1. Ia au i te Hebera 12:1, eaha te tia ia tatou ia rave ia raea ia tatou te reni tapaeraa?

 TE FAAAU ra te Bibilia i to tatou oraraa Kerisetiano i te hoê hororaa. E fanaˈo te taata horo te raea ia ˈna te reni tapaeraa i te ora mure ore. (Tim. 2, 4:7, 8) E tia ia tatou ia tutava i te horo no te mea fatata roa tatou i te faaoti i te hororaa. Ua upootia te aposetolo Paulo i tera hororaa, ua faahiti ïa o ˈna eaha te tauturu ia tatou ia upootia atoa. Ua parau hoi oia: “E haapae atoa anaˈe ïa i te mau mea teimaha atoa . . . e e horo anaˈe ma te faaoromai tamau i te hororaa i tuuhia i mua ia tatou.”—A taio i te Hebera 12:1.

2. Eaha te auraa ia parauhia “ia haapae i te mau mea teimaha atoa”?

² I to Paulo parauraa “ia haapae i te mau mea teimaha atoa,” ua parau anei oia e eita te Kerisetiano e amo i te tahi noa ˈˈe hopoia? Aita. Ua parau râ oia e tia ia haapae i te mau mea teimaha faufaa ore. E nehenehe hoi te reira e faataupupu ia tatou. No te faaoromai tamau, e tia ia tapao eaha te faateimaha ra ia tatou e ia haapae oioi i te reira. Eita râ tatou e haapae i te mau hopoia te tia ia amo. Ia ore tatou ia haapao maitai, eita tatou e faaoti i te hororaa. (Tim. 2, 2:5) E hiˈo anaˈe ïa eaha te mau hopoia te tia ia amo.

3. (1) Ia au i te Galatia 6:5, eaha te mau hopoia te tia ia tatou ia amo? (2) Eaha ta tatou e hiˈopoa i roto i teie tumu parau haapiiraa e no te aha?

 ³ A taio i te Galatia 6:5. Ua faahiti Paulo eaha te hopoia te tia ia tatou ia amo. Ua papai o ˈna: “E amo hoi te taata tataitahi i ta ˈna iho hopoia.” I ǒ nei, te faahiti ra Paulo i ta tatou hopoia i mua ia Iehova, te mea ta Iehova e titau mai ra ia tatou ia rave ei tavini na ˈna. I roto i teie tumu parau haapiiraa, e ite tatou eaha te hopoia te tia ia tatou ia amo e e nafea ia haapao i te reira. Ia na reira tatou a haapae atu ai i te mau mea teimaha faufaa ore, e noaa ia tatou ia faaoti i te hororaa Kerisetiano.

4. No te aha e ere ta tatou euhe ia Iehova i te mea teimaha ia amo? (A hiˈo atoa i te hohoˈa.)

⁴ Ta tatou euhe ia Iehova. I te pûpûraa tatou i to tatou ora ia Iehova, ua euhe tatou i te haamori ia ˈna e i te rave i to ˈna hinaaro. E hopoia faufaa roa teie te tia ia amo, e ere râ i te mea teimaha. Inaha ua poiete Iehova ia tatou no te rave i to  ˈna hinaaro. (Apo. 4:11) Ua hamani oia ia tatou ia au i to ˈna huru, no reira tatou e hiaai ai i te mau mea pae varua. E nehenehe ïa tatou e faafatata ˈtu ia ˈna e e oaoa a rave ai i to ˈna hinaaro. (Sal. 40:8) Ia na reira tatou a pee atu ai i te hiˈoraa o ta ˈna Tamaiti, e ite ïa tatou “i te tamahanahanaraa.”—Mat. 11:28-30.

5. Eaha te tauturu ia outou ia tapea i ta outou euhe ia Iehova? (Ioane 1, 5:3)

⁵ E nafea ia amo i tera hopoia? A tahi, a haapuai i to outou here ia Iehova ma te feruri i nia i te mau mea atoa ta ˈna i rave aˈena no outou e ta ˈna e rave a muri aˈe. Ia rahi noa ˈtu to outou here, e ohie atu â ïa no outou i te auraro ia ˈna. (A taio i te Ioane 1, 5:3.) A piti, a pee i te hiˈoraa o Iesu. Ua noaa ia ˈna ia rave i te hinaaro o to ˈna Metua no te mea ua ani oia ia ˈna i te tauturu e ua tiatonu noa o ˈna i nia i te mau haamaitairaa ta ˈna e fanaˈo. (Heb. 5:7; 12:2) Mai ia Iesu, e ani anaˈe ia Iehova i te puai e e tiatonu anaˈe i nia i tiaturiraa o te ora mure ore. Ma te haapuai i to outou here ia Iehova e ma te pee i te hiˈoraa o Iesu, e haere ia outou ia tapea i ta outou euhe.

6. No te aha e tia ia tatou ia amo i te hopoia utuafare? (A hiˈo atoa i te hohoˈa.)

⁶ Ta tatou hopoia utuafare. I roto i ta tatou hororaa Kerisetiano, e tia ia tatou ia here ia Iehova e ia Iesu hau aˈe i to tatou fetii. (Mat. 10:37) E ere râ te auraa e aita e titauhia ia haapao i to tatou utuafare. No reira, e tia ia tatou ia amo i ta tatou mau hopoia utuafare. (Tim. 1, 5:4, 8) E oaoa ˈtu â tatou i te na reira. Ua ite hoi Iehova e e oaoa te utuafare ia faatura e ia here te tane e te vahine faaipoipo te tahi i te tahi, ia here e ia haapii te mau metua i ta ratou mau tamarii e ia auraro te mau tamarii i ta ratou mau metua.—Eph. 5:33; 6:1, 4.

7. E nafea outou ia amo i ta outou hopoia utuafare?

⁷ E nafea ia amo i tera hopoia? Noa ˈtu eaha ta outou hopoia i roto i te utuafare, a tiaturi i te mau aˈoraa paari a te Bibilia. Eiaha e pee i to vetahi ê manaˈo no nia i te mea ino e te mea maitai aore ra i ta te faahua aivanaa e parau ra. (Mas. 24:3, 4) A faaohipa maitai i ta tatou mau papai no te ite e nafea ia haapao i te mau aratairaa Bibilia. Ei hiˈoraa, i roto i te anairaa tumu parau “Tauturu no te mau utuafare” e itehia te tahi mau fifi ta te mau hoa faaipoipo, te mau metua e te mau taurearea e faaruru nei. b A faaohipa i ta te Bibilia e parau ra noa ˈtu aita te toea o te utuafare e pee ra i te reira. Papu maitai, e faufaahia to outou utuafare e e haamaitai Iehova ia outou.—Pet. 1, 3:1, 2.

8. Eaha te mau faahopearaa o ta tatou mau faaotiraa?

⁸ Ta tatou hopoia e rave i te faaotiraa. Ua horoa mai Iehova i te tiamâraa e maiti e te hinaaro ra o ˈna ia oaoa tatou i te rave i te faaotiraa maitai. Ia rave râ tatou i te faaotiraa ino, na tatou iho e amo i te utua. (Gal. 6:7, 8) No reira tatou e farii ai i te amo i te hopoia no ta tatou mau faaotiraa, parau e ohipa. Ia au i te  ohipa ta tatou i rave, e nehenehe to tatou manaˈo haava e hauti. Tera râ, ua ite tatou e na tatou iho e amo i te hopoia no ta tatou mau faaotiraa. E turai ïa te reira ia tatou ia faaite i ta tatou mau hara, ia faatitiaifaro i te hapa e ia ore e tapiti faahou. A na reira ˈi, e tamau noa ïa tatou i roto i te hororaa.

9. E nafea outou mai te peu ua rave outou i te faaotiraa ino? (A hiˈo atoa i te hohoˈa.)

⁹ E nafea ia amo i tera hopoia? E nafea outou mai te peu ua rave outou i te faaotiraa ino? A farii e aita e mana to outou no nia i te reira. Eiaha e haamâuˈa i to outou taime e puai no te imi i te otoheraa, no te faahapa ia outou aore ra ia vetahi ê. A farii e ua hape outou e a rave i te maraa ia outou i teie nei â. Ma te haehaa, a pure ia Iehova, a tatarahapa e a ani ia ˈna ia faaore i ta outou hapa. (Sal. 25:11; 51:3, 4) A tatarahapa atoa i te feia ta outou i haamauiui e mai te peu e titauhia, a ani i te tauturu a te mau matahiapo. (Iak. 5:14, 15) A farii i ta oe hape e eiaha e tapiti faahou. A na reira ˈi, e faaite Iehova i to ˈna aroha hamani maitai e e tauturu oia ia outou.—Sal. 103:8-13.

10. No te aha e ere i te mea tano ia titau hau aˈe i te maraa ia tatou? (Galatia 6:4)

¹⁰ Eiaha e titau hau aˈe i te maraa ia tatou. Ia faaau tatou ia tatou iho i te tahi taata, e nehenehe te reira e haaparuparu ia tatou. (A taio i te Galatia 6:4.) Hau atu, e tupu te feii e te manaˈo tataˈu i roto ia tatou. (Gal. 5:26) Ia hinaaro tatou e rave mai ia vetahi ê noa ˈtu eita e maraa ia tatou, e hepohepo roa tatou. Te parau ra te Bibilia e “e maˈihia te aau ia maoro tei tiaihia ra.” Eaha ˈtu â ïa ia ore te reira e tupu! (Mas. 13:12) E ore roa to tatou anaanatae e tamau i roto i te hororaa.—Mas. 24:10.

11. E nafea ia ore e titau hau aˈe i te maraa ia outou?

¹¹ E nafea ia haapae i tera hopoia teimaha? Eiaha e titau hau aˈe i ta Iehova e ani ra ia outou. Eita hoi o ˈna e titau hau aˈe i te maraa ia outou. (Kor. 2, 8:12) Eita Iehova e faaau i ta outou e rave ra i ta vetahi ê e rave nei. (Mat. 25:20-23) Mea faufaa roa no ˈna to outou itoito i roto i te taviniraa, to outou taiva ore e to outou faaoromai tamau. A farii e ua taui to outou tupuraa. No te matahiti rahi aore ra no te maˈi, eita paha outou e nehenehe faahou e rave mai ta outou i matau noa na. Mai ia Barazilai, eiaha e farii i te hopoia mai te peu eita te reira e maraa ia outou. (Sam. 2, 19:35, 36) Mai ia Mose, a farii i te tauturu e a tutuu i te hopoia na vetahi ê. (Exo. 18:21, 22) Ia faaite outou i te haehaa, e rave noa ïa outou i te maraa ia outou e e tamau outou i roto i te hororaa.

12. Na tatou anei e amo i te hopoia o te mau faaotiraa a vetahi ê? A faataa.

¹² Te faahaparaa ia tatou no ta vetahi ê mau faaotiraa. E ere na tatou e faaoti no vetahi ê, e ere atoa na tatou e amo i ta ratou utua. Ei hiˈoraa, e nehenehe te hoê tamarii e faaoti i te faarue i te parau mau. Papu, mea mauiui roa no te mau metua ia tupu te reira. Tera râ, mea teimaha roa no te mau metua ia faahapa noa ratou ia ratou iho no te faaotiraa ino ta te tamarii i rave. Aita Iehova e hinaaro ra ia amo ratou i tera hopoia teimaha.—Roma 14:12.

13. E nafea te mau metua ia rave ta ratou mau tamarii i te faaotiraa ino?

 ¹³ E nafea ia haapae i tera hopoia teimaha? A haamanaˈo e ua horoa Iehova ia tatou pauroa i te tiamâraa e maiti. E vaiiho o ˈna i te taata tataitahi ia rave i ta ˈna iho faaotiraa e tavini anei ia ˈna aore ra aita. E te mau metua, ua ite Iehova e taata hara outou, tera râ, te hinaaro ra o ˈna ia horoa outou i te mea maitai roa ˈˈe. Na ta outou iho tamarii e amo i ta ˈna hopoia, e ere râ na outou. (Mas. 20:11) Noa ˈtu râ, e nehenehe outou e faahapa ia outou no ta outou mau hape. A faaite ïa ia Iehova i to outou mau huru aau e a ani ia ˈna ia faaore i ta outou hapa. Ua ite o ˈna e aita ta outou e ravea no te hoˈi i muri e no te taui i ta outou mau faaotiraa. Tera râ, aita atoa Iehova e hinaaro ia paruru outou i ta outou tamarii no te mau faahopearaa o ta ˈna mau faaotiraa. A haamanaˈo e ia hinaaro noa ˈtu o ˈna e hoˈi mai ia Iehova, ua ineine noa Iehova i te farii ia ˈna.—Luka 15:18-20.

14. No te aha e haapae ai i te manaˈo faahapa tano ore?

¹⁴ Te manaˈo faahapa tano ore. E faahapa iho â tatou ia tatou no ta tatou mau hara. Tera râ, aita Iehova i opua ia teimaha roa tatou no te manaˈo faahapa. E tia ïa ia haapae i te reira. E nafea tatou e ite ai e aita e tano ra? Ia faaite tatou e ua hara tatou, ua tatarahapa e ua haapae roa i te hara, ia papu ia tatou e ua faaore Iehova i te reira. (Ohi. 3:19) Ua na reira anaˈe tatou, aita Iehova e hinaaro ra ia faahapa faahou tatou ia tatou iho. Ua ite hoi o ˈna e e mea atâta roa te manaˈo faahapa tano ore. (Sal. 31:10) Ia hepohepo roa tatou, e nehenehe tatou e faaea i ta tatou hororaa.—Kor. 2, 2:7.

15. E nafea ia haapae i te manaˈo faahapa tano ore? (Ioane 1, 3:19, 20) (A hiˈo atoa i te hohoˈa.)

¹⁵ E nafea ia haapae i tera hopoia teimaha?  Ia teimaha roa tatou no te manaˈo faahapa tano ore, e haamanaˈo anaˈe e e Atua Iehova o “te faaore mau ra . . . i te hara.” (Sal. 130:4) A faaore ai i te hapa a te feia tatarahapa mau, te fafau ra Iehova: “Eita vau e haamanaˈo faahou i ta ratou hara.” (Ier. 31:34) No reira, eita roa Iehova e haamanaˈo ia tatou i ta tatou mau hara tahito. Eiaha e manaˈo e ia amo outou i te utua o ta outou hara, aita ïa Iehova i faaore i te reira. Eiaha atoa e toaruaru ia erehia outou i te tahi mau haamaitairaa i roto i te amuiraa. Inaha ua tumâ roa Iehova i ta outou hara, eaha ïa outou e haamanaˈo ai i te reira?—A taio i te Ioane 1, 3:19, 20.

16. Ei taata horo, eaha te tia ia tatou ia farii?

¹⁶ I roto i te hororaa Kerisetiano, e tia ia tatou ia horo “ia riro ia [tatou] te re.” (Kor. 1, 9:24) E upootia tatou ia faataa ê tatou i te hopoia te tia ia amo e te mau mea teimaha te tia ia haapae. I roto i teie tumu parau haapiiraa, ua ite mai tatou i te tahi noa o taua mau hopoia ra, aita hoi i faahiti-pauroa-hia. Ua parau Iesu e e nehenehe to tatou aau e “teimaha i te rahi o te tamaa, i te inu hua, i te haapeapearaa o te oraraa.” (Luka 21:34) Maoti te mau irava Bibilia mai teie te huru, e ite tatou eaha te tia ia faatitiaifaro ia riro ia tatou te re.

17. No te aha e papu ai ia tatou e e riro ia tatou te re?

¹⁷ Papu, e riro ia tatou te re no te mea e horoa mai Iehova i te puai titauhia. (Isa. 40:29-31) Eiaha ïa e faataupupu i ta outou hororaa! A pee i te hiˈoraa o te aposetolo Paulo tei rohi ia noaa ia ˈna te re. (Phil. 3:13, 14) Na tatou e horo i ta tatou hororaa, e ere na te tahi atu. E nehenehe râ Iehova e tauturu mai no te haapao i ta tatou mau hopoia e no te haapae i te mau mea teimaha. (Sal. 68:19) I te mea e tei to tatou pae Iehova, e horo tatou i te hororaa ma te faaoromai tamau e tae roa ˈtu i te reni tapaeraa.