1. Eaha ta Mareta i papu no nia i to ˈna taeae? (A hiˈo i te hohoˈa matamua.)

 UA OTO o Mareta hoê hoa piri e pǐpǐ a Iesu. Ua pohe to ˈna taeae ra o Lazaro. Te vai ra anei te tahi mea o te nehenehe e tamahanahana ia ˈna? E. Ua fafau Iesu ia ˈna: “E tia faahou mai to taeae.” Mea papu, aita teie mau parau e nehenehe e faaore roa i to ˈna mauiui. Ua tiaturi râ Mareta i ta Iesu i fafau e ua parau: “Ua ite au e e tia faahou mai oia i te tia-faahou-raa i te mahana hopea.” (Ioa. 11:20-24) Ua papu ia ˈna e e tupu iho â te hoê tia-faahou-raa a muri aˈe. Ua faatupu râ Iesu i muri iho i te hoê semeio. Ua faatia mai oia ia Lazaro i taua iho mahana ra.

2. No te aha e hinaaro ai oe i te hoê â tiaturiraa e to Mareta?

² E ore e tia ia tatou ia tiai ia faatia mai Iesu aore ra to ˈna Metua i te feia herehia e tatou i teie nei â. Ua papu anei râ ia outou, mai ia Mareta, e e tupu te tahi tia-faahou-raa no te feia herehia a muri aˈe? Peneiaˈe ua pohe ta oe tane aore ra vahine, to oe mama, to oe papa, hoê papa e mama ruau aore ra hoê tamarii herehia e oe. Te tiai ru nei oe i te tauahi  ia ˈna, i te paraparau aore ra i te ataata e o ˈna. Mai ia Mareta, e nehenehe oe e parau e, ‘Ua ite au e e tia faahou mai tei herehia e au i te tia-faahou-raa.’ E mea maitai atoa râ ia feruri te Kerisetiano tataitahi i te mau tumu e tiaturi ai tatou i te reira.

3, 4. Eaha ta Iesu i rave e mea nafea te reira i haapuai ai i to Mareta tiaturiraa?

³ I faaea na o Mareta i pihaiiho ia Ierusalema, aita paha oia i ite ia Iesu i te faatiaraa mai i te tamaiti a te hoê vahine ivi e faaea ra i pihaiiho i te oire o Naina i Galilea. Ua faarooroo râ oia i te reira. Eita e ore e ua faaroo atoa oia e ua faatia mai o Iesu mai te pohe mai i te tamahine a Iaeiro. Ua “ite” te utuafare o teie tamahine “e ua pohe oia.” Ua rave râ Iesu i to ˈna rima e ua parau: “Tamahine, a tia mai!” E tia maira oia i reira iho. (Luka 7:11-17; 8:41, 42, 49-55) Ua ite râ o Mareta e to ˈna tuahine ra o Maria, e e nehenehe Iesu e faaora i te maˈi. Ua papu ia raua e ahani Iesu i ǒ nei, eita ïa o Lazaro e pohe. Teie nei râ ua pohe oia, eaha ta Mareta e tiai ra? A tapao na e ua parau oia e e tia faahou mai o Lazaro a muri aˈe, “i te mahana hopea.” No te aha i papu ai ia ˈna? E no te aha e papu ai ia oe e e tupu iho â te hoê tia-faahou-raa a muri aˈe, e to roto atoa te feia herehia e oe?

⁴ Te vai ra te tahi mau tumu papu e tiaturi ai tatou i te tia-faahou-raa. E hiˈopoa mai tatou te tahi o te reira. Inaha, e nehenehe oe e ite mai i te tahi mau manaˈo i roto i te Parau a te Atua ta oe e ore e manaˈo pinepine nei e o te haapuai râ i to oe faaroo a nehenehe atu ai oe e ite faahou i te feia herehia e oe.

5. No te aha i papu ai ia Mareta e e tia faahou mai o Lazaro?

⁵ A tapao na e aita o Mareta i parau: ‘Mea maitai e tia faahou mai to ˈu taeae.’ Ua parau ra oia: “Ua ite au e e tia faahou mai oia.” No te aha Mareta i tiaturi ai i te reira? No te mea ua ite oia no nia i te mau tia-faahou-raa o tei tupu i tahito ra. Ua haapii paha oia i te reira i te fare e i te sunago i to ˈna tamariiriiraa ra. E hiˈo mai tatou e toru o na tia-faahou-raa i faahitihia i roto i te mau Papai.

6. Eaha te semeio ta Mareta iho i haapii?

⁶ Ua tupu te tia-faahou-raa matamua i te taime a horoa ˈi te Atua i te mana ia Elia no te faatupu i te mau semeio. I te pae apatoerau o Iseraela, i te oire Phoinikia piihia Zarephate, te vai ra hoê vahine ivi, mea veve oia, o te farii maitai i te peropheta. I muri iho, ua faatupu Iehova i te hoê semeio. Ua haapao oia ia ore ta ˈna faraoa e hinu e pau a nehenehe ai raua ta ˈna tamaiti e ora mai. (Arii 1, 17:8-16) I muri aˈe, ua maˈihia ta ˈna tamaiti e pohe atura. Ua tauturu râ o Elia ia ˈna. A tapea ˈi i te tamaiti, ua pure o Elia ia Iehova: “E tau Atua, . . . , teie ta ˈu parau ia oe, e faahoˈi mai oe i te [v]arua o teie nei tamaiti.” E tera iho â tei tupu! Ua faaroo te Atua ia Elia e ua faahoˈihia mai te tamaiti i te ora. Teie te tia-faahou-raa matamua i faatiahia i roto i te Bibilia. (A taio i Te mau arii 1, 17:17-24.) Papu maitai e ua haapii o Mareta no nia i teie tupuraa faahiahia.

7, 8. (a) Mea nafea Elisaia i te tamahanahanaraa i te hoê metua vahine oto? (b) Eaha ta te semeio a Elisaia e haapapu ra no nia ia Iehova?

⁷ Na te peropheta Elisaia i faatupu i te  piti o te tia-faahou-raa faatiahia i roto i te Bibilia. I te oire o Sunema, i ora na hoê vahine Iseraela. Aita ta ˈna e tamarii. No te mea ua farii maitai oia ia Elisaia, ua haamaitai Iehova i teie vahine e ta ˈna tane paari ma te horoa ˈtu i te hoê tamaiti. Tau matahiti râ i muri aˈe, pohe mai nei te tamaroa. A feruri na i te mauiui o teie metua vahine. No to ˈna oto rahi, ua haere oia e 30 kilometera te atea e farerei ia Elisaia i te mouˈa Karemela. Tono atura o Elisaia i ta ˈna tavini ia Gehazi na mua ˈtu ia raua i Sunema no te faatia faahou mai i te tamaroa. Aita râ i haere ia Gehazi ia faahoˈi mai ia ˈna i te ora. I muri iho, tae atura te metua vahine oto e o Elisaia i te fare.—Arii 2, 4:8-31.

⁸ Haere atura Elisaia i roto i te fare i reira te tino pohe o te tamaroa i vaiihohia ˈi, e pure atura. Ua pahono Iehova i te pure a Elisaia e ma te hoê semeio ua faahoˈi mai i te tamaiti i te ora. Ua oaoa roa te metua vahine i to ˈna iteraa e ua ora mai ta ˈna tamaiti. (A taio i Te mau arii 2, 4:32-37.) Peneiaˈe ua haamanaˈo oia i te mau parau ta Hana i faahiti i roto i ta ˈna pure. Aita i noaa ta Hana tamarii e tae roa i te taime i haamaitai ai Iehova ia ˈna ma te horoa ˈtu i te hoê tamaiti, o Samuela. Arue atura Hana ia Iehova no te mea na ˈna e “hopoi roa i te apoo ra,” e na ˈna e “faahoˈi mai” i te ora. (Sam. 1, 2:6) Ma te faatia mai i te tamaiti i Sunema, ua haapapu te Atua e e nehenehe oia e faatia faahou mai i te feia pohe.

9. A faataa i te toru o te tia-faahou-raa i faatiahia i roto i te Bibilia.

⁹ Ua itehia te tahi tupuraa faahiahia i muri aˈe i te poheraa o Elisaia. Ua hau atu i te 50 matahiti oia i te taviniraa ei peropheta, e “pohe ihora Elisaia i te maˈi, te maˈi i pohe ai oia ra.” I muri aˈe, o te mau ivi anaˈe o Elisaia tei toe mai. I te hoê mahana, ua tanu te tahi mau Iseraela i te hoê taata, ite atura ratou i te mau enemi i te haereraa mai. Haavitiviti atura te mau Iseraela i te horo, faarue noa ihora i taua taata pohe ra i roto i to Elisaia apoo. Te na ô ra te Bibilia: “Ia tuuhia taua taata ra i raro, e tiaia ˈtura i te pera [aore ra ivi] o Elisaia, te ora noa ra oia ra, e ua tia noa maira i nia.” (Arii 2, 13:14, 20, 21) Ua haapapu teie mau faatiaraa ia Mareta e e mana to te Atua i nia i te pohe. Ia haapapu atoa te reira ia oe e e mana rahi roa to te Atua e te faito ore.

10. Mea nafea Petero i te tautururaa i te hoê tuahine Kerisetiano tei pohe?

¹⁰ Te faatia atoa ra te mau Papai Heleni Kerisetiano i te mau tia-faahou-raa ta te tahi mau tavini taiva ore a te Atua i faatupu. Ua faahiti aˈena tatou i te mau tia-faahou-raa ta Iesu i faatupu i pihaiiho i te oire o Naina e i te fare o Iaeiro. Tau taime i muri aˈe, ua faatia mai te aposetolo Petero ia Doreka pii-atoa-hia Tabita. Ua tomo o Petero i roto i te piha i reira to ˈna tino i te vaiihoraahia, pure atura, e na ô atura: “Tabita, a tia!” I tera iho â taime, tia mai nei o ˈna, “e faaite atura” Petero  “ia Tabita tei ora mai” i te mau Kerisetiano i reira. No te mea ua ite-mata-roa-hia teie tupuraa e te taata, “tiaturi aˈera e rave rahi” i roto i tera oire “i te Fatu.” Ua nehenehe ïa te mau pǐpǐ apî e faaite haere ia vetahi ê i te mau parau apî oaoa no nia ia Iesu e e faaite i te taata atoa i te mana o Iehova no te faatia mai i te feia pohe.—Ohi. 9:36-42.

11. Eaha ta te taote ra o Luka i papai no nia i te hoê taurearea, e mea nafea teie tupuraa i ohipa ˈi i nia ia vetahi ê?

¹¹ Ua ite mata te tahi mau taata i te hoê tia-faahou-raa ê atu. I te hoê taime, ua apiti te aposetolo Paulo i te hoê putuputuraa i roto i te hoê piha teitei i Teroa, i roto i tei piihia i teie nei o Turekia apatoerau. Ua paraparau Paulo e tae roa ˈtu i te tuiraa po. Te faaroo noa ra o Eutiko, hoê taurearea, a parahi noa ˈi i te haamaramarama. Ua varea râ oia i te taoto e marua ihora i raro mai te tahua piti atu. Peneiaˈe o Luka na mua tei tae i pihaiiho ia Eutiko. Ei taote, ua taa ia ˈna e ua pohe te taurearea. Ua pou atoa mai Paulo, tauahi atura ia Eutiko a parau atu ai i teie mea maere mau: “Te ora ra . . . o ˈna.” Ua ohipa teie semeio i nia i te mau taata tei ite i tei tupu. I to ratou iteraa e ua pohe te taurearea e ua faatia-faahou-hia mai oia, “oaoa roa aˈera ratou.”—Ohi. 20:7-12.

12, 13. Eaha te mau uiraa ta tatou e nehenehe e uiui no te mau tia-faahou-raa ta tatou i hiˈopoa mai?

¹² Mea maitai ia horoa te mau tia-faahou-raa ta tatou i hiˈopoa mai i te hoê â tiaturiraa e to Mareta. E nehenehe tatou e tiaturi e e faatia faahou mai to tatou Atua, tei horoa mai i te ora, i tei pohe. Mea anaanatae ia ite e ua apiti te tahi mau tavini taiva ore a te Atua, mai ia Elia, Iesu aore ra Petero i te tia-faahou-raa tataitahi faahitihia i nia ˈtu. E ua tupu te reira i te taime a faatupu noa ˈi Iehova i te mau semeio. E no te feia ïa o tei pohe i te tahi taime aita â teie mau semeio i faatupuhia  ˈtura? Ua tiaturi anei te mau tane e vahine haapao maitai e e faatia faahou mai te Atua i tei pohe a muri aˈe? Ua tiaturi papu anei ratou mai ia Mareta i to ˈna parauraa no to ˈna taeae: “Ua ite au e e tia faahou mai oia i te tia-faahou-raa i te mahana hopea”? No te aha i papu ai ia ˈna e e tupu iho â te hoê tia-faahou-raa a muri aˈe, e no te aha e nehenehe atoa oe e tiaturi i te reira?

¹³ E rave rahi faatiaraa i roto i te Parau a te Atua o te faaite ra e ua papu i ta ˈna mau tavini taiva ore e e tupu iho â te hoê tia-faahou-raa a muri aˈe. E hiˈo mai tatou i te tahi mau tupuraa.

14. Eaha ta te faatiaraa no nia ia Aberahama e haapii mai no nia i te tia-faahou-raa?

¹⁴ A feruri na i ta Iehova i faaue ia Aberahama ia rave i nia ia Isaaka, te tamaiti ta ˈna i tiai noa na. Ua faaue Iehova: “A rave i to tamaiti i tena na, i to tamaiti hoê ra ia Isaaka, ta oe e here na, a haere ai i te fenua ra o Moria, pûpû mai ai ia ˈna i reira ei tusia taauahi.” (Gen. 22:2) I to oe manaˈo, eaha te huru o Aberahama i to ˈna faarooraa i teie faaueraa? Ua fafau Iehova e na roto i te huaai o Aberahama e haamaitaihia ˈi te mau fenua atoa o te ao nei. (Gen. 13:14-16; 18:18; Roma 4:17, 18) Ua parau atoa Iehova e e itehia taua haamaitairaa ra na “roto mai ia Isaaka.” (Gen. 21:12) Mea nafea râ te reira e tupu ai mai te peu e pûpû o Aberahama i ta ˈna tamaiti? Ua aratai te Atua ia Paulo ia faataa e ua tiaturi Aberahama e e nehenehe ta te Atua e faatia faahou mai ia Isaaka. (A taio i te Hebera 11:17-19.) Teie râ, aita te Bibilia e parau ra e ua manaˈo o Aberahama e e faatia-faahou-hia mai o Isaaka i tera iho â taime, tau hora, hoê mahana aore ra hoê hebedoma i muri mai. Aita o Aberahama i ite afea ta ˈna tamaiti e faatia-faahou-hia mai. Ua tiaturi papu râ oia e e faahoˈi mai Iehova ia Isaaka i te ora.

15. Eaha ta te taata taiva ore ra o Ioba i tiaturi?

¹⁵ Ua ite atoa te taata taiva ore ra o Ioba e e tupu te hoê tia-faahou-raa a muri aˈe. Ua ite oia e ia tâpûhia hoê tumu raau, e  nehenehe te reira e tupu faahou a riro atu ai mai te hoê tumu raau apî. Mea taa ê râ no te hoê taata. (Ioba 14:7-12; 19:25-27) Ia pohe hoê taata, aita oia e nehenehe e faaora faahou mai ia ˈna iho. (Sam. 2, 12:23; Sal. 89:48) E ere râ te auraa e aita te Atua e nehenehe e faatia faahou mai i te hoê taata. Inaha, ua tiaturi o Ioba e e haamanaˈo Iehova ia ˈna. (A taio i te Ioba 14:13-15.) Aita o Ioba i ite i teihea taime a muri aˈe te reira e tupu ai. Ua tamau noa râ Ioba i te tiaturi e e haamanaˈo e e faatia faahou te Atua poiete o tei horoa i te ora i te taata, ia ˈna.

16. Eaha te faaitoitoraa ta te hoê melahi i horoa ia Daniela?

¹⁶ A feruri na i te tahi atu taata haapao maitai ra o Daniela. Ua tavini oia ia Iehova ma te taiva ore i te roaraa o to ˈna oraraa e ua turu Iehova ia ˈna. I te hoê taime, ua pii te hoê melahi ia Daniela e “taata here-roa-hia” e ua parau atu ia vai hau noa oia e ia itoito atoa.—Dan. 9:22, 23; 10:11, 18, 19.

17, 18. Eaha ta Iehova i fafau ia Daniela?

¹⁷ A fatata roa ˈi 100 matahiti to Daniela e a piri ai i te hopea o to ˈna oraraa, eita e ore e ua haapeapea oia no nia i to ˈna tupuraa. Ua tiaturi anei o Daniela e e ora faahou mai oia? Papu maitai e e! I te hopea o te buka Daniela, te ite ra tatou i ta te Atua i fafau ia ˈna: “E haere râ oe e tae noa ˈtu i te hopea: e faaearaa hoi to oe.” (Dan. 12:13) Ua ite o Daniela e te faaea, aore ra te taoto ra, te feia pohe e “aore e imiraa, aore hoi e ite, aore hoi e paari, i te apoo” i reira oia e vai ai. (Koh. 9:10) E ere râ tera te hopea no Daniela. Ua fafau Iehova ia ˈna i te hoê a muri aˈe faahiahia mau.

¹⁸ Ua parau te melahi a Iehova ia ˈna: “E mau hoi oe i to oe kelero ia tae i te hopea o te mau mahana ra.” Aita o Daniela i papu maitai afea e tupu ai te reira. Ua taa ia ˈna e pohe oia a faaea noa ˈtu ai. I to Daniela râ faarooraa i te parau fafau “E mau hoi oe i to oe kelero,” ua taa ia ˈna e e faatia-faahou-hia mai oia a muri aˈe. E tupu te reira i te hoê tau maoro i muri aˈe i to ˈna poheraa, “ia tae i te hopea o te mau mahana ra,” aore ra i te anotau hopea.

19, 20. (a) Eaha te tuatiraa i rotopu i te mau tupuraa ta tatou i ite mai e te parau a Mareta ia Iesu? (b) Eaha ta tatou e hiˈopoa i roto i to muri mai tumu parau?

¹⁹ Mea papu te tumu e tiaturi ai Mareta e e “tia faahou mai” to ˈna taeae taiva ore ra o Lazaro “i te tia-faahou-raa i te mahana hopea.” Ua hiˈopoa mai tatou te parau ta Iehova i fafau ia Daniela e te faaroo o Mareta i te hoê tia-faahou-raa a muri aˈe. Te horoa mai ra te reira i te tiaturiraa i teie mahana. E tupu iho â te hoê tia-faahou-raa.

²⁰ Ua haapii mai tatou no nia i te mau tia-faahou-raa tei tupu i tahito ra. Te haapapu ra te reira e e nehenehe te feia pohe e ora faahou mai. Ua ite atoa mai tatou e ua tiai te tahi mau tane e vahine o tei tavini i te Atua ma te taiva ore, i te hoê tia-faahou-raa a muri aˈe. Teie râ, te vai ra anei te tahi mau haapapuraa o te faaite e e nehenehe te hoê tia-faahou-raa e tupu maoro i muri aˈe i te fafauraahia te reira? Mai te peu e e, e tumu papu ïa to tatou no te tiai i te hoê tia-faahou-raa a muri aˈe. Afea râ te reira e tupu ai? E hiˈopoa mai tatou i teie na uiraa i roto i to muri mai tumu parau.