1, 2. Mea nafea Iehova i te tamahanahanaraa ia tatou i roto i to tatou mau fifi, e eaha te parau fafau ta tatou e ite i roto i ta ˈna Parau?

 UA FERURI te hoê taeae apî faaea taa noa i te Korinetia 1, 7:28 o te na ô ra: “E fifihia râ [te feia faaipoipo] i te tino.” Ua paraparau te taeae i te hoê matahiapo paari tei faaipoipo e ua ani oia ia ˈna: “Eaha taua ‘fifi’ ra, e e nafea vau ia faaruru i te reira ia faaipoipo vau?” Hou a pahono ai i tera uiraa, ua parau te matahiapo i teie taeae apî ia feruri i te tahi atu manaˈo ta te aposetolo Paulo i papai: O Iehova “te Atua no ˈna anaˈe te mahanahana, o te tamahanahana ia tatou i roto i te mau tamataraa atoa,” aore ra ati.—Kor. 2, 1:3, 4.

² Ua ite tatou e te here mai ra Iehova to tatou Metua ia tatou e te tamahanahana mai ra oia ia faaruru tatou i te mau fifi. Te haamanaˈo ra paha oe i te tahi mau tupuraa i turu e i aratai na Iehova ia oe maoti ta ˈna Parau. Ua papu ia tatou e te hinaaro ra oia i te mea maitai roa ˈˈe no tatou, mai ta ˈna i rave i nia i ta ˈna mau tavini i tahito ra.—A taio i te Ieremia 29:11, 12.

3. Eaha te mau uiraa ta tatou e pahono i roto i teie tumu parau?

 ³ Mai tei matauhia, mea ohie aˈe ia faaruru i te mau fifi e ati ia ite tatou mea nafea te reira i te tupuraa mai. No reira, no te aha e faaruru ai tatou i te fifi i roto i te faaipoiporaa aore ra i roto i to tatou utuafare? Eaha te mau hiˈoraa Bibilia i tahito ra e i teie tau o te tauturu mai ia ite i te tamahanahanaraa ta tatou e hinaaro mau ra? E pahono anaˈe i teie na uiraa a hiˈo atu ai e nafea tatou e nehenehe ai e faaruru i te mau fifi.

4, 5. Eaha paha te mau fifi ta te hoê tane e vahine e faaruru?

⁴ I muri aˈe i to Iehova poieteraa i te vahine matamua, ua aratai Oia ia ˈna i te tane ra a riro atu ai ei vahine na ˈna. Ua parau Iehova: “E faarue . . . te taata i tana metua tane e tana metua vahine, a ati atu ai i ta ˈna vahine, e e riro hoi raua ei hoê.” (Gen. 2:24) Mea papu, e taata tia ore tatou pauroa. (Roma 3:23) No reira, e tupu iho â te mau fifi ia faaipoipo te hoê tane e te hoê vahine. Ei hiˈoraa, hou a faaipoipo ai, mea titauhia i te hoê vahine ia auraro i to ˈna na metua. Te parau ra râ te Bibilia e i muri aˈe i te faaipoiporaa, o te tane te upoo o ta ˈna vahine. (Kor. 1, 11:3) I te omuaraa, mea fifi paha no te tane ia horoa i te aratairaa i ta ˈna vahine. E no te vahine, mea fifi paha no ˈna ia farii e e ere na to ˈna na metua faahou e faatere ia ˈna, na ta ˈna râ tane. Hau atu, ia faaipoipo te tane e te vahine, e tupu paha te aimârôraa e to raua na metua hoovai e e nehenehe te reira e faatupu i te fifi.

⁵ A feruri atoa na i te huru aau o te hoê tane e vahine a ite ai e ua hapû te vahine. E oaoa roa paha raua, e riro atoa râ te reira ei haapeapearaa no raua. E ui paha raua e e maitai mai anei te taime hapûraa, e e haapeapea raua no nia i te ea o te pêpe. Ua ite atoa raua e rahi mai te mau haamâuˈaraa. I muri aˈe i te fanauraa, e titauhia ia rave na hoa faaipoipo i te tahi atu mau faatanoraa. E faataa ˈtu â paha te metua vahine i te taime no te haapao i ta ˈna pêpe. Aita ˈtura ïa e taime faahou to te tane e ta ˈna vahine no te tahi e te tahi mai i na mua ˈtu. Mea rahi atu â ïa mau hopoia a te metua tane. E mea tia ia ˈna ia papu e te fanaˈo ra ta ˈna vahine e ta ˈna tamarii i ta raua e hinaaro mau ra.

6-8. Eaha te huru aau o na hoa faaipoipo mai te peu e eita ta raua tamarii e noaa?

⁶ Te faaruru ra te tahi mau tane e vahine faaipoipo i te tahi atu huru fifi. E hinaaro rahi to ratou i te tamarii, eita râ ta ratou e noaa. Mai te peu e eita te vahine e hapû, e mauiui rahi roa paha oia. (Mas. 13:12) I te tau tahito ra, mea faufaa roa no te mau vahine ia faaipoipo e ia fanau i te tamarii. No reira, o Rahela, te vahine faaipoipo a Iakoba i hepohepo roa ˈi, no te mea eita o ˈna e hapû mai, area râ to ˈna tuahine, oia ïa. (Gen. 30:1, 2) I teie mahana, i te tahi mau fenua, e rave rahi o te tiaturi ra e mea faufaa roa ia fanau rahi i te tamarii. E ani pinepine te feia i te mau mitionare o te ora ra i teie mau fenua e no te aha aita ta ratou e tamarii. E tutava te mau mitionare i te faataa ˈtu eaha te tumu. Noa ˈtu râ, e parau atu vetahi, ‘Êê, e pure matou no orua!’

⁷ A hiˈo na i te tahi atu hiˈoraa. I hinaaro  noa na te hoê tuahine no Beretane i te tamarii. I to ˈna iteraa e eita ta ˈna e nehenehe e fanau i te tamarii, ua hepohepo roa o ˈna. I muri aˈe, ua faaoti raua ta ˈna tane i te faaamu i te hoê tamarii. Ua tamau râ oia i te oto no te hoê tau taime. Ua parau oia, “Ua ite au e e ere hoê â huru ia faaamu oe i te hoê tamarii e ia fanau mai i ta oe iho tamarii.”

⁸ Te parau ra te Bibilia “e faahereherehia te vahine i te fanauraa i te tamarii.” (Tim. 1, 2:15) E ere râ i te auraa e e fanaˈo oia i te ora mure ore no te mea e tamarii ta ˈna. Eaha ïa te auraa o teie irava? Mea ohipa roa te hoê metua vahine no te haapao i ta ˈna tamarii e no te atuatu i te fare. E nehenehe te reira e tauturu ia ˈna ia ape i te tahi mau huru mai te faatia-haere-raa i te parau aore ra te faaôraa ia ˈna i roto i te mau mea e ere i te ohipa na ˈna. (Tim. 1, 5:13) Noa ˈtu te reira, e tupu iho â te fifi i roto i to ˈna faaipoiporaa e utuafare.

9. Eaha te tahi atu mau fifi ta te feia faaipoipo e faaruru ra?

⁹ I roto i te mau fifi ta te tahi mau hoa faaipoipo e faaruru ra, o te pohe ïa o to ratou hoa faaipoipo. Noa ˈtu ua manaˈo ratou e eita roa ˈtu ratou e roohia i te reira, ua faaruru e rave rahi i teie tupuraa fifi mau. Te tiaturi papu nei te mau Kerisetiano i te parau fafau o te tia-faahou-raa, e e tamahanahana mau â te reira ia ratou. (Ioa. 5:28, 29) I roto i ta ˈna Parau, e rave rahi parau fafau a to tatou Metua ra Iehova o te tamahanahana ra ia tatou i roto i te mau taime fifi mau. E hiˈo anaˈe e nafea te tahi mau tavini a Iehova i fanaˈo ai i teie tamahanahanaraa e e nafea te reira i tauturu ai ia ratou.

10. Mea nafea Hana i te tamahanahana-raa-hia? (A hiˈo i te hohoˈa matamua.)

¹⁰ A hiˈo na i tei tupu no Hana, te vahine here a Elikana. Ua hinaaro oia i te tamarii, aita râ ta ˈna tamarii i noaa. Area râ o Penina, te tahi atu vahine a Elikana, mea rahi ïa ta ˈna tamarii. (A taio i te Samuela 1, 1:4-7.) Te mea ino roa ˈtu, ua faaooo Penina ia Hana i “te mau matahiti atoa” no te reira. Ua haamauiui roa te reira ia Hana. Eaha ta ˈna i rave no te ite i te tamahanahanaraa? Ua pure oia ia Iehova. Ua haere atoa Hana i te vahi haamoriraa a Iehova e ua pure maoro oia. Ua ani oia ia Iehova ia horoa mai i te hoê tamaiti na ˈna e ua tiaturi o ˈna e e tauturu Oia ia ˈna. I te otiraa ta ˈna pure, ua maitai mai oia e “aita ˈtura to ˈna mata i hana,” aore ra i oto faahou. (Sam. 1, 1:12, 17, 18) Ua ite oia e e horoa Iehova i te hoê tamaiti na ˈna aore ra e tamahanahanahia oia ma te tahi atu ravea.

11. E nafea tatou e tamahanahanahia ˈi maoti te pure?

¹¹ I te mea hoi e taata tia ore tatou e te ora nei tatou i roto i te ao a Satani, e tamau tatou i te faaruru i te mau fifi. (Ioa. 1, 5:19) E tauturu râ ta tatou. E nehenehe tatou e pure ia Iehova, “te  Atua no ˈna anaˈe te mahanahana.” O ta Hana ïa i rave. Ua faaite Hana ia Iehova i to ˈna huru aau mau e ua ani i ta ˈna tauturu. Hoê â huru, ia mauiui tatou, mea tia ia rave tatou hau atu i te faaite-noa-raa i to tatou mau fifi ia Iehova. Mea titauhia ia taparu ia ˈna i te tauturu e ia faaite atu i to tatou huru aau mau.—Phil. 4:6, 7.

12. Eaha tei tauturu ia Ana ia oaoa noa ˈtu to ˈna mau fifi?

¹² E oto rahi paha tatou no te mea aita ta tatou e tamarii aore ra ua pohe tei herehia e tatou. E nehenehe râ tatou e ite i te tamahanahanaraa. A hiˈo na i te hiˈoraa o Ana, o tei ora i te tau o Iesu. I muri aˈe i to ˈna faaipoiporaa e hitu noa matahiti, ua pohe ta ˈna tane. E au ra e aita ta ˈna e tamarii. Eaha râ tei tauturu ia ˈna? “I haere noa na oia i te hiero.” Noa ˈtu e 84 matahiti to ˈna, ua haere noa oia i te hiero no te pure e no te haamori ia Iehova. (Luka 2:37) Na te reira i tamahanahana e i tauturu ia ˈna ia oaoa noa ˈtu to ˈna mau fifi.

13. E nafea te mau hoa mau e tamahanahana ˈi ia tatou mai te peu e haamauiui te mau mero o to tatou utuafare ia tatou?

¹³ E nehenehe atoa tatou e ite i te tamahanahanaraa i te mau hoa o te amuiraa. (Mas. 18:24) E pae noa matahiti to Paula a faaea ˈi to ˈna mama i te tavini ia Iehova. Ua oto roa Paula e e mea fifi mau no ˈna. Ua faaitoitohia râ oia e te hoê tuahine pionie, o Ann te iˈoa, e ua haapao maitai atoa ia ˈna. Te faataa ra Paula: “Noa ˈtu e ere mâua Ann i te fetii, ua tauturu mai ta ˈna haapeapearaa î i te here ia ˈu, ua tauturu te reira ia ˈu ia tavini noa ia Iehova.” Mai reira mai, ua hoˈi mai te mama o Paula i te amuiraa, e ua oaoa roa Paula. Ua oaoa atoa Ann no te mea ua nehenehe oia e tauturu ia Paula ia tavini noa ia Iehova.

14. E nafea tatou e faufaahia ˈi ia tamahanahana tatou ia vetahi ê?

¹⁴ Ia rave tatou i te mau ohipa maitai no te tahi atu mau taata, e pinepine tatou i te ore e haapao i to tatou iho mau fifi. Ei hiˈoraa, ua ite e rave rahi tuahine faaipoipo  aore ra faaea taa noa, e ia faaite ratou i te parau apî oaoa o te Faatereraa arii ia vetahi ê, te ohipa ra ïa ratou e o Iehova e te rave ra ratou i to ˈna hinaaro. E faaoaoa te reira ia ratou. Tera râ, e nehenehe tatou pauroa e faaite e te haapeapea ra tatou no vetahi ê ma te poro i te parau apî oaoa ia ratou. E ia rave tatou i te mau mea maitai no to tatou mau taeae e tuahine, e piri atu â tatou ia ratou. (Phil. 2:4) O ta te aposetolo Paulo ïa i rave. Ua haapao oia ia vetahi ê “mai te hoê metua vahine e faatamaa ra e e aupuru ra i ta ˈna iho mau tamarii.” Ua tamahanahana e ua faaitoito atoa Paulo i to ˈna mau taeae “mai te hoê metua tane ra i ta ˈna mau tamarii.”—A taio i te Tesalonia 1, 2:7, 11, 12.

15. Na vai te hopoia e haapii i te mau tamarii no nia ia Iehova?

¹⁵ E nafea tatou e tamahanahana ˈi i te mau utuafare o te amuiraa? I te tahi taime, e nehenehe te tahi feia poro apî e ani mai ia tauturu ia ratou ia haapii i ta ratou tamarii no nia ia Iehova aore ra ia haapii i te Bibilia i ta ratou tamarii. Te faaite ra te Bibilia e ua horoa Iehova i te hopoia i te mau metua e haapii e e faaineine i ta ratou tamarii. (Mas. 23:22; Eph. 6:1-4) Noa ˈtu i roto i te tahi mau tupuraa e nehenehe paha vetahi ê e tauturu atu, mea faufaa roa ia haapii te mau metua i ta ratou iho tamarii. Mea tia ia paraparau tamau te mau metua i ta ratou tamarii.

16. Eaha te tia ia haamanaˈo tatou ia tauturu tatou i te tamarii?

¹⁶ Ia ani mai te hoê metua ia tatou ia haapii i ta ˈna tamarii i te Bibilia, mea maitai ia haamanaˈo e ere hoê â huru hopoia ta tatou e ta te metua. I te tahi taime, e nehenehe paha tatou e haapii e te tamarii e ere te metua i te Ite no Iehova. Ia haapii tatou i te mau tamarii e ere na tatou, e haerea î i te paari ia haapii tatou ia ratou i to ratou fare tei reira anaˈe to ratou metua aore ra te tahi atu Ite no Iehova feruriraa paari aore ra ia haapii i te vahi taata. Ma te na reira, eita te taata e faatupu i te manaˈo hape no nia ia tatou. I muri aˈe, peneiaˈe e nehenehe ai te mau metua e haapii i ta ratou tamarii no nia ia Iehova.

17. E nafea te mau tamarii e nehenehe ai e tamahanahana i te tahi atu mero o te utuafare?

¹⁷ E nehenehe te feia apî o tei haapii i te here ia Iehova e tamahanahana e e faaitoito i te tahi atu mau mero o to ratou utuafare. E nafea ïa? Ma te faatura i to ratou metua e ma te haa rahi no te tauturu ia ratou ma te tahi atu mau ravea. Hau atu â, ia vai taiva ore te mau tamarii ia Iehova, e faaitoito te reira i te utuafare taatoa. Hou te diluvi, ua haamori Lameha ia Iehova. Ua parau oia no nia i ta ˈna tamaiti ra o Noa: “E riro teie nei tamaiti ei haamaharaa aho no tatou, i to tatou rohirohi, e te ohipa a to tatou nei rima, no te fenua i parau-ino-hia [aore ra i faainohia] e Iehova.” Ua tupu tera parau tohu i muri aˈe i te diluvi i te taime i faaore ai Iehova i te faainoraa i te fenua. (Gen. 5:29; 8:21) I teie mahana, e nehenehe atoa te mau tamarii o tei taiva ore ia Iehova e tamahanahana i to ratou utuafare. E nehenehe ratou e tauturu i te taatoaraa o te utuafare ia faaruru i te mau fifi i teie nei e a muri noa ˈtu.

18. Eaha te tauturu ia tatou ia faaruru noa ˈtu te mau fifi atoa?

¹⁸ Te imi ra te nunaa o Iehova i te tamahanahanaraa maoti te pure, te feruriruriraa i te mau hiˈoraa Bibilia e te mau auhoaraa piri e to ratou mau taeae e tuahine. (A taio i te Salamo 145:18, 19.) Ua ite tatou e ua ineine noa Iehova i te tamahanahana ia tatou, e e tauturu iho â oia ia tatou ia faaruru i te mau fifi atoa ta tatou e farerei ra!