TUMU PARAU HAAPIIRAA 33
HIMENE 130 E faaore noa anaˈe i te hapa
E nafea te amuiraa e pee ai i te manaˈo o Iehova no nia i te feia rave hara?
“Ia rave noa ˈtu râ te tahi taata i te hara, e tauturu to tatou.”—IOA. 1, 2:1.
MANAˈO FAUFAA
E huti mai tatou i te mau haapiiraa faufaa no tei tupu i roto i te amuiraa no Korinetia, ua rave hoi te hoê Kerisetiano i te hara ino mau.
1. Eaha to Iehova hinaaro no te taata?
I TO Iehova poieteraa i te taata, ua horoa oia ia ratou i te tiamâraa e maiti. E faaohipa pinepine tatou i teie ô, a rave ai tatou i te mau faaotiraa. Te faaotiraa faufaa roa ˈˈe ta te hoê taata e rave, o te pûpûraa ïa ia ˈna ia Iehova e te riroraa ei mero no to ˈna utuafare pae varua. Tera ta Iehova e hinaaro ia rave tatou. No te aha? No te mea mea here na ˈna i te taata e e hinaaro o ˈna i te maitai no ratou. E hinaaro Iehova ia faatupu ratou i te auhoaraa e o ˈna e ia ora ratou e a muri noa ˈtu.—Deut. 30:19, 20; Gal. 6:7, 8.
2. Eaha to Iehova hinaaro no te feia aita i tatarahapa? (Ioane 1, 2:1)
2 Eita râ Iehova e faahepo i te tahi noa ˈˈe taata ia tavini ia ˈna. E vaiiho o ˈna na te taata tataitahi e faaoti. Eaha râ te tupu ia rave te hoê Kerisetiano i te hara ino mau? Ia ore o ˈna e tatarahapa, e tuuhia o ˈna i rapae i te amuiraa. (Kor. 1, 5:13) E hinaaro râ Iehova ia hoˈi mai teie taata ia ˈna ra. Inaha, teie te tumu i horoa ˈi Iehova i te hoo, no te faaore i te hara a te feia tei tatarahapa. (A taio i te Ioane 1, 2:1.) E Atua here mau o Iehova o te faaitoito i te feia rave hara ia tatarahapa.—Zek. 1:3; Roma 2:4; Iak. 4:8.
3. Eaha ta tatou e hiˈopoa i roto i teie tumu parau?
3 Te hinaaro ra Iehova ia pee tatou i to ˈna manaˈo no nia i te hara e te feia tei rave i te hara ino mau. I roto i teie tumu parau e hiˈo mai tatou e nafea tatou e na reira ˈi. E hiˈopoa tatou (1) eaha tei tupu i roto i te amuiraa no Korinetia, (2) eaha te aratairaa ta Paulo i horoa ia tatarahapa te hoê Kerisetiano, e (3) eaha ta te Bibilia e parau ra no nia i to Iehova manaˈo i te feia tei rave i te hara ino mau.
TEI TUPU I ROTO I TE AMUIRAA NO KORINETIA
4. Eaha tei tupu i roto i te amuiraa no Korinetia? (Korinetia 1, 5:1, 2)
4 A taio i te Korinetia 1, 5:1, 2. I te toruraa o te tere mitionare o Paulo, ua faaroo oia i te hoê tupuraa peapea mau i roto i te amuiraa apî no Korinetia. Ua taoto te hoê taeae e te vahine a to ˈna iho metua tane. E haerea hairiiri teie ‘tei ore hoi e itehia ra i roto i te mau nunaa ěê.’ Ua farii te amuiraa i ta ˈna i rave e ua au atoa ratou. Ua manaˈo paha vetahi e te pee ra ratou i te aroha hamani maitai o Iehova i te feia rave hara. Eita râ Iehova e farii i tera peu i roto i to ˈna nunaa. E ino te roo o te amuiraa no ta teie taeae i rave. Hau atu, e nehenehe te tahi atu mau Kerisetiano e pee i to ˈna haerea. No reira, eaha te aratairaa ta Paulo i horoa i te amuiraa?
5. Eaha ta Paulo i parau i te amuiraa, e eaha te auraa? (Korinetia 1, 5:13) (A hiˈo atoa i te hohoˈa.)
5 A taio i te Korinetia 1, 5:13. Maoti to ˈna varua moˈa ua aratai Iehova ia Paulo ia papai i te amuiraa ia tuu i rapae i teie taata tei ore i tatarahapa. Eaha ïa te huru o te mau Kerisetiano i nia ia ˈna? Ua parau Paulo ia ratou ia “faaea i te amuimui” ia ˈna. Eaha te auraa? Ua faataa Paulo “eiaha roa e tamaa e tera huru taata.” (Kor. 1, 5:11) Ia tamaa tatou e te tahi atu taata, e tauaparau ïa tatou e o ˈna, a au roa ˈtu ai i te faahoa ia ˈna. No reira Paulo i parau ai i te amuiraa eiaha roa ˈtu e amuimui i teie taata. E paruru te reira i te amuiraa i to ˈna haerea haapaoraa ore. (Kor. 1, 5:5-7) Ia faaea ratou i te amuimui ia ˈna, e feruri paha ïa o ˈna e mea ino ta ˈna i rave, a tatarahapa ˈtu ai.
Maoti to ˈna varua moˈa ua aratai Iehova ia Paulo ia papai i te amuiraa ia tuu i rapae i te amuiraa teie taata tei ore i tatarahapa (A hiˈo i te paratarafa 5)
6. Eaha ta te amuiraa e ta teie taata i rave?
6 I muri iho i to ˈna haponoraa i ta ˈna rata i te mau Kerisetiano no Korinetia, ua hinaaro Paulo e ite eaha te huru o te amuiraa no nia i ta ˈna aratairaa. Ua faaite ïa Tito ia Paulo i te parau apî. Ua pee te amuiraa i te mau aratairaa a Paulo. Ua tuuhia i rapae te taata tei rave i te hara. (Kor. 2, 7:6, 7) E tau avaˈe i muri iho, ua tatarahapa oia. Ua taui o ˈna i to ˈna haerea e ua pee faahou i te mau ture aveia a Iehova. (Kor. 2, 7:8-11) Eaha ïa ta Paulo i parau i te amuiraa ia rave?
E NAFEA TE AMUIRAA I NIA I TE FEIA TEI TATARAHAPA?
7. Eaha ta teie taata i rave no to ˈna tuuraahia i rapae i te amuiraa? (Korinetia 2, 2:5-8)
7 A taio i te Korinetia 2, 2:5-8. Ua parau Paulo e “ua navai noa i to te rahiraa . . . aˈoraa i teie taata.” Te auraa, ua tauturu te aˈoraa i teie taata ia tatarahapa. Aita ïa e faufaa ia tamau noa te amuiraa i te aˈo ia ˈna.—Heb. 12:11.
8. Eaha ta Paulo i parau i te amuiraa i muri iho?
8 Ua parau Paulo i te amuiraa: “Ia ineine ïa outou i te faaore i ta ˈna hara e tia ˈi e i te tamahanahana ia ˈna” e “ia haapapu i to outou here ia ˈna.” Ua hinaaro Paulo ia farii faahou te amuiraa i teie taeae e hoˈi mai ra. Ua ani atoa Paulo ia ratou ia faaite na roto i ta ratou parau e ohipa e ua faaore ratou i ta ˈna hara e ua here ratou ia ˈna. E haapapu ïa te reira e ua oaoa ratou i to ˈna hoˈiraa mai i roto i te amuiraa.
9. No te aha paha vetahi i ore ai i oaoa i te faahoˈiraahia mai to ratou taeae?
9 Aita paha vetahi i roto i te amuiraa i oaoa i te faahoˈiraahia mai teie taeae. No te aha tatou e parau ai i te reira? Ua haafifi ta ˈna i rave i te amuiraa e peneiaˈe ua haamauiui te reira ia vetahi. Ua manaˈo paha te tahi atu e ere mea tano ia farii faahou ia ˈna i roto i te amuiraa, ua haa rahi hoi ratou no te vai taiva ore ia Iehova e no te auraro i ta ˈna mau faaueraa. (A hiˈo atoa i te Luka 15:28-30.) No te aha râ mea faufaa no te amuiraa ia faaite i te here i to ratou taeae?
10-11. Eaha te nehenehe e tupu ia ore te mau matahiapo e faaore i te hara a te hoê taeae tei tatarahapa?
10 A feruri na eaha te nehenehe e tupu ia ore te mau matahiapo e farii faahou i teie taeae i roto i te amuiraa, aore ra ia ore te amuiraa e faaite i to ratou here ia ˈna. Eita e ore e “oto rahi” oia. E manaˈo o ˈna e aita ta ˈna e ravea faahou aore ra aita paha Iehova i faaore i ta ˈna hara. Aita ïa e faufaa ia taui o ˈna i to ˈna haerea.
11 Te mea ino roa ˈtu â, mai te peu eita te mau taeae e tuahine e faaore i ta ˈna hara, e haafifi te reira i to ratou auhoaraa e o Iehova. No te aha? No te mea eita ratou e pee i to Iehova manaˈo no nia i te feia tei tatarahapa. O te huru etaeta râ e te aroha ore o Satani ta ratou e pee. E vaiiho hoi ratou i te Diabolo ia faaohipa ia ratou no te faatoaruaru i teie taeae ia tavini faahou ia Iehova.—Kor. 2, 2:10, 11; Eph. 4:27.
12. E nafea te amuiraa no Korinetia e pee ai ia Iehova?
12 E nafea ïa te amuiraa no Korinetia e pee ai ia Iehova, eiaha râ ia Satani? Ma te pee ïa i te huru feruriraa o Iehova no nia i te feia tei tatarahapa. A tapao na i ta te tahi mau taata papai Bibilia i parau no nia ia Iehova. Ua parau Davida: “Mea maitai hoi oe e Iehova, e ua ineine i te faaore i te hara.” (Sal. 86:5) Ua papai Mika: “O vai te Atua mai ia oe, o te faaore i te hara e o te ore e haamanaˈo i te hapa?” (Mika 7:18) E ua parau Isaia: “Ia haapae te taata ino i to ˈna haerea e te taata ohipa ino i to ˈna mau manaˈo. Ia hoˈi mai oia ia Iehova, o te aroha hamani maitai ia ˈna, i to tatou Atua, e faaore rahi hoi oia i te hara.”—Isa. 55:7.
13. No te aha mea tano iho â ia faahoˈi mai i teie taeae i roto i te amuiraa? (A hiˈo i te tumu parau tarenihia “ Afea te faahoˈiraahia mai te taeae i roto i te amuiraa?”)
13 No te pee ia Iehova, ua titauhia i te amuiraa no Korinetia ia faaore i te hara a teie taeae e ia haapapu i to ratou here ia ˈna. Ma te pee i te aratairaa a Paulo ia farii maitai ia ˈna, e faaite ïa te amuiraa i to ratou “auraro . . . i te mau mea atoa.” (Kor. 2, 2:9) Tau avaˈe noa to ˈna tuuraahia i rapae, ua tatarahapa râ o ˈna i muri mai. Aita ïa e tumu ia tiai faahou â te mau matahiapo no te faahoˈi mai ia ˈna i roto i te amuiraa.
A PEE I TA IEHOVA PARAU-TIA E TO ˈNA AROHA HAMANI MAITAI
14-15. Eaha ta tatou i haapii mai i tei tupu i roto i te amuiraa no Korinetia? (Petero 2, 3:9) (A hiˈo atoa i te hohoˈa.)
14 Ua riro teie tupuraa “ei haapiiraa ia tatou.” (Roma 15:4) Ua haapii mai tatou eita Iehova e farii i te hara ino mau i rotopu i to ˈna nunaa. Eita atoa oia e vaiiho i te feia tei ore i tatarahapa i roto i te amuiraa. Parau mau, e Atua aroha hamani maitai o Iehova, eita râ o ˈna e taui i ta ˈna mau ture aveia. (Iuda 4) Mai te peu e vaiiho noa Iehova i te feia tei ore i tatarahapa, e fifihia ïa te amuiraa.—Mas. 13:20; Kor. 1, 15:33.
15 Ua haapii atoa mai tatou eita Iehova e hinaaro ia pohe te taata, ia ora mai râ ratou. Te faaite ra Iehova i to ˈna aroha hamani maitai i te feia tei taui i to ratou haerea e o te hinaaro e riro faahou ei hoa no ˈna. (Ezk. 33:11; a taio i te Petero 2, 3:9.) No reira, i to te taeae no Korinetia tatarahaparaa e tauiraa i to ˈna haerea, ua faaohipa Iehova ia Paulo no te faataa i te amuiraa ia faaore i ta ˈna hara e ia faahoˈi mai ia ˈna.
Ma te pee i to Iehova here e aroha hamani maitai, e farii maitai te amuiraa i te feia tei faahoˈihia mai (A hiˈo i te paratarafa 14-15)
16. Eaha to oe huru a haapii ai i ta Iehova i rave no te amuiraa no Korinetia?
16 Te faaite mai ra tei tupu i roto i te amuiraa no Korinetia e Atua here mau Iehova e te parau-tia. (Sal. 33:5) E turai ïa te reira ia tatou ia arue ia ˈna. Inaha, e taata hara anaˈe tatou o te hinaaro ia faaorehia ta tatou mau hara. E mauruuru atoa tatou ia Iehova no te horoaraa mai i te hoo, a nehenehe atu ai ta tatou mau hara e faaorehia. E tamahanahana mai te iteraa e mea here mau â na Iehova i to ˈna nunaa e te hinaaro ra o ˈna i te mea maitai no ratou.
17. Eaha ta tatou e hiˈopoa i roto i to muri nei mau tumu parau?
17 E nafea ïa te mau matahiapo i teie mahana e pee ai i te here o Iehova e e tauturu ai i te hoê Kerisetiano ia tatarahapa? Eaha te huru o te amuiraa ia faaoti te mau matahiapo e tuu i rapae aore ra e faahoˈi mai i te hoê Kerisetiano tei tatarahapa? E pahonohia teie na uiraa i roto i to muri nei mau tumu parau.
HIMENE 109 Here rahi ma te aau atoa
