1. No te aha tatou e hinaaro ai i te paari o te Atua? (Maseli 4:7)

 I MUA i te hoê faaotiraa faufaa roa, papu e pure outou no te ani i te paari no te mea tera ta outou e hinaaro mau ra. (Iak. 1:5) Ua papai te arii Solomona: “O te paari te mea faufaa roa ˈˈe.” (A taio i te Maseli 4:7.) Papu, aita Solomona i faahiti i te paari o teie nei ao. Ua faahiti râ o ˈna i te paari no ǒ mai i te Atua ra o Iehova. (Mas. 2:6) Tera râ, ia faaruru tatou i te mau fifi, e nehenehe mau anei te paari o te Atua e tauturu mai? E, e nehenehe. O ta tatou ïa e hiˈopoa i roto i teie tumu parau haapiiraa.

2. E nafea tatou e riro ai ei taata î i te paari?

² No te riro ei taata î i te paari, e nehenehe tatou e haapii e e faaohipa i te mau aˈoraa a e piti taata î i te paari. Na mua roa, e hiˈopoa tatou i te hiˈoraa o Solomona. Te parau ra te Bibilia: “Horoa maira te Atua na Solomona i te paari e te haroˈaroˈa rahi.” (Arii 1, 4:29) I muri mai, e hiˈopoa tatou i te hiˈoraa o Iesu no te mea aita ˈtu taata î i te paari mai ia ˈna. (Mat. 12:42) Ua tohu Isaia “e parahi te varua o Iehova” i nia ia Iesu e e noaa ia ˈna “te paari e te haroˈaroˈa.”​—Isa. 11:2.

3. Eaha ta tatou e hiˈopoa i roto i teie tumu parau haapiiraa?

³ Maoti te paari o te Atua, ua nehenehe Solomona e Iesu e horoa i te mau aˈoraa maitai no nia i te tahi mau tuhaa faufaa roa o te oraraa. I roto i teie tumu parau haapiiraa, e hiˈopoa tatou e toru o taua mau tuhaa ra: Te faufaaraa ia tapea i te hoê feruriraa tano no nia i te moni, te ohipa e ia tatou iho.

4. Eaha te taa-ê-raa i rotopu i te huru oraraa o Solomona e to Iesu?

⁴ E taata moni roa o Solomona e e oraraa fanaˈo to ˈna. (Arii 1, 10:7, 14, 15) Area Iesu, mea iti roa ta ˈna mau taoˈa e aita to ˈna e nohoraa papu. (Mat. 8:20) Tera râ, maoti te paari no ǒ mai i te Atua ra o Iehova, ua nehenehe raua e tapea noa i te hoê feruriraa tano no nia i te mau taoˈa materia.

5. Eaha te huru feruriraa o Solomona no nia i te moni?

⁵ Ua parau Solomona e “parururaa” te moni. (Koh. 7:12) Maoti te moni e noaa mai ai te mau mea hinaaro-mau-hia o te oraraa. Noa ˈtu e taata moni o Solomona, ua taa ia ˈna e ere te moni i te mea faufaa roa ˈˈe. Ei hiˈoraa, ua papai o ˈna: “Mea au aˈe te hoê iˈoa maitai [aore ra “roo maitai,” nota] i te taoˈa rahi.” (Mas. 22:1) Ua parau atoa Solomona e eita te taata mea au na ratou te moni e mauruuru i te mau mea e vai ra ia ratou. (Koh. 5:10, 12) Hau atu, ua faaara o ˈna ia tatou eiaha e tuu i to tatou tiaturiraa i roto i te moni no te mea eita te reira e vai noa mai.​—Mas. 23:4, 5.

6. Eaha te huru feruriraa o Iesu no nia i te mau taoˈa materia? (Mataio 6:31-33)

⁶ E feruriraa tano to Iesu no nia i te mau taoˈa materia. E oaoa o ˈna a tamaa ˈi e a inu ai. (Luka 19:2, 6, 7) I te hoê mahana, ua faatupu Iesu i ta ˈna semeio matamua ma te faariro i te pape ei uaina maitai roa. (Ioa. 2:10,11) Hau atu, i to ˈna poheraa, e ahu moni rahi to nia ia ˈna. (Ioa. 19:23, 24) Aita râ Iesu i vaiiho i te mau taoˈa materia ia riro ei mea faufaa roa ˈˈe no ˈna. Ua parau o ˈna i ta ˈna mau pǐpǐ: “Eita te hoê taata e nehenehe e tavini e piti fatu . . . Eita outou e nehenehe e tavini i te Atua e te Moni.” (Mat. 6:24) Ua haapii Iesu e mai te peu e imi na mua tatou i te Faatereraa arii a te Atua, e haapao iho â Iehova ia fanaˈo tatou i ta tatou e hinaaro mau ra.​—A taio i te Mataio 6:31-33.

7. Mea nafea te hoê taeae i te faufaaraahia i te huru feruriraa tano no nia i te moni?

 ⁷ Ua faufaahia e rave rahi taeae e tuahine a faaohipa ˈi i te mau aˈoraa î i te paari a Iehova no nia i te moni. Teie te hiˈoraa o Daniel, te hoê taeae faaea taa noa. Te na ǒ ra o ˈna: “I to ˈu taurearearaa, ua faaoti au i te haafaufaa aˈe i ta ˈu taviniraa ia Iehova.” No to ˈna oraraa haapae, ua nehenehe Daniel e faaohipa i to ˈna taime e aravihi no te tavini atu â ia Iehova. Te parau atoa ra o ˈna: “Aita roa ˈtu vau e tatarahapa i te mau faaotiraa ta ˈu i rave. Ua nehenehe au e riro ei taata moni mai te peu o te moni te mea faufaa roa ˈˈe no ˈu, eita râ vau e fanaˈo i te hoa maitai. Ahani ua haafaufaa vau i te moni, eita vau e ite i te oaoa ta ˈu e fanaˈo ra i teie mahana a tavini ai ia Iehova. Maoti Iehova, mea rahi aˈe te oaoa ta ˈu i ite i ta te moni e nehenehe e horoa mai.” Oia mau, e oaoa tatou a tiatonu ai i nia i te taviniraa ia Iehova, eiaha râ i te moni.

8. Eaha te faaite ra e feruriraa tano to Solomona no nia i te ohipa? (Koheleta 5:18, 19)

⁸ Ua parau Solomona e “ô a te Atua” te oaoa ta tatou e ite a ohipa ˈi. (A taio i te Koheleta 5:18, 19.) Ua papai o ˈna: “E faufaa noa te noaa ia ravehia te mau huru ohipa rohirohi atoa.” (Mas. 14:23) Ua ite Solomona e parau mau iho â te reira. E taata rave ohipa hoi o ˈna! Ua patu o ˈna i te fare, ua faaapu i te vine, ua hamani i te mau ô rarahi e pape hopu. Hau atu, ua patu o ˈna i te mau oire. (Arii 1, 9:19; Koh. 2:4-6) Papu, mea rahi te ohipa ta Solomona i rave e ua oaoa roa o ˈna i te reira. Ua taa râ ia ˈna e no te fanaˈo i te oaoa mau, e titauhia ia rahi atoa ta ˈna ohipa no Iehova. Ei hiˈoraa, ua titauhia e hitu matahiti no te patu i te hoê hiero nehenehe mau no te haamori ia Iehova e na Solomona i haapao i te reira. (Arii 1, 6:38; 9:1) I roto i te mau ohipa atoa ta Solomona i rave, ua taa ia ˈna e te mea faufaa roa ˈˈe ta te hoê taata e nehenehe e rave, o te taviniraa ïa ia Iehova. Ua papai o ˈna: “Teie te puohuraa, ua faahitihia hoi te mau mea atoa: A mǎtaˈu i te Atua mau e a haapao i ta ˈna mau faaueraa.”​—Koh. 12:13.

9. Mea nafea to Iesu faaiteraa e ere ta ˈna ohipa te mea faufaa roa ˈˈe i roto i to ˈna oraraa?

⁹ E taata rave ohipa Iesu. I nia i te fenua, ua ohipa o ˈna ei tamuta. (Mar. 6:3) Papu maitai, ua mauruuru roa to ˈna na metua no te mea ua tauturu oia ia raua ia aupuru i te utuafare rahi. Hau atu, e taata tia roa o Iesu e mea maitai roa te ohipa ta ˈna i rave. Eita e ore, mea rahi te taata tei hinaaro e hoo mai i ta ˈna mau taihaa! Mea au roa na Iesu ta ˈna ohipa e mea aravihi roa o ˈna. Noa ˈtu râ, ua faataa noa Iesu i te taime no te tavini ia Iehova. (Ioa. 7:15) Tau taime i muri mai, ei taata poro taime taatoa, ua horoa o ˈna i teie aˈoraa: “A rave i te ohipa eiaha no te maa o te pê, no te maa râ o te vai noa e noaa ˈi te ora mure ore.” (Ioa. 6:27) Hau atu, i roto i ta ˈna Aˈoraa i nia i te mouˈa, ua parau Iesu: “A haapue . . . i te taoˈa na outou i te raˈi.” (Mat. 6:20)

10. Eaha te fifi ta vetahi Kerisetiano e faaruru ra no ta ratou ohipa maitai?

¹⁰ Ia faaohipa tatou i te mau aˈoraa î i te paari a Iehova, e faaite tatou i te hoê feruriraa tano no nia i te ohipa. Ei Kerisetiano, ua haapiihia tatou ia “rohi . . . i te raveraa i te ohipa maitai.” (Eph.  4:28) Pinepine te mau paoti i te tapao i to tatou haerea tia e to tatou itoito a parau atu ai e mea au roa ta tatou ohipa. E nehenehe te reira e turai ia tatou ia rave i te hora hau a nehenehe atu ai ta tatou paoti e faahiti i te parau maitai no nia i te mau Ite no Iehova. A na reira ˈi, aita faahou ïa e taime no to tatou utuafare e no ta tatou taviniraa ia Iehova. E titauhia ia rave tatou i te mau tauiraa no te faatupu i te hoê feruriraa tano no nia i te ohipa.

11. Eaha ta te hoê taeae i haapii no nia i te faufaaraa ia faatupu i te hoê feruriraa tano no nia i te ohipa?

¹¹ Ua faufaahia William, te hoê taeae apî, i te hiˈoraa o te tahi taeae. Ua ohipa o ˈna no teie taeae na mua aˈe e ua taa ia ˈna i te faufaaraa ia faatupu i te hoê feruriraa tano no nia i te ohipa. Te na ô ra William: “E hiˈoraa maitai roa teie taeae no ˈu no to ˈna feruriraa tano no nia i te ohipa. E rohi iho â o ˈna e mea au roa na te mau hoani ia ˈna no ta ˈna ohipa maitai. I te hopea râ o te mahana, e faaea o ˈna i ta ˈna ohipa no te aupuru i to ˈna utuafare e no te tavini ia Iehova. O ˈna hoê o te mau taata oaoa roa ˈˈe ta ˈu i ite!” *

12. Mea nafea to Solomona faaiteraa i te hoê feruriraa tano no nia ia ˈna iho, no te aha râ aita o ˈna i tamau i te na reira?

¹² A tavini ai Solomona ia Iehova ma te taiva ore, ua tapea noa o ˈna i te hoê feruriraa tano no nia ia ˈna iho. I to ˈna apîraa, ua riro o ˈna ei arii e ua farii atoa ma te haehaa e taotiaraa to ˈna e ua ani atu i te aratairaa a Iehova. (Arii 1, 3:7-9) I muri mai, ua taa ia ˈna e mea ino roa ia riro ei taata teoteo. Ua papai hoi o ˈna: “Hou te ati, o te teoteo ïa, e na mua te manaˈo faateitei i te turoriraa.” (Mas. 16:18) Tera râ, aita oia i pee i ta ˈna iho aˈoraa. Tau taime i muri mai, ua faateitei oia ia  ˈna a haamata ˈtu ai i te haafaufaa ore i te mau faaueraa a te Atua. Ei hiˈoraa, ia au i te ture ua titauhia i te arii Hebera ia ore “e faarahi i te vahine faaipoipo na ˈna, ia ore to ˈna aau ia hahi ê.” (Deut. 17:17) Aita râ Solomona i haapao i tera ture. Ua rave o ˈna 700 vahine faaipoipo e 300 vahine faaipoipo tavini. E vahine ěê te rahiraa o ratou! (Arii 1, 11:1-3) Ua manaˈo paha Solomona e ere te reira i te mea ino. Tera râ, ua faaruru o ˈna i te mau faahopearaa ino no to ˈna faaroo ore ia Iehova.​—Arii 1, 11: 9-13.

13. Eaha ta tatou e haapii a feruriruri ai i nia i te haehaa o Iesu?

¹³ Ua faaite noa Iesu i te hoê feruriraa tano no nia ia ˈna iho e ua faatupu o ˈna i te haehaa. Hou a haere mai ai i te fenua, mea rahi te ohipa faahiahia ta ˈna i rave a tavini noa ˈi ia Iehova. Te na ô ra te Bibilia no nia ia Iesu: “E mea na roto hoi ia ˈna i poietehia ˈi to te raˈi atoa e to te fenua atoa.” (Kol. 1:16) I to ˈna bapetizoraahia, ua haamanaˈo Iesu i te mau mea atoa ta ˈna i rave i pihai iho i to ˈna Metua. (Mat. 3:16; Ioa. 17:5) Aita râ o ˈna i faateitei ia ˈna a haamanaˈo ai i te reira. Aita roa ˈtu Iesu i manaˈo e mea faufaa aˈe o ˈna ia vetahi ê. Aita atoa o ˈna i rave i te tahi noa ˈˈe ohipa o te haapapu ra i te reira. Ua parau hoi o ˈna i ta ˈna mau pǐpǐ e ua haere mai o ˈna i nia i te fenua “eiaha ia tavinihia oia, no te tavini râ e no te horoa i to ˈna ora ei hoo no te taata e rave rahi.” (Mat. 20:28) Hau atu, ua parau Iesu e eita o ˈna e rave mai ta ˈna e hinaaro. (Ioa. 5:19) Mea haehaa mau o Iesu e e hiˈoraa maitai roa o ˈna no tatou.

14. Maoti te hiˈoraa o Iesu, eaha ta tatou e haapii no nia i te hoê feruriraa tano no nia ia tatou iho?

¹⁴ Ua haapii Iesu i ta ˈna mau pǐpǐ ia faatupu i te hoê feruriraa tano no nia ia ratou iho. I te hoê taime, ua haapapu Iesu ia ratou e ua “taio-pauroa-hia te rouru o to [ratou] upoo.” (Mat. 10:30) Mea mahanahana mau teie mau parau mai te peu iho â râ te haafaufaa ore ra outou ia outou iho. Te auraa ïa, te tâua mau ra to  tatou Metua i te raˈi ia tatou. Hau atu, e mea faufaa roa tatou no ˈna. Te farii ra hoi Iehova ia haamori tatou ia ˈna e te hinaaro ra o ˈna ia fanaˈo tatou i te ora mure ore i roto i te ao apî. Eiaha roa ˈtu ïa tatou e manaˈo e ua hape o ˈna.

15. (1) Eaha te feruriraa tano ta Te Pare Tiairaa e faaitoito ra ia tatou ia faatupu? (2) Eaha ta tatou e ere ia haapao noa tatou ia tatou iho? (A hiˈo i te mau hohoˈa i te api 24.)

¹⁵ A 15 matahiti i teie nei, ua faaitoito Te Pare Tiairaa ia faatupu i te hoê feruriraa tano no nia ia tatou iho ma te parau: “Papu maitai, eita tatou e hinaaro ia hau te manaˈo ia tatou iho a teoteo roa ˈi; eita atoa tatou e hinaaro e topa i roto i te tahi atu huru hiˈoraa ma te manaˈo e e ere tatou i te mea faufaa. Ta tatou râ fa, ia faatupu ïa i te hoê huru hiˈoraa au noa no nia ia tatou iho e tia ˈi, ma te tâuˈa i to tatou mau vahi puai tae noa ˈtu i to tatou nei mau taotiaraa. O ta te hoê ïa vahine Kerisetiano i parau: ‘E ere au i te hoê taata ino; e ere atoa vau i te hoê taata faahiahia. E pae maitai e e pae ino to ˈu, e hoê â huru no te mau taata atoa.’” * Te ite maitai ra tatou i te faufaaraa ia faatupu i te hoê feruriraa tano no nia ia tatou iho.

16. No te aha Iehova e horoa mai ai i te aratairaa î i te paari?

¹⁶ Te horoa ra Iehova i te hoê aratairaa î i te paari maoti ta ˈna Parau. Mea here na ˈna ia tatou e te hinaaro ra o ˈna ia oaoa noa tatou. (Isa. 48:17, 18) A tamau ïa i te rave i te mau mea ta Iehova e au. Tera te faaotiraa maitai roa ˈˈe ta tatou e nehenehe e rave e o te hopoi mai i te oaoa mau. A na reira ˈi, eita tatou e roohia i te fifi mai ta vetahi ê e faaruru ra no te mea te haafaufaa rahi aˈe ra ratou i te moni, te ohipa e ia ratou iho. E tamau anaˈe ïa i te faaite i te hoê haerea paari e i te faaoaoa i te aau o Iehova!​—Mas. 23:15.