1, 2. (a) Eaha te titauhia ia tatou ia ite e no te aha mea faufaa? (b) Eaha ta tatou e hiˈo mai i roto i teie haapiiraa?

 E HINAARO tatou paatoa e ite e nafea ia hiˈopoa maitai i te hoê parau e ia papu e parau mau te reira. (Mas. 3:21-23; 8:4, 5) Ia ore, e haafariu ê hanoa o Satani e ta ˈna ao i to tatou feruriraa. (Eph. 5:6; Kol. 2:8) No te papu e parau mau tei faaitehia mai, mea tia ia ite i te tupuraa mau. Te na ô ra te Maseli 18:13: “O tei parau vave mai aitâ i faaitehia ˈtu, ua faaite oia e maamaa to ˈna, e au ia ˈna te vahavaha.”

² I roto i teie haapiiraa, e hiˈo mai tatou no te aha mea fifi ia ite i te tupuraa mau e ia papu e parau mau te reira. E faaite atoa teie haapiiraa i te mau faaueraa tumu e hiˈoraa o te tauturu mai ia hiˈopoa maite i te hoê tupuraa.

3. No te aha e titauhia ia haapao i te faaueraa i roto i te Maseli 14:15? (A hiˈo i te hohoˈa matamua.)

³ I teie mahana, mea rahi te poroi e haapararehia nei na roto i te Internet, te afata teata e te tahi atu mau ravea apî. E faatia mai paha te hoa i te aamu e e hapono mai i te reira  na roto i te Internet e te vini. I te tahi taime, eita e hope ia taio i te mau poroi atoa. E titauhia ïa ia haapao maitai! Noa ˈtu e manaˈo maitai to te mau hoa, mea rahi râ te taata o te haaparare ra i te parau haavare e te taviri ra i te mau tupuraa. Eaha te faaueraa tumu e tauturu mai ia hiˈopoa maitai i te poroi e tae mai ia tatou ra? Te na ô ra te Maseli 14:15: “Te faaroo ra te ite ore i te mau parau atoa ra; te hiˈo maitai ra râ te taata haapao ra i to ˈna taahiraa.”

4. E nafea te Philipi 4:8, 9 e tauturu mai ai ia maiti i ta tatou e taio? No te aha mea faufaa ia hiˈopoa mea mau anei te tupuraa i faaitehia mai? (A hiˈo atoa i te tumu parau “ Ravea no te ite i te mau tupuraa papu.”)

⁴ No te rave i te faaotiraa maitai, mea faufaa ia ite mea mau te tupuraa i faaitehia mai. Mea tia ïa ia haapao maitai i ta tatou e maiti i te taio. (A taio i te Philipi 4:8, 9.) Eiaha to tatou taime ia mâuˈa i te hiˈo i te mau reni Internet e te taio i te mau rata e haaparare i te mau parau papu ore. Mea faufaa roa ˈtu â eiaha ia hiˈo i te mau reni i reira te mau apotata e faaite haere ai i to ratou mau manaˈo. Te hinaaro ra hoi taua feia ra e haaparuparu i te faaroo o te nunaa o te Atua e e taviri i te parau mau. E ere anaˈe te tupuraa i te mea papu, e faaotiraa ino te ravehia. Eiaha roa e manaˈo eita tatou e fifihia i te hoê poroi papu ore.—Tim. 1, 6:20, 21.

5. Eaha te faatiaraa hape i faaitehia i te mau Iseraela e mea nafea ratou i te fifiraahia?

⁵ E nehenehe atoa te fifi e tupu no te mau faatiaraa hape. I te tau o Mose, ua tonohia 12 taata no te hiˈo haere i te Fenua tǎpǔhia. Hoê ahuru o ratou tei faatia i te mau parau hape. (Num. 13:25-33) Ua faarahi roa ratou i ta ratou mau parau, mǎtaˈu e toaruaru atura te nunaa o Iehova. (Num. 14:1-4) Ua tiaturi te nunaa mea mau ta ratou faatiaraa. Peneiaˈe no te mea ahuru o ratou tei faatia i te hoê â parau. Aita ˈtura te nunaa i hinaaro e faaroo i te faatiaraa a na taata e piti e toe ra. (Num. 14:6-10) Aita te nunaa i hiˈopoa i te tupuraa mau, paruparu atura to ratou faaroo ia Iehova e faaoti ihora i te tiaturi i te faatiaraa hape. Auê te maamaa e!

6. No te aha eita tatou e maere a faaroo ai i te mau parau huru ê no nia i te mau Ite no Iehova?

⁶ E titauhia ia haapao maitai ia faaroo tatou i te hoê faatiaraa no nia i te mau Ite no Iehova. A haamanaˈo i to tatou enemi ra o Satani “tei pari i to tatou mau taeae.” (Apo. 12:10) Ua faaara mai Iesu a na ô ai oia, e “pari haavare te  taata ia outou i te mau mea ino atoa.” (Mat. 5:11) Ia haapao maite tatou i tera faaararaa, eita tatou e maere ia faaroo tatou i te mau parau huru ê no nia i te mau Ite no Iehova.

7. Eaha te tia ia ui ia tatou iho hou a hapono ai i te poroi na roto i te Internet e te vini?

⁷ Mea au anei na oe e hapono i te poroi na roto i te Internet e te vini i te mau hoa? Ia ite oe i te tahi faatiaraa anaanatae mau aore ra taa ê, e hinaaro anei oe e ahu mai i te pereue o te papai vea ma te haaparare oioi i te reira? Hou a hapono ai i te poroi, a ui ia oe iho, ‘Mea mau anei teie faatiaraa? Te vai ra anei te haapapuraa tera iho â tei tupu?’ Aita anaˈe oe i papu, e parau haavare paha ta oe e haaparare. No reira, e ere anaˈe i te mea papu e tupuraa mau te reira, eiaha e hapono ia vetahi ê. A tumâ roa ˈtu i tera poroi!

8. Eaha ta te tahi o to tatou mau enemi i rave i te tahi mau fenua e e nafea tatou e turu ai ia ratou ma te opua ore?

⁸ Te vai ra te tahi atu tumu e mea atâta ia hapono i te poroi ma te feruri ore. I te tahi mau fenua, ua faaturehia aore ra ua opanihia ta tatou ohipa. E haaparare paha to tatou mau enemi i te mau parau ia mǎtaˈu tatou aore ra ia manaˈo ino te tahi i te tahi. A hiˈo na i tei tupu i raro aˈe i te faatereraa Rusia tahito. Ua faatia ta ratou mau mutoi huna i te mau parau haavare no nia i te tahi mau taeae matau-maitai-hia, mai te huru ra e ua taiva ratou ia Iehova. * Mea rahi te mau taeae o tei tiaturi i tera mau faatiaraa hape e faarue atura i te faanahonahoraa a Iehova. Ua hoˈi mai vetahi i roto i te  parau mau, area te tahi atu aita roa. Ua vaiiho ratou i tera mau parau haavare ia tuino i to ratou faaroo. (Tim. 1, 1:19) E nafea ia ore ia topa i roto i tera herepata? Eiaha e haaparare i te parau haavare e te papu ore. Eiaha e tiaturi i te mau parau atoa, a hiˈopoa maitai râ mea mau te tupuraa i faaitehia ˈtu.

9. Eaha te tahi atu tumu e ere i te mea ohie ia papu mea mau te hoê faatiaraa?

⁹ I te tahi taime, e faaroo tatou i te tahi faatiaraa, hoê anaˈe râ tuhaa te mea mau. I te tahi atu taime, eita te taatoaraa o te ohipa i tupu e faatiahia. E ere atura i te mea ohie ia papu e parau mau te reira. Eita roa e nehenehe e tiaturi i te hoê faatiaraa mai te peu hoê anaˈe tuhaa te mea mau! Eaha ïa te rave ia ore tatou ia haavarehia e tera mau huru faatiaraa?—Eph. 4:14.

10. No te aha te tahi mau Iseraela i fatata ˈi i te aro i to ratou mau taeae? Auaa râ, eaha ta ratou i rave na mua ˈˈe?

¹⁰ E haapiiraa ta tatou e huti mai i tei tupu i rotopu i te mau Iseraela tei parahi i te pae tooa o te râ o Ioridana i te tau o Iosua. (Ios. 22:9-34) Ua faaroo ratou ua patu te mau Iseraela e parahi ra i te pae hitia o te râ o Ioridana i te hoê fata rahi piri atu i te anavai. E parau mau te reira, aita râ te taatoaraa o te tupuraa i faaitehia ia ratou. Manaˈo atura to te pae tooa o te râ ua taiva to ratou mau taeae ia Iehova e opua aˈera ratou e aro i to te pae hitia o te râ. (A taio i te Iosua 22:9-12.) Hou râ a haere ai e aro, ua tono te mau Iseraela o te pae tooa o te râ i te tahi mau taata no te ite i te tupuraa mau. Mea na reira to ratou taaraa aita to te pae hitia o te râ i hamani i te fata no te haamori i te mau atua hape. Ua na reira râ ei haamanaˈoraa i te taata atoa o Iehova ta ratou i haamori. Eita e ore, ua topa roa te hau o te mau Iseraela i te iteraa eita ratou e aro i to ratou mau taeae. Auaa ratou i imi maite i te tupuraa mau.

11. (a) Eaha te ohipa tia ore i ravehia i nia ia Mephiboseta? (b) Eaha ta Davida i nehenehe e rave no te ape i te reira?

¹¹ I te tahi taime, e mauiui paha tatou ia faatia vetahi i te parau no nia ia tatou, aita râ te tupuraa atoa i faaitehia. Tera tei tupu i nia ia Mephiboseta. Ma te hamani maitai, ua horoa ˈtu te arii Davida na ˈna i te mau fenua atoa fatuhia e to ˈna papa ruau ra o Saula. (Sam. 2, 9:6, 7) I muri aˈe, ua faaroo Davida e ohipa ino ta Mephiboseta i rave. Aita râ oia i imi maite i te tupuraa mau e faaere ihora ia ˈna i ta ˈna mau faufaa atoa. (Sam. 2, 16:1-4) I to Davida paraparauraa ia Mephiboseta, taa aˈera ia ˈna i to ˈna hape e faahoˈi atura i te tahi tuhaa o ta Mephiboseta faufaa. (Sam. 2, 19:24-29) Ua hape Davida i te haa-oioi-raa. Ahani oia i rave i te taime no te imi maite i te tupuraa mau, eita ïa te ohipa tia ore e ravehia i nia ia Mephiboseta.

12, 13. (a) Eaha ta Iesu i rave a faatia ˈi te taata i te parau haavare no nia ia ˈna? (b) E nafea tatou ia faatia te taata i te parau haavare no nia ia tatou?

¹² Eaha te rave ia haaparare te tahi i te parau haavare no nia ia tatou? Ua farerei Iesu e Ioane Bapetizo i tera tupuraa. (A taio i te Mataio 11:18, 19.) Eaha ta Iesu i rave? Aita oia i haamâuˈa i to ˈna  taime e puai no te faaafaro i te parau hape atoa i faatiahia no nia ia ˈna. Ua faaitoito râ oia i te taata ia imi i te haapapuraa e parau mau anei. Ua hinaaro Iesu ia tiatonu te taata i nia i ta ˈna i rave e i haapii. Ua na ô hoi oia: “Na te mau ohipa parau-tia ta te hoê taata e rave e haapapu e e taata paari oia.”—Mat. 11:19.

¹³ I te tahi taime, e faatia te taata i te parau tano ore aore ra hape no nia ia tatou e e haapeapea tatou no to tatou roo. E itehia râ te parau mau na nia i to tatou huru oraraa. Mai ia Iesu, na to tatou haerea maitai e haapapu mea hape te mau pariraa a te taata.

14, 15. No te aha eiaha tatou ia tiaturi i to tatou iho ite?

¹⁴ E ere iho â i te mea ohie ia ite i te tupuraa mau o te tahi ohipa. Te tahi atu tumu, o to tatou ïa huru tia ore. Peneiaˈe, mea maoro tatou i te taviniraa ia Iehova e ua noaa mai te tahi faito paari. E faatura mai paha te taata no to tatou aravihi ia feruri maite. E nehenehe anei râ te reira e riro ei fifi?

¹⁵ E. E turai mai te reira ia tiaturi i to tatou iho ite a vaiiho atu ai i to tatou mau huru aau e manaˈo ia faatere i to tatou feruriraa. Te mea atâta ˈtu â, e tae roa paha tatou i te tiaturi aita e faufaa ia ite i te taatoaraa o te tupuraa. Te faaara papu mai ra te Bibilia eiaha ia tiaturi ia tatou aore ra i to tatou iho ite!—Mas. 3:5, 6; 28:26.

16. I roto i teie tupuraa, eaha ta Teva i ite a haere ai i te fare tamaaraa e eaha ta ˈna i manaˈo?

¹⁶ A feruri na i teie tupuraa: Mea maoro o taeae Teva i te taviniraa ei matahiapo. I te hoê po, ua haere oia i te fare tamaaraa e ite ihora ia Ioane, te tahi atu matahiapo, e parahi ra e te hoê vahine, e ere i to ˈna hoa faaipoipo. Te oaoa  maitai ra raua, te ataata ra e te tauahi ra te tahi i te tahi. Haapeapea aˈera Teva e feruri ihora, ‘E faataa anei Ioane i ta ˈna vahine faaipoipo? E ta raua ïa tamarii?’ Ua ite aˈenei hoi Teva i te tupuraa mai tera te huru. Eaha to oe huru ahani o oe o Teva?

17. Eaha ta Teva i ite i muri aˈe e eaha te haapiiraa e huti mai i teie tupuraa?

¹⁷ Heru na râ. Noa ˈtu ua manaˈo Teva ua taiva Ioane i ta ˈna vahine, ua ite anei oia i te tupuraa mau? I tera po, ua niuniu Teva ia Ioane, ite aˈera oia, te vahine ta ˈna i ite, o te tuahine ïa o Ioane. Mea maoro, a tahi ra raua Ioane e farerei faahou ai. Tau hora noa oia i te faaearaa mai, maa taime noa ïa no te tamaa e o Ioane, aita râ ta ˈna vahine i vata i tera taime. Auê Teva i te oaoa aita o ˈna i faatia i te parau! Eaha te haapiiraa e huti mai? Noa ˈtu mea maoro tatou i te taviniraa ia Iehova, e titau-noa-hia â ia imi maite i te tupuraa mau hou a faahiti ai i te hoê parau.

18. Eaha te nehenehe e turai mai ia tiaturi i te tahi parau hape no nia i to tatou taeae?

¹⁸ E ere atoa i te mea ohie ia hiˈopoa maitai i te tahi tupuraa mai te peu aita tatou e afaro ra e te tahi taeae. Ma te faaau ia tatou i te tahi atu, e haamata paha tatou i te manaˈo ino i to tatou taeae. E ia faaroo tatou i te tahi parau no nia ia ˈna, e hinaaro tatou e tiaturi i te reira noa ˈtu aita e haapapuraa e mea mau tei parauhia mai. Eaha te haapiiraa? Ia haamata tatou i te manaˈo ino i to tatou mau taeae, e nehenehe te reira e turai mai ia faahiti i te parau hape. (Tim. 1, 6:4, 5) Eiaha ïa e vaiiho i te manaˈo ino mai te feii e te pohehae i roto i to tatou aau. A haamanaˈo, te ani mai ra o Iehova ia here i to tatou mau taeae e ia faaore i ta ratou hapa ma te aau tae.—A taio i te Kolosa 3:12-14.

19, 20. (a) Eaha te mau faaueraa tumu Bibilia o te tauturu mai ia hiˈopoa maitai i te hoê parau? (b) Eaha ta tatou e hiˈopoa i to mua ˈtu haapiiraa?

¹⁹ I teie mahana, e ere roa ˈtu i te mea ohie ia hiˈopoa maitai i te hoê parau e ia papu e parau mau te reira. Eaha te tumu? Mea pinepine, eita te taatoaraa o te tupuraa e faaitehia aore ra hoê noa tuhaa o te reira te mea mau. Hau atu â, mea tia ore tatou paatoa. E haapao anaˈe ïa i te mau faaueraa tumu i roto i te Parau a te Atua. A tahi, te parau ra te Bibilia mea maamaa ia faahiti i te parau hou a ite ai i te tupuraa mau. (Mas. 18:13) Te piti, eiaha e tiaturi hanoa i te mau parau atoa, a imi na mua i te haapapuraa e parau mau anei. (Mas. 14:15) Te toru, eiaha e tiaturi i to tatou iho manaˈo noa ˈtu mea maoro tatou i te taviniraa ia Iehova. (Mas. 3:5, 6) E tauturu mai te mau faaueraa tumu Bibilia ia hiˈopoa maitai i te hoê parau, ia imi maite i te tupuraa mau e ia rave i te faaotiraa maitai.

²⁰ Te vai ra te tahi atu tumu e mea fifi ia ite i te tupuraa mau o te tahi ohipa. Ei taata, e haava oioi tatou ia au i ta to tatou mata e ite. I roto i to mua ˈtu haapiiraa, e hiˈopoa mai tatou i roto i teihea tuhaa e hape oioi ai tatou i te haava ia vetahi ê e eaha te rave no te ape i te reira.