1. Eaha ta Isaia i tohu no nia ia Iesu e no te aha tatou e itoitohia ˈi i te reira?

 E ITOITOHIA tatou i te parau tohu a Isaia no nia ia Iesu Mesia e e noaa atoa mai te tiaturiraa papu. Ua tohu Isaia no Iesu, “e ore hoi ta ˈna parau e faaauhia i tei itea e tana mata; e ore hoi oia e aˈo i ta to ˈna tariˈa i faaroo ra: e haava râ oia i te taata rii ma te parau-tia ra.” (Isa. 11:3, 4) I roto i teie ao, ua matau hoi te taata i te maitiiti e i te haava ia vetahi ê ia au i ta to ratou mata e ite. E hinaaro mau tatou i te Haava tia roa ra o Iesu, eita hoi oia e haava ma te haapao i te huru rapaeau!

2. Eaha ta Iesu i faaue mai ia rave e eaha ta tatou e hiˈopoa i roto i teie haapiiraa?

² Ua rau ta tatou huru hiˈoraa ia vetahi ê i te mau mahana atoa. I te mea râ e ere tatou i te feia tia roa mai ia Iesu, e ere atoa ïa to tatou mau manaˈo i te mea tia roa. Mea ohie ia vaiiho i ta to tatou mata e ite ia faahuru ê i ta tatou huru hiˈoraa ia vetahi ê. No reira Iesu i faaue ai: “A faaea i te haava ma te haapao i te huru rapaeau, a haava râ ma  te parau-tia.” (Ioa. 7:24) Ua hinaaro ïa Iesu ia pee tatou i to ˈna hiˈoraa ma te ore e haava i te taata ia au i to ratou huru rapaeau. I roto i teie haapiiraa, e hiˈopoa tatou e toru tumu o te nehenehe e faahuru ê i ta tatou huru hiˈoraa ia vetahi ê: Te iri aore ra te nunaa o te taata, ta ˈna faufaa e to ˈna faito matahiti. E ite atoa mai tatou e nafea ia auraro i te faaueraa a Iesu ia ore e haava i te taata ia au i to ratou huru rapaeau.

3, 4. (a) No te aha Petero i taui ai i ta ˈna huru hiˈoraa i te feia no te nunaa ê? (A hiˈo i te hohoˈa matamua.) (b) Eaha te haapiiraa apî ta Iehova i faaite ia Petero?

³ A feruri na i te huru o te aposetolo Petero a anihia ˈi o ˈna ia haere i Kaisarea i te fare o Korenelio, te hoê taata no te nunaa ê. (Ohi. 10:17-29) Ua paari mai Petero e te manaˈo e mea viivii te feia no te nunaa ê. Ua taui râ ta ˈna huru hiˈoraa ia ratou i muri aˈe i to ˈna iteraa i te tahi orama no ǒ mai i te Atua ra. (Ohi. 10:9-16) I roto i tera orama, ua ite Petero i te tahi mea e au i te hoê ahu rahi tei î i te animara viivii e pou mai ra mai te raˈi mai. Faaroo ihora oia i te hoê reo i te na ôraa: “A tia Petero, a tupai e a amu!” Ua patoi etaeta Petero i te na reira, na ô maira râ te reo: “A faaea i te parau e mea viivii ta te Atua i tamâ.” Aita Petero i taa i ta ˈna i faaroo. I reira iho, tae mai nei te mau vea tonohia mai e Korenelio. Ua tauturu te varua moˈa ia Petero ia farii i te haere i te fare o Korenelio, apee atura oia i te mau vea.

⁴ Ahani Petero i haava “ma te haapao i te huru rapaeau,” eita roa oia e tae i te fare o Korenelio. Eita hoi te mau ati Iuda e haere i te fare o te feia no te nunaa ê. No te aha ïa Petero i na reira ˈi? Noa ˈtu i hiˈo ê na oia ia ratou, ua tauturu te orama e te varua moˈa ia ˈna ia taui i ta ˈna huru hiˈoraa i te feia no te nunaa ê. I muri aˈe i to ˈna faarooraa ia Korenelio, teie ta Petero i parau: “I teie nei, taa ˈtura ia ˈu e e ore te Atua e maitiiti i te taata, i roto râ i te mau nunaa atoa, e farii oia i te taata o te mǎtaˈu ia ˈna e o te rave i te mea tia.” (Ohi. 10:34, 35) E haapiiraa apî e te faahiahia teie no Petero e no te mau Kerisetiano atoa. Eaha te tumu?

5. (a) Eaha ta Iehova i hinaaro ia taa i te mau Kerisetiano atoa? (b) Noa ˈtu ua ite tatou i tera haapiiraa, eaha paha te nehenehe e vai noa i roto i to tatou aau?

⁵ Ua faaohipa o Iehova ia Petero no te tauturu i te mau Kerisetiano atoa ia taa e ere oia i te Atua e maitiiti i te taata. No Iehova, e ere te iri, te nunaa, te opu e te reo i te mea faufaa. No te fanaˈo i ta ˈna farii maitai, e tia ia mǎtaˈu ia ˈna e ia rave i te mea tia. (Gal. 3:26-28; Apo. 7:9, 10) Ua ite aˈena tatou i te reira. Teie nei râ, mai te peu ua paari tatou i roto i te hoê fenua aore ra utuafare o te maitiiti i te taata, eaha to tatou huru? Peneiaˈe,  te manaˈo ra outou e ere outou i te mea maitiiti i te taata, te vai ra râ paha te tahi toetoea manaˈo hiˈo ê ia vetahi ê. Noa ˈtu na Petero i faataa eita te Atua e maitiiti i te taata, ua vai noa â maa toetoea i roto i to ˈna aau i hiˈo ê faahou ai oia ia vetahi ê i muri aˈe. (Gal. 2:11-14) No reira, e nafea tatou ia auraro i te faaueraa a Iesu ia faaea i te haava i te taata ia au i to ratou huru rapaeau?

6. (a) Eaha te tauturu mai ia haapae roa i te hiˈo ê i te taata? (b) Eaha ta te rata papaihia e te tahi matahiapo e faaite ra no nia ia ˈna?

⁶ No te ite e toetoea manaˈo hiˈo ê anei to roto i to tatou aau, e titauhia ia hiˈopoa i to tatou huru ia au i ta te Parau a te Atua e haapii ra. (Sal. 119:105) E nehenehe atoa e ani i te tahi hoa papu aita anei o ˈna i ite i te reira i nia ia tatou. (Gal. 2:11, 14) I te tahi taime, ua matau roa paha tatou i te faaite i tera huru ma te ore e haapao te na reira ra tatou! Tera tei tupu i nia i te tahi matahiapo. Ua papai oia i te hoê rata i te amaa no nia i te tahi na hoa faaipoipo itoito i roto i te taviniraa taime taatoa. No roto mai te tane i te hoê nunaa taata ta te rahiraa e faariro nei ei feia haihai. Mea rahi te mau parau maitai ta te taeae i papai no nia i te tane. I te pae hopea râ o ta ˈna rata, ua papai oia e noa ˈtu no roto mai te tane i te hoê nunaa ta te taata e faariro ei mea haihai, e tauturu to ˈna haerea e to ˈna huru oraraa ia vetahi ê ia taa, e ere te feia atoa o to ˈna nunaa i te mea repo e te haihai. Eaha te haapiiraa? Noa ˈtu e hopoia rahi ta tatou i roto i ta Iehova faanahonahoraa, mea tia ia hiˈopoa ia tatou iho e ia farii i te tauturu no te ite aita anei e toetoea manaˈo hiˈo ê i roto i to tatou aau. Eaha ˈtu â te nehenehe e tauturu mai?

7. E nafea ia haamahora ˈtu i to tatou aau?

⁷ Ia haamahora ˈtu tatou i to tatou aau, e rahi roa mai te here e aita e parahiraa faahou no te hiˈo-ê-raa. (Kor. 2, 6:11-13) Mea au anei na outou e faahoa i te feia anaˈe hoê â iri, nunaa aore ra reo e to outou? Mai te peu e e, e nehenehe atoa ïa outou e na reira e te tahi atu mau taata. Peneiaˈe, ma te poro na muri i te mau taeae e tuahine no te mau nunaa rau aore ra ma te titau manihini ia tamaa aore ra ia faaanaanatae e outou. (Ohi. 16:14, 15) E î roa mai to outou aau i te here, aita ˈtura e vahi e toe no te manaˈo hiˈo ê! I teie nei, e hiˈo anaˈe i te tahi atu tumu e haava ˈi paha tatou “ma te haapao i te huru rapaeau.”

8. Ia au i te Levitiko 19:15, e nafea te faufaa a te tahi taata e nehenehe ai e ohipa i nia i ta tatou huru hiˈoraa ia ˈna?

⁸ E nehenehe tatou e maitiiti i te taata ia au i ta ratou faufaa. Te na ô ra te Levitiko 19:15: “Eiaha outou e faatia i te parau-tia ore i te haavaraa; eiaha oe e tapoˈi i te taata rii, eiaha hoi e auraro atu i te taata rarahi; e haava outou i te  taata ma te parau-tia ra.” E nafea te faufaa a te tahi taata e nehenehe ai e ohipa i nia i ta tatou huru hiˈoraa ia ˈna?

9. Eaha te parau peapea ta Solomona i papai e eaha ta te reira e haapii mai ra?

⁹ Ua aratai te varua moˈa ia Solomona ia papai i teie parau peapea mau: “Te ririhia ra te taata haehaa e to ˈna ihora taua; e rave rahi râ tei ite i te feia taoˈa.” (Mas. 14:20) Eaha ta te reira e haapii mai ra? Ia ore tatou e haapao, e nehenehe tatou e faahoa noa i te mau taeae taoˈa rahi, eiaha râ i te mea veve. No te aha mea atâta ia haava e ia maitiiti i te taata ia au i ta ratou faufaa?

10. Eaha te faaararaa ta Iakobo i horoa i te mau Kerisetiano?

¹⁰ Ia maitiiti tatou i te mau taeae ia au i ta ratou faufaa, e faatupu te reira i te amahamaharaa i roto i te amuiraa. Tera tei tupu i roto i te tahi mau amuiraa i te senekele matamua e ua faaara Iakobo i tera mau Kerisetiano. (A taio i te Iakobo 2:1-4.) Eiaha roa e vaiiho ia tupu te amahamaharaa i roto i te amuiraa Kerisetiano! E nafea ˈtu â ia haapae roa i te haava e te maitiiti i te taata ia au i ta ratou faufaa?

11. E riro anei te hoê taata ei hoa no Iehova ia au i te faufaa e vai ra ia ˈna? A faataa.

¹¹ Mea tia ia hiˈo i to tatou mau taeae mai ia Iehova. Eita te Atua e haafaufaa aˈe i te tahi no te mea e taata taoˈa rahi aore ra veve oia. Eita tatou e riro ei hoa no Iehova ia au i te moni e te faufaa e vai ra ia tatou! Parau mau, ua parau Iesu  “mea fifi no te hoê taata taoˈa rahi ia ô i roto i te Faatereraa arii o te raˈi,” aita râ oia i parau eita roa e tia. (Mat. 19:23) Ua na ô atoa Iesu: “E oaoa outou te feia veve, no outou hoi te Faatereraa arii a te Atua.” (Luka 6:20) E ere râ te auraa e faaroo te feia veve atoa ia Iesu e e haamaitairaa taa ê ta ratou e fanaˈo. Mea rahi te feia veve o tei ore i riro ei pǐpǐ na Iesu. Eita roa ïa e nehenehe e parau e riro te hoê taata ei hoa no Iehova ia au i te faufaa e vai ra ia ˈna.

12. Eaha ta te Bibilia e parau ra i te feia taoˈa e tei veve?

¹² I roto i te nunaa o Iehova, te vai ra te mau taeae e tuahine taoˈa rahi e te vai ra te mea veve. Tera râ, te here ra ratou paatoa ia Iehova e te tavini atoa ra ia ˈna ma te aau atoa. Te parau ra te Bibilia i te feia taoˈa “ia tuu i to ratou tiaturiraa, eiaha i te mau taoˈa e pê, i te Atua râ.” (A taio i te Timoteo 1, 6:17-19.) Te faaara atoa ra te Parau a te Atua i te mau tavini atoa a Iehova, te mea taoˈa e te mea veve, e mea atâta te nounou moni. (Tim. 1, 6:9, 10) Ma te hiˈo i to tatou mau taeae mai ia Iehova, eita tatou e haava a maitiiti atu ai i te feia taoˈa aore ra veve. E ia maitiiti i te taata ia au i to ratou faito matahiti, e mea tano anei?

13. Eaha ta te Bibilia e haapii mai ra no nia i te faaturaraa i te feia paari?

¹³ Pinepine te Bibilia i te parau mea tia ia faatura i te feia paari. Te na ô ra te Levitiko 19:32: “E tia oe i nia i mua i te aro o te upoo teatea, e faatura oe i te taata tahito; e e mǎtaˈu hoi oe i to Atua.” Te parau ra te Maseli 16:31, “e korona hanahana te upoo hinahina, ia roohia ˈtu tei te eˈa parau-tia ra.” Ua parau Paulo ia Timoteo eiaha ia aˈo etaeta i te tane paari aˈe, ia faariro râ ia ratou mai te metua tane ra. (Tim. 1, 5:1, 2) Noa ˈtu e hopoia rahi aˈe ta Timoteo i ta te mau taeae paari, ua titauhia ia ˈna ia hamani maitai e ia faatura noa ia ratou.

14. I teihea taime e titauhia paha ia aˈo i te hoê o tei paari aˈe ia tatou?

¹⁴ Eaha te huru ia hara te tahi taata paari aˈe ia tatou ma te opuahia aore ra ia rave oia i te hoê peu au-ore-hia e te Atua? Eita o Iehova e aroha hamani maitai ia ˈna noa ˈtu e taata paari aˈe oia e te faaturahia. A tapao na i te manaˈo e matara mai ra i roto i te Isaia 65:20: “Te taata rave hara tei tae i te matahiti hoê hanere ra; e parauhia ïa, o te tuhihia [aore ra faainohia].” Hoê â atoa manaˈo te faaitehia ra i roto i te orama a Ezekiela. (Ezk. 9:5-7) Eaha te mea faufaa aˈe? Ia faatura ïa tatou i To te mau mahana tahito ra o Iehova. (Dan. 7:9, 10, 13, 14) No to tatou faatura ia Iehova, e noaa mai te itoito no te aˈo i te taata e hinaaro ra i te tauturu noa ˈtu eaha to ˈna faito matahiti.—Gal. 6:1.

15. Eaha te haapii mai i te hiˈoraa o te aposetolo Paulo no nia i te faaturaraa i te mau taeae apî aˈe ia tatou?

¹⁵ E mai te peu e e taeae apî, te auraa anei eita e titauhia ia faatura ia ˈna? Teie ta Paulo i papai ia Timoteo: “Eiaha roa ei taata e vahavaha i to apîraa. Tera râ, ia riro oe ei hiˈoraa no te feia faaroo, i te parau hoi, te haerea, te here, te faaroo e te vai-viivii-ore-raa.” (Tim. 1, 4:12) I te taime a papai ai Paulo i tera mau parau, e au ra e e 30 matahiti to Timoteo. Noa  ˈtu râ, ua horoa ˈtu Paulo i te mau hopoia faufaa roa ia Timoteo. Eaha te haapiiraa? Eiaha e haava i te taeae apî ia au i to ˈna faito matahiti! A feruri na i te mau ohipa atoa ta Iesu i rave i te 33raa o to ˈna matahiti!

16, 17. (a) E nafea te mau matahiapo ia faaoti e nehenehe te hoê taeae e riro ei tavini tauturu aore ra ei matahiapo? (b) E nafea to tatou iho manaˈo aore ra to te taata i to tatou fenua e patoi ai i ta te Bibilia e parau ra?

¹⁶ I roto i te tahi mau nunaa, eita te taata e faatura i te tane apî. No tera tumu, eita vetahi matahiapo e hinaaro e faatoroa i te hoê taeae apî ei tavini tauturu aore ra ei matahiapo noa ˈtu te faaî ra oia i te mau titauraa. Aita roa te Bibilia e parau ra e titauhia te hoê faito matahiti taa maitai no te riro ei tavini tauturu aore ra ei matahiapo! (Tim. 1, 3:1-10, 12, 13; Tito 1:5-9) Mai te peu e e haafaufaa aˈe te hoê matahiapo i te peu matauhia i to ˈna fenua, aita oia e pee ra i te Parau a te Atua. Mea tia i te mau matahiapo ia haava i te mau taeae apî ia au i te mau ture aveia i roto i te Parau a te Atua, eiaha râ ia au i to ratou iho manaˈo e te peu a to ratou nunaa.—Tim. 2, 3:16, 17.

¹⁷ Ia ore te mau matahiapo e pee i te mau ture aveia Bibilia, te tapea ra ratou i te faatoroaraa o te mau taeae e faaî ra i te mau titauraa. I te tahi fenua, ua amo maitai te hoê tavini tauturu i te mau hopoia faufaa i horoahia ˈtu. Ua hoê te mau matahiapo no te parau te faaî ra oia i te mau titauraa no te riro ei matahiapo. Tera râ, no to ˈna apî, ua manaˈo vetahi matahiapo paari aˈe eiaha e faatoroa ia ˈna ei matahiapo. Mea peapea mau ia ite ua haavahia te taeae ia au i to ˈna huru rapaeau! E peu matauhia te reira na te ao nei. Mea faufaa roa ïa ia turui i nia i te Bibilia, eiaha râ i nia i to tatou iho manaˈo aore ra te peu i to tatou fenua. I reira tatou e auraro ai i te faaueraa a Iesu ia faaea i te haava ma te haapao i te huru rapaeau.

18, 19. Eaha te tauturu mai ia hiˈo i to tatou mau taeae mai ia Iehova?

¹⁸ E taata hara tatou, e nehenehe râ tatou e hiˈo ia vetahi ê mai ia Iehova ma te ore e faatupu i te manaˈo hiˈo ê. (Ohi. 10:34, 35) Mea tia ïa ia haapao noa i te mau aˈoraa i roto i te Parau a te Atua. I reira tatou e auraro ai i te faaueraa a Iesu ia “faaea i te haava ma te haapao i te huru rapaeau.”—Ioa. 7:24.

¹⁹ Fatata to tatou Arii ra o Iesu Mesia i te haava i te taata atoa. E haava o ˈna ia au i te mau ture aveia tia a te Atua, eiaha râ ia au i ta to ˈna mata e ite e i ta to ˈna tariˈa e faaroo. (Isa. 11:3, 4) Te tiai ru mau nei tatou i tera taime faahiahia!