1. Eaha ta te buka Apokalupo e faaite ra no nia i te mau tavini a te Atua?

 TE FAAITE ra te buka Apokalupo e ua haamauhia te Faatereraa arii a te Atua i te raˈi e ua tiavaruhia Satani mai te raˈi mai. (Apo. 12:1-9) E fanaˈo to te raˈi i te hau, area tatou, e rave rahi ïa fifi ta tatou e faaruru. No te aha? No to ˈna riri, te aro ra Satani i te feia e tavini ra ia Iehova ma te taiva ore i nia i te fenua.​—Apo. 12:12, 15, 17.

2. Eaha te tauturu ia tatou ia vai taiva ore ia Iehova?

² E nafea tatou e vai taiva ore ai ia Iehova noa ˈtu te mau aroraa a Satani? (Apo. 13:10) Hoê ravea o te tauturu ia tatou, o te iteraa ïa eaha te tupu a muri aˈe. Ei hiˈoraa, i roto i te buka Apokalupo, te faataa ra te aposetolo Ioane i te tahi mau haamaitairaa ta tatou e fatata i te fanaˈo. Hoê o tera mau haamaitairaa, o te haamouraa ïa o te mau enemi o te Atua. E hiˈopoa anaˈe mea nafea te buka Apokalupo i te faataaraa o vai te mau enemi o te Atua e eaha te tupu no ratou.

3. Eaha te tahi mau faahohoˈaraa tei faaohipahia i roto i te buka Apokalupo?

³ I te irava matamua iho â o te buka Apokalupo, e faaarahia mai e e “taipe” aore ra e auraa parau ta tatou e taio i muri iho. (Apo. 1:1) Ei hiˈoraa, no te ite o vai te mau enemi o te Atua, ua faaohipahia te tahi mau faahohoˈaraa. E rave rahi puaa taehae tei faahitihia. Te vai ra “te hoê puaa taehae  mai roto mai i te miti i te fauraraa mai, hoê ahuru tara e e hitu afii to ˈna.” (Apo. 13:1) Na muri ia ˈna, te vai ra “te tahi atu puaa taehae mai roto mai i te fenua i te fauraraa mai.” Te paraparau ra o ˈna mai te hoê teni e te faatopa ra o ˈna “i te auahi mai te raˈi mai i te fenua nei.” (Apo. 13:11-13) Te ite-atoa-hia ra te tahi atu huru puaa taehae, oia hoi “te hoê puaa taehae uteute” e te parahi ra te hoê vahine taiata i nia iho. Te faahohoˈahia ra teie na toru puaa taehae i te mau enemi o te aro noa ra i te Atua e ta ˈna Faatereraa arii. Tera râ, mea faufaa no tatou ia ite e te faahohoˈahia ra ratou i te aha.​—Apo. 17:1, 3.

4-5. E nafea te Daniela 7:15-17 e tauturu mai ai ia taa i te auraa o tera mau faahohoˈaraa?

⁴ Hou a haapii ai o vai teie mau enemi, e titauhia ia tatou ia taa na mua roa eaha te auraa o teie mau faahohoˈaraa. E vaiiho ïa tatou e na te Bibilia e faataa mai. Mea rahi faahohoˈaraa o te buka Apokalupo tei faataa-aˈena-hia i roto i te tahi atu mau buka o te Bibilia. Ei hiˈoraa, i roto i te hoê moemoeâ, ua ite Daniela e “maha tiapai animara” tei faura mai te miti mai. (Dan. 7:1-3) Ua faataa Daniela i te auraa o te reira. Teie na tiapai animara, e maha ïa “arii” aore ra faatereraa. (A taio i te Daniela 7:15-17.) E tauturu mai teie faataaraa maramarama maitai ia taa e e faatereraa taata te mau puaa taehae faahitihia i roto i te buka Apokalupo.

⁵ E hiˈopoa anaˈe i te tahi mau faahohoˈaraa faahitihia i roto i te buka Apokalupo. A na reira ˈi, e ite tatou e nafea te Bibilia e tauturu mai ai ia taa i te auraa o te reira. E haamata tatou ma te hiˈopoa i te mau puaa taehae tataitahi. E ite tatou e te faahohoˈahia ra ratou ia vai, eaha te tupu no ratou e eaha te auraa no tatou.

6. Ia au i te Apokalupo 13:1-4, te faahohoˈahia ra te puaa taehae e hitu afii to ˈna i te aha?

⁶ Te faahohoˈahia ra te puaa taehae e hitu afii to ˈna i te aha? (A taio i te Apokalupo 13:1-4.) Te tapao ra tatou e mai te nemera ra te huru o te puaa taehae. To ˈna râ avae, mai to te daba ïa e to ˈna vaha, mai to te liona. Hau atu, e hoê ahuru tara to ˈna. Mai tera atoa te huru o na maha animara faahitihia i roto i te Daniela pene 7. Tera râ, i roto i te buka Apokalupo, te itehia ra teie na maha huru animara i nia hoê noa puaa taehae, eiaha râ i nia e maha puaa taehae taa ê. E ere tera puaa taehae i te hoê noa faatereraa aore ra hau emepera. Hau atu, e parauhia no teie puaa taehae e te faatere ra o ˈna “i nia i te mau opu e reo e nunaa atoa.” Te auraa, mea puai aˈe o ˈna i te tahi atu mau hau faatere. (Apo. 13:7) Te faahohoˈahia ra ïa tera puaa taehae i te mau hau puai atoa o tei faatere i te taata e tae roa mai i teie mahana. *​—Koh. 8:9.

7. Te faahohoˈahia ra na hitu afii tataitahi i te aha?

⁷ Te faahohoˈahia ra na hitu afii tataitahi i te aha? Te pahono ra te Apokalupo pene 17 i tera uiraa ma te faataa i te hohoˈa o te puaa taehae faahitihia i roto i te pene 13. Te na ô ra te Apokalupo 17:10: “E hitu atoa ïa arii: ua taahuri e pae, te tia noa ra hoê, aita â te tahi atu i tae mai atura. Ia tae anaˈe mai râ, e vai ïa oia no te hoê tau poto.” I roto i te mau faatereraa atoa ta Satani i faaohipa, e hitu noa faatereraa tei riro ei “afii” no to ratou puai  rahi e ua hamani ino ratou e rave rahi tavini a te Atua. A ora noa ˈi te aposetolo Ioane, ua faatere aˈena e pae o taua mau faatereraa ra mai ia Aiphiti, Asura, Babulonia, Medai Peresia e Heleni. A ite ai Ioane i teie mau orama, o Roma te ono o te faatereraa tei riro ei hau puai rahi i taua taime ra. Eaha ïa te hitu o te afii aore ra faatereraa?

8. Te faahohoˈahia ra te hitu o te afii o te puaa taehae i te aha?

⁸ E hiˈopoa anaˈe i te mau parau tohu o te buka Daniela o te tauturu mai ia ite eaha te hitu o te afii o te puaa taehae. Eaha te hau puai rahi te faatere nei i teie ao i te roaraa o te mau mahana hopea, oia hoi “te mahana o te Fatu”? (Apo. 1:10) Ua tahoê te hau Beretane i te hau Marite. I taua taime ra, ua riro mai raua ei hau puai Beretane Marite. E nehenehe ïa tatou e haapapu e tera te hitu o te afii o te puaa taehae faahitihia i roto i te Apokalupo 13:1-4.

9. Te faahohoˈahia ra te puaa taehae “e piti tara to ˈna mai to te fanauˈa mamoe” i te aha?

⁹ I roto i te Apokalupo pene 13, te haapii ra tatou e o te hau puai Beretane Marite te hitu o te afii. Te haa ra o ˈna mai te hoê puaa taehae “e piti tara to ˈna mai to te fanauˈa mamoe,” tera râ, te paraparau ra o ˈna “mai te hoê teni.” Hau atu, “e faatupu oia i te tahi mau ohipa maere rahi, oia atoa te faatoparaa i te auahi mai te raˈi mai i te fenua nei i mua i te huitaata.” (Apo. 13:11-15) I roto i te Apokalupo pene 16 e te 19, ua piihia teie puaa taehae “te peropheta haavare.” (Apo. 16:13; 19:20) Hoê â manaˈo ta Daniela i faahiti, oia hoi e faatupu te hau puai Beretane Marite i “te hoê haamouraa e maere roa ˈi te taata.” (Dan. 8:19, 23, 24) Tera iho â tei tupu i te pae hopea o te piti o te Tamaˈi rahi. Ua hamani te mau aivanaa Beretane e Marite i e piti paura atomi tei faaruehia i Patitifa. Mai te huru ra ïa ua faatopa ratou i “te auahi mai te raˈi mai i te fenua nei.”

10. Te faahohoˈahia ra “te tii o te puaa taehae” i te aha? (Apokalupo 13:14, 15; 17:3, 8, 11)

¹⁰ E hiˈopoa anaˈe i te tahi atu puaa taehae. E au o ˈna i te puaa taehae e hitu afii to ˈna. Tera râ, mea uteute o ˈna. Ia au i te Bibilia, o “te vaˈu ïa o te arii” oia hoi “te tii o te puaa taehae matamua.” * (A taio i te Apokalupo 13:14, 15; 17:3, 8, 11.) Ua taa ia Ioane e i vai na teie “arii” e aita faahou o ˈna, ua hoˈi faahou mai râ i muri iho. Tano maitai tera faataaraa no te Hau amui o te turu nei i te mau faanahoraa poritita na te ao nei! I te omuaraa, ua piihia te reira te Amuitahiraa o te mau hau faatere. I muri iho, ua faaorehia te reira i te piti o te Tamaˈi rahi. I muri aˈe râ, ua haamau-faahou-hia te reira ei Hau amui.

11. Eaha ta te mau faatereraa e rave ra e no te aha eita tatou e mǎtaˈu ia ratou?

¹¹ Ma te haaparare i te mau parau haavare, te turai ra te mau puaa taehae aore ra te mau faatereraa i te taata ia patoi ia Iehova e i ta ˈna mau tavini. E au ra e ua haaputuputu ratou i “te mau arii atoa o te fenua nei” no te tamaˈi o Aramagedo, oia hoi “te mahana rahi o te Atua Manahope.” (Apo. 16:13, 14, 16) Eita râ tatou e mǎtaˈu. E haa oioi to tatou Atua puai o Iehova no te faaora i te feia atoa e turu ra i ta ˈna Faatereraa arii.​—Ezk. 38:21-23.

12. Eaha te tupu no te mau puaa taehae atoa?

 ¹² Eaha te tupu no te mau puaa taehae atoa? Te na ô ra te Apokalupo 19:20: “Haruhia ˈtura te puaa taehae e oia atoa te peropheta haavare tei faatupu i te mau ohipa maere i mua ia ˈna, i vare ai te feia tei tapaohia i te tapao o te puaa taehae e te feia e haamori ra i to ˈna tii. Huri-ora-noa-hia ˈtura raua e piti atoa i raro i te roto auahi e ura puai noa ra.” E haamou roa te Atua i teie mau enemi poritita a faatere noa ˈi ratou.

13. Eaha te faaheporaa a te mau faatereraa ta te mau Kerisetiano e faaruru nei?

¹³ Eaha te auraa no tatou? Ei Kerisetiano, e mea tia ia vai taiva ore tatou i te Atua e ta ˈna Faatereraa arii. (Ioa. 18:36) No te na reira, e titauhia ia tatou ia ore e faaô i roto i te mau ohipa poritita. E ere roa ˈtu i te mea ohie ia tapea i to tatou tiaraa amui ore no te mea te faahepo ra te mau faatereraa ia turu roa tatou ia ratou na roto i ta tatou mau parau e ohipa. E tuuhia te tapao o te puaa taehae i nia i te feia o te hema i mua i te faaheporaa ia turu i te mau faatereraa. (Apo. 13:16, 17) Eita te feia ua tuuhia te tapao e fanaˈo faahou i te farii maitai a Iehova e te ora mure ore. (Apo. 14:9, 10; 20:4) Mea faufaa ïa ia tapea tatou tataitahi i to tatou tiaraa amui ore noa ˈtu te faaheporaa a te mau faatereraa!

14. Ia au i te Apokalupo 17:3-5, eaha te tupuraa maere mau ta te aposetolo Ioane i ite i muri iho?

¹⁴ Te faahiti ra te aposetolo Ioane e “ua maere roa” o ˈna i te tahi atu tupuraa ta ˈna i ite, oia hoi te hoê vahine e parahi ra i nia hoê o taua mau puaa taehae ra. (Apo. 17:1, 2, 6) E au o ˈna i te hoê “vahine taiata rahi” e o “Babulonia rahi” to ˈna iˈoa. Te rave ra o ˈna i te “mau peu taotoraa tia ore” e “te mau arii o te fenua.”​—A taio i te Apokalupo 17:3-5.

15-16. O vai o “Babulonia rahi” e no te aha?

¹⁵ O vai o “Babulonia rahi”? E ere tera vahine i te hoê faanahoraa poritita no te mea te parauhia ra e te taiata ra o ˈna i te mau tia faatere o te ao nei. (Apo. 18:9) E au ra e te parahi ra o ˈna i nia ia ratou no te mea te tamata ra o ˈna i te aratai ia ratou. Hau atu, e ere tera vahine i te faanahoraa tapihooraa nounou o te ao a Satani. Ua faahitihia hoi tera faanahoraa i roto i te tahi atu mau irava o te buka Apokalupo e ua piihia te reira “te mau ona o te fenua.”​—Apo. 18:11, 15, 16.

¹⁶ I roto i te Bibilia, e faaohipahia te parau “taiata” aore ra “faaturi” no te feia o te parau ra e tavini ratou na te Atua, te taiva nei râ ratou ia ˈna ma te haamori i te mau idolo aore ra ma te faahoa i to teie nei ao. (Par. 1, 5:25; Iak. 4:4) Area no te feia e haamori ra i te Atua ma te taiva ore, te faaohipahia ra te parau “viivii ore” aore ra “aita . . . i taoto i te hoê apiti.” (Kor. 2, 11:2; Apo. 14:4) I tahito ra, o te oire Babulonia te pu o te haamoriraa hape. Papu maitai ïa, te faahohoˈahia ra Babulonia rahi i te mau huru haamoriraa hape atoa. Mea tano ia parau e o ˈna te taatoaraa o te mau haapaoraa hape.​—Apo. 17:5, 18; a hiˈo i te tumu parau i nia i te jw.org “Qu’est-ce que Babylone la Grande ?”

17. Eaha te tupu no Babulonia rahi?

¹⁷ Eaha te tupu no Babulonia rahi? Te pahono ra te Apokalupo 17:16, 17: “Na tara hoê ahuru ta oe i ite e te puaa taehae, e hae ïa i te vahine taiata. E haru ratou i ta ˈna mau taoˈa e to ˈna ahu e te mau faaneheneheraa i nia ia ˈna. E amu atoa ratou i to ˈna iˈo e e tanina roa ia ˈna. E tuu hoi te  Atua i te manaˈo i roto i to ratou aau e rave i to ˈna hinaaro.” E turai Iehova i te mau nunaa ia faaohipa i te puaa taehae uteute, oia hoi te Hau amui no te aro e no te haamou roa i te taatoaraa o te mau haapaoraa hape.​—Apo. 18:21-24.

18. Eaha te haapapu ra e aita roa ˈtu tatou e turu ra ia Babulonia rahi?

¹⁸ Eaha te auraa no tatou? Mea faufaa ia vai mâ e ia vai viivii ore ta tatou haamoriraa i “te aro o to tatou Atua.” (Iak. 1:27) Eiaha roa ˈtu tatou e farii i te mau haapiiraa hape, te mau oroa a te mau nunaa ěê, te mau ture aveia haafaufaa-ore-hia e te mau peu tahutahu a Babulonia rahi! E tamau tatou i te faaara i te mau taata ia “haere ê mai i rapae ia ˈna” ia ore te Atua e faautua ia ratou no ta ˈna mau hara.—Apo. 18:4.

19. Te faahohoˈahia ra te “teni rahi uteute mai te auahi” ia vai?

¹⁹ Te faahiti atoa ra te buka Apokalupo i “te hoê teni rahi uteute mai te auahi.” (Apo. 12:3) Te aro ra teie teni ia Iesu e i ta ˈna mau melahi. (Apo. 12:7-9) Te aro atoa ra o ˈna i te nunaa o te Atua e te horoa ra o ˈna i te mana i te mau puaa taehae aore ra te mau faatereraa taata. (Apo. 12:17; 13:4) O vai tera teni? O “te ophi i tahito ra, oia hoi te Diabolo ra o Satani.” (Apo. 12:9; 20:2) O ˈna te faatere ra i te mau enemi atoa o Iehova.

20. Eaha te tupu no te teni?

²⁰ Eaha te tupu no te teni? Te faataa ra te Apokalupo 20:1-3 e e huri te hoê melahi ia Satani i roto i te abuso. E riro te reira ei fare tapearaa no Satani. Eita ïa o ˈna e “haavare faahou i te mau nunaa e ia hope roa ˈtu na 1 000 matahiti.” I te pae hopea, e hurihia Satani e ta ˈna mau demoni i roto i “te roto auahi e ura puai noa ra,” te auraa ïa e e haamou-roa-hia ratou. (Apo. 20:10) A feruri na i te hoê ao aita faahou Satani e ta ˈna mau demoni. Auê ïa taime oaoa mau!

21. No te aha tatou e oaoa ˈi a taio ai i te buka Apokalupo?

²¹ Ua itoitohia tatou i te iteraa i te auraa o tera mau faahohoˈaraa o te buka Apokalupo! Ua haapii tatou o vai te mau enemi o Iehova, oia atoa eaha te tupu no ratou. Papu, “e oaoa te taata e taio haapuai e te feia e faaroo i teie parau tohu e e haapao i tei papaihia i roto”! (Apo. 1:3) I te taime e haamouhia ˈi te mau enemi o te Atua, eaha te mau haamaitairaa ta te mau tavini taiva ore a te Atua e fanaˈo? O ta tatou ïa e hiˈopoa i to muri iho tumu parau haapiiraa.