• “Mai te huru ra e ua faaturi noa ta ˈu tane.”

• “Ua haamâ roa vau. E au ra e mea faufaa ore au e aita e taata e hinaaro ra ia ˈu.”

• “Aita i haere ia ˈu ia faahiti i tera ohipa. Ua faaoromai noa vau i te mauiui.”

• “No ˈu, aita Iehova e tâuˈa ra ia ˈu.”

Te faaite ra te mau faatiaraa i nia ˈtu i te oto rahi ta te mau vahine e faaruru ia mataitai ta ratou tane faaipoipo i te hohoˈa faufau. Mai te peu ua rave huna te hoê tane i tera peu, no tau avaˈe paha aore ra no tau matahiti, eita paha ta ˈna vahine e tiaturi faahou ia ˈna. Te na ô ra te hoê vahine: “E ui au ia ˈu iho, ‘O vai mau na tera taata? Eaha ˈtu â ta ˈna e huna ra?’”

Ua faaineinehia teie tumu parau no te mau vahine ua topa ta ratou tane i roto i te mataitairaa i te hohoˈa faufau. a E faahitihia te tahi mau aratairaa Bibilia no te tamahanahana i teie mau vahine, no te haapapu e tei pihai iho Iehova ia ratou no te faaitoito atu i te pae aau e i te pae varua. b

Parau mau, aita to outou e mana i nia i te mau ohipa atoa ta ta outou tane e rave. Tera râ, te vai ra te ravea no te faaiti i to outou haapeapearaa a fanaˈo atu ai i te hau. Teie mai te tahi mau manaˈo tauturu.

Eiaha e faahapa ia outou. E nehenehe te vahine e manaˈo e no ratou te hape i mataitai ai ta ratou tane i te hohoˈa faufau. Ua manaˈo Alice c e aita ta ˈna tane e hinaaro ra ia ˈna. Ua ui o ˈna ia ˈna iho, ‘No te aha mea au aˈe na ta ˈu tane e hiˈo i te tahi atu mau vahine, eiaha râ ia ˈu?’ E faahapa vetahi vahine ia ratou ma te manaˈo e no to ratou huru, ua rahi atu â ta ratou tane i te raveraa i tera peu. Area o Danielle te parau ra o ˈna: “Ua manaˈo vau e mea iria roa vau e no reira to mâua faaipoiporaa i fifi ai.”

Tera atoa anei to outou manaˈo? Ia ite mai outou, aita Iehova e faahapa ra ia outou no te hape a ta outou tane. Te na ô ra te Iakobo 1:14:  “E faahemahia râ te taata tataitahi ia umehia oia e to ˈna iho hinaaro tia ore a hema ˈtu ai oia.” (Roma 14:12; Phil. 2:12) Aita Iehova e faahapa ra ia outou, te haapopou nei râ oia i to outou taiva ore.—Par. 2, 16:9.

Mea faufaa ia papu ia outou e e ere no te mea te mataitai ra ta outou tane i te hohoˈa faufau e aita o ˈna e hinaaro ra ia outou. Te parau ra te mau aivanaa e e riro te mau hohoˈa faufau mai te raau taero ra te huru, aita hoê aˈe vahine te nehenehe e haamâha i te reira.

Eiaha e haapeapea rahi roa. Ua topa te tane a Catherine i roto i te mataitairaa i te hohoˈa faufau. Te parau ra o ˈna e ua ino roa to ˈna oraraa i te haapeapea-noa-raa no ta ˈna tane. Te na ô ra Frances: “E haapeapea roa vau aita anaˈe vau i ite teihea roa ta ˈu tane. E hepohepo roa vau i te mahana taatoa.” Ua faaite atoa te tahi atu mau vahine e e haamâ ratou i te amui i te tahi atu mau Kerisetiano tei ite i te peu a ta ratou tane. Ua moˈemoˈe atoa vetahi mau vahine no te mea aita hoê aˈe taata e taa ra i to ratou tupuraa.

E tupu iho â tera huru manaˈo. Ia tiatonu noa râ outou i nia iho, e haapeapea ˈtu â outou. A tiatonu ïa i nia i to outou auhoaraa e o Iehova. A na reira ˈi, e noaa ia outou ia faaoromai tamau.—Sal. 62:2; Eph. 6:10.

I roto i te Bibilia, te vai ra te aamu o te tahi mau vahine tei fanaˈo i te tamahanahanaraa a Iehova maoti te pure. E noaa ia outou te tahi tauturu ia taio e ia feruriruri outou i nia iho. Pinepine, aita Iehova i faaore i to ratou fifi, ua horoa ˈtu râ o ˈna i te hau o te feruriraa. Ei hiˈoraa, “ua rahi roa to Hana mauiui.” Ia ˈna râ i pure ia Iehova, fanaˈo ihora oia i te hau noa ˈtu aita o ˈna i ite eaha te tupu i muri mai.—Sam. 1, 1:10, 12, 18; Kor. 2, 1:3, 4.

A ani i te tauturu a te mau matahiapo. E riro ratou “ei tamaru i te mataˈi” e “ei haapuraa i te vero ûa.” (Isa. 32:2, nota) E nehenehe ratou e ani i te hoê tuahine ia tauturu ia outou. A aparau ai outou e teie tuahine, e fanaˈo ïa outou i te tamahanahanaraa.—Mas. 17:17.

E nehenehe outou e tauturu i ta outou tane ia haapae i te peu e mataitai i te hohoˈa faufau. No te aro i te hoê enemi puai mau, te parau  ra te Bibilia e “mea maitai aˈe e piti i hoê noa.” (Koh. 4:9-12) Te haapapu ra te mau aivanaa e mea ohie aˈe no te hoê taata ia haapae i tera peu ia turu mai to ˈna hoa faaipoipo. E tiaturi faahou atoa raua te tahi i te tahi.

Parau mau, e tia ia faaoti papu ta outou tane i te haapae i te peu e mataitai i te hohoˈa faufau. Ua taparu anei oia ia Iehova i te puai na roto i te pure? Ua imi anei oia i te tauturu a te mau matahiapo? (Kor. 2, 4:7; Iak. 5:14, 15) Ua rave anei oia i te faanahoraa ia ore oia ia hema? Ei hiˈoraa, e nehenehe o ˈna e ape i te mau tupuraa atâta e e haavî ia ˈna a faaohipa ˈi i te mau matini afaifai. (Mas. 27:12) E farii anei o ˈna i ta outou tauturu? Ua ineine anei o ˈna i te faaite i te parau mau? Mai te peu e e, e nehenehe outou e tauturu i ta outou tane.

E nafea ïa? Teie te hiˈoraa o Felicia tei faaipoipo ia Ethan. Ua topa Ethan i roto i te herepata e mataitai i te hohoˈa faufau mai to ˈna tamariiraa mai â. Ua ineine noa Felicia i te faaroo i ta ˈna tane mea fifi anaˈe no ˈna i te patoi i tera peu. Te faataa ra Ethan: “E faaite pauroa vau i ta ˈu vahine. Na ˈna e tauturu ia ˈu ia haavî ia ˈu e e ui pinepine mai o ˈna eaha to ˈu huru. E haapao atoa o ˈna ia ore au ia faaohipa i te reni natirara no te mataitai i te hohoˈa faufau.” Papu, mea mauiui no Felicia ia rave ta ˈna tane i tera peu. Tera râ, te na ô ra o ˈna: “Ua taa ia ˈu eita to ˈu riri e to ˈu hepohepo e tauturu i ta ˈu tane ia haapae i tera peu. Ia aparau râ mâua, i reira ïa vau e nehenehe ai e haamahora i to ˈu aau. Ma te na reira, e itoito atu â ta ˈu tane i te faaea i tera peu.”

Mea faufaa ia tauaparau no nia i tera tupuraa. E ravea teie ia haapae te tane i te peu e mataitai i te hohoˈa faufau e ia tiaturi faahou ta ˈna vahine ia ˈna. Ua ineine anaˈe te tane i te faaite pauroa i ta ˈna vahine, to ˈna anei mau hinaaro tano ore, eaha ta ˈna e rave ra, teihea roa o ˈna, e taa ïa i ta ˈna vahine e aita o ˈna e huna ra i te hoê ohipa.

E te mau vahine, e nehenehe anei outou e na reira no te tauturu i ta outou tane? E nehenehe outou e taio i teie tumu parau e ta outou tane. E tutava o ˈna i te faaea i te mataitai i te hohoˈa faufau ia tiaturi faahou outou ia ˈna. Eiaha o ˈna e riri no te mea te haapeapea ra outou, ia feruri râ o ˈna eaha to outou huru aau i mua i tera fifi. Mea maitai ia turu outou i ta ˈna mau tutavaraa ia nehenehe faahou outou e tiaturi ia ˈna. E tia ia orua ia hiˈo eaha te mau tupuraa e hema ˈi o ˈna e e nafea ia haapae i tera peu. d

 Ia manaˈo outou e ura orua ia faahitihia tera parau, a ani i te hoê matahiapo ta orua i matau maitai ia apiti mai i ta orua mau aparauraa. E noa ˈtu ua haapae to outou hoa faaipoipo i tera peu, e titauhia te taime no te tiaturi faahou ia ˈna. Eiaha e tuu! E mauruuru outou a ite ai i te apî i roto i to orua faaipoiporaa. Maoti te faaoromai, e puai atu â to orua here te tahi i te tahi.—Koh. 7:8; Kor. 1, 13:4.

Ia hapa faahou ta outou tane, te auraa anei ïa e aita o ˈna i tatarahapa e aita e ravea faahou no ˈna? E ere! Mai te peu ua riro tera peu mai te raau taero no ˈna, e tia ia ˈna ia aro noa i te reira i te roaraa o to ˈna oraraa. E nehenehe hoi o ˈna e hapa i te tahi taime noa ˈtu mea maoro to ˈna haapaeraa i tera peu. E tia ia ˈna ia haavî atu â ia ˈna ma te imi i te mau ravea papu no te haapae i tera peu. (Mas. 28:14; Mat. 5:29; Kor. 1, 10:12) E tia ia ˈna ia “faaapî i [to ˈna] huru feruriraa” e ia “faufau i te mea ino,” mai te mataitairaa i te hohoˈa faufau e te mirimiriraa i te mero atiraa. (Eph. 4:23; Sal. 97:10; Roma 12:9) Ua ineine anei o ˈna i te aro? Mai te peu e e, e nehenehe o ˈna e upootia. e

E mai te peu aita to outou hoa faaipoipo e anaanatae ra i te aro? Eita e ore e e hepohepo outou, e riri e e manaˈo atoa paha outou e ua taiva o ˈna ia outou. A huri i to outou mau ahoaho i nia ia Iehova. A na reira ˈi, e noaa ïa ia outou te hau. (Pet. 1, 5:7) A faafatata ˈtu ia Iehova maoti te haapiiraa, te pure e te feruriruriraa. Ia na reira outou, e faafatata atoa mai Iehova. Mai ta te Isaia 57:15 e parau ra, tei pihai iho Iehova i te feia haihai “e teimaha ra” no te tamahanahana ia ratou. A faaitoito ïa i te tavini ia Iehova ma te taiva ore. A ani i te tauturu a te mau matahiapo e a tiaturi e ia tae i te hoê mahana, e taui mau â ta outou tane.—Roma 2:4; Pet. 2, 3:9.