1. Eaha te faaotiraa faufaa roa te titauhia i te taata atoa ia rave?

 I TEIE mahana, tei mua te taata atoa i teie faaotiraa faufaa roa: E farii anei ratou i te Atua ra o Iehova, ei Faatere o te ao taatoa aore ra e turu ratou i to ˈna enemi ino mau, o Satani te Diabolo? Mea tia ia maiti te mau taata atoa o vai ta ratou e turu. Na ta ratou faaotiraa e haapapu e fanaˈo anei ratou i te ora mure ore aore ra eita. (Mat. 25:31-33, 46) I te roaraa o “te ati rahi,” e tapaohia ratou no te faaoraraa aore ra no te haamouraa.​—Apo. 7:14; 14:9-11; Ezk. 9:4, 6.

2. (1) Eaha ta te Hebera 10:35-39 e faaitoito ra ia tatou ia rave? (2) E nafea te buka Apokalupo e tauturu mai ai?

² A taio i te Hebera 10:35-39. E faaotiraa î i te paari ia maiti i te turu i te Faatereraa arii a Iehova. I teie nei, e turai te reira ia outou ia tauturu ia vetahi ê ia rave i te faaotiraa maitai. No te na reira, e nehenehe outou e faaohipa i ta outou i haapii i roto i te buka Apokalupo. Te faaite ra teie buka faahiahia mau eaha te tupu no te feia e patoi ra ia Iehova e eaha te mau haamaitairaa ta te feia e turu ra i ta ˈna Faatereraa arii e fanaˈo. Mea maitai ïa ia hiˈopoa maite tatou i tera mau haapiiraa faufaa roa. Ma te na reira, e puai atu â to tatou hinaaro e tavini ia Iehova. Hau atu, e nehenehe tatou e faaohipa i ta tatou i haapii no te tauturu ia vetahi ê ia maiti i te tavini ia Iehova e ia tamau i te na reira.

3. Eaha ta tatou e hiˈopoa i roto i teie tumu parau haapiiraa?

³ I roto i teie tumu parau haapiiraa, e pahono tatou i teie na uiraa: Eaha te tupu no te feia e turu ra i te Faatereraa arii a te Atua? Eaha te tupu no te feia e maiti i te  turu i te puaa taehae uteute faahitihia i roto i te buka Apokalupo?

4. Eaha te pǔpǔ ta te aposetolo Ioane e ite ra i te raˈi e o Iesu?

⁴ I roto i te hoê orama, te ite ra te aposetolo Ioane e piti pǔpǔ o te turu ra i te Faatereraa arii a Iehova e o te fanaˈo ra i te ora mure ore. E taiohia 144 000 taata i roto i te pǔpǔ matamua. (Apo. 7:4) Ua maitihia ratou i rotopu i te feia o te fenua no te riro ei arii e o Iesu i roto i te Faatereraa arii i te raˈi e e faatere ratou i te fenua. (Apo. 5:9, 10; 14:3, 4) I roto i te orama, te ite atoa ra Ioane ia ratou e o Iesu e tia ra i “te mouˈa Ziona” i te raˈi.​—Apo. 14:1.

5. Eaha te tupu no te toea o te feia faatavaihia e ora noa ra i nia i te fenua?

⁵ Ua maitihia na 144 000, mai te tau o te mau aposetolo e tae roa mai i teie mahana. (Luka 12:32; Roma 8:17) Tera râ, ua faaitehia ia Ioane e e toe mai vetahi o ratou i nia i te fenua i te roaraa o te mau mahana hopea. E fanaˈo teie “toea” i te “tapao” hopea o ta Iehova farii maitai hou a haamata ˈi te ati rahi. (Apo. 7:2, 3; 12:17) Tau taime noa i muri mai i te ati rahi, e haaputuhia ratou i te raˈi e te tahi atu feia faatavaihia tei vai taiva ore e tae roa ˈtu i te pohe. E riro ïa ratou ei arii e o Iesu i roto i te Faatereraa arii a te Atua.​—Mat. 24:31; Apo. 5:9, 10.

6-7. (1) Eaha te pǔpǔ ta Ioane i ite i muri iho e eaha ta tatou e haapii ra no nia ia ratou? (2) No te aha e faufaahia ˈi tatou i te Apokalupo pene 7 noa ˈtu eaha to tatou tiaturiraa?

⁶ I muri iho, te ite ra Ioane i “te hoê nahoa rahi.” Taa ê atu i na 144 000, eita e noaa ia taio ehia taata to roto i tera pǔpǔ. (Apo. 7:9, 10) Eaha ta tatou e haapii ra no nia ia ratou? Ua parau Ioane: “Mea na roto mai teie nei feia i te ati rahi, e ua horoi e ua faauouo ratou i to ratou ahu roa i te toto o te Arenio.” (Apo. 7:14) I muri aˈe i te ati rahi, e ora teie “nahoa rahi” i nia i te fenua a fanaˈo atu ai i te mau haamaitairaa faahiahia mau.​—Sal. 37:9-11, 27-29; Mas. 2:21, 22; Apo. 7:16, 17.

⁷ Noa ˈtu tei te raˈi aore ra tei te fenua to tatou tiaturiraa, te ite ra anei tatou ia tatou iho i roto i te faataaraa o te Apokalupo pene 7? Papu maitai e e! Auê ïa taime faahiahia no na pǔpǔ e piti e tavini ra i te Atua! E oaoa roa tatou no te mea ua maiti tatou i te turu i te Faatereraa arii a Iehova. Eaha ˈtu â ta te buka Apokalupo e faaite ra no nia i te ati rahi?​—Mat. 24:21.

8. E nafea te ati rahi e haamata ˈi e eaha ta te rahiraa o te taata e rave?

⁸ I roto i te tumu parau haapiiraa na mua ˈtu, ua haapii tatou e fatata te mau faatereraa i te aro ia Babulonia rahi, oia hoi te taatoaraa o te mau haapaoraa hape. (Apo. 17:16, 17) E haamata te ati rahi i taua taime ra. Te auraa anei ïa e faaoti e rave rahi taata i te tavini ia Iehova? Aita roa ˈtu. Te faaite ra te Apokalupo pene 6 e imi te taata i te haapuraa i roto i te mau faanahoraa poritita e tapihooraa o tei faaauhia i te mau mouˈa. I te mea râ e eita ratou e turu i te Faatereraa arii a te Atua, e riro ïa ratou ei enemi no Iehova.​—Luka 11:23; Apo. 6:15-17.

9. I te roaraa o te ati rahi, e nafea te mau tavini a Iehova e faaite ai e mea taa ê ratou e eaha te faahopearaa?

 ⁹ Papu, e itehia e mea taa ê te mau tavini taiva ore a Iehova i te roaraa o te ati rahi. O ratou anaˈe te tavini ia Iehova i te fenua nei e o te ore e turu i te “puaa taehae.” (Apo. 13:14-17) E riri roa te feia e patoi ra ia Iehova a ite ai i te taiva ore o ta ˈna mau tavini. Ei faahopearaa, e amui te mau faatereraa o teie ao no te aro i te nunaa o te Atua. I roto i te Bibilia, te piihia ra te reira te aroraa a Goga no Magoga.​—Ezk. 38:14-16.

10. Ia au i te Apokalupo 19:19-21, eaha te huru o Iehova a aro ai te mau enemi i to ˈna nunaa?

¹⁰ Eaha te huru o Iehova i mua i teie aroraa uˈana? Te parau ra o ˈna: “E ura roa to ˈu riri rahi.” (Ezk. 38:18, 21-23) Te faataa ra te Apokalupo pene 19 eaha te tupu i muri iho. E tono Iehova i ta ˈna Tamaiti no te paruru i to ˈna nunaa e no te haamou i to ˈna mau enemi. E aro atoa “te mau nuu o te raˈi,” oia hoi te mau melahi haapao maitai e na 144 000 Kerisetiano faatavaihia na muri ia Iesu. (Apo. 17:14; 19:11-15) Eaha te faahopearaa o tera tamaˈi? E haamou-roa-hia te mau taata e te mau faanahoraa atoa tei patoi ia Iehova!​—A taio i te Apokalupo 19:19-21.

11. Eaha te tupuraa faufaa roa i roto i te buka Apokalupo?

¹¹ A feruri na i te huru o te mau tavini taiva ore i nia i te fenua a ite ai i te haamouraa o te mau enemi o te Atua! Auê ïa te oaoa i taua taime ra! Noa ˈtu e oaoa to te raˈi a haamouhia ˈi Babulonia rahi, te vai ra te tahi atu tupuraa o te faaoaoa ˈtu â ia ratou. (Apo. 19:1-3) E tupuraa faufaa roa teie i roto i te buka Apokalupo, oia hoi “te oroa faaipoiporaa o te Arenio.”​—Apo. 19:6-9.

12. Ia au i te Apokalupo 21:1, 2, afea te oroa faaipoiporaa o te Arenio e tupu ai?

¹² Afea te oroa faaipoiporaa e tupu ai? Tei te ra ˈi te taatoaraa o na 144 000 hou a haamata ˈi te tamaˈi o Aramagedo. Tera râ, aita te oroa faaipoiporaa o te Arenio i tupu atura. (A taio i te Apokalupo 21:1, 2.) E tupu te reira i muri mai i te tamaˈi o Aramagedo e te haamouraa o te mau enemi atoa o te Atua.​—Sal. 45:3, 4, 13-17.

13. Eaha te faufaaraa o te faaipoiporaa o te Arenio no te feia e tuhaa ta ratou i roto i te reira?

¹³ Eaha te faufaaraa o te faaipoiporaa o te Arenio no te feia e tuhaa ta ratou i roto i te reira? Mai te hoê faaipoiporaa e taati ra i te hoê tane e te hoê vahine, e taatihia te Arenio, oia hoi te Arii Iesu Mesia e ta ˈna “vahine,” na 144 000. I reira e haamauhia ˈi te hoê faatereraa apî o te faatere i te fenua 1 000 matahiti te maoro.​—Apo. 20:6.

14-15. Te faaau ra te Apokalupo pene 21 i na 144 000 i te aha? (A hiˈo i te hohoˈa i te api matamua.)

¹⁴ I roto i te Apokalupo pene 21, te faaauhia ra na 144 000 i te hoê oire nehenehe mau, o “Ierusalema apî” to ˈna iˈoa. (Apo. 21:2, 9) No te patu i taua oire ra, ua faaohipahia 12 ofai niu e i nia iho i te reira, ua papaihia te iˈoa o na “aposetolo 12 a te Arenio.” No te aha ua oaoa Ioane i te reira? No te mea ua ite o ˈna i to  ˈna iˈoa i nia hoê o taua mau ofai ra. Auê ïa fanaˈoraa faahiahia mau!​—Apo. 21:10-14; Eph. 2:20.

¹⁵ Aita ˈtu oire mai teie te huru. Ua hamanihia te aroâ o teie oire e te auro tamâhia. Te vai ra 12 uputa e e poe te uputa tataitahi. Hau atu, ua faaunaunahia te niu o te patu o te oire i te mau ofai maitai roa e mea tia roa te mau faito o taua oire ra. (Apo. 21:15-21) Tera râ, e au ra e ua moˈehia hoê mea! A tapao na i ta Ioane i parau i muri iho: “Aita vau i ite i te hoê hiero i roto, o Iehova hoi te Atua Manahope te hiero o taua oire ra, e te Arenio atoa. Aita e faufaa ia turama te mahana e te avaˈe i te oire, na te hanahana hoi o te Atua e turama, e o te Arenio te maramarama o taua oire ra.” (Apo. 21:22, 23) E faafatata tia ˈtu te feia e tuhaa ta ratou i roto i te Ierusalema apî ia Iehova. (Heb. 7:27; Apo. 22:3, 4) Inaha, o Iehova e o Iesu te hiero o taua oire ra.

16. I te roaraa o te faatereraa tausani matahiti a te Atua, eaha te mau haamaitairaa ta te huitaata e fanaˈo?

¹⁶ Mea faahiahia mau no te feia faatavaihia ia feruriruri i nia i tera oire. Oia atoa, no te feia tei te fenua to ratou tiaturiraa. I te roaraa o te faatereraa tausani matahiti a te Atua, e rave rahi haamaitairaa ta te Ierusalema apî e hopoi mai. Te ite ra Ioane i tera mau haamaitairaa e tahe ra mai “te hoê anavai pape o te ora.” Hau atu, i na pae e piti o te anavai, te vai ra “te mau tumu raau o te ora.” E faaohipahia te mau rauere “no te faaora . . . i te maˈi o te mau nunaa.” (Apo. 22:1, 2) I taua taime ra, e nehenehe te huitaata e fanaˈo i tera mau haamaitairaa. E riro mǎrû noa mai te feia o te faaroo i te Atua ei taata tia roa. E ore roa te maˈi, te oto e te mauiui.​—Apo. 21:3-5.

17. Ia au i te Apokalupo 20:11-13, o vai te fanaˈo i te mau haamaitairaa i te roaraa o te faatereraa tausani matahiti a te Atua?

¹⁷ O vai te fanaˈo i teie mau haamaitairaa faahiahia mau? Na mua roa, o te nahoa rahi tei ora mai i te tamaˈi Aramagedo, oia atoa te mau tamarii tei fanauhia i roto i te ao apî. Tera râ, te faaite atoa ra te Apokalupo pene 20 e e faatiahia mai te feia pohe. (A taio i te Apokalupo 20:11-13.) E faatiahia mai te feia “parau-tia” i nia i te fenua, oia atoa te  feia parau-tia ore, tei ore i haapii no nia ia Iehova no te mea aita ratou i ite o vai o ˈna. (Ohi. 24:15; Ioa. 5:28, 29) Te auraa anei ïa e e faatiahia mai te taatoaraa o te feia pohe i nia i te fenua i te roaraa o te faatereraa tausani matahiti a te Atua? E ere. Te vai ra o tei ore i farii i te tavini ia Iehova hou a pohe ai ratou. Ua nehenehe hoi ratou e na reira. Eita ïa ratou e faatiahia mai no te mea aita ratou i haafaufaa i te ora mure ore i nia i te fenua faarirohia ei Paradaiso.​—Mat. 25:46; Tes. 2, 1:9; Apo. 17:8; 20:15.

18. Eaha te tupu i nia i te fenua i te pae hopea o na tausani matahiti?

¹⁸ I te pae hopea o na tausani matahiti, e riro te taata atoa e ora ra i nia i te fenua ei taata tia roa. Eita te taata e ite faahou i te mau faahopearaa o te hara a Adamu. (Roma 5:12) E faaore-roa-hia te reira. E hoˈi mai ïa te feia “i te ora” i nia i te fenua no te mea e riro ratou ei taata tia roa i taua taime ra.​—Apo. 20:5.

19. No te aha mea faufaa te tamataraa hopea?

¹⁹ Ua ite tatou e ua vai taiva ore Iesu i mua i te mau tamataraa a Satani. Tera râ, e na reira atoa anei te mau taata tia roa ia tamata Satani ia ratou? E pahono ratou tataitahi i tera uiraa i te taime e tuuhia ˈi Satani i rapae i te abuso i te hopea o na tausani matahiti. (Apo. 20:7) E fanaˈo te feia o te ore e hema i te tamataraa hopea i te ora mure ore e te tiamâraa mau. (Roma 8:21) E haamou-roa-hia râ te feia o te pee ia Satani e o te patoi ia Iehova, oia atoa Satani e ta ˈna mau demoni.​—Apo. 20:8-10.

20. Eaha to outou huru a hiˈopoa ˈi i te mau parau tohu faahiahia mau o te buka Apokalupo?

²⁰ Eaha to outou huru a hiˈopoa ˈi i te tahi mau tuhaa o te buka Apokalupo? Te ite ra anei outou ia outou iho i te taime e tupu ai tera mau parau tohu faahiahia mau? Aita anei outou e oaoa ra a feruri ai i te reira? Aita anei outou e hinaaro ra e titau manihini i te tahi atu ia apiti ia outou i roto i te haamoriraa viivii ore? (Apo. 22:17) Ua hiˈopoa tatou eaha te tupu a muri aˈe. Ua oaoa roa tatou i te reira e mai te aposetolo Ioane, te hinaaro ra tatou e parau: “Amene! A haere mai, to ˈu Fatu Iesu.”​—Apo. 22:20.