1. No te aha to Babulonia i faahiahia ˈi i te peropheta Daniela?

 E TAUREAREA noa â te peropheta Daniela i to ˈna haruraahia e hopoi-ê-raahia i Babulonia. Ua faahiahia roa to Babulonia ia ˈna. Ua hiˈo ratou “i ta to [ratou] mata e ite ra,” inaha ua tapao ratou e “mea haviti” Daniela e no roto mai oia i te hoê utuafare faaturahia. (Sam. 1, 16:7) Faaineine ihora to Babulonia ia ˈna no te tavini i te aorai.—Dan. 1:3, 4, 6.

2. Eaha to Iehova manaˈo no nia ia Daniela? (Ezekiela 14:14)

² Mea here na Iehova ia Daniela, eiaha no to ˈna haviti aore ra to ˈna tiaraa, no te mea râ ua maiti o ˈna i te tavini ia Iehova ma te taiva ore. E 20 noa paha matahiti to Daniela i to Iehova parauraa e e taata faufaa rahi oia mai ia Noa raua Ioba tei tavini i te Atua ma te taiva ore. (Gen. 5:32; 6:9, 10; Ioba 42:16, 17; a taio i te Ezekiela 14:14.) Ua tamau Iehova i te here ia Daniela i te roaraa o to ˈna oraraa faahiahia mau.—Dan. 10:11, 19.

3. Eaha ta tatou e hiˈopoa i roto i teie tumu parau haapiiraa?

³ I roto i teie tumu parau haapiiraa, e hiˈopoa tatou e piti huru maitatai ta Daniela i faaite a riro atu ai ei taata faahiahia no te Atua. E hiˈo na mua tatou i na huru maitatai tataitahi e i roto i teihea tupuraa to Daniela faaiteraa i te reira. I muri iho, e ite tatou eaha tei tauturu ia Daniela ia faatupu i teie mau huru maitatai. I te pae hopea, e hiˈopoa tatou e nafea ia pee i to ˈna hiˈoraa. Noa ˈtu no te mau taurearea teie tumu parau haapiiraa, o tatou pauroa te faufaahia i te hiˈoraa o Daniela.

4. Mea nafea Daniela i te faaiteraa i te itoito? A horoa i te hiˈoraa.

⁴ E mǎtaˈu atoa te taata itoito, eita râ te reira e tapea ia ratou ia rave i te mea tia. E taurearea itoito mau Daniela, e hiˈo anaˈe ïa i roto i teihea tupuraa. E piti matahiti i muri aˈe i to Babulonia haamouraa ia Ierusalema, ua peapea roa te arii Nebukanesa a moemoeâ ˈi i te hoê tii rahi. Ua parau o ˈna e e haapohehia Daniela e te mau tane paari atoa o Babulonia aita anaˈe ratou e faatia e e tatara i te auraa o ta ˈna moemoeâ. (Dan. 2:3-5) Ua haa oioi Daniela ia ore te taata ia haapohehia. “Haere atura ïa [o ˈna] i mua i te arii e ani atura ia ˈna ia horoa mai maa taime ia faaite atu oia i te auraa o te moemoeâ.” (Dan. 2:16) Ua faaite mau o ˈna i te itoito e te faaroo puai, inaha aita te Bibilia e parau ra e ua faataa na Daniela i te mau moemoeâ. Parau atura o ˈna ia Sadaraka, Meseka, e ia Abedenego “ia pure i te Atua o te raˈi ia faaite mai i to ˈna aroha hamani maitai no nia i teie parau huna.” (Dan. 2:18) Ua pahono Iehova i ta ratou mau pure e ua noaa ia Daniela ia tatara i te auraa o te moemoeâ a Nebukanesa. Aita ˈtura ïa Daniela e to ˈna mau hoa i haapohehia.

5. I roto i teihea ˈtu â tupuraa to Daniela faaiteraa i te itoito?

⁵ Ua titau-faahou-hia ia Daniela ia faaite i te itoito. Ua moemoeâ faahou Nebukanesa. Ua ite o ˈna i te hoê tiapai tumu raau. Ma te itoito, ua tatara Daniela i te auraa o te moemoeâ a te arii. Ua faatia roa ˈtu o ˈna eaha te tupu no te arii, e inohia to ˈna upoo e eita o ˈna e faatere faahou hoê area taime. (Dan. 4:25) Ua nehenehe Nebukanesa e haapohe ia Daniela a manaˈo ai e te patoi ra oia i to ˈna mana arii. Noa ˈtu râ, ua faaite Daniela i te itoito ma te faataa i te auraa mau o te moemoeâ.

6. Eaha tei tauturu ia Daniela ia faaite i te itoito?

⁶ Eaha tei tauturu ia Daniela ia faaite i te itoito i te roaraa o to ˈna oraraa? I to ˈna taurearearaa, ua faufaahia Daniela i te hiˈoraa maitai o to ˈna na metua. Ua pee maite raua i te mau aratairaa ta Iehova i horoa i te mau metua Iseraela e  ua haapii i te reira i ta raua mau tamarii. (Deut. 6:6-9) Ua ite maitai ïa Daniela i te Ture a Mose, mai na Ture Ahuru e te tahi atu mau ture. Ei hiˈoraa, ua ite o ˈna eaha ta te Iseraela e nehenehe e amu aore ra aita. b (Lev. 11:4-8; Dan. 1:8, 11-13) Ua haapii atoa Daniela i te aamu o te nunaa o te Atua e eaha tei tupu i te oreraa ratou e pee i te mau ture aveia a Iehova. (Dan. 9:10, 11) Na roto i ta ˈna i ora mai, ua papu ia Daniela e e tauturu noa Iehova e ta ˈna mau melahi puai ia ˈna.—Dan. 2:19-24; 10:12, 18, 19.

7. Eaha ˈtu â tei tauturu ia Daniela ia faaite i te itoito? (A hiˈo atoa i te hohoˈa.)

⁷ Ua haapii Daniela i te mau papai a te mau peropheta a te Atua, mai te mau parau tohu a Ieremia. Maoti te reira, ua taa ia Daniela e fatata te ati Iuda i te tiamâ mai Babulonia mai. (Dan. 9:2) A ite ai i te tupuraa o te mau parau tohu, eita e ore ua puai atu â to Daniela tiaturi ia Iehova. Papu, e faaitoito te reira i te feia e tiaturi ra i te Atua. (A hiˈo atoa i te Roma 8:31, 32, 37-39.) Te mea faufaa roa ˈtu â, ua tamau Daniela i te pure i to ˈna Metua i te raˈi. (Dan. 6:10) I faaite na oia i to ˈna mau huru aau atoa e i ta ˈna mau hapa. E ani atoa na o ˈna i te tauturu a Iehova. (Dan. 9:4, 5, 19) E taata o ˈna mai ia tatou ra te huru, ua titauhia ia ˈna ia faatupu i te itoito maoti te haapiiraa, te pure e te tiaturi ia Iehova.

8. E nafea tatou ia faatupu i te itoito?

⁸ Eaha ïa te rave no te faatupu i te itoito? Papu, eita to tatou mau metua e nehenehe e tutuu mai i te itoito ia tatou, e haapii mai râ ratou i te faufaaraa ia faaite i te itoito. E au te faatupuraa i te itoito i te haapiiraa i te hoê toroa apî. E nehenehe outou e aravihi atu â ma te hiˈopoa e ma te pee maite i te huru raveraa a te orometua. Hoê â huru ia hinaaro tatou e faatupu i te itoito. E faufaahia tatou a hiˈopoa ˈi i te hiˈoraa o te feia itoito a pee atu ai i te reira. Eaha ïa ta tatou i haapii i te hiˈoraa o Daniela? Mai ia ˈna, e titauhia ia tatou ia haapii maite i te Bibilia, ia faatupu i te auhoaraa piri e o Iehova e ia tamau i te faaite atu i to tatou mau manaˈo e huru aau. Mea faufaa atoa ia tiaturi e e tauturu noa mai Iehova. Ia tamatahia to tatou faaroo, e faaite ïa tatou i te itoito.

9. Eaha te faufaaraa ia faaite i te itoito?

⁹ Mea rahi te haamaitairaa ia faaite i te itoito. Teie te hiˈoraa o Ben. I te fare haapiiraa ta ˈna i haere i Heremani, e tiaturi te taata e mea tupu noa mai te mau mea atoa e no ratou e buka aai noa te Bibilia. I te hoê mahana, ua anihia Ben ia faataa no te aha oia e tiaturi ai i te hoê Atua poiete i mua i to ˈna mau hoa haapiiraa. Ua na reira ïa o ˈna ma te itoito. Eaha te mau maitai ta ˈna i ite? Te na ô ra Ben: “Ua faaroo maite te orometua e ua nenei o ˈna i te mau api parau o ta ˈu vauvauraa e ua opere o ˈna na te mau piahi.” Eaha te manaˈo o te mau hoa haapiiraa? Te na ô ra Ben: “E rave rahi o ratou tei farii i ta ˈu i parau e ua faahiahia roa ratou i ta ˈu mau faataaraa.” Mai ta te hiˈoraa o Ben e faaite ra, pinepine te feia itoito i te faaturahia. E nehenehe atoa to ratou hiˈoraa e tauturu i te feia aau tae  ia haapii no nia ia Iehova. E tumu papu ïa to tatou ia faaite i te itoito.

10. Eaha te taiva ore?

¹⁰ I roto i te Bibilia, e faaohipahia te taˈo Hebera hurihia “taiva ore” aore ra “here taiva ore” no te faaite i te here rahi o te Atua no ta ˈna mau tavini. E faaohipa-atoa-hia teie taˈo no te faataa i te here e vai ra i rotopu i ta ˈna mau tavini. (Sam. 2, 9:6, 7) A mairi ai te tau, e nehenehe to tatou taiva ore e puai atu â. E hiˈopoa anaˈe mea nafea Daniela i te faaiteraa i to ˈna taiva ore.

11. I te ruhiruhiaraa, mea nafea Daniela i te faaiteraa i to ˈna taiva ore? (A hiˈo i te hohoˈa i te api matamua.)

¹¹ Ua rau te tupuraa ta Daniela i faaruru tei tamata i to ˈna taiva ore ia Iehova. I te 90raa o to ˈna matahiti, ua faaruru o ˈna i te hoê tupuraa peapea mau. I taua taime ra, ua haruhia Babulonia na to Medai e Peresia e o Dariu tei riro mai ei arii i Babulonia. Mea au ore na te mau mero o te aorai ia Daniela e aita ratou i faatura i to ˈna Atua. Opua ˈtura ratou e haapohe ia Daniela ma te haamau i te hoê ture tei tamata i to ˈna taiva ore. Ia au i tera ture, eita Daniela e nehenehe faahou e pure ia Iehova i roto i te hoê roaraa 30 mahana. Ua tamau noa râ o ˈna i te pure ia Iehova mai ta ˈna i matau. Ei faahopearaa, ua taorahia o ˈna i roto i te apoo liona. Ua haamaitai râ Iehova ia Daniela ma te faaora ia ˈna. (Dan. 6:12-15, 20-22) E nafea tatou e pee ai i te hiˈoraa o Daniela?

12. Eaha tei tauturu ia Daniela ia vai taiva ore ia Iehova?

¹² Mai tei faahitihia na mua ˈtu, e vai taiva ore tatou ia Iehova mai te peu noa e mea puai to tatou here ia ˈna. Aita roa ˈtu Daniela i taiva i to ˈna Metua i te raˈi no to ˈna here rahi ia ˈna. Ua rahi atu â to ˈna here a feruri ai i te mau huru maitatai o Iehova e mea nafea o ˈna i te faaiteraa i te reira. (Dan. 9:4) Ua feruri atoa Daniela i nia i te mau mea atoa ta Iehova i rave no ˈna e no to ˈna nunaa.—Dan. 2:20-23; 9:15, 16.

13. (1) E nafea te taiva ore o te feia apî e tamatahia ˈi? A horoa i te hiˈoraa. (A hiˈo atoa i te hohoˈa.) (2) Mai tei faaitehia i roto i te video, e nafea outou ia pahono ia anihia outou e turu anei te mau Ite no Iehova i te peu mahu?

 ¹³ Mai ia Daniela, te haaatihia ra te feia apî e te taata o tei ore e faatura ia Iehova e i ta ˈna mau ture aveia. Mea au ore atoa paha na ratou i te feia e tavini ra i te Atua. E faaino atoa vetahi i te feia apî no te tamata i to ratou taiva ore ia Iehova. E hiˈo anaˈe eaha tei tupu no Gabriel, hoê taurearea e ora ra i Auteralia. c I te hoê mahana, ua faaruru o ˈna i te tahi tupuraa peapea mau i te fare haapiiraa tuarua. Ua ani te orometua i te mau piahi eaha ta ratou e rave ia parau noa mai hoê hoa e mahu o ˈna. Parau atura o ˈna i te mau piahi mai te peu e turu ratou, ia tia i te hoê pae e te mau piahi e ore e farii i tera peu, ia tia ïa ratou i te tahi atu pae. Te na ô ra Gabriel: “Ua turu te taatoaraa o te mau piahi i te peu mahu. Mâua anaˈe e te tahi hoa haapiiraa Ite no Iehova tei ore i turu.” I muri mai, ua titauhia ia Gabriel ia tapea i to ˈna taiva ore ia Iehova. Te na ô ra oia: “Ua parau ino noa mai te mau piahi e te orometua ia mâua. Ua faataa ˈtu vau ma te mǎrû no te aha te mau Ite no Iehova e ore ai e turu i te peu mahu, aita râ ratou i faaroo mai.” Eaha to Gabriel huru i muri mai? Te faatia ra o ˈna: “Aita vau i au i ta ratou mau faainoraa, ua oaoa râ vau i te vai-taiva-ore-raa ia Iehova e i te patururaa i ta ˈu mau tiaturiraa.” d

14. Eaha te tauturu ia tatou ia vai taiva ore ia Iehova?

¹⁴ Mai ia Daniela, e noaa ia tatou ia vai taiva ore ia Iehova mai te peu noa e mea puai to tatou here ia ˈna. Rahi atu tatou i te haapii no nia i te mau huru maitatai o Iehova, rahi atu â ïa tatou i te here ia ˈna. Ei hiˈoraa, e haapii atu â tatou no nia ia Iehova maoti te mau mea poietehia. (Roma 1:20) E nehenehe tatou e taio i te tuhaa o te anairaa tumu parau “Mea poietehia anei?” e e mataitai atoa i te mau video. Te vai atoa ra te mau buka rairai Mea poietehia anei? aore ra E pae uiraa no nia i te tumu o te ora na roto i te reo Farani. A tapao na eaha ta Esther, te hoê tuahine apî no Danemata i parau no nia i teie mau buka rairai. Te na ô ra o ˈna: “Mea au roa te mau faataaraa i roto. Aita te buka rairai e faahepo ra i te taata taio ia tiaturi i tei parauhia, e faataahia râ eaha te tumu o te ora, na te taata tataitahi ïa e maiti i te tiaturi aore ra aita.” Te na ô ra Ben tei faahitihia na mua ˈtu: “Mea au roa tera mau vea. Ua papu ia ˈu i teie nei e, te vai ra te hoê Atua poiete.” Ia haapii outou i teie mau vea, e farii ïa outou i ta te Bibilia e parau ra: “E au roa ia oe Iehova to matou Atua te hanahana, te teitei e te puai, no te mea na oe i poiete i te mau mea atoa.”—Apo. 4:11. e

15. E nafea ˈtu â tatou e faatupu ai i te auhoaraa piri e o Iehova?

¹⁵ E puai atu â to tatou here ia Iehova ia haapii maite tatou no nia i ta ˈna Tamaiti Iesu. Teie ta Samira, te hoê tuahine no Heremani i parau: “Mea rahi ta ˈu i haapii no nia ia Iehova maoti Iesu.” I to ˈna tamariiraa, e ere i te mea ohie no Samira ia taa e e mea here na Iehova ia tatou.  Mea taa ê roa râ no Iesu. No te aha? Te na ô ra oia: “Ua taa ia ˈu e te pee ra Iesu i te hiˈoraa o to ˈna Metua ma te tia roa. Hoê â hoi raua. Taa ˈtura ia ˈu e tera te tumu i tono ai Iehova ia Iesu i nia i te fenua, oia hoi ia nehenehe te taata e ite o vai Iehova.” (Ioa. 14:9) No reira, no te faatupu i te auhoaraa e o Iehova e nehenehe ta outou e haapii atu â no nia ia Iesu. A na reira ˈi, e puai atu â to outou here ia Iehova e to outou hinaaro e vai taiva ore ia ˈna.

16. No te aha mea faufaa ia vai taiva ore? (Salamo 18:25; Mika 6:8)

¹⁶ Eita to tatou mau hoa e taiva ia tatou mai te peu e faaite tatou i te taiva ore. (Ruta 1:14-17) Hau atu, e fanaˈo te mau tavini taiva ore a Iehova i te hau o te feruriraa e te oaoa mau. No te aha? No te mea ua fafau Iehova e eita oia e taiva i te taata taiva ore. (A taio i te Salamo 18:25; Mika 6:8.) A feruri na. Te hinaaro ra te Atua Manahope, te Atua poiete ia riro tatou ei hoa no ˈna. Ia fanaˈo tatou i teie auhoaraa taa ê, eita hoê noa ˈˈe fifi, taata patoi aore ra te pohe e nehenehe e faataa ê ia tatou i te here o te Atua. (Dan. 12:13; Luka 20:37, 38; Roma 8:38, 39) No reira, mea faufaa ia pee tatou i te hiˈoraa o Daniela e ia vai taiva ore ia Iehova.

17-18. Eaha ˈtu â te haapii mai no nia ia Daniela?

¹⁷ I roto i teie tumu parau haapiiraa, ua hiˈopoa tatou e piti huru maitatai ta Daniela i faaite. Mea rahi atu â râ ta tatou e nehenehe e haapii mai no nia ia ˈna. Maoti Iehova, ua ite orama Daniela i te tahi mau tupuraa e moemoeâ. Ua horoa atoa o ˈna ia Daniela te aravihi e tatara i te auraa o te mau parau tohu. Ua tupu aˈena vetahi o teie mau parau tohu. Te vai ra râ te tahi atu o te faaite ra eaha te tupu a muri aˈe.

¹⁸ I roto i to muri nei tumu parau haapiiraa, e hiˈopoa tatou e piti parau tohu o te buka Daniela. Ma te na reira, e noaa ia tatou pauroa ia rave i teie nei â i te mau faaotiraa maitai. E faaitoito teie na parau tohu ia tatou ia vai ineine no te mau tupuraa e fatata mai ra. Te mea faufaa ˈtu â, e vai taiva ore noa tatou ia Iehova.