E TAUSANI taeae tei faatoroahia ei matahiapo e ei tavini tauturu na te ao nei i te matahiti i mairi. O oe anei hoê o ratou? Eita e ore, ua oaoa oe i te tavini ia Iehova e i to oe mau taeae maoti teie hopoia apî.

E haapeapea iho â râ oe. E taeae apî o Jason te tavini ra ei matahiapo, te parau ra oia: “I te faatoroaraahia vau, ua manaˈo vau eita paha e maraa ia ˈu teie mau hopoia apî.” Tera atoa ta Mose raua Ieremia i manaˈo a horoa ˈtu ai Iehova i te hopoia apî. (Exo. 4:10; Ier. 1:6) E nafea ia ore e taiâ e ia tamau i te haere i mua i te pae varua? Mea rahi ta oe e haapii mai i te hiˈoraa o Timoteo.—Ohi. 16:1-3.

Peneiaˈe, e 20 matahiti tiahapa aore ra iti mai to Timoteo a apee ai oia i te aposetolo Paulo i to ˈna mau tere. I te omuaraa, ua taiâ atoa paha Timoteo i te haapii e te aˈo ia vetahi ê no to ˈna apî. (Tim. 1, 4:11, 12; Tim. 2, 1:1, 2, 7) Ua haere noa râ o ˈna i mua i te pae varua e ahuru matahiti i muri aˈe, teie ta Paulo i parau i to Philipi: “Te manaˈo nei au e tono oioi ia Timoteo ia outou ia tia i te Fatu ra o Iesu.” Eaha te tumu? Te faataa ra Paulo: “Aita ˈtu hoi ta ˈu e taata mai ia ˈna ra te huru.”—Phil. 2:19, 20.

No te aha e hiˈoraa maitai roa o Timoteo no te mau matahiapo? E hiˈopoa mai tatou e ono tumu.

1. Ua haapeapea mau no te taata. Ua parau Paulo i te mau taeae i Philipi e ua “haapeapea mau” Timoteo no ratou. (Phil. 2:20) Ua hinaaro Timoteo ia vai piri noa te mau taeae ia Iehova e ua ineine roa oia i te horoa i to ˈna taime e puai no te tauturu ia ratou.

E matahiapo William a 20 matahiti i teie nei. Teie ta ˈna i matau i te parau i te mau matahiapo faatoroa-apî-hia: “A here i te mau taeae. A haapao na mua i to ratou mau hinaaro, eiaha râ i te tiaau-noa-raa i te mau ohipa i roto i te amuiraa.” Eiaha e riro mai te taata faahoro pereoo mataeinaa o te tapapa noa i te hora tapaeraa, eita râ e tapea no te rave mai i te taata.

2. Ua tuu i te taviniraa a Iehova i te parahiraa matamua. Mea rahi te feia i ‘imi i to ratou iho maitai, eiaha râ i to Iesu Mesia ra.’ (Phil. 2:21) Ua tapao Paulo mea haapao aˈe te mau taeae i to ratou iho oraraa. I te tahi taime, i tuu na ratou i to ratou iho maitai na mua ˈˈe i te taviniraa a Iehova. Ua parau râ Paulo e ere Timoteo mai ia ratou. I te taime iho â i nehenehe ai o ˈna e tavini atu â i te Atua, ua parau Timoteo mai ia Isaia: “Inaha, teie au; o vau ta oe e tono.”—Isa. 6:9.

E nafea ia faaite i te huru aifaito a haapao ai i to oe mau hinaaro e to te amuiraa? A tahi, a pee i te aˈoraa a Paulo: “Ia taa maitai . . . eaha te mea faufaa roa ˈˈe.” (Phil. 1:10) A tuu na mua roa i te taviniraa a Iehova. Te piti, a haapae i te mau ohipa o te amu rahi roa i te taime e te faarohirohi atu. Ua parau Paulo ia Timoteo: “A horo ê i te mau hinaaro o te apîraa, a tapi râ i te parau-tia, te faaroo, te here, te hau.”—Tim. 2, 2:22.

3. Mea itoito i roto i te taviniraa a Iehova. Ua parau Paulo no nia ia Timoteo:  “Mai te hoê tamarii e to ˈna metua ua tavini mâua ia atutu te parau apî oaoa.” (Phil. 2:22) E ere Timoteo i te mea hupehupe. Ua haa rahi oia na muri ia Paulo a riro atu ai raua ei hoa piri roa.

I teie mahana, mea rahi te ohipa i roto i ta Iehova faanahonahoraa. E noaa mai te mauruuru mau e e piri atu â oe i te mau taeae e tuahine. Ia papu ïa ia oe ‘ia rahi noa ta oe ohipa i roto i te Fatu.’—Kor. 1, 15:58.

4. Ua faaohipa i ta ˈna i haapii. Ua papai Paulo ia Timoteo: “Ua pee maite . . . oe i ta ˈu mau haapiiraa, to ˈu huru oraraa, ta ˈu fa, to ˈu faaroo, to ˈu faaoromai, to ˈu here, to ˈu faaoromai tamau.” (Tim. 2, 3:10) Ua faaohipa Timoteo i ta ˈna i haapii, ua fanaˈo ïa oia e rave rahi atu â hopoia.—Kor. 1, 4:17.

E nehenehe oe e haapii mai i te hiˈoraa o te hoê matahiapo aravihi. Mea maoro Tom i te taviniraa ei matahiapo, te haamanaˈo ra oia ua anaanatae te hoê matahiapo aravihi ia ˈna e ua faaite atu e nafea ia amo maitai i ta ˈna hopoia. Te na ô ra Tom: “Aita vau i fiu i te haapii mai e ua haapao atoa vau i ta ˈna aˈoraa. Ore roa ˈtura to ˈu taiâ.”

5. Ua haamataro ia ˈna iho. Ua aˈo Paulo ia Timoteo: “A haamataro maite ia oe e ia riro te haamoriraa i te Atua anaˈe ei fa na oe.” (Tim. 1, 4:7) Noa ˈtu e taata faaineine to te hoê maona, e titauhia ia faaineine o ˈna ia ˈna iho. Ua faaue Paulo ia Timoteo: “A tamau i te haamataro i te taio maitai i mua i te taata atoa, e te aˈo atu e te haapii atu . . . A feruri maite e a manaˈo noa i teie mau mea atoa nei ia ite maitai te taata atoa e te nuu ra oe i mua i te pae varua.”—Tim. 1, 4:13-15.

E titau-atoa-hia oe ia aravihi atu â. A haapii maite i te Bibilia e te mau mea apî atoa no ǒ mai i te faanahonahoraa. Eiaha e tiaturi rahi roa ia oe iho a manaˈo atu aita e faufaa ia rave i te mau maimiraa no te mea mea maoro oe i te taviniraa ei matahiapo. Mai ia Timoteo, “a haapao maitai ia oe iho e i te mau haapiiraa ta oe e horoa.”—Tim. 1, 4:16.

6. Ua tiaturi i nia i te varua moˈa o Iehova. A faahiti ai i ta Timoteo taviniraa, ua haamanaˈo atu Paulo ia ˈna: “A faaherehere i teie mau mea maitai roa tei tuuhia ia oe ra na roto i te varua moˈa e vai ra i roto ia tatou.” (Tim. 2, 1:14) Mea titauhia ia tiaturi Timoteo i nia i te varua moˈa o te Atua.

Mea maoro Donald i te taviniraa ei matahiapo, te na ô ra oia: “E mea tia ia poihere te mau taeae faatoroahia i to ratou auhoaraa e te Atua. E rahi noa ˈtu â ïa ratou i te itoito. Ma te ani i te varua moˈa o te Atua e ma te faaite i te mau huru maitatai ta te varua e faatupu, e riro mau â ratou ei haamaitairaa no te mau taeae.”—Sal. 84:7; Pet. 1, 4:11.

Mea mahanahana mau ia ite i te mau tavini tauturu e matahiapo apî mai ia oe o te tamau ra i te tavini atu â ia Iehova. Te parau ra Jason tei faahitihia na mua ˈtu: “Mai te taime a riro ai au ei matahiapo, e rave rahi ta ˈu i haapii mai e ua faaea vau i te taiâ. Te oaoa mau nei au i ta ˈu hopoia e e haamaitairaa faahiahia mau!”

E tamau anei oe i te haere i mua i te pae varua? Ia pee oe i te hiˈoraa o Timoteo, e riro atoa oe ei haamaitairaa no te mau taeae e tuahine.