No te aha eiaha ia tuu i te mau mea piahia e te mau Ite no Iehova i nia i te tahi atu reni Internet aore ra reni faahoaraa?

Te manaˈo ra vetahi aita e ino ia rave mai aore ra ia tuu i ta tatou mau papai Bibilia i nia i te tahi atu reni no te mea mea tamoni ore te reira. E nehenehe râ tera raveraa e faatupu i te fifi rahi e e ofati i te mau faatureraa faahitihia i roto i te Parau no te faaohiparaa * o ta tatou mau reni. Te faataa maitai ra teie Parau eita e faatiahia ia “pia i te mau hohoˈa papaihia, papai roro uira, iˈoa haamanahia, upaupa, hohoˈa patahia e tavirihia, aore ra tumu parau no nia ˈtu i teie reni i nia i te Internet (e te tahi noa ˈtu reni tufaraa parau aore ra video e reni faahoaraa).” No te aha mea faufaa roa ˈi teie mau faatureraa?

E tiaraa fatu to te mau mea atoa e vai ra i nia i ta tatou reni. Te auraa, mea paruruhia ïa e te ture. Mea faufaa roa ia ore te reira ia faaohipahia ma te tano ore. No te haafifi i ta tatou ohipa, e tuu te mau apotata e te tahi atu mau taata i ta tatou mau papai i nia i ta ratou reni no te huti i te ara-maite-raa o te mau Ite no Iehova e to vetahi atu. E tuu atoa râ ratou i nia i tera mau reni te tahi mau papai ia feaa te feruriraa o te taata. (Sal. 26:4; Mas. 22:5) Ua faaohipa vetahi i ta tatou i pia aore ra i ta tatou tapao jw.org i roto i te mau parau faatianianiraa, te mau ravea roro uira no te mau matini afaifai e i nia i te tahi mau taoˈa ta ratou e hoo atu. Tera râ, mea paruruhia ta tatou mau piaraa e tapao jw.org e te ture, e nehenehe ïa tatou e horo ia ratou i te haavaraa ia faaea ratou i te na reira. (Mas. 27:12) E nehenehe râ te ture e faahapa mai ia vaiiho tatou i te taata e tae noa ˈtu i to tatou mau taeae ia tuu i ta tatou mau piaraa i nia i te tahi atu reni aore ra ia faaohipa i te tapao jw.org no te hoo atu i te tahi mea.

Mea atâta roa ia rave mai tatou i ta tatou mau papai mai nia mai i te tahi atu reni e ere i te jw.org. Te horoa mai ra Iehova i te maa pae varua na roto noa i “te tavini haapao maitai e te paari.” (Mat. 24:45) E faaohipa noa tera “tavini” i te mau reni haamanahia i mua i te ture: www.pr418.com, tv.pr418.com, e wol.pr418.com. E toru anaˈe ravea roro uira haamanahia i mua i te ture no te mau matini afaifai: JW Language^®, JW Library^® e te JW Library Sign Language^®. I nia i tera mau reni e ravea roro uiraa, eita e itehia te parau faatianiani aore ra te tahi noa ˈtu mea no roto mai i te ao a Satani. Tera râ, ia rave noa mai tatou i ta tatou mau papai mai nia mai i te tahi atu reni aore ra ravea roro uira, e tia ïa ia ara, ua tauihia paha te tahi tuhaa o te reira.—Sal. 18:26; 19:8.

Hau atu â, ia tuu tatou i ta tatou mau papai i nia i te tahi reni e nehenehe ai te taata e horoa i to ratou manaˈo, e nehenehe te mau apotata e vetahi atu e faaino i te faanahonahoraa a Iehova. E mârô te tahi mau taeae e tera mau taata e e rahi roa ˈtu â Iehova i te faainohia. E ere tera mau aparauraa i nia i te Internet i te ravea tano no te faatitiaifaro i te feruriraa o te taata e no te tauturu ia taa i te parau mau. (Tim. 1, 6:3-5; Tim. 2, 2:23-25) Ua hamani atoa vetahi i te reni Internet e reni faahoaraa mai te huru ra e mero ratou no te faanahonahoraa aore ra no te Tino aratai. E haavare râ, aita hoi ta te tahi noa ˈˈe mero o te Tino aratai e reni tufaraa parau aore ra e reni faahoaraa.

Te turu ra tatou i te pororaa i “te parau apî oaoa” ma te faahaere i te taata i nia i te jw.org. (Mat. 24:14) Te maitai noa ˈtura ta tatou mau reni e ravea roro uira. E hinaaro tatou ia fanaˈo te taata atoa. No reira, e faatiahia tatou ia hapono na roto i te rata roro uira i te hoê papai aore ra te hoê nati o te faahaere i te taata i nia i ta tatou reni. E aratai ïa tatou i te taata i “te tavini haapao maitai e te paari,” te ravea hoê roa ta Iehova e faaohipa nei no te horoa mai i te maa pae varua.