TUMU PARAU HAAPIIRAA 35
HIMENE 123 Auraro anaˈe i ta Iehova aratairaa ma te taiva ore
Tauturu no tei tuuhia i rapae i te amuiraa
“E oaoa rahi atoa tei te raˈi no te hoê noa taata rave hara e tatarahapa, eiaha râ no na 99 taata parau-tia e manaˈo ra e aita e faufaa ia tatarahapa ratou.”—LUKA 15:7.
MANAˈO FAUFAA
No te aha e tuuhia ˈi vetahi i rapae i te amuiraa? E nafea te mau matahiapo e tauturu ai ia ratou ia tatarahapa e ia hoˈi mai ia Iehova ra?
1-2. (1) Eaha to Iehova manaˈo no nia i te hara? (2) Eaha ta ˈna e hinaaro no te taata rave hara?
EITA Iehova e farii i te ohipa ino e mea au ore na ˈna i te hara. (Sal. 5:4-6) Te hinaaro ra o ˈna ia faatura tatou i ta ˈna mau ture aveia i roto i te Bibilia. Ua ite Iehova e taata hara tatou, eita ïa o ˈna e titau ia haa tatou ma te tia roa. (Sal. 130:3, 4) Eita atoa râ o ˈna e farii i te feia o te faatura ore ia ˈna e o “te haafaufaa ore nei i to ˈna hamani maitai rahi ma te rave i te mau peu faufau.” (Iuda 4) No reira te Bibilia e faahiti ai i te “haamouraa o te feia faatura ore i te Atua” i te tamaˈi o Aramagedo.—Pet. 2, 3:7; Apo. 16:16.
2 Aita Iehova e hinaaro ra ia haamouhia te taata. I roto i teie vea, ua haapii mai tatou e te ‘hinaaro nei Iehova ia noaa i te taata atoa te tatarahapa.’ (Pet. 2, 3:9) E pee te mau matahiapo i te hiˈoraa o Iehova ma te tauturu i te feia rave hara ia taui i to ratou haerea e ia fanaˈo faahou i ta Iehova farii maitai. E ere râ o ratou pauroa te tatarahapa. (Isa. 6:9) Noa ˈtu e tutava te mau matahiapo i te tauturu ia ratou, e tamau noa vetahi i te rave i te mea ino. Eaha ïa te tupu no ratou?
“A TUU I TE TAATA INO I RAPAE”
3. (1) Eaha ta te Bibilia e parau ra no te taata rave hara tei ore i tatarahapa? (2) No te aha tatou e parau ai e na ˈna i maiti ia tuuhia o ˈna i rapae i te amuiraa?
3 Aita anaˈe te taata rave hara i tatarahapa, e pee te mau matahiapo i te Korinetia 1, 5:13: “A tuu i te taata ino i rapae i te amuiraa.” Na te taata rave hara i maiti i tera faahopearaa, ua ooti ïa o ˈna i ta ˈna i ueue. (Gal. 6:7) No te aha tatou e parau ai i te reira? No te mea ua onoono o ˈna i te patoi i te tauturu a te mau matahiapo no te aratai ia ˈna i te tatarahapa. (Arii 2, 17:12-15) Ua faaite ïa o ˈna na roto i to ˈna haerea e aita iho â o ˈna e hinaaro ra e auraro i ta Iehova mau ture aveia.—Deut. 30:19, 20.
4. No te aha e faaarahia ˈi te amuiraa e ua tuuhia te hoê taata rave hara tatarahapa ore i rapae i te amuiraa?
4 Ua tuuhia anaˈe te hoê taata rave hara i rapae i te amuiraa, e faaarahia e ere faahou o ˈna i te Ite no Iehova. a E ere no te faahaama ia ˈna. Mea faufaa râ ia ite te amuiraa e titauhia ia ratou ia “faaea i te amuimui” e i te “tamaa e tera huru taata.” (Kor. 1, 5:9-11) E tumu papu i horoa ˈi Iehova i teie faaueraa. Ua papai hoi te aposetolo Paulo: “E maraa te taatoaraa o te faraoa ôihia i te hopue rii noa.” (Kor. 1, 5:6) Oia mau, aita anaˈe te taata rave hara i tuuhia ˈi i rapae, e manaˈo paha ïa vetahi ê aita e faufaa ia auraro i ta Iehova mau faaueraa.—Mas. 13:20; Kor. 1, 15:33.
5. Eaha to tatou manaˈo no nia i te hoê mero tei tuuhia i rapae i te amuiraa?
5 Eaha ïa to tatou manaˈo ia tuuhia te hoê mero i rapae i te amuiraa? Noa ˈtu e faaea tatou i te amuimui ia ˈna, e ere râ te auraa e aita faahou e ravea no ˈna. E au teie taata rave hara i te hoê mamoe tei moˈe. E nehenehe hoi teie mamoe e hoˈi mai i roto i te nǎnǎ. E haamanaˈo anaˈe ïa ua pûpû teie taata tei moˈe i to ˈna ora ia Iehova. Aita râ o ˈna i tapea i ta ˈna euhe, ua faaatea ê oia ia ˈna i te eˈa o te parau mau. (Ezek. 18:31) Noa ˈtu râ, no to Iehova aroha hamani maitai rahi e taime â to ˈna no te tatarahapa. E nafea te mau matahiapo e tauturu ai ia ˈna noa ˈtu ua tuuhia o ˈna i rapae?
E NAFEA TE MAU MATAHIAPO E TAUTURU AI I TEI TUUHIA I RAPAE?
6. Eaha ta te mau matahiapo e rave no te tauturu i tei tuuhia i rapae i te amuiraa?
6 Ia tuuhia te hoê taata i rapae i te amuiraa, e faaea anei te mau matahiapo i te tauturu ia ˈna? Eita! Ia faaara te mau matahiapo i te taata rave hara e tuuhia o ˈna i rapae, e faataa atoa ratou i te mau taahiraa e titauhia ia ˈna ia rave ia faahoˈihia mai o ˈna i roto i te amuiraa. E faaite atoa te mau matahiapo e te hinaaro ra ratou e farerei faahou ia ˈna tau avaˈe i muri iho no te ite ua taui anei to ˈna feruriraa. Ia farii teie taata i te reira, e faaitoito te mau matahiapo ia ˈna ma te mahanahana ia tatarahapa e ia hoˈi mai. Noa ˈtu i tera taime aita paha o ˈna i taui, e faanaho te mau matahiapo no te farerei faahou ia ˈna.
7. E nafea te mau matahiapo e pee ai i te aumihi o Iehova a tauturu ai i tei tuuhia i rapae i te amuiraa? (Ieremia 3:12)
7 E pee te mau matahiapo i te aumihi o Iehova a tauturu ai i tei tuuhia i rapae. Ei hiˈoraa, i tahito ra aita Iehova i tiai roa ia tatarahapa te nunaa Iseraela no te tauturu ia ratou. Na ˈna hoi i rave i te taahiraa matamua no te aratai ia ratou i te tatarahapa. Mai ta tatou i ite i roto i te piti o te tumu parau haapiiraa, ua faaite Iehova i to ˈna aumihi ma te ani i te peropheta Hosea ia faaore i te hara a ta ˈna vahine e ia rave faahou mai ia ˈna. I taua taime ra, te faaturi noa ra ta ˈna vahine. (Hos. 3:1; Mal. 3:7) Mai ia Iehova, te hinaaro ra te mau matahiapo ia tatarahapa e ia hoˈi mai te mau mero tei tuuhia i rapae. E imi ïa ratou i te mau ravea atoa no te tauturu ia ˈna.—A taio i te Ieremia 3:12.
8. E nafea te faahohoˈaraa a Iesu o te tamaiti tei moˈe e faaite ai i to Iehova aumihi e aroha hamani maitai? (Luka 15:7)
8 A haamanaˈo na i te faahohoˈaraa a Iesu no nia i te tamaiti tei moˈe. I to te metua tane iteraa i ta ˈna tamaiti, ‘horo atura oia, tauahi maitai ihora ia ˈna e apa atura’ ia ˈna. (Luka 15:20) Ua tapao anei outou? Aita te metua tane i tiai roa ia tatarahapa mai ta ˈna tamaiti. Na ˈna râ i horo e farerei i ta ˈna tamaiti no to ˈna here ia ˈna. Hoê â huru no te mau matahiapo. Te hinaaro ra ratou ia hoˈi mai te feia tei atea ê ia Iehova i roto i ta ˈna faanahonahoraa. (Luka 15:22-24, 32) Papu roa, ia hoˈi mai tei tuuhia i rapae e oaoa to te raˈi e to te fenua.—A taio i te Luka 15:7.
9. E nafea Iehova e faaitoito ai i te mau mero tei tuuhia i rapae?
9 Mai ta tatou i hiˈopoa mai, eita Iehova e vaiiho noa i te taata rave hara tatarahapa ore i roto i te amuiraa. Eita râ o ˈna e faarue ia ratou. Te hinaaro ra Iehova ia hoˈi mai ratou ia ˈna ra. O ta tatou ïa e tapao ra i roto i te Hosea 14:4: “E rapaau vau i to ratou taiva. E here au ia ratou ma te aau tae, ua fariu ê hoi to ˈu riri ia ratou.” Inaha ua ite te mau matahiapo i te manaˈo o Iehova, e tamoemoe ïa ratou i te mau tapao e faaite ra e ua tatarahapa te taata tei tuuhia i rapae. E faaitoitoraa atoa teie irava no ratou tei tuuhia i rapae, e mea here na Iehova ia ratou e te hinaaro ra o ˈna ia hoˈi oioi mai ratou.
10-11. E nafea te mau matahiapo e tauturu ai i tei tuu-ê-na-hia i rapae?
10 E no te mau mero tei tuu-ê-na-hia i rapae i te amuiraa, peneiaˈe e rave rahi matahiti i teie nei? Mea maoro paha to ratou faaearaa i te rave i te hara. Aita paha vetahi o ratou e haamanaˈo faahou ra i te tumu i tuuhia ˈi ratou i rapae i te amuiraa. Noa ˈtu râ, e haere te mau matahiapo e farerei ia ratou pauroa. I reira te mau matahiapo e pure ai e o ratou, e faaitoito ai ia ratou ma te mahanahana ia hoˈi mai i roto i te amuiraa. Mai te peu e rave rahi matahiti teie taata i rapae i te amuiraa, eita e ore ua paruparu roa oia i te pae varua. No reira, ia farii o ˈna i te hoˈi mai, e nehenehe te mau matahiapo e faanaho i te hoê haapiiraa Bibilia no ˈna noa ˈtu aita â o ˈna i faahoˈihia mai atura i roto i te amuiraa. Tera râ, na te mau matahiapo anaˈe e rave i tera faanahoraa no te haapiiraa Bibilia.
11 Ma te pee i te aroha hamani maitai o Iehova i te feia rave hara, te hinaaro ra te mau matahiapo e tauturu i tei tuuhia i rapae. Ia ite hoi ratou e te matara noa ra te opani no te hoˈi mai ia Iehova. No reira, ia tatarahapa te hoê taata e ia taui i to ˈna haerea, e farii-faahou-hia o ˈna i roto i te amuiraa.—Kor. 2, 2:6-8.
12. (1) I roto i teihea mau tupuraa e vai ara ˈi te mau matahiapo? (2) No te aha eiaha tatou ia manaˈo eita e tano ia fanaˈo te tahi taata rave hara i to Iehova aroha hamani maitai? (A hiˈo atoa i te nota.)
12 I te tahi taime, e titauhia i te mau matahiapo ia vai ara hou a faahoˈi mai ai i te hoê taata. Ei hiˈoraa, ua rave ino paha oia i te hoê tamarii, ua riro mai oia ei apotata aore ra ua faaturi o ˈna ia taa raua to ˈna hoa faaipoipo. I roto i tera mau tupuraa, e ara te mau matahiapo e ua tatarahapa mau â teie taata. (Mal. 2:14; Tim. 2, 3:6) Mea faufaa roa ia paruru ratou i te amuiraa. Ia papu atoa râ ia tatou e farii Iehova i te taata o te tatarahapa mau â e o te faaea i te rave i te mea ino. No reira, noa ˈtu e vai ara te mau matahiapo, eiaha râ ratou ia manaˈo eita te tahi taata rave hara e nehenehe e fanaˈo i to Iehova aroha hamani maitai. b—Pet. 1, 2:10.
EAHA TA TE AMUIRAA E RAVE?
13. Hoê â huru anei to tatou i nia i te hoê taata tei aˈohia e te hoê mero tei tuuhia i rapae?
13 Mai ta tatou i hiˈopoa i to na mua ˈtu tumu parau, i te tahi taime e faaarahia te amuiraa e ua aˈohia te hoê taata. I roto i tera tupuraa, e nehenehe noa tatou e amuimui ia ˈna, inaha ua tatarahapa e ua rave oia i te mea maitai. (Tim. 1, 5:20) E mero noa â o ˈna no te amuiraa e e itoitohia o ˈna ma te amuimui i te mau taeae e tuahine. (Heb. 10:24, 25) Mea taa ê râ no tei tuuhia i rapae i te amuiraa. E “faaea [tatou] i te amuimui” e i te “tamaa e tera huru taata.”—Kor. 1, 5:11.
14. Eaha to tatou huru no nia i te hoê mero tei tuuhia i rapae? (A hiˈo atoa i te hohoˈa.)
14 Te auraa anei e mata ê roa tatou i tei tuuhia i rapae? Eita. Papu, e faaea tatou i te amuimui ia ˈna. Tera râ, na te taata poro tataitahi e faaoti maoti to ˈna manaˈo haava haapiihia i te Bibilia e titau manihini anei i te hoê mero tei tuuhia i rapae no te putuputuraa aore ra eita. Peneiaˈe e mea piri roa tatou ia ˈna na mua ˈˈe aore ra e fetii o ˈna no tatou. E ia haere mai o ˈna i te putuputuraa, eaha to tatou huru? Na mua ˈˈe, eita tatou e aroha i tei tuuhia i rapae. I roto atoa i tera tupuraa, na te taata poro tataitahi e faaoti maoti to ˈna manaˈo haava haapiihia i te Bibilia e aroha poto noa aore ra e farii maitai i tera taata i te putuputuraa. Tera râ, eita tatou e paraparau maoro ia ˈna, a faahoa roa ˈtu ai.
Na te Kerisetiano tataitahi e faaoti maoti to ˈna manaˈo haava haapiihia i te Bibilia, e titau manihini i te putuputuraa te hoê mero tei tuuhia i rapae, e aroha poto noa aore ra e farii maitai ia ˈna (A hiˈo i te paratarafa 14)
15. O vai ma tei faahitihia i roto i te Ioane 2, 9-11? (A hiˈo atoa i te tumu parau tarenihia “ Hoê â anei hara ta Ioane raua Paulo i faahiti?”)
15 E na ô paha vetahi: ‘Aita anei te Bibilia e faaue mai ra eiaha e aroha i te hoê mero tei tuuhia i rapae? Aita anaˈe, te turu ra ïa tatou i ta ˈna ohipa ino, e ere?’ (A taio i te Ioane 2, 9-11.) I roto i te Ioane 2, 9-11, te faahitihia ra te parau o te mau apotata e te feia e turai ra ia vetahi ê ia rave i te ohipa ino. (Apo. 2:20) Mai te peu tera ta teie taata i rave, eita te mau matahiapo e farerei ia ˈna. Papu, e nehenehe o ˈna e tatarahapa i muri iho. A tiai noa ˈi râ i tera taime, eita tatou e aroha i teie taata aore ra e titau manihini ia ˈna i te putuputuraa.
A PEE I TO IEHOVA AUMIHI E AROHA HAMANI MAITAI
16-17. (1) Eaha ta Iehova e hinaaro ia rave te taata rave hara? (Ezekiela 18:32) (2) E nafea te mau matahiapo e ohipa amui ai e Iehova?
16 Eaha ta tatou i haapii mai i roto i teie vea? Eita Iehova e hinaaro ia haamouhia te tahi taata! (A taio i te Ezekiela 18:32.) E hinaaro o ˈna ia faahau te taata rave hara e o ˈna. (Kor. 2, 5:20) No reira Iehova i faaitoito noa ˈi i to ˈna nunaa e ta ˈna mau tavini tataitahi ia tatarahapa e ia hoˈi mai ia ˈna ra. E ohipa amui te mau matahiapo e Iehova no te tauturu i te taata rave hara ia tatarahapa.—Roma 2:4; Kor. 1, 3:9.
17 A feruri na i te oaoa i te raˈi ia tatarahapa te feia rave hara. E oaoa roa Iehova i te mau taime atoa e hoˈi mai ai hoê o tei atea ê i te amuiraa. E rahi roa ˈtu to tatou here ia Iehova ia feruriruri tatou i to ˈna maitai rahi, to ˈna aumihi e to ˈna aroha hamani maitai.—Luka 1:78.
HIMENE 111 Ia oaoa tatou i te Atua
a Eita tatou e parau faahou e ua tiavaruhia te hoê taata rave hara tei ore i tatarahapa. Ia au i ta Paulo i faahiti i te Korinetia 1, 5:13, e parau tatou i teie nei e ua tuuhia te hoê mero i rapae i te amuiraa.
b Ia au i te Bibilia, te vai ra te hara o te ore e faaorehia, mai te patoi-uˈana-raa i te Atua. E ere râ na tatou e faaoti ta vai hara e faaorehia aore ra eita. Na Iehova raua Iesu anaˈe tera hopoia.—Mar. 3:29; Heb. 10:26, 27.
