau Kerisetiano matamua.—Roma 8:5, 6.

9. Eaha ta te Roma 8:6 e ore e parau?

⁹ Mea faufaa atoa teie faaararaa no tatou i teie mahana. E nehenehe atoa te hoê taata o tei tavini ia Iehova e rave rahi matahiti e haamata i te ora ia “au i ta te tino.” Ua parau anei ïa Paulo e eiaha roa ˈtu e manaˈo i te mau mea mai te maa, te ohipa, te faaanaanataeraa aore ra te here i rotopu i na hoa faaipoipo? Aita roa ˈtu. Mai tera iho â te oraraa. I au na hoi Iesu i te maa, ua faatamaa atoa oia ia vetahi ê. Ua taa atoa ia ˈna te faufaaraa ia tamǎrû. E ua papai Paulo e i roto i te faaipoiporaa, e tuhaa faufaa te taotoraa i to ˈna apiti.

10. Eaha te auraa o te taˈo “haapao”?

¹⁰ Eaha ta Paulo i hinaaro e parau ma te taˈo “haapao,” aore ra manaˈo noa? Te auraa o te taˈo Heleni ta Paulo i faaohipa, no te hoê ïa taata o te haamau pauroa to ˈna mau manaˈo e opuaraa i nia i te tahi ohipa. Ua faataa te hoê aivanaa e tera parau, no te feia ïa o te haapao, “anaanatae roa, e paraparau noa no nia” i to ratou iho mau hinaaro miimii. E vaiiho ratou i tera mau hinaaro ia faatere i to ratou oraraa.

11. Eaha te tahi mau mea o te nehenehe e riro ei mea faufaa roa no tatou?

¹¹ Ua titauhia ia hiˈopoa te mau Kerisetiano no Roma ia ratou iho, a ite atu ai i nia i te aha ratou i haamau ai i to ratou mau manaˈo. I nia anei i te mau mea a “te tino”? I teie mahana, ia feruri atoa tatou eaha te mea faufaa roa ˈˈe no tatou. Eaha te mau aparauraa ta tatou e au roa ˈˈe? Eaha te mea ta tatou e au roa ia rave? E taa paha vetahi e tei nia to ratou feruriraa i te tamataraa i te mau uaina, te faaneheneheraa i to ratou fare, hooraa mai i te ahu apî, faahoturaa i te moni aore ra te faaineineraa i te mau mahana faafaaearaa. E ere te reira i te mea ino. Mai tera iho â te oraraa. Ei hiˈoraa, i te hoê oroa faaipoiporaa, ua taui Iesu i te pape ei uaina, e ua parau Paulo ia Timoteo  ia inu “maa uaina iti” no to ˈna ea. (Tim. 1, 5:23; Ioa. 2:3-11) Aita râ te uaina i riro ei mea faufaa roa ˈˈe i roto i to ratou oraraa. E no tatou ïa? Eaha te mea faufaa roa ˈˈe i roto i to tatou oraraa?

12, 13. No te aha ia vai ara tatou i nia i ta tatou e tiatonu ra?

¹² Ua faaara Paulo: “O te haapao hoi i ta te tino ra, o te pohe ïa.” (Roma 8:6) Eaha ta ˈna i hinaaro e parau? Ia ora tatou ia “au i ta te tino,” e nehenehe tatou e ere i to tatou auhoaraa e o Iehova i teie nei, a ere atu ai i to tatou ora no a muri aˈe. E nehenehe râ e ape i te reira. E nehenehe te hoê taata e taui. A haamanaˈo na i teie tane haerea tia ore no Korinetia o tei tiavaruhia. Ua taui oia e ua faaea i te rave i to ˈna mau hinaaro tia ore. Ua tavini faahou oia ia Iehova ma te haerea mâ.—Kor. 2, 2:6-8.

¹³ E hiˈoraa ino roa tera taata no te parau o te oraraa ia “au i ta te tino.” Ua taui râ oia. No reira, i teie mahana, ia haamata te hoê Kerisetiano i te pee i to ˈna mau hinaaro tia ore eiaha râ i ta Iehova mau ture aveia, e nehenehe atoa oia e taui. E nehenehe te haamanaˈoraa i ta Paulo faaararaa e turai ia tatou ia rave i te tahi mau tauiraa e titauhia.

14, 15. (a) Ua faaue Paulo ia haapao tatou i te aha? (b) Eaha te auraa ia “haapao . . . i ta te tino”?

¹⁴ I muri aˈe i to Paulo paraparauraa no nia i te fifi atâta o te haapaoraa “i ta te tino,” ua faataa oia: “O te haapao i ta te [v]arua ra, o te ora ïa e te hau.” Auê ïa haamaitairaa ta tatou e nehenehe e fanaˈo!

¹⁵ E ere râ te parau “haapao i ta te [v]arua” te auraa e eita te hoê taata e haapao i te mea mau. E ere atoa te auraa e e manaˈo e e paraparau noa te tahi taata no nia ia Iehova aore ra i te Bibilia. Ei hiˈoraa, ua ora te mau Kerisetiano o te senekele matamua mai te tahi atu mau taata. I au na ratou i te maa, e inu, ua faaipoipo ratou, ua aupuru i te hoê utuafare e ua rave i te ohipa.—Mar. 6:3; Tes. 1, 2:9.

16. Eaha te mea faufaa roa ˈˈe i roto i to Paulo oraraa?

¹⁶ Aita râ Paulo e te tahi atu mau Kerisetiano o te senekele matamua i vaiiho i teie mau ohipa ia riro ei mea faufaa roa ˈˈe i roto i to ratou oraraa. Ei hiˈoraa, ua ite tatou e ua hamani Paulo i te fare ie ei imiraa na ˈna. E ere râ ta ˈna ohipa te mea faufaa roa ˈˈe i roto i to ˈna oraraa. Te mea faufaa roa ˈˈe i roto i to Paulo oraraa, o te taviniraa ïa i te Atua. Ua tiatonu Paulo i te ohipa pororaa e haapiiraa. (A taio i te Ohipa 18:2-4; 20:20, 21, 34, 35.) Ua titauhia ia pee te mau taeae e tuahine no Roma i to Paulo hiˈoraa. Ia na reira atoa tatou.—Roma 15:15, 16.

17. Eaha te mau haamaitairaa ia “haapao i ta te [v]arua”?

¹⁷ Mai te aha râ to tatou oraraa ia tiatonu tatou i te taviniraa ia Iehova? Te na  ô ra te Roma 8:6: “O te haapao i ta te [v]arua ra, o te ora ïa e te hau.” Te auraa, e vaiiho ïa tatou i to tatou feruriraa ia arataihia e to Iehova varua e e haapii tatou ia feruri mai ia ˈna. Ua fafau Iehova i te hoê oraraa oaoa i teie nei e te ora mure ore no a muri aˈe.

18. E nafea tatou e ite ai i te hau ia haapao tatou “i ta te [v]arua”?

¹⁸ Eaha ta Paulo i hinaaro e faataa mai a parau ai oia e e nehenehe te haapaoraa “i ta te [v]arua” e hopoi mai i te hau? Pauroa te taata e hinaaro i te hau, te hau o te feruriraa iho â râ. Mea iti roa te taata e ite i te reira. Maoti Iehova, e nehenehe mau tatou e fanaˈo i te hau o te feruriraa. E nehenehe atoa tatou e ite i te hau i roto i to tatou utuafare e te amuiraa. No te mea e taata tia ore tatou, i te tahi taime, e tupu mai te fifi e to tatou mau taeae e tuahine. Ia tupu noa ˈtu te reira, e pee anaˈe i ta Iesu aˈoraa: “E . . . haere e faite i to taeae.” (Mat. 5:24) A haamanaˈo e te tavini atoa ra to taeae aore ra tuahine ia Iehova “te Atua hau.”—Roma 15:33; 16:20.

19. Eaha te tahi atu hau ta tatou e nehenehe e fanaˈo?

¹⁹ Ia haapao tatou “i ta te [v]arua,” e ite tatou i te hau e te Atua. Ua papai te peropheta Isaia: “O tei ore i aueue te manaˈo ra, e riro oe [Iehova] i te tiai ia ˈna, e ei hau rahi roa te hau, o oia i tiaturi ia oe ra.”—Isa. 26:3; a taio i te Roma 5:1.

20. No te aha oe e mauruuru ai i te poroi o te Roma pene vaˈu?

²⁰ Noa ˈtu e tiaturiraa to tatou no te ora i te raˈi aore ra i te fenua nei, e nehenehe tatou pauroa e faufaahia i te mau parau î i te paari e itehia i roto i te Roma pene vaˈu. Te mauruuru nei tatou e te faaitoito mai ra te Bibilia ia tiatonu i te taviniraa ia Iehova, eiaha râ i to tatou iho mau hinaaro. Ua ite tatou e ia haapao tatou “i ta te [v]arua,” e haamaitairaa faahiahia to muri mai. Ua papai Paulo: “Te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu.”—Roma 6:23.