TUMU PARAU HAAPIIRAA 34
HIMENE 107 Faaite mai te Atua e nafea ia here
E nafea te mau matahiapo e aroha hamani maitai ai i te taata rave hara?
“Te hinaaro ra te Atua, no to ˈna hamani maitai, e aratai ia oe i te tatarahapa.”—ROMA 2:4.
MANAˈO FAUFAA
E ite mai tatou e nafea te mau matahiapo e tauturu ai i te mau mero o te amuiraa tei rave i te hara.
1. Eaha ta Iehova e rave ia hara te hoê Kerisetiano?
I TO na mua ˈtu tumu parau, ua ite mai tatou eaha ta Paulo i ani i te amuiraa no Korinetia ia rave i to te hoê taata hararaa. Ua tuuhia o ˈna i rapae i te amuiraa no te mea aita o ˈna i tatarahapa. Teie râ, ia au i ta tatou irava tumu, e nehenehe Iehova e aratai i te hoê taata ia tatarahapa. (Roma 2:4) E faaohipa ïa o ˈna i te mau matahiapo. E nafea ïa?
2-3. Eaha te rave ia ite noa ˈtu tatou e ua hara te hoê mero o te amuiraa, e no te aha?
2 Eita te mau matahiapo e nehenehe e tauturu i te hoê Kerisetiano tei rave i te hara mai te peu aita ratou i faaarahia. No reira, ia ite noa ˈtu tatou ua hara hoê mero o te amuiraa, eaha ta tatou e rave? E faaitoito tatou ia ˈna ia farerei i te mau matahiapo.—Isa. 1:18; Ohi. 20:28; Pet. 1, 5:2.
3 E nahea râ ia ore o ˈna e farerei i te mau matahiapo? Na tatou ïa e faaara ia ratou. No to tatou here ia ˈna e hinaaro tatou ia tauturuhia o ˈna. Ia ore o ˈna e taui, e mutu to ˈna auhoaraa e o Iehova e ino atoa te roo o te amuiraa. No reira, noa ˈtu e ere mea ohie, e faaara iho â tatou i te mau matahiapo no to tatou here ia Iehova e i to tatou taeae aore ra tuahine.—Sal. 27:14.
E NAFEA TE MAU MATAHIAPO E TAUTURU AI IA RATOU?
4. Ia farerei te mau matahiapo i tei rave i te hara, eaha ta ratou fa?
4 Ia hara te hoê mero, e maiti te tino matahiapo e toru o ratou no te farerei ia ˈna. E piihia teie na taeae e toru e tomite. a E titauhia ia ratou te aau faahaihai e te haehaa. Ua taa ia ratou e noa ˈtu e tauturu ratou i teie mero ia tatarahapa, eita ta ratou e nehenehe e faahepo atu. (Deut. 30:19) Ua ite atoa ratou e ere pauroa mai ia Davida tei tatarahapa. (Sam. 2, 12:13) Eita hoi vetahi e faaroo i te aˈoraa a Iehova. (Gen. 4:6-8) Te fa râ a te mau matahiapo, o te imiraa ïa i te mau ravea atoa no te tauturu ia ˈna ia tatarahapa. Eaha ïa te mau aratairaa Bibilia te titauhia ia pee ratou?
5. Ia faatupu te mau matahiapo i te aha no te tauturu i tei rave i te hara? (Timoteo 2, 2:24-26) (A hiˈo atoa i te hohoˈa.)
5 E hiˈo te mau matahiapo i tei rave i te hara ei mamoe herehia tei moˈe. (Luka 15:4, 6) Eita ïa ratou e iria ia ˈna aore ra e faahiti i te mau parau teimaha. Eita atoa ratou e titorotoro no te ite noa eaha ta ˈna i rave, oti atu ai. E faatupu râ ratou i te mau huru maitatai faahitihia i te Timoteo 2, 2:24-26. (A taio.) E vai mǎrû e e hamani maitai noa ratou no te tauturu i tei rave i te hara ia taui.
Mai te mau tiai mamoe i tahito ra, e rohi te mau matahiapo i te tauturu i te mamoe tei moˈe (A hiˈo i te paratarafa 5)
6. E nafea te mau matahiapo e imi ai i to Iehova manaˈo hou a farerei ai i tei rave i te hara? (Roma 2:4)
6 E imi te mau matahiapo i to Iehova manaˈo. E tutava ratou i te pee i to Iehova huru i nia i te feia rave hara. E haamanaˈo ïa ratou i ta Paulo i papai: “Te hinaaro ra te Atua, no to ˈna hamani maitai, e aratai ia oe i te tatarahapa.” (A taio i te Roma 2:4.) Ia haamanaˈo atoa ratou e tiai ratou o te aupuru i te amuiraa i raro aˈe i te aratairaa a te Mesia. (Isa. 11:3, 4; Mat. 18:18-20) No reira, hou ratou a farerei ai i tei rave i te hara, e pure ratou ia Iehova ia raea ta ratou fa: e aratai i te taata rave hara i te tatarahapa. E rave ratou i te mau maimiraa i roto i te Bibilia e ta tatou mau papai. E ani atoa ratou ia Iehova i te haroˈaroˈa ia ite ratou eaha tei turai i teie taeae aore ra tuahine ia hara.—Mas. 20:5.
7-8. E nafea te mau matahiapo e pee ai i to Iehova faaoromai?
7 E faaoromai te mau matahiapo mai ia Iehova. E haamanaˈo ïa ratou i to Iehova huru i nia i te feia rave hara i tahito ra. Ei hiˈoraa, ua haaferuri Iehova ma te faaoromai ia Kaina. Ua faaara hoi oia ia Kaina eaha te tupu ia tamau noa o ˈna i te riri. Ia faaroo râ o ˈna i te aˈoraa, e haamaitaihia o ˈna. (Gen. 4:6, 7) Ua faaohipa Iehova ia Natana ta ˈna peropheta no te aˈo ia Davida maoti te hoê aamu o tei haaputapû i to ˈna aau. (Sam. 2, 12:1-7) Ua “tamau noa” atoa Iehova i te tono i ta ˈna mau peropheta “i tera e tera mahana” i to ˈna nunaa Iseraela. (Ier. 7:24, 25) Aita o ˈna i tiai roa ia tatarahapa ratou no te tauturu atu. Aita, te hara noa ra ratou a faaitoito ai oia ia ratou ia tatarahapa.
8 E pee ïa te mau matahiapo i to Iehova hiˈoraa no te tauturu i tei rave i te hara. E haaferuri ratou ia ˈna “ma te faaoromai” mai ta te Timoteo 2, 4:2 e faaue ra. Mea faufaa roa ïa ia vai hau noa e ia faaoromai ratou no te tauturu i tei rave i te hara ia tatarahapa. Aita anaˈe, eita paha ta ratou mau aˈoraa e fariihia aore ra eita tei rave i te hara e hinaaro e tatarahapa.
9-10. E nafea te mau matahiapo e haaferuri ai i tei rave i te hara?
9 E tamata te mau matahiapo i te taa eaha tei turai ia ˈna ia rave i te hara. Ei hiˈoraa, ua faaea paha teie Kerisetiano i te taio i te Bibilia e i te poro. Ua faaea atoa paha o ˈna i te pure ia Iehova. Aita paha oia e haavî faahou ra i te mau hinaaro e rave i te mau ohipa tano ore. O vai ma ta ˈna e amuimui ra? Mea maitai anei ta ˈna mau faaanaanataeraa? Eaha ˈtura ïa to ˈna huru feruriraa e to ˈna haerea? Te taa ra anei ia ˈna eaha to Iehova manaˈo no nia i ta ˈna i rave?
10 Ma te mǎrû e uiui te mau matahiapo ia ˈna eaha tei haafifi i to ˈna auhoaraa e Iehova a hara ˈtu ai. Eita râ ratou e faaô i roto i to ˈna oraraa. (Mas. 20:5) Mai ta Natana i rave i nia ia Davida, e nehenehe atoa te mau matahiapo e faahiti i te tahi hiˈoraa no te haaferuri i teie mero tei hara ia taa e mea ino ta ˈna i rave. Peneiaˈe e oto oia no to ˈna haerea e te faaotiraa ta ˈna i rave. I reira paha o ˈna e tatarahapa ˈi.
11. Eaha to Iesu huru i nia i te taata rave hara?
11 E pee te mau matahiapo i te hiˈoraa o Iesu. I to Iesu paraparauraa ia Saulo, ua ui atu o ˈna: “Saulo, Saulo, eaha oe e hamani ino ai ia ˈu?” Te haaferuri ra Iesu ia ˈna ia taa e haerea ino to ˈna. (Ohi. 9:3-6) E no te vahine ra o “Iezebela” ua parau Iesu: “Ua horoa hoi au i te taime ia tatarahapa o ˈna.”—Apo. 2:20, 21.
12-13. No te aha te mau matahiapo e vaiiho ai i te taime i tei rave i te hara ia tatarahapa? (A hiˈo atoa i te hohoˈa.)
12 Mai ia Iesu, eita te mau matahiapo e faaoti oioi noa eita te taata rave hara e tatarahapa. Te vai ra o te tatarahapa i te taime matamua e farereihia ˈi ratou e te mau matahiapo. Area te tahi atu, e titauhia ïa te taime. E faanaho ïa te mau matahiapo e farerei faahou â ia ˈna. Peneiaˈe ua feruri o ˈna i te aˈoraa i horoahia e ua pure o ˈna ia Iehova ia faaore i ta ˈna hara. (Sal. 32:5; 38:18) No reira, ia farerei faahou te mau matahiapo ia ˈna, ua taui rii paha ïa to ˈna feruriraa.
13 No te tauturu i tei rave i te hara ia tatarahapa, e faaite te mau matahiapo i te aumihi e te hamani maitai. E pure ratou ia Iehova ia haamaitai i ta ratou mau tutavaraa, a tiaturi ai e feruri maitai faahou to ratou taeae, a tatarahapa ˈtu ai.—Tim. 2, 2:25, 26.
E tamau te mau matahiapo i te farerei i tei rave i te hara, a horoa ˈtu ai i te taime ia tatarahapa o ˈna (A hiˈo i te paratarafa 12)
14. Ia tatarahapa tei rave i te hara, no vai te hanahana e no te aha?
14 Ia tatarahapa tei rave i te hara, mea oaoa roa ïa. (Luka 15:7, 10) No vai te hanahana? No te mau matahiapo anei? A haamanaˈo i ta Paulo i parau no nia i te feia rave hara: “Peneiaˈe e faatia te Atua ia ratou ia tatarahapa.” (Tim. 2, 2:25) No reira, na Iehova i tauturu i teie Kerisetiano ia taui i to ˈna feruriraa e haerea. Ua faataa Paulo i te mau maitai ta teie Kerisetiano e fanaˈo i muri mai. E ite papu atu â oia i te parau mau, e feruri maitai faahou o ˈna. Hau atu, ua ora mai o ˈna i te mau marei a Satani.—Tim. 2, 2:26.
15. E nafea te mau matahiapo e tamau ai i te tauturu i tei rave i te hara e tei tatarahapa?
15 Ia tatarahapa tei rave i te hara, e tamau te mau matahiapo i te farerei ia ˈna no te tauturu ia ˈna ia haapuai i to ˈna faaroo, ia mau papu i mua i te faahemaraa a Satani e ia rave i te mea maitai. (Heb. 12:12, 13) Eita iho â ïa te mau matahiapo e faatia haere i ta teie Kerisetiano i rave. Eaha râ ta ratou e faaara i te amuiraa?
“A AˈO I TE FEIA RAVE HARA I MUA I TE TAATA ATOA”
16. Ia au i te Timoteo 1, 5:20, o vai ma “te taata atoa”?
16 A taio i te Timoteo 1, 5:20. Ua parau Paulo ia Timoteo te tahi atu matahiapo ia “aˈo i te feia rave hara i mua i te taata atoa.” I mua noa anei i te amuiraa taatoa ta Paulo e hinaaro ra e parau? Eita. Te faahiti ra o ˈna i te feia tei ite ê na i te hara ta te Kerisetiano i rave. Ua ite mata roa paha ratou aore ra na teie Kerisetiano tei rave i te hara i faatia ia ratou. O ratou noa ïa ta te mau matahiapo e faaara ˈtu e ua aˈohia o ˈna.
17. Eaha te faaarahia i te amuiraa e no te aha?
17 I te tahi taime, mea rahi tei ite e ua hara te hoê Kerisetiano aore ra e faaroo ratou i tei tupu. I roto i tera tupuraa, o te amuiraa taatoa ïa “te taata atoa” ta Paulo i faahiti. E faaara te hoê matahiapo i te amuiraa e ua aˈohia taua Kerisetiano ra. No te aha? Te pahono ra Paulo: “Ei faaararaa i te tahi pae” ia ore ia rave i te hara.
18. Eaha ta te mau matahiapo e rave ia hara te hoê tamarii bapetizohia aita i tia to ˈna matahiti? (A hiˈo atoa i te hohoˈa.)
18 Eaha ta te mau matahiapo e rave ia hara te hoê tamarii bapetizohia aita i tia to ˈna matahiti? E maiti ïa te tino matahiapo e piti o ratou no te farerei ia ˈna e to ˈna na metua. b E ui na matahiapo i na metua eaha ta raua i rave no te tauturu i ta raua tamarii ia tatarahapa. Mai te peu te rave ra teie tamarii i te mau tauiraa, e vaiiho ïa teie na matahiapo na te metua e tamau i te tauturu ia ˈna. Inaha, na raua te hopoia e aˈo ia ˈna ma te here. (Deut. 6:6, 7; Mas. 6:20; 22:6; Eph. 6:2-4) I te tahi râ taime e ani na matahiapo ia raua te fanaˈo ra anei te tamarii i te tauturu hinaarohia. E ia ore taua tamarii ra e tatarahapa? I tera taime, i reira te hoê tomite matahiapo e farerei ai ia ˈna e to ˈna na metua.
Ia hara te hoê tamarii bapetizohia aita i tia to ˈna matahiti, e farerei e piti matahiapo ia ˈna e to ˈna na metua (A hiˈo i te paratarafa 18)
“E ATUA HERE RAHI IEHOVA E TE AROHA HAMANI MAITAI”
19. E nafea te mau matahiapo e pee ai i te hiˈoraa o Iehova no te tauturu i te taata rave hara?
19 Te titau ra Iehova i te mau matahiapo ia paruru i te amuiraa i te feia aita e faaroo ra i ta ˈna mau faaueraa. (Kor. 1, 5:7) Te imi atoa ra ratou i te mau ravea atoa no te tauturu i te taata rave hara ia tatarahapa, a tiaturi ai e taui o ˈna. No te aha? Te hinaaro ra ratou e pee i te hiˈoraa o Iehova “e Atua here rahi . . . e te aroha hamani maitai.” (Iak. 5:11) Ua faaite te aposetolo Ioane i te here i te mau taeae e tuahine. Ua papai o ˈna: “Ta ˈu mau tamarii here, te papai atu nei au i teie mau parau ia ore outou e rave i te hara. Ia rave noa ˈtu râ te tahi taata i te hara, e tauturu to tatou tei te Metua ra, o Iesu Mesia te taata parau-tia.”—Ioa. 1, 2:1.
20. Eaha ta tatou e hiˈo mai i roto i te tumu parau haapiiraa hopea?
20 I te tahi râ taime, eita te hoê Kerisetiano e tatarahapa. E tuuhia ïa o ˈna i rapae i te amuiraa. Eaha ïa ta te mau matahiapo e rave i roto i taua tupuraa ra? E hiˈo mai tatou i te pahonoraa i roto i te tumu parau haapiiraa hopea.
HIMENE 103 Te mau tiai no ǒ mai ia Iehova
a I parau noa na tatou e tomite haavaraa. Eita râ tatou e parau faahou haavaraa no te mea hoê noa tuhaa teie o ta ratou hopoia. I teie nei e parau noa tatou e tomite matahiapo.
b Tei parauhia no te mau metua e tano atoa ïa no te taata na ˈna e haapao ra i teie tamarii i mua i te ture. Aore ra no te tahi atu taata e haapao ra i te hoê tamarii aita i tia te matahiti i roto i te amuiraa.
