1, 2. Ia papu ia tatou tataitahi i te aha? (A hiˈo i te hohoˈa matamua.)

 MAI tei faataahia ˈtu i to mua ˈtu tumu parau, ua parau te Diabolo e eita roa ˈtu e au ia Iehova ia faatere i te huitaata. Ua parau oia e aita e tano ra te faatereraa a Iehova e e oaoa aˈe te taata ia faatere ratou ia ratou iho. Ua tano anei Satani? A feruri na ahani te taata e faatere ia ratou iho a ora ˈi e a muri noa ˈtu. E oaoa mau anei ratou mai tera ia faaauhia i te oaoa te noaa mai ia faatere te Atua ia ratou? E oaoa mau anei oe ahani e ora oe e a muri noa ˈtu i te atea ê i te Atua?

² O oe anaˈe te nehenehe e pahono no oe iho. Mea titauhia ia feruri maite tatou tataitahi i teie mau uiraa. E papu ïa ia tatou e, ta Iehova ra te huru faatereraa maitai roa ˈˈe e mea tano iho â ia paturu atu tatou ia ˈna ma te aau atoa. Ua papu ia tatou te reira no ta tatou i taio i roto i te Bibilia. E hiˈo anaˈe eaha ta te Bibilia e parau ra no nia i te tiaraa o Iehova e faatere i te ao taatoa.

3. No te aha e tiaraa to Iehova no te faatere ei Arii hau ê?

³ O Iehova anaˈe te Arii hau ê o te ao taatoa no te mea, o ˈna te Manahope e te Atua Poiete. (Par. 1, 29:11; Ohi. 4:24) Ua ite-orama-hia i nia i te raˈi na 144 000 e faatere ei arii e te Mesia i te na ôraa: “E au roa ia faahanahanahia e ia faateiteihia oe Iehova to matou Atua puai, no te mea na oe i poiete i te mau mea atoa e no to hinaaro i vai ai e i poietehia ˈi te reira.” (Apo. 4:11) Ua poiete Iehova i te mau mea atoa, e tiaraa ïa to ˈna no te faatere i to te fenua e to te raˈi atoa.

4. Noa ˈtu to tatou tiamâraa e maiti, no te aha aita ˈi e tiaraa to tatou ia orure hau i te Atua?

⁴ Aita hoê aˈe mea ta Satani i poiete. Aita ïa to ˈna e tiaraa no te faatere i te ao taatoa. Ua orure hau o ˈna e na hoa faaipoipo matamua a patoi ai ratou i te tiaraa Arii hau ê o Iehova. (Ier. 10:23) Inaha hoi e tiamâraa to ratou ia maiti, e tiaraa anei ïa to ratou no te patoi i te faatereraa a Iehova? Aita. Ua horoahia ratou i te tiamâraa no te faaoti no ratou iho, eiaha râ no te patoi i te Atua Poiete, o Iehova. Papu maitai a orure hau ai ratou i te Atua, aita i tano ta ratou huru faaohiparaa i te tiamâraa e maiti. I nia i to tatou tiaraa taata, mea titauhia e na Iehova e faatere e e aratai ia tatou.

5. No te aha e mea tia noa ˈi ta te Atua mau faaotiraa?

⁵ A feruri na i te tahi atu tumu e mea tia ˈi e na Iehova e faatere. E faaohipa oia i to ˈna mana ma te parau-tia roa. Te na ô mai ra oia ia tatou: “O vau o Iehova tei rave i te parau hamani maitai ra, e te parau au [aore ra parau-tia], e te haavare ore, i te fenua nei: o ta ˈu ïa mau mea au.” (Ier. 9:24) Eita Iehova e turui i nia i te mau ture a te taata ia faaoti eaha te mea tia, na ˈna iho râ e haamau i te mea tia. E e horoa oia na te taata i te ture tei niuhia i nia i to ˈna parau-tia maitai roa. Ua na ô te papai Salamo: “O te parau-tia ra e te au, o te tumu ïa o to oe ra terono.” No reira te mau ture, aratairaa e faaotiraa atoa no ǒ mai ia Iehova, e mea tia anaˈe ïa. (Sal. 89:14; 119:128) Ua parau Satani e e ere Iehova i te Faatere maitai. Eita hoi ta Satani e nehenehe e hopoi mai i te parau-tia i te ao nei.

6. Eaha te tahi atu tumu e mea tia ˈi e na Iehova e faatere?

⁶ Te tahi atu tumu e mea tia ˈi e na Iehova e faatere, tei ia ˈna ra hoi te ite e te paari no te aupuru i te ao taatoa. Ta tatou ïa e ite ra i to ˈna horoaraa i ta ˈna Tamaiti i te mana no te faaora i te mau maˈi aita i ora i te taote. (Mat. 4:23, 24; Mar. 5:25-29) E semeio tera no tatou, e ere roa ˈtu râ no Iehova. Ua ite oia i te faanahoraa o te tino e e nafea e faaora i te reira ia maˈihia. E nehenehe atoa oia e faaora mai i te feia pohe e e arai i te mau ati natura.

7. E nafea e ite ai e mea paari aˈe Iehova i to te ao atoa a Satani?

⁷ Eita te ao faaterehia e Satani e nehenehe e hopoi mai i te hau, i roto anei i te hoê fenua aore ra ia tamaˈi tera e tera  nunaa. Tei ia Iehova anaˈe te paari no te hopoi mai i te hau na te fenua atoa. (Isa. 2:3, 4; 54:13) Hoê â to tatou huru aau e to Paulo ia ˈna i parau: “Auê te rahi hau ê o ta te Atua mau haamaitairaa e te hohonu mau hoi o to ˈna ite e to ˈna paari! Eita e noaa ia tatou ia taa roa i ta ˈna mau haavaraa atoa e to ˈna mau haerea atoa!”—Roma 11:33.

8. Eaha to oe manaˈo i te huru faatereraa a Iehova?

⁸ Mai tei faataahia mai nei, te faaite maitai ra te Bibilia e e tiaraa to Iehova no te faatere, e o ˈna atoa te Faatere maitai roa ˈˈe no te mea te faatere nei oia ma te here. Ia feruri tatou “e Atua aroha noa [oia], e te hamani maitai rahi, e te faaoromai rahi, e te maitai rahi, e te parau mau,” e piri atu â tatou ia ˈna. (Exo. 34:6) E faatura noa mai te Atua ia tatou. Mea ite aˈe oia i te aupuru ia tatou hau atu ia tatou iho. Ua parau te Diabolo e te tapea ra Iehova i te maitai i ta ˈna mau tavini, e haavare râ te reira. Ua tae roa hoi te Atua i te horoa mai i ta ˈna Tamaiti here ia roaa ia tatou te tiaturiraa e ora e a muri noa ˈtu.—A taio i te Salamo 84:11; Roma 8:32.

9. E nafea tatou i ite ai e te tâuˈa mai ra te Atua ia tatou tataitahi?

⁹ Mea here na Iehova i to ˈna mau taata atoa ei nunaa. Teie râ, te tâuˈa mau ra oia i te taata tataitahi. A feruri na i tei tupu i tahito ra, i faaohipa na Iehova i te tahi mau tavana e 300 matahiti i te maoro no te aratai i to ˈna nunaa e ia upootia ratou i to ratou mau enemi. I tera atoa tau, ua haapao Iehova i tera e tera taata, mai te vahine ra o Ruta. E ere oia i te Iseraela, mea rahi râ ta ˈna i haapae no te haamori ia Iehova. Ua haamaitai oia ia ˈna a horoa ˈi ia ˈna i te hoê tane e te hoê tamaiti. Hau atu â, no roto mai te Mesia i te opu fetii o te tamaiti a Ruta. Ua haapapai atoa Iehova i te aamu o Ruta i roto i te hoê buka Bibilia tei topahia i to ˈna iˈoa. I to outou manaˈo, eaha te huru aau o Ruta ia tia faahou mai oia i te ora a ite atu ai oia i te reira?—Ruta 4:13; Mat. 1:5, 16.

10. No te aha tatou e nehenehe ai e parau e e ere te faatereraa a Iehova i te mea etaeta?

¹⁰ E ere te faatereraa a Iehova i te mea etaeta. E itehia râ i te feia e auraro ia ˈna te tiamâraa e te oaoa. (Kor. 2, 3:17) Ua parau Davida no Iehova: “Te tura e te mana tei mua ïa i tana mata; te puai e te nehenehe [aore ra oaoa] tei to ˈna ïa vahi moˈa.” (Par. 1, 16:7, 27) Ua papai te fatu Salamo ra o Etana: “E ao to te mau taata i ite i te reo oaoa ra! e hahaere â ratou, e Iehova, i te maramarama o to mata ra. Te oaoa ra ratou i to iˈoa e mure noa ˈtu te mahana, e ua teitei ratou i te parau-tia na oe ra.”—Sal. 89:15, 16.

11. E nafea e papu atu â ˈi ia tatou e o Iehova te Arii hau ê maitai roa ˈˈe?

¹¹ Rahi noa ˈtu â tatou i te manaˈo i to Iehova maitai, e papu atu â ia tatou e ta ˈna ra te faatereraa maitai roa ˈˈe. Hoê â huru aau to tatou e to te papai Salamo  tei na ô i te Atua: “E maitai ae te mahana hoe i to oe mau vahi moâ ra i te mahanaˈtoa e tauatini noaˈtu.” (Sal. 83:11, Te Bibilia Moˈa V.C.J.S., 1976.) Na Iehova i opua e i poiete ia tatou, ua ite mau â ïa oia i te mea e oaoa ˈi tatou. Mea rahi aˈe ta ˈna e horoa mai i ta tatou e hinaaro mau ra. Te mau mea atoa ta Iehova e ani mai ra, no to tatou noa maitai. E ia rave noa ˈtu tatou i te haapaeraa, e oaoa noa tatou ia auraro tatou ia Iehova.—A taio i te Isaia 48:17.

12. Eaha te tumu rahi roa ˈˈe e paturu ai tatou i to Iehova tiaraa Arii hau ê?

¹² Ua haapii tatou i roto i te Bibilia e e patoi faahou vetahi i te tiaraa Arii hau ê o Iehova ia hope te Faatereraa arii tausani matahiti a te Mesia. (Apo. 20:7, 8) Eaha hoi ratou e na reira ˈi? I tera tau, e tamata faahou te Diabolo i te turai i te taata ia haapao noa ia ratou iho, mai ta ˈna i na reira aˈena. E tamata oia i te haavare i te taata a na ô ai e e nehenehe ratou e ora e a muri noa ˈtu ma te ore e auraro ia Iehova. E ere roa râ te reira i te parau mau. Tera râ, e ui anaˈe ia tatou iho, ‘E tiaturi anei au i tera huru haavare?’ Mai te peu e mea here iho â na tatou ia Iehova, e ua papu ia tatou e Atua maitai oia e e tiaraa to ˈna no te faatere i te ao taatoa, e au ore roa ïa tatou i teie huru haavare. E hinaaro noa tatou e ora ma te auraro i te tiaraa Arii hau ê o Iehova o te faatere mai ra ma te here.

13. E nafea tatou e paturu ai i te tiaraa Arii hau ê o te Atua ia pee tatou i to ˈna hiˈoraa?

¹³ Mai ta tatou i hiˈo mai nei, e tiaraa to Iehova no te faatere, e ta ˈna ra te faatereraa maitai roa ˈˈe. Mea tano ia paturu maite tatou i to ˈna tiaraa Arii hau ê. E paturu tatou i te reira a vai taiva ore ai ia ˈna e a pee ai i to ˈna hiˈoraa. Ia imi tatou i te mau ravea atoa no te rave i to Iehova hinaaro, e faaite tatou e mea au na tatou i ta ˈna huru faatereraa e te paturu ra tatou i te reira.—A taio i te Ephesia 5:1, 2.

14. E nafea te mau matahiapo e te mau upoo utuafare e pee ai i te hiˈoraa o Iehova?

¹⁴ Ua haapii tatou i roto i te Bibilia e e faaohipa noa na Iehova i to ˈna mana ma te here. Te mau upoo utuafare e te mau matahiapo e turu ra i te tiaraa Arii hau ê o Iehova, e pee noa ïa ratou i to ˈna hiˈoraa ma te ore e haavî e e faahepo atu. Ua tutava mau â Paulo i te pee i te hiˈoraa o te Atua e ta ˈna Tamaiti. (Kor. 1, 11:1) Aita oia i faahuru ê aore ra i faahepo ia vetahi ê ia rave i te mea tia. Tera râ, ua faaitoito oia ia ratou ma te mǎrû ia rave i te mea tia. (Roma 12:1; Eph. 4:1; Philem. 8-10) A na reira ˈi oia, ua pee Paulo i te hiˈoraa o Iehova. Ma te rave ia vetahi ê na roto i te here, te paturu ra ïa tatou i te tiaraa Arii hau ê o Iehova.

15. E nafea tatou e paturu ai i te faatereraa a Iehova ia faatura tatou i te mau matahiapo, upoo utuafare e metua?

¹⁵ Te paturu atoa ra tatou i te faatereraa a Iehova ia faatura e ia auraro tatou i te mau matahiapo, upoo utuafare e metua. Noa ˈtu aita tatou e taa maitai ra i ta ratou faaotiraa e rave aore ra aita to tatou manaˈo e tu ra, e turu noa tatou ia ratou. E ere mai tera te haerea o teie nei ao, teie râ te haerea ta tatou e pee ua farii anaˈe tatou ia Iehova ei Faatere no tatou. (Eph. 5:22, 23; 6:1-3; Heb. 13:17) E oaoa ïa tatou, no te mea e hinaaro te Atua i te mea maitai roa no tatou.

16. E nafea tatou e faaite ai e te paturu ra tatou i te tiaraa Arii hau ê o te Atua na roto i te mau faaotiraa ta tatou e rave?

 ¹⁶ E nehenehe atoa tatou e paturu i te tiaraa Arii hau ê o te Atua na roto i te mau faaotiraa ta tatou e rave. Eita Iehova e horoa mai i te ture no tera e tera tupuraa o te oraraa. Tera râ, e faaite mai oia i to ˈna manaˈo, a taa ˈtu ai ia tatou eaha te tia ia rave. Ei hiˈoraa, aita Iehova i horoa i te mau Kerisetiano i te hoê tapura o te mau ahu ta ratou e nehenehe e oomo aore ra eita. Ua faataa râ oia e e hinaaro oia e ei Ite no ˈna, ia faanehenehe ïa tatou ia tatou iho ma te tano e te tura. (Tim. 1, 2:9, 10) Te hinaaro ra oia ia feruri tatou eaha te tupu i nia ia vetahi ê ia rave tatou i te hoê faaotiraa. (Kor. 1, 10:31-33) Ia tu ta tatou mau faaotiraa i te manaˈo o Iehova, te faaite ra tatou e mea au na tatou ta ˈna huru faatereraa e te paturu ra tatou i te reira.

17, 18. E nafea te mau hoa faaipoipo e faaite ai e te paturu ra ratou i te tiaraa Arii hau ê o Iehova?

¹⁷ A hiˈo na i te hoê ravea e nehenehe ai te mau Kerisetiano faaipoipohia e paturu i te tiaraa Arii hau ê o Iehova. E ite paha na hoa faaipoipo e e ere te oraraa ei tane e vahine faaipoipo mai ta raua i manaˈo na. E nehenehe atoa raua e faaruru i te fifi rahi. Mai te peu e te reira iho  â, e faufaahia raua i te feruriraa i ta Iehova huru raveraa ia Iseraela i tahito. Ua faahohoˈa Iehova ia ˈna iho mai te hoê tane faaipoipo na to ˈna nunaa. (Isa. 54:5; 62:4) Pinepine to ˈna nunaa i te faainoino ia Iehova. Mai te hoê faaipoiporaa fifi to raua taairaa. Aita râ Iehova i oioi noa i te faarue ia Iseraela. Ua faaore râ oia i ta ratou mau hara e ua tapea i ta ˈna i fafau ia ratou.—A taio i te Salamo 106:43-45.

¹⁸ E tutava te mau Kerisetiano faaipoipohia o te here ra ia Iehova i te pee i to ˈna hiˈoraa. Noa ˈtu e e fifihia to ratou faaipoiporaa, eita ratou e imi i te hoê ravea aita i roto i te Bibilia no te faataa. Ua ite ratou e mea faufaa roa no Iehova te euhe o te faaipoiporaa, e te hinaaro ra oia ia “ati” na hoa faaipoipo te tahi i te tahi. Ia au i te mau Papai, o te peu taotoraa tia ore anaˈe te tumu e nehenehe ai te tahi e ani i te faataaraa a tiamâ ˈtu ai oia i te faaipoipo faahou. (Mat. 19:5, 6, 9) Ia imi te mau Kerisetiano i te mau ravea atoa ia manuïa to ratou faaipoiporaa, te paturu ra ratou i te tiaraa Arii hau ê o Iehova.

19. Eaha te tia ia rave ia hapa noa ˈtu tatou?

¹⁹ E feia hara anaˈe tatou, e i te tahi mau taime, e rave tatou i te tahi mau ohipa e inoino ai Iehova. Ua ite oia i te reira, te tumu ïa i horoa mai ai oia i te Mesia ei hoo. No reira ia hapa tatou, ia ani tatou ia Iehova ia faaore mai i ta tatou hapa. (Ioa. 1, 2:1, 2) Eiaha tatou e hepohepo noa no ta tatou hapa i rave, e huti mai râ i te haapiiraa. Te hinaaro ra tatou e vai piri noa ia Iehova, o te faaore mai i ta tatou hapa, e te tauturu ia tatou ia maitai mai e ia tamau â i te tavini ia ˈna.—Sal. 103:3.

20. Ia nafea tatou no te paturu i te tiaraa Arii hau ê o Iehova i teie nei â?

²⁰ I roto i te ao apî, e faaterehia te taata atoa e Iehova e e haapii ratou i ta ˈna mau eˈa parau-tia. (Isa. 11:9) I teie nei â, e nehenehe tatou e haapii atu â no nia i to ˈna mau manaˈo e nafea oia e hinaaro ai ia rave tatou i te mau mea. Fatata roa eita hoê aˈe e faahapa i te tiaraa o te Atua e faatere. A rave anaˈe ïa i te mau mea atoa no te paturu i te tiaraa Arii hau ê o Iehova ma te auraro ia ˈna, te tavini ia ˈna ma te taiva ore, e te tutava maite ia pee i te hiˈoraa i roto i ta tatou mau ohipa atoa e rave.