1. Eaha ta tatou mau ravea no te ohipa e o Iehova?

 MAI te omuaraa mai â, ua hinaaro Iehova ia riro te taata atoa ei hoa ohipa no ˈna. Noa ˈtu e mea tia ore te taata i teie mahana, e nehenehe te feia haapao maitai e ohipa e o Iehova i tera e tera mahana. ‘E hoa ohipa tatou no te Atua’ a poro ai i te parau apî oaoa o ta ˈna Faatereraa arii e a faariro ai i te taata ei pǐpǐ. (Kor. 1, 3:5-9) Auê fanaˈoraa taa ê i te maitiraa mai te Atua poiete ia tatou no te rave i te hoê ohipa faufaa mau! E ere râ te pororaa anaˈe te ravea no te ohipa e o Iehova. I roto i teie haapiiraa, e hiˈo mai tatou e nehenehe atoa tatou e na reira ma te tauturu i to tatou utuafare e te amuiraa, ma te farii maitai i te taata, ma te turu i te mau opuaraa a te faanahonahoraa na te ao e ma te haa rahi atu â i roto i te taviniraa.—Kol. 3:23.

2. Eaha te tumu eiaha e faaau i ta tatou e rave ra no Iehova i ta te tahi atu e rave ra?

² A nuu ai tatou i roto i teie haapiiraa, mea faufaa ia haamanaˈo noa e mea taa ê te taata atoa. E ere hoê â faito matahiti, ea, tupuraa e aravihi to tatou paatoa. Eiaha ïa e faaau i ta outou e rave ra no Iehova i ta te tahi atu e rave ra. Ua parau te aposetolo Paulo: “Ia hiˈopoa te taata tataitahi  i ta ˈna iho ohipa, e na reira hoi oia e oaoa ˈi ia ˈna iho, eiaha râ no te mea ua faaau o ˈna ia ˈna i te tahi atu.”—Gal. 6:4.

3. No te aha mea tano ia parau, te feia atoa e aupuru i to ratou utuafare, te ohipa ra ïa e te Atua?

³ Te titau mai ra Iehova ia aupuru i to tatou utuafare. E tutava paha outou ia noaa mai te moni no te mau hinaaro o te utuafare. E rave rahi metua vahine o tei titauhia ia faaea i te fare no te haapao i ta ratou tamarii. E ia ore to tatou metua e nehenehe faahou e haapao ia ratou iho, na tatou ïa e aupuru atu. Mea titauhia ia amo i tera mau hopoia. Te na ô ra te Bibilia: “Ia ore hoi te tahi ia aupuru i to ˈna iho, i te mau mero iho â râ o to ˈna utuafare, ua ere oia i te faaroo e ua hau aˈe to ˈna ino i to te taata aita e faaroo to ˈna.” (Tim. 1, 5:8) E hinaaro paha outou e rave atu â no Iehova, no te mau hopoia râ i te utuafare, eita e nehenehe. Eiaha râ e haaparuparu! Te mauruuru ra o Iehova ia aupuru outou i to outou utuafare.—Kor. 1, 10:31.

4. E nafea te mau metua e tuu ai i te Faatereraa arii na mua roa e eaha ta ratou haamaitairaa?

⁴ E ohipa te mau metua Kerisetiano e o Iehova ma te tauturu i ta ratou tamarii ia haamau i te fa i roto i te taviniraa a Iehova. E mea rahi te metua o tei na reira. I muri mai, ua faaoti ta ratou tamarii, tamaroa e tamahine, e tavini ma te taime taatoa noa ˈtu e titauhia ia haere i te vahi atea. Te tavini ra vetahi ei mitionare aore ra ei pionie i te vahi hinaaro-rahi-hia te feia poro, e te tahi atu ei mero ïa o te utuafare o te Betela. Tei te vahi atea anaˈe te tamarii, eita te mau metua e ite pinepine faahou ia ratou. Ma te ore râ e haapao noa ia ratou, e faaitoito te metua i te tamarii ia tamau i te tavini ia Iehova noa ˈtu teihea ratou. Eaha te tumu? Te oaoa nei hoi ratou ia tuu ta ratou tamarii ia Iehova i te parahiraa matamua. (Ioa. 3, 4) Mea rahi o ratou tei au ia Hana o tei parau, ua “horoa” o ˈna ia Samuela ia Iehova ra. E haamaitairaa taa ê e e ravea tera no te metua no te ohipa e o Iehova.—Sam. 1, 1:28.

5. E nafea ia tauturu i te mau taeae e tuahine o ta outou amuiraa? (A hiˈo i te hohoˈa matamua.)

⁵ Aita anaˈe e hopoia ru ta outou i te utuafare, e nehenehe paha ïa e tauturu i te mau taeae e tuahine maˈimaˈi, ruhiruhia aore ra e hinaaro taa ê to ratou. Aore ra, e nehenehe paha e tauturu i te taata haapao. A imi i roto i te amuiraa o vai ma te hinaaro i taua tauturu ra. Peneiaˈe, te hoê tuahine o te aupuru ra i to ˈna metua ruhiruhia. E tia anei ia outou ia faaherehere maa taime no te faaea e to ˈna metua ia nehenehe o ˈna e haapao i te tahi atu ohipa faufaa? E nehenehe paha e faahoro ia ˈna i te mau putuputuraa, i te fare toa aore ra no te farerei i te hoa i te fare maˈi. Ma te na reira, te ohipa ra paha outou e o Iehova ei pahonoraa i te hoê pure.—A taio i te Korinetia 1, 10:24.

6. E nafea ia farii maitai i te taata?

⁶ E feia farii maitai i te taata te mau  hoa ohipa o te Atua. I roto i te Bibilia, “hamani maitai i te mau taata ěê” te auraa o te taˈo Heleni i hurihia “farii maitai.” (Heb. 13:2; nota) Mea rahi te mau hiˈoraa Bibilia o te haapii mai ra e nafea ia hamani maitai ia vetahi ê. (Gen. 18:1-5) E nehenehe e e tia ia tatou paatoa ia tauturu i te taata i te mau taime atoa, e “taeae e tuahine i roto i te faaroo” anei aore ra aita.—Gal. 6:10.

7. Eaha te mau maitai e noaa mai ia farii maitai i te mau Kerisetiano i roto i te taviniraa taime taatoa?

⁷ E ohipa tatou e o Iehova ma te farii maitai atoa i te mau Kerisetiano i roto i te taviniraa taime taatoa e imi ra i te nohoraa. (A taio i te Ioane 3, 5, 8.) A na reira ˈi, e maitaihia ratou, o tatou atoa râ! Te parau ra te Bibilia, e nehenehe tatou e faaitoito te tahi i te tahi. (Roma 1:11, 12) A hiˈo na ia Olaf. I to ˈna apîraa, e taeae faaea taa noa te tiaau haaati tei haere atu i ta ratou amuiraa. Ua hinaaro oia i te hoê nohoraa, aita râ i tia i te amuiraa ia tauturu atu. Ua ani Olaf i to ˈna na metua e ere i te Ite no Iehova, e nehenehe anei e farii i te tiaau haaati i to ratou fare. Ua farii raua, e titauhia râ ia Olaf ia taoto i nia i te tofa. Tera iho â ta Olaf i rave e aita oia i tatarahapa! Ua riro mau ei hebedoma faahiahia e te tiaau haaati! E ara poipoi raua i te mau mahana atoa a tauaparau atu ai no nia e rave rahi tumu parau anaanatae mau i te taime taoferaa. Ua faaitoito rahi mau te tiaau haaati ia Olaf i faaoti roa ˈi oia i te tavini ia Iehova ma te taime taatoa. Ua tavini Olaf ei mitionare i te mau fenua e rave rau e 40 matahiti te maoro.

8. No te aha e tia ia hamani maitai ia vetahi ê noa ˈtu eita ratou e faaite oioi i te mauruuru? A horoa i te hiˈoraa.

⁸ E rave rahi ravea no te faaite i te here i te feia ěê noa ˈtu eita ratou e faaite oioi i te mauruuru. A hiˈo na i te tahi tuahine i Paniora o te haapii ra i te Bibilia ia Yesica no Équateur mai. I te hoê mahana, ua taˈi noa Yesica a faaterehia ˈi ta ˈna haapiiraa. Ani aˈera te tuahine eaha te tumu o ˈna e taˈi ai. Faaite maira Yesica, e vahine veve roa oia na mua ˈˈe. I te hoê mahana, aita ta ˈna e maa no te horoa i ta ˈna tamahine, e pape anaˈe râ. Ua ani Yesica i te tauturu na roto i te pure a tamata noa ˈi i te faataoto i ta ˈna aiû. Haere mai nei e piti Ite no Iehova e horoa ˈtura i te hoê vea na ˈna. Ua tuhi râ oia ia raua e pahae ihora i te vea ma te parau: “Eaha, e paia anei ta ˈu tamahine i teie vea?” Ua tamata na tuahine i te tamǎrû ia ˈna, aita râ Yesica i hinaaro e faaroo ia raua. I muri aˈe, ua afai na tuahine i te hoê afata î i te maa i to ˈna pae opani. Te taˈi ra ïa Yesica no te mea ua taa ia ˈna i teie nei aita o ˈna i haapao i te pahonoraa a te Atua i ta ˈna pure. Ua faaoti papu râ Yesica i te tavini ia Iehova. E maitai ïa tei itehia a faaite ai na tuahine i te aau horoa noa.—Koh. 11:1, 6.

9, 10. (a) Mea nafea to te mau Iseraela tautururaa ma te aau tae? (b) E nafea te mau taeae e tauturu ai i te amuiraa i teie mahana?

⁹ I tahito ra, mea rahi ta te mau Iseraela i rave no te tauturu ma te aau tae. (Exo. 36:2; Par. 1, 29:5; Neh. 11:2) I teie mahana, mea rahi atoa ta tatou e nehenehe e rave no te horoa noa i to tatou taime, ta tatou faufaa e to tatou aravihi no te tauturu i te mau taeae e tuahine. Ma te na reira, e oaoa mau tatou e e haamaitai mai Iehova.

¹⁰ Te faaitoito ra te Parau a te Atua i te mau taeae i roto i te amuiraa ia ohipa e o Iehova ei tavini tauturu e ei matahiapo. (Tim. 1, 3:1, 8, 9; Pet. 1, 5:2, 3) E hinaaro tera mau taeae e horoa i te tauturu tano e e turu ia vetahi ê i roto i ta ratou taviniraa i te Atua. (Ohi. 6:1-4) Ua ani anei te mau matahiapo ia outou ia farii maitai i te taata, ia haapao i te vairaa papai, i te mau tuhaa fenua, i te atuaturaa i te Piha a te Basileia aore ra i te tahi atu ohipa? Ua oaoa roa te mau taeae o tei farii na i tera mau hopoia.

11. Eaha te mau maitai i itehia e te tahi tuahine i turu i te ohipa paturaa?

¹¹ E pinepine te feia i turu i te mau paturaa i te haamatau i te hoa apî. Ua turu te tuahine Margie i te ohipa paturaa o te mau Piha a te Basileia 18 matahiti te maoro. I tera mau taime, e haafatata ˈtu oia i te mau tuahine apî no te haapiipii ia ratou i te ohipa. Te faaite ra oia ua riro te reira ei ravea maitai roa no te mau rima tauturu ia faaitoito te tahi i te tahi. (Roma 1:12) Ia farerei o ˈna i te fifi, na te mau hoa ta ˈna i haamatau i te mau paturaa i faaitoito ia ˈna. Ua pûpû aˈenei outou ia outou no te turu i te tahi paturaa? E nehenehe outou e apiti i te reira noa ˈtu aita to outou e aravihi taa ê i te pae o te paturaa.

12. E nafea ia hopoi i te tauturu i muri aˈe i te hoê ati?

 ¹² E nehenehe tatou e ohipa e o Iehova ma te tauturu i te mau taeae e tuahine i muri aˈe i te hoê ati. Peneiaˈe, ma te horoa ˈtu i te moni. (Ioa. 13:34, 35; Ohi. 11:27-30) Aore ra ma te turu i te ohipa tamâraa e tataîraa. A hiˈo na i te tahi tuahine no Poronia o Gabriela te iˈoa. Ua ino roa to ˈna fare i te vai pue, ua oaoa roa râ oia i te iteraa ua haere mai te mau taeae no te mau amuiraa tapiri e tauturu ia ˈna. Ma te haamanaˈo i tei tupu, te faaite ra Gabriela aita o ˈna i haapeapea i te ereraa i ta ˈna mau faufaa. Ua tapea mai râ oia i ta ˈna i fanaˈo i roto i tera ati. Te na ô ra oia: “Ua haamanaˈo mai tera tupuraa e mea fanaˈo tatou ei mero o te amuiraa Kerisetiano. E tumu atoa e oaoa e e mauruuru mau ai tatou.” Mea rahi atoa tei na reira i te parau i te fanaˈoraa ratou i te tauturu i muri aˈe i te ati. Ua oaoa e ua mauruuru mau te mau taeae i hopoi atu i te tauturu i te ohiparaa e o Iehova.—A taio i te Ohipa 20:35; Korinetia 2, 9:6, 7.

13. E nafea to tatou here ia Iehova e puai ai ia tauturu tatou ia vetahi ê? A horoa i te hiˈoraa.

¹³ Ua ohipa atoa te tuahine Stephanie e te tahi atu mau taata poro e te Atua. Mea nafea? Ma te tauturu i te mau Ite no Iehova tei horo i Marite no te tamaˈi e tupu ra i to ratou fenua. Ua tauturu ratou ia noaa i tera mau taeae te nohoraa e te tahi atu mau taihaa fare. Te na ô ra Stephanie: “Ua putapû roa matou i to ratou mauruuru e oaoa no te here taeae i faaitehia i nia ia ratou. No tera mau utuafare, o matou tei tauturu atu. Te tanoraa mau râ, o ratou tei tauturu rahi mai ia matou. I mua i to ratou here, hoê, faaroo e tiaturi ia Iehova, ua puai-mau-hia to matou here ia Iehova. Ua turai mai te reira ia mauruuru atu â i te mau mea atoa ta tatou e fanaˈo na roto i ta ˈna faanahonahoraa.”

14, 15. (a) Eaha te huru feruriraa ta te peropheta Isaia i faatupu? (b) E nafea te mau Kerisetiano ia pee i te haerea o Isaia?

¹⁴ E hinaaro anei outou e ohipa ˈtu â e o Iehova? Ua ineine anei outou i te haere i te vahi e hinaaro-rahi-hia te feia poro? Parau mau, eita e titauhia ia tere i te vahi atea no te riro ei taata horoa noa. Ua na reira râ te tahi mau taeae e tuahine. Ua faatupu ratou i te hoê â huru feruriraa e to te peropheta Isaia. I to Iehova aniraa, “O vai ta ˈu e tono; o vai te haere no tatou?” Na ô ihora Isaia:  “Inaha, teie au; o vau ta oe e tono.” (Isa. 6:8, 9) E nehenehe e e farii anei outou i te turu i te faanahonahoraa a Iehova? Eaha te tahi mau ravea no te na reira?

¹⁵ No te ohipa pororaa e faariroraa i te taata ei pǐpǐ, ua na ô Iesu: “Te rahi mau nei te auhune, mea iti râ te rave ohipa. A taparu ïa i te Fatu o te auhune ia tono mai i te rave ohipa no te ootiraa.” (Mat. 9:37, 38) E nehenehe anei outou e tavini ei pionie i te vahi e hinaaro-rahi-hia te feia poro? Aore ra, e tia anei ia tauturu i te tahi atu ia na reira? No te faaite i to ratou here ia Iehova e i to ratou taata tupu, mea rahi te taeae e tuahine o te manaˈo nei e ravea maitai roa ia tavini ei pionie i te vahi hinaaro-rahi-hia te feia poro. E ravea ê anei ta outou no te haa rahi atu â i roto i te taviniraa? Mai te peu e e, a haa ïa, eita roa outou e tatarahapa, e oaoa roa râ!

16, 17. Eaha te tahi atu mau ravea no te tavini rahi atu â ia Iehova?

¹⁶ E farii anei outou i te tavini i te Betela aore ra i te turu i te ohipa paturaa? E nehenehe e na reira no te hoê area taime aore ra tau mahana i te hebedoma. E hinaaro tamau te faanahonahoraa a Iehova i te feia o tei ineine i te tavini i te mau vahi atoa ma te ore e maitiiti i te ohipa noa ˈtu e aravihi taa ê to ratou i roto i te tahi atu tuhaa. Mea faufaa no Iehova te feia atoa o te rave i te mau haapaeraa no te tavini i te vahi e hinaarohia te tauturu.—Sal. 110:3.

¹⁷ E hinaaro anei outou e faaaravihi ia outou no te tavini rahi atu â ia Iehova? No te aha e ore ai e tapao ia outou i te Haapiiraa no te feia poro i te parau apî oaoa o te Basileia? I tera haapiiraa, e tauturuhia te mau taeae e tuahine feruriraa paari e tavini ra ma te taime taatoa ia vaiiho i te faanahonahoraa ia faaohipa ˈtu â ia ratou. E titauhia ia ratou ia farii i te tavini i te vahi e tonohia ˈi ratou. E farii anei outou i te rave rahi atu â i roto i te taviniraa na roto i tera ravea?—Kor. 1, 9:23.

18. Eaha te mau maitai e noaa mai ia ohipa e o Iehova i tera e tera mahana?

¹⁸ Ei mero no te nunaa o te Atua, e feia horoa noa, maitai, hamani maitai e î i te here tatou. E imi tatou i te maitai o vetahi ê i tera e tera mahana e e hopoi mai te reira i te oaoa, te hau e te mauruuru mau. (Gal. 5:22, 23) Noa ˈtu eaha to outou tupuraa, e oaoa outou ma te pee i te huru horoa noa o Iehova e ma te riro ei hoa ohipa here no ˈna!—Mas. 3:9, 10.