I roto i tera tumu parau, te itehia ra te hoê mea faufaa roa no te mau taata e no te mau melahi, o te parau ïa o te haamoˈaraa o te iˈoa teitei o Iehova. Ma te turu i to ˈna tiaraa Arii hau ê e ma te vai taiva ore ia Iehova, te faaite papu nei tatou e o ta ˈna huru faatereraa te mea maitai roa ˈˈe.

No te aha râ e parauhia ˈi e te mea faufaa roa ˈˈe i teie nei o te haamoˈaraa o te iˈoa o Iehova? E hiˈopoa anaˈe e toru tumu.

A tahi, ua faaino Satani i te iˈoa o Iehova i roto i te ô i Edene. Na roto i ta ˈna uiraa ia Eva, ua hinaaro Satani ia manaˈohia e e Atua aroha ore Iehova o te opani ra e rave rahi ohipa i ta ˈna mau tavini. Ua taviri Satani i te mau parau a Iehova e ua parau roa ˈtu o ˈna e e haavare te Atua. Ua faaino ïa o ˈna i te iˈoa o Iehova. Ua riro mai o ˈna e “Diabolo,” oia hoi “pari haavare” te auraa. (Ioa. 8:44) A tiaturi ai Eva i te haavare a Satani, ua faaroo ore o ˈna i te Atua e ua patoi i to ˈna tiaraa Arii hau ê. (Gen. 3:1-6) Mai tera iho â mahana, te pari haavare nei Satani ia Iehova. O te feia e tiaturi ra i taua mau haavare ra te faaroo ore ia Iehova. No te mau tavini râ a te Atua, mea ino mau te pari-haavare-raa ia Iehova. Tera hoi te tumu i ino roa ˈi teie nei ao.

Te piti, no te maitai o te mau mea atoa i poietehia, e haamoˈa Iehova i to ˈna iˈoa, ma te tumâ roa i te mau faainoraa. Tera te mea faufaa roa ˈˈe no Iehova. Ua na ô o ˈna: “E haamoˈa iho â vau i to ˈu iˈoa teitei.” (Ezk. 36:23) Ua haapapu atoa Iesu e eaha te mea matamua roa ta te mau tavini atoa a Iehova e faahiti a pure ai. Ua na ô oia: “Ia moˈa to oe iˈoa.” (Mat. 6:9) Ahia taime to te Bibilia faahitiraa i te faufaaraa ia faahanahana i te iˈoa o Iehova! Teie mai te tahi mau hiˈoraa: “A faahoˈi atu ia Iehova i te hanahana e au i to ˈna iˈoa.” (Par. 1, 16:29; Sal. 96:8) “A himene i te arueraa i to ˈna iˈoa hanahana.” (Sal. 66:2) “E faahanahana vau i to iˈoa e a muri noa ˈtu.” (Sal. 86:12) Hoê atoa taime i paraparau ai Iehova mai te raˈi mai, tei te hiero i Ierusalema ïa Iesu a parau ai: “To ˈu Metua, a faahanahana i to iˈoa.” Pahono atura Iehova: “Ua faahanahana vau e e faahanahana â vau i te reira.”—Ioa. 12:28. a

Te toru, e tuati noa te opuaraa a Iehova i to ˈna iˈoa. A feruri na i te faufaaraa o te iˈoa o Iehova i muri aˈe i te tamataraa hopea o te tupu ia hope na 1 000 matahiti faatereraa a te Mesia. I tera taime, eaha te manaˈo o te taatoaraa o te mau melahi e te mau taata i te iˈoa o Iehova? No te pahono i tera uiraa, e hiˈopoa anaˈe e piti tuhaa, te vai-taiva-ore-raa ia Iehova e te tururaa i to ˈna tiaraa Arii  hau ê. I tera taime, aita e titau-faahou-hia i te taata ia haapapu i to ratou taiva ore no te mea e riro ratou ei taata tia roa e e fanaˈo ratou i te ora mure ore. Aita atoa e titau-faahou-hia ia haapapu e o ta Iehova huru faatereraa te mea maitai roa ˈˈe no te mea e farii to te raˈi e to te fenua taatoa i te tiaraa Arii hau ê o Iehova.

I tera taime, e ite te taata atoa i te parau mau no nia ia Iehova e i reira atoa e haamoˈa-roa-hia ˈi to ˈna iˈoa. E tamau atoa râ to te raˈi e to te fenua i te faaite e o te iˈoa o Iehova te mea faufaa roa ˈˈe no ratou. E ite hoi ratou i te mau mea faahiahia atoa ta Iehova e rave. A feruri na, ia faahoˈi Iesu i te tiaraa mana i to ˈna Metua ra, i tera taime e riro Iehova “ei Arii hoê roa no te mau mea atoa.” (Kor. 1, 15:28) I muri aˈe, e roaa i te taata i “te tiamâraa hanahana o te mau tamarii a te Atua.” (Roma 8:21) E faatupu atoa Iehova i ta ˈna opuaraa e tahoê i to te raˈi e to te fenua ei utuafare.—Eph. 1:10.

Ua tupu anaˈe te reira, eaha te huru o te mau melahi e te mau taata? Papu maitai, e rahi atu â to tatou hinaaro e faahanahana ia Iehova. Ua papai Davida: “Ia aruehia te Atua ra o Iehova . . . Ia aruehia to ˈna iˈoa hanahana e a muri noa ˈtu.” (Sal. 72:18, 19) E tamau tatou i te faahanahana ia Iehova e a muri noa ˈtu.

I roto i te iˈoa Iehova e itehia ˈi o vai mau na o ˈna. A feruri ai i te iˈoa o Iehova, e haamanaˈo tatou i to ˈna here. (Ioa. 1, 4:8) E haamanaˈo noa tatou e no to ˈna here i poiete ai Iehova ia tatou e i horoa mai ai i te hoo. E haamanaˈo atoa tatou e o ta ˈna huru faatereraa te mea maitai roa ˈˈe. E tamau â tatou i te ite i te tapao o to Iehova here ia tatou. E faafatata ˈtu â tatou i to tatou Metua i te raˈi e e arue tatou i to ˈna iˈoa hanahana e a muri noa ˈtu.—Sal. 73:28.