1. O vai te utuafare o Iakobo?

 EI TAEAE no Iesu, ua paari Iakobo i roto i te hoê utuafare tei tavini ia Iehova ma te taiva ore. b O Iosepha raua Maria to ˈna na metua. Mea here roa na raua ia Iehova e ua rave raua i tei maraa ia raua no te tavini ia ˈna. Ua fanaˈo Iakobo i te tahi atu haamaitairaa, oia hoi o to ˈna tuaane te Mesia fafauhia. Auê ïa fanaˈoraa taa ê no Iakobo ia riro ei mero o taua utuafare ra!

2. Eaha te mau tumu i nehenehe ai Iakobo e faahiahia i to ˈna tuaane?

² E rave rahi tumu i nehenehe ai Iakobo e faahiahia i to ˈna tuaane. (Mat. 13:55) Ei hiˈoraa i te 12raa o to Iesu matahiti, ua maere roa te mau orometua i Ierusalema no te mea ua ite maitai o ˈna i te mau Papai. (Luka 2:46, 47) Peneiaˈe ua ohipa Iakobo ei tamuta na muri ia Iesu. Ua matau maitai ïa o ˈna i to ˈna tuaane. Pinepine te taeae Nathan Knorr i te parau: “E matau atu â i te hoê taata a ohipa ˈi na muri ia ˈna.” c Ua tapao atoa paha o Iakobo e “a rahi mai ai Iesu, rahi atoa ˈtura to ˈna paari. Noaa atoa maira ïa ia ˈna te farii maitai o te Atua e te taata.” (Luka 2:52) E manaˈo paha ïa tatou e o Iakobo te pǐpǐ matamua a Iesu. E ere roa ˈtu râ tera tei tupu.

3. Eaha ta Iakobo i rave i to Iesu haamataraa i ta ˈna taviniraa?

³ I to Iesu taviniraa i nia i te fenua, aita Iakobo i riro ei pǐpǐ na ˈna. (Ioa. 7:3-5) Ua apiti paha o Iakobo i te tahi atu mau fetii tei manaˈo e “ua maamaahia” o Iesu. (Mar. 3:21) Aita e haapapuraa e ua haere Iakobo na muri i to ˈna metua  vahine o Maria a haapohehia ˈi Iesu i nia i te pou haamauiuiraa.—Ioa. 19:25-27.

4. Eaha te mau haapiiraa ta tatou e huti mai i to Iakobo hiˈoraa?

⁴ I muri iho, ua faatupu Iakobo i te faaroo ia Iesu e ua riro o ˈna ei matahiapo faaturahia o te amuiraa Kerisetiano. I roto i teie tumu parau haapiiraa, e huti mai tatou e piti haapiiraa i to Iakobo hiˈoraa: (1) No te aha e mea faufaa ia faatupu noa i te haehaa? (2) E nafea ia riro ei taata aravihi i te haapii atu?

5. Eaha ta Iakobo i rave i muri aˈe i to Iesu tia-faahou-raa e faraa ˈtu ia ˈna?

⁵ Afea râ Iakobo i te riroraa mai ei pǐpǐ haapao maitai na Iesu? I muri aˈe i to ˈna tia-faahou-raa, “fa ˈtura [Iesu] ia Iakobo, e i muri iho i te mau aposetolo atoa.” (Kor. 1, 15:7) I muri aˈe i tera tupuraa, riro atura Iakobo ei pǐpǐ na Iesu. Tei roto atoa o ˈna i te piha i nia o te hoê fare i Ierusalema e te mau aposetolo tei tiai i te varua moˈa fafauhia. (Ohi. 1:13, 14) I muri iho, ua tavini Iakobo ei mero o te Tino aratai o te senekele matamua. (Ohi. 15:6, 13-22; Gal. 2:9) E tau taime hou te matahiti 62, ua fanaˈo oia i te varua moˈa no te papai i te hoê rata i te mau Kerisetiano faatavaihia. E faufaahia tatou i taua rata ra i teie mahana, tei te raˈi anei to tatou tiaturiraa aore ra i nia i te fenua nei. (Iak. 1:1) Ua parau Iosepha, te hoê aivanaa o te senekele matamua e ua faaue te tahuˈa rahi ati Iuda o Anania ia haapohehia Iakobo. Ua vai taiva ore o Iakobo ia Iehova tae roa ˈtu i to ˈna pohe.

6. No te aha mea taa ê Iakobo i te mau tia haapaoraa o taua tau ra?

⁶ E taata haehaa o Iakobo. Eaha te haapapu ra i te reira? A hiˈo na i te taa-ê-raa i rotopu i te huru o Iakobo i nia ia Iesu e to e rave rahi tia haapaoraa o taua tau ra. I to Iakobo taaraa o Iesu te Tamaiti a te Atua, ua farii o ˈna i te reira ma te haehaa. Area te mau tia haapaoraa i Ierusalema, aita ïa. Ei hiˈoraa, ua papu roa ia ratou e ua faatia Iesu ia Lazaro mai te pohe mai. Aita râ ratou i hinaaro e farii e tia o Iesu no Iehova. Ua opua atoa ratou i te haapohe ia Iesu e ia Lazaro. (Ioa. 11:53; 12:9-11) I muri aˈe i to Iesu tia-faahou-raa, ua tamata ratou i te huna i tei tupu. (Mat. 28:11-15) No to ratou teoteo, ua patoi te mau tia haapaoraa i te Mesia.

7. No te aha mea tia ia haapae i te teoteo?

 ⁷ Te haapiiraa: A haapae i te teoteo e a farii i te haapiiraa no ǒ mai ia Iehova. Mai te hoê maˈi o te nehenehe e haafifi i to tatou mafatu, e tapea te teoteo ia tatou ia faaroo ia Iehova. No to ratou teoteo, aita te mau Pharisea i farii e o Iesu te Tamaiti a te Atua e tei ia ˈna ra te varua moˈa o te Atua, noa ˈtu ua haapapuhia te reira. (Ioa. 12:37-40) Auê ïa huru maamaa, a ere atu ai ratou i te ora mure ore! (Mat. 23:13, 33) Mea faufaa roa ia vaiiho noa i te Parau a te Atua e to ˈna varua moˈa ia ohipa i nia i to tatou haerea e huru feruriraa, oia atoa ta tatou mau faaotiraa. (Iak. 3:17) No to ˈna haehaa, ua vaiiho Iakobo ia Iehova ia haapii ia ˈna. E mai ta tatou e ite, no to ˈna haehaa i riro ai o ˈna ei taata aravihi i te haapii atu.

8. Eaha te tauturu mai ia riro ei taata aravihi i te haapii atu?

⁸ Aita Iakobo i haere i te haapiiraa a te mau Rabi. Papu, hoê â manaˈo to te mau tia haapaoraa o to ˈna tau no nia ia Iakobo e no nia i te mau aposetolo Petero e Ioane. Ua parau hoi ratou: “Aita raua i haere i te haapiiraa e aita to raua e tiaraa teitei.” (Ohi. 4:13) Ua haapii râ Iakobo e nafea ia riro ei taata aravihi i te haapii atu, mai ta tatou e ite nei i roto i te rata ta ˈna i papai. Mai ia Iakobo, aita paha tatou i haere i te haapiiraa teitei. Noa ˈtu râ, maoti te varua o Iehova e te tauturu a ta ˈna faanahonahoraa, e nehenehe tatou e riro ei taata aravihi i te haapii atu. E hiˈopoa anaˈe i te hiˈoraa o Iakobo i roto i tera tuhaa e e huti anaˈe i te haapiiraa no tatou.

9. E nafea outou e faataa ˈi i te huru haapiiraa a Iakobo?

⁹ Ua faaohipa Iakobo i te mau taˈo e te mau faataaraa ohie ia taa. Ei faahopearaa, ua taa i te mau taata tei faaroo ia ˈna eaha tei titauhia ia ratou ia rave e e nafea ratou. Ei hiˈoraa, a feruri na mea nafea Iakobo i te haapiiraa i te mau Kerisetiano ia faaruru i te tupuraa tano ore ma te ore e inoino. Ua na ô o ˈna: “Te parau  nei matou e ia oaoa te feia tei faaoromai tamau. Ua faaroo outou i te faaoromai tamau o Ioba e ua ite outou i ta Iehova i rave e e Atua here rahi Iehova e te aroha hamani maitai.” (Iak. 5:11) A tapao na, ua niuhia te mau haapiiraa a Iakobo i nia i te mau Papai. Ua faaohipa o ˈna i te Parau a te Atua no te tauturu i te feia tei faaroo ia ˈna ia taa e e haamaitai iho â Iehova i te feia o te vai taiva ore ia ˈna, mai ia Ioba. Ua horoa Iakobo i tera haapiiraa ma te faaohipa i te mau taˈo e te mau faataaraa ohie ia taa. A na reira ˈi, ua haafaufaa o ˈna ia Iehova, eiaha râ ia ˈna iho.

10. E nafea ia pee i to Iakobo hiˈoraa a haapii ai ia vetahi ê?

¹⁰ Te haapiiraa: Ia taa-ohie-hia ta tatou poroi e ia faaohipa tatou i te Parau a te Atua e tia ˈi. A haapii ai ia vetahi ê, e faaite tatou e te tâuˈa mau ra Iehova ia ratou, eita râ tatou e faatietie ia tatou no to tatou ite. (Roma 11:33) E naea tatou i tera fa ma te tamau i te niu i ta tatou haapiiraa i nia i te Bibilia. Ei hiˈoraa, i mua i te hoê tupuraa ta te piahi Bibilia e faaruru, eita tatou e parau atu eaha ta tatou e rave ahani o tatou tei roto i to ˈna tupuraa. E tauturu râ tatou ia ˈna ia feruri i nia i te mau hiˈoraa Bibilia e ia taa i te manaˈo e te huru o Iehova. I muri iho, e faaohipa ratou i ta ratou i haapii no te mea ua hinaaro ratou e faaoaoa ia Iehova, eiaha râ ia tatou.

11. Eaha te mau fifi ta vetahi mau Kerisetiano i faaruru i te tau o Iakobo e eaha te aˈoraa ta Iakobo i horoa ˈtu? (Iakobo 5:13-15)

¹¹ E manaˈo au noa to Iakobo. A taio ai tatou i ta ˈna rata, mea papu e ua ite maitai Iakobo i te mau fifi ta to ˈna mau hoa Kerisetiano i faaruru e ua horoa ˈtu o ˈna i te aˈoraa tano. Ei hiˈoraa, aita vetahi mau Kerisetiano i pee oioi i ta ˈna aratairaa. (Iak. 1:22) Ua tâuˈa rahi aˈe vetahi i te feia moni. (Iak. 2:1-3) E no te tahi atu, mea fifi ia haavî i to ratou arero. (Iak. 3:8-10) E fifi rahi ïa to teie mau Kerisetiano. Ua tamau râ Iakobo i te tiaturi e nehenehe ratou e taui. Ua horoa o ˈna i te aˈoraa ma te mǎrû e te haavare ore. Ua faaitoito o ˈna i te feia paruparu i te pae varua ia ani i te tauturu i te mau matahiapo.—A taio i te Iakobo 5:13-15.

12. E nafea ia faaite i te manaˈo tano a tauturu ai i ta tatou mau piahi Bibilia?

¹² Te haapiiraa: E manaˈo au noa e te tano to tatou i nia ia vetahi ê. Mea fifi paha no e rave rahi o ta tatou piahi ia faaohipa i te mau aˈoraa Bibilia. (Iak. 4:1-4) E titauhia paha e rave rahi taime no te haapae i te mau peu iino e no te faatupu i te mau huru maitatai Kerisetiano. Mai ia Iakobo, e faaite tatou i te itoito no te faataa i te piahi eaha te titauhia ia ˈna ia rave. E faaite atoa tatou i te manaˈo tano a tiaturi atu ai e faafatata Iehova i te feia haehaa ia ˈna ra e e horoa ˈtu o ˈna i te puai no te rave i te mau tauiraa i roto i to ratou oraraa.—Iak. 4:10.

13. Mai tei papaihia i roto i te Iakobo 3:2, eaha ta Iakobo i farii?

¹³ E manaˈo tano noa to Iakobo no nia ia ˈna iho. Aita Iakobo i manaˈo mea faufaa aˈe o ˈna i te tahi atu mau Kerisetiano no te mea e taeae o ˈna no Iesu e e rave rahi hopoia taa ê ta ˈna. Ua pii o ˈna i to ˈna mau hoa Kerisetiano “to ˈu mau taeae here.” (Iak. 1:16, 19; 2:5) Aita o ˈna i hinaaro ia hiˈohia o ˈna ei taata tia roa. No reira o ˈna i farii ai: “E hapa hoi tatou paatoa [te mau Kerisetiano e o ˈna atoa] e rave rahi taime.”—A taio i te Iakobo 3:2 .

14. No te aha e mea tia ia farii e hape tatou i te tahi taime?

 ¹⁴ Te haapiiraa: A haamanaˈo e taata hara anaˈe tatou pauroa. Eiaha e manaˈo e mea hau aˈe tatou i ta tatou piahi. A na reira ˈi, e nehenehe paha te piahi e manaˈo e aita tatou e rave i te tahi noa ˈˈe hape. I muri iho, e toaruaru o ˈna a manaˈo atu ai e aita roa ˈtu o ˈna e nehenehe e tavini i te Atua ma te tia roa. A faaite râ ia ˈna e ere i te mea ohie no tatou ia pee noa i te mau aratairaa Bibilia e a faataa ˈtu mea nafea Iehova i te tautururaa mai ia rave i te mau tauiraa i roto i to tatou oraraa. E tauturu te reira i te piahi ia taa e nehenehe atoa o ˈna e tavini ia Iehova.

15. Eaha te huru faahohoˈaraa ta Iakobo i faaohipa? (Iakobo 3:2-6, 10-12)

¹⁵ Ua faaohipa Iakobo i te mau faahohoˈaraa putapû mau. Papu na te varua moˈa i tauturu ia ˈna ia na reira. Ua aravihi atoa râ o ˈna i roto i tera tuhaa ma te haapii i te mau faahohoˈaraa ta to ˈna tuaane o Iesu i faaohipa. Mea ohie ia taa i te mau faahohoˈaraa a Iakobo e mea papu maitai te mau haapiiraa.—A taio i te Iakobo 3:2-6, 10-12.

16. No te aha mea faufaa ia faaohipa i te mau faahohoˈaraa tano maitai?

¹⁶ Te haapiiraa: A faaohipa i te mau faahohoˈaraa tano maitai. E puta maitai ïa te hohoˈa i roto i te feruriraa o te taata e e tauturu atu ia haamanaˈo i te manaˈo faufaa i roto i te Bibilia. O Iesu te mea aravihi aˈe no te faaohipa i te mau faahohoˈaraa tano maitai e ua pee to ˈna taeae o Iakobo i to ˈna hiˈoraa. E hiˈopoa anaˈe hoê o te mau faahohoˈaraa a Iakobo e e hiˈo anaˈe no te aha mea tano maitai te reira.

17. No te aha mea tano maitai te faahohoˈaraa papaihia i roto i te Iakobo 1:22-25?

¹⁷ A taio i te Iakobo 1:22-25. Mea tano maitai te faahohoˈaraa a Iakobo no nia i te hiˈo. No te aha? Ua horoa o ˈna i teie haapiiraa taa maitai: Ia faufaahia tatou i te Parau a te Atua, e mea tia ia taio e ia faaohipa i te reira. Ua maiti Iakobo i te hoê faahohoˈaraa ta te feia e faaroo e taa ohie, oia hoi te hoê taata e hiˈo ra ia ˈna i roto i te hiˈo. Eaha te haapiiraa? Mea  maamaa ia hiˈo te hoê taata i to ˈna hohoˈa mata i roto i te hiˈo, ia ite i te tahi mea tano ore i nia ia ˈna e ia ore e faaafaro i te reira. Hoê â huru no te taata o te taio ra i te Bibilia e o te ite ra eaha te titauhia ia taui i roto i to ˈna oraraa a ore atu ai e faatano i te reira.

18. Eaha te mau manaˈo ta tatou e haapao a faaohipa ˈi i te mau faahohoˈaraa?

¹⁸ A faaohipa ˈi i te mau faahohoˈaraa, e pee tatou i to Iakobo hiˈoraa ma te haapao i to muri nei mau manaˈo: (1) Ia papu ia tatou e mea tano maitai te faahohoˈaraa no te huti i te haapiiraa ta tatou e hiˈopoa ra. (2) A faaohipa i te faahohoˈaraa ohie ia taa. (3) Ia papu maitai te haapiiraa o te faahohoˈaraa. Mai te peu aita ta tatou e faahohoˈaraa tano, a faaohipa i te buka Maimiraa Bibilia no te mau Ite no Iehova. I te tumu parau iti “Faahohoˈaraa,” e itehia e rave rahi faahohoˈaraa tano ta tatou e nehenehe e faaohipa. A haamanaˈo râ, e au te mau faahohoˈaraa i te hoê taoˈa haapuairaa reo. E haapapu atu â te reira i te manaˈo ta tatou e hinaaro e haamatara. Ia faaohipa tatou e rave rahi faahohoˈaraa, e painu paha te feia e faaroo ra. E vai ara anaˈe ïa ia faaohipa i te faahohoˈaraa tano maitai no te manaˈo ta tatou e hinaaro e haamatara. Te mea papu, te tumu e hinaaro ai tatou e aravihi atu â i te haapii atu, o te tautururaa ïa i te taata ia riro ei mero o to Iehova utuafare oaoa, eiaha râ te faaiteiteraa ia tatou.

19. E nafea ia faaite i to tatou here i to tatou mau taeae e tuahine?

¹⁹ Ua paari Iakobo e te hoê tuaane tia roa, area tatou, aita ïa. E fanaˈoraa taa ê râ no tatou ia tavini ia Iehova e to tatou mau taeae e tuahine Kerisetiano. E faaite atu tatou i to tatou here ma te amui atu ia ratou, ma te haapii i to ratou hiˈoraa e ma te apiti ia ratou i roto i te ohipa pororaa e haapiiraa ia vetahi ê. A tutava ˈi i te pee i te hiˈoraa o Iakobo i roto i to tatou huru, haerea e ta tatou huru haapiiraa, te faahanahana ra tatou ia Iehova e te tauturu ra tatou i te feia aau farii ia faafatata ˈtu i to tatou Metua î i te here.