1-2. Eaha te hoê tumu e faufaahia ˈi tatou i te buka Apokalupo?

 UA FAAITE aˈena anei te hoê taata ta oe i matau i ta ˈna buka hohoˈa? A mataitai ai i te reira, e ite paha oe i te tahi mau taata ta oe i ore i matau. Tano aˈera oe i nia i te hoê hohoˈa o oe to nia iho. A hiˈo noa ˈi i te reira, e tamata oe i te feruri i teihea taime e vahi i patahia ˈi tera hohoˈa e o vai ma to nia iho. Papu, e oaoa roa oe a ite ai i tera hohoˈa.

² E au te buka Apokalupo i tera hohoˈa no e piti tumu. A tahi roa, ua papaihia teie buka Bibilia no tatou. I te irava matamua roa, te taiohia ra: “E heheuraa na Iesu Mesia, ta te Atua i horoa ˈtu ia ˈna no te faaite i ta ˈna mau tavini i te mau mea e fatata i te tupu.” (Apo. 1:1) Ua papaihia teie buka no tatou, te mau tavini haapao maitai a Iehova, eiaha râ no te taata atoa. Ei tavini na te Atua, eita tatou e maere e e tuhaa atoa ta tatou i roto i te tupuraa o te mau parau tohu e vai ra i roto i teie buka faahiahia mau. A taio ai i te buka Apokalupo, e ite tatou eaha te faufaaraa no tatou.

3-4. Afea te mau parau tohu o te buka Apokalupo i te haamataraa i te tupu e eaha te faufaaraa no tatou?

³ E hiˈopoa atoa tatou i te buka Apokalupo no te mea e itehia te taime e tupu ai te mau parau tohu. I to ˈna ruhiruhiaraa, ua faaite roa te aposetolo Ioane eaha taua taime ra. Ua papai o ˈna: “Arataihia ihora vau e te varua moˈa i te mahana o te Fatu ra.” (Apo. 1:10) Ua papai Ioane i tera mau parau i te area tau 96, aita râ “te mahana o te Fatu” i haamata ˈtura. (Mat. 25:14, 19; Luka 19:12) Ia au i te parau tohu Bibilia, ua haamata tera mahana i 1914, i te  taime i riro ai Iesu ei Arii i te raˈi. Mai taua matahiti mai â, ua haamata te mau parau tohu o te buka Apokalupo no nia i te mau tavini a te Atua i te tupu. Papu maitai, te ora nei tatou i “te mahana o te Fatu”!

⁴ Inaha e tau faahiahia mau ta tatou e ora nei, e titauhia ia tatou ia hiˈopoa maite i te aˈoraa î i te here o te Apokalupo 1:3 o te parau ra: “E oaoa te taata e taio haapuai e te feia e faaroo i teie parau tohu e e haapao i tei papaihia i roto, ua fatata hoi te tau faataahia.” E titauhia ia tatou ia “taio haapuai,” ia “faaroo i teie parau tohu” e ia “haapao” i te reira. Eaha te tahi o tera mau parau te titauhia ia tatou ia haapao?

5. E nafea te buka Apokalupo e faaite ai i te faufaaraa ia haamori noa ia Iehova ia au i to ˈna hinaaro?

⁵ Mai te pene matamua iho â o te Apokalupo, te haapii ra tatou e te ite ra Iesu i te mau ohipa atoa e tupu ra i roto i te mau amuiraa ta ˈna e aratai ra. (Apo. 1:12-16, 20; 2:1) Te haapapu-maitai-hia ra te reira i roto i te mau poroi ta ˈna i faatae atu i na hitu amuiraa no Asia Iti. Ua horoa Iesu i te mau aratairaa taa maitai i taua mau amuiraa ra no te tauturu i te mau Kerisetiano ia haamori noa ia Iehova ia au i to ˈna hinaaro. Mea faufaa atoa tera mau poroi no te mau tavini a te Atua i teie mahana. Eaha ïa te haapiiraa no tatou? O Iesu Mesia to tatou Aratai e o ˈna te ite maitai roa ˈˈe mea puai anei to tatou auhoaraa e o Iehova. Te paruru ra Iesu ia tatou e ua ite o ˈna i te mau mea atoa. Hau atu, ua ite o ˈna eaha te titauhia ia tatou ia rave no te fanaˈo noa i te farii maitai a Iehova. Eaha te aratairaa ta ˈna i horoa mai ta tatou e haapao i teie mahana?

6. (1) Ia au i te Apokalupo 2:3, 4, eaha te fifi ta Iesu i tapao i roto i te amuiraa i Ephesia? (2) Eaha te haapiiraa no tatou?

⁶ A taio i te Apokalupo 2:3, 4. Eiaha roa tatou ia erehia i to tatou here matamua no Iehova. Te faaite ra ta Iesu poroi i te amuiraa i Ephesia e ua tamau tera mau Kerisetiano i te faaoromai e i te tavini ia Iehova noa ˈtu te fifi rau ta ratou i faaruru. Tera râ, ua ere ratou i to ratou here matamua. Ua titauhia ïa ia ratou ia haapuai i tera here. Aita anaˈe, mea faufaa ore ta ratou haamoriraa ia Iehova. Hoê â huru no tatou i teie mahana, eita e navai ia faaoromai tamau, e titauhia râ ia tutava rahi atu â. Aita to tatou Atua e haapao noa eaha ta tatou e rave ra, e hiˈo atoa râ o ˈna no te aha tatou e rave ai i te reira. Mea faufaa roa no ˈna to tatou mau manaˈo turai no te mea te hinaaro ra o ˈna ia niuhia ta tatou haamoriraa i nia i to tatou here e mauruuru ia ˈna.​—Mas. 16:2; Mar. 12:29, 30.

7. (1) Ia au i te Apokalupo 3:1-3, eaha te fifi itehia i roto i te amuiraa i Saradi? (2) Eaha te titauhia ia tatou ia rave?

⁷ A taio i te Apokalupo 3:1-3. Ia vai ara noa tatou e tia ˈi. Mea ê te fifi itehia i roto i te amuiraa i Saradi. Noa ˈtu to ratou itoito i roto i te taviniraa na mua aˈe, e au ra e ua taoto ratou i te pae varua. Ua parau râ Iesu ia ratou ia “ara mai.” Eaha ïa te haapiiraa no tatou? Papu, eita e moˈehia ia Iehova te ohipa ta tatou e rave ra. (Heb. 6:10) Eiaha râ tatou e manaˈo e no te mea ua tavini tatou ia Iehova na mua aˈe, aita ïa e faufaa ia tavini hau atu  â ia ˈna i teie nei. Noa ˈtu e taotiaraa to tatou i teie nei, e titauhia “ia rahi noa ta [tatou] ohipa i roto i te Fatu” e ia vai ara e tae roa ˈtu i te hopea.​—Kor. 1, 15:58; Mat. 24:13; Mar. 13:33.

8. Eaha te haapii mai i ta Iesu i parau i te mau taeae i Laodikea? (Apokalupo 3:15-17)

⁸ A taio i te Apokalupo 3:15-17. A tavini ia Iehova ma te itoito rahi e te aau atoa. I roto i ta ˈna poroi i to Laodikea, mea ê te fifi ta Iesu i tapao. Mea “pumahana” ta ratou haamoriraa. No to ratou tâuˈa ore, ua parau atu Iesu e “mea aroha roa [ratou] e te veve.” Ua titauhia ia ratou ia haa ma te itoito rahi i roto i ta ratou haamoriraa ia Iehova. (Apo. 3:19) Eaha ïa te haapiiraa no tatou? Ia iti mai to tatou itoito, e titauhia ia tutava i te faaite noa i to tatou mauruuru no te mau mea atoa ta Iehova e ta ta ˈna faanahonahoraa e horoa mai ra. (Apo. 3:18) Eiaha roa ˈtu ïa tatou e tapi i te hoê oraraa fanaˈo a tuu atu ai i ta tatou haamoriraa ia Iehova i te hiti.

9. Ia au i ta Iesu i parau i te mau Kerisetiano i Peregamo e Tuatira, eaha te titauhia ia tatou ia patoi?

⁹ Mea tia ia patoi tatou i te mau haapiiraa apotata. Ua faahapa Iesu i te tahi mau Kerisetiano i Peregamo no to ratou faatupuraa i te amahamaharaa. (Apo. 2:14-16) Ua haapopou râ o ˈna i te amuiraa i Tuatira no te mea ua patoi ratou i “te mau mea hohonu a Satani” e ua faaitoito o ˈna ia ratou ia “tapea papu” i te parau mau. (Apo. 2:24-26) Ua orure hau râ te tahi mau Kerisetiano o tera na amuiraa ma te pee i te mau haapiiraa hape e ua titauhia ia ratou ia tatarahapa. No tatou atoa i teie mahana, e titauhia ia patoi i te mau haapiiraa hape o te ore e tuati ra i te manaˈo o Iehova. Ia hiˈohia ˈtu te mau apotata, “e au ra e te haamori ra ratou i te Atua, aita râ ratou e faaohipa ra i te reira.” (Tim. 2, 3:5) Ia tamau tatou i te haapii i te Parau a te Atua, mea ohie aˈe ïa no tatou ia ite e ia patoi i te mau haapiiraa hape.​—Tim. 2, 3:14-17; Iuda 3, 4.

10. Eaha ˈtu â te haapii mai i ta Iesu i parau i te mau amuiraa i Peregamo e Tuatira?

¹⁰ Mea tia ia patoi tatou i te mau peu tano ore atoa. E peu ê tei itehia i Peregamo e Tuatira. Ua rave vetahi i roto i tera na amuiraa i te mau peu tano ore atoa e ua faautua Iesu ia ratou. (Apo. 2:14, 20)  Eaha ïa te haapiiraa no tatou? Noa ˈtu e rave rahi matahiti to tatou taviniraa ia Iehova aore ra e hopoia ta tatou i roto i te amuiraa, eita roa ˈtu Iehova e farii i ta tatou haamoriraa ia rave tatou i te mau peu tano ore atoa. (Sam. 1, 15:22; Pet. 1, 2:16) Te hinaaro ra Iehova ia tamau tatou i te haapao i ta ˈna mau ture aveia teitei noa ˈtu te ino noa ra teie nei ao.​—Eph. 6:11-13.

11. Eaha ta tatou i ite mai te omuaraa mai â o teie haapiiraa? (A hiˈo atoa i te tumu parau “ Te haapiiraa no tatou i teie mahana.”)

¹¹ Mai te omuaraa mai â o teie haapiiraa, ua ite mai tatou i te faufaaraa ia papu ia tatou e te haamori ra tatou ia Iehova ia au i to ˈna hinaaro. Mai te peu e te rave ra tatou i te tahi mea o te haafifi ra i ta tatou haamoriraa, e titauhia ia haa oioi no te faatitiaifaro i te reira. (Apo. 2:5, 16; 3:3, 16) Tera râ, te vai ra te tahi atu mau haapiiraa ta Iesu i faahiti i roto i ta ˈna mau poroi i te mau amuiraa. O ta tatou ïa e ite mai.

12. Eaha te haapii mai i te mau poroi ta Iesu i faatae atu i te mau taeae i Semurina e Philadelephia? (Apokalupo 2:10)

¹² I teie nei, e hiˈopoa anaˈe i te mau poroi ta Iesu i faatae atu i te mau amuiraa i Semurina e Philadelephia. Ua parau o ˈna i taua mau Kerisetiano ra ia ore e mǎtaˈu i te hamani-ino-raa no te mea e haamaitai iho â Iehova ia ratou no to ratou haapao maitai. (A taio i te Apokalupo 2:10; 3:10) Eaha ïa te haapiiraa no tatou i teie mahana? E faaruru iho â tatou i te hamani-ino-raa e e mea faufaa ia vai ineine no te faaoromai i te reira. (Mat. 24:9, 13; Kor. 2, 12:10) No te aha mea faufaa ia haamanaˈo i te reira?

13-14. Eaha ta te nunaa o te Atua i faaruru i muri aˈe i te mau tupuraa faahitihia i roto i te Apokalupo pene 12?

¹³ I roto i te buka Apokalupo, te parauhia ra e e hamani-ino-hia te nunaa o te Atua i “te mahana o te Fatu,” te tau ïa ta tatou e ora nei. I te pene 12, te parauhia ra e i muri aˈe i to Iesu riroraa mai ei Arii, ua tupu te hoê tamaˈi i te raˈi. Aro atura Mihaela * e ta ˈna mau melahi ia Satani e ta ˈna mau demoni. (Apo. 12:7, 8) Ua pau te mau enemi a te Atua. Hurihia ˈtura ratou i raro i te fenua e haamauiui aˈera ratou i te huitaata. (Apo. 12:9, 12) Eaha râ tei tupu no te nunaa o te Atua?

¹⁴ I muri aˈe, te faaite ra te buka Apokalupo e aita faahou Satani i nehenehe e  haere i te raˈi. Faahoˈi atura o ˈna i to ˈna riri i nia i te mau tavini faatavaihia a te Atua no te mea o ratou te mau tia a te Atua i nia i te fenua e “tei ia ratou ra te ohipa faaiteraa i te parau o Iesu.” (Apo. 12:17; Kor. 2, 5:20; Eph. 6:19, 20) Mea nafea ïa tera parau tohu i te tupuraa?

15. O vai “na ite e piti” faahitihia i roto i te Apokalupo pene 11 e eaha tei tupu no ratou?

¹⁵ Ua turai Satani i te mau enemi a te Atua ia aro i te mau taeae faatavaihia o te aratai ra i te ohipa pororaa i te fenua nei. I roto i te buka Apokalupo, o te mau taeae faatavaihia ïa “na ite e piti” tei taparahi-pohe-hia. * (Apo. 11:3, 7-11) I 1918, ua pari-haavare-hia e vaˈu o ratou e ua tuuhia ratou i roto i te fare tapearaa. I te manaˈo o te taata, e au ra e ua mou roa te ohipa a teie mau taeae faatavaihia.

16. Eaha te mea maere i tupu i 1919 e eaha ta Satani i tamau i te rave i taua taime ra?

¹⁶ I roto i te Apokalupo pene 11, te parau-atoa-hia ra e ora faahou mai “na ite e piti” i muri aˈe i te hoê tau poto. I Mati 1919, ua tupu te hoê ohipa maere mau. Ua matara mai te mau taeae faatavaihia na te fare tapearaa e ua faaorehia te mau pariraa no nia ia ratou. Ua haa oioi tera mau taeae i roto i te ohipa pororaa e haapiiraa. Aita râ Satani i faaea i te aro i te nunaa o te Atua. I tera atoa taime, ua manii Satani i “te anavai” o te hamani-ino-raa i nia i te mau tavini atoa a te Atua. (Apo. 12:15) Papu maitai, e titauhia ia tatou paatoa “te faaoromai tamau e te faaroo.”​—Apo. 13:10.

17. Noa ˈtu te mau aroraa a Satani, eaha te ravea manaˈo-ore-hia ta te nunaa o te Atua i fanaˈo?

¹⁷ I roto i te Apokalupo pene 12, te faataahia ra e e fanaˈo te nunaa o te Atua i te tauturu na roto i te hoê ravea manaˈo-ore-hia. Mai te huru ra e e horomii “te fenua” i “te anavai” o te hamani-ino-raa. (Apo. 12:16) Tera iho â tei tupu. Ua turu te tahi mau faanahoraa o te ao a Satani i te nunaa o te Atua. Ei hiˈoraa, i mua i te mau tiripuna, ua turu te tahi mau haava i te mau tavini a Iehova ia upootia i roto e rave rahi haavaraa. I taua taime ra, ua faaohipa maitai te mau tavini a Iehova i  to ratou taime i roto i te ohipa ta Iehova i horoa ia ratou. (Kor. 1, 16:9) Eaha ïa tera ohipa?

18. Eaha te ohipa faufaa roa ta tatou e rave ra i teie mau mahana hopea?

¹⁸ Ua tohu Iesu e faaite ta ˈna mau tavini i “te parau apî oaoa o te Faatereraa arii” a te Atua. (Mat. 24:14) A poro ai, e arataihia ratou e te mau melahi tei ia ratou ra te “parau apî oaoa e te mure ore . . . no te faaite atu i te feia e parahi ra i te fenua, i te mau nunaa e opu e reo atoa.”​—Apo. 14:6.

19. Eaha te tahi atu poroi te titauhia i te feia e here ra ia Iehova ia faaite?

¹⁹ Hau atu i te parau apî oaoa o te Faatereraa arii, e poroi ê atu te titauhia i te nunaa o te Atua ia faaite. E titau-atoa-hia ia ratou ia turu i te ohipa a te mau melahi tei faahitihia i roto i te Apokalupo pene 8 tae atu i te pene 10. Te faaara ra teie mau melahi eaha te mau ati e tupu i nia i te feia e patoi ra i te Faatereraa arii a te Atua. E faaite te mau Ite no Iehova i te hoê poroi faautuaraa e au i “te ûa paari e te auahi.” Te faataa ra te reira i te mau faautuaraa a te Atua i nia i te mau faanahoraa atoa o te ao a Satani. (Apo. 8:7, 13) Hou te mahana o to Iehova riri e tae mai ai, mea faufaa ia faaarahia te taata e te fatata mai ra te hopea e e titauhia ia ratou ia rave i te mau tauiraa ia nehenehe ratou e ora ˈtu i taua mahana ra. (Zeph. 2:2, 3) E poroi taa ê mau teie. E titauhia hoi te itoito no te faaite i te reira i te taata. I te roaraa o te ati rahi, e riri atu â te taata a faaroo ai i te poroi faautuaraa hopea.​—Apo. 16:21.

20. Eaha ta tatou e ite mai i roto i na tumu parau haapiiraa i muri nei?

²⁰ Mea faufaa roa ia haapao tatou i “teie parau tohu” no te mea e tuhaa atoa ta tatou i roto i te tupuraa faataahia i roto i te buka Apokalupo. (Apo. 1:3) E nafea râ tatou e mau papu ai i mua i te hamani-ino-raa e e tamau ai i te faaite i taua mau poroi ra ma te itoito? E itoitohia tatou a hiˈopoa ˈi eaha ta te buka Apokalupo e faaite ra no nia i te mau enemi a te Atua e te mau haamaitairaa ta tatou e fanaˈo a muri aˈe mai te peu e vai taiva ore tatou ia Iehova. Ta tatou ïa e ite mai i roto i na tumu parau haapiiraa i muri nei.