1. Eaha te huru o te taata i mua i te mau aˈoraa î i te paari e vai ra i roto i te Bibilia? (Maseli 1:20, 21)

 I TE tahi mau fenua, pinepine e itehia te mau Ite no Iehova e poro ra na te mau vahi taata. E oaoa ratou i te pûpû i te vea i te feia ta ratou e farerei. Ua tamata aˈena anei outou i tera huru taviniraa? Mai te peu e e, ua haamanaˈo paha te reira ia outou i tei faahitihia i roto i te buka Maseli no nia i te paari e tuô ra na te aroâ ia faaroo te taata i to ˈna reo. (A taio i te Maseli 1:20, 21.) Maoti te Bibilia e ta tatou mau papai, te fanaˈo ra tatou i te “paari mau” no ǒ mai ia Iehova. E titauhia hoi te reira no te fanaˈo i te ora mure ore. E oaoa tatou ia farii te hoê taata i ta tatou mau vea. E ere râ pauroa te farii nei i te reira. Te vai ra vetahi o te ore e anaanatae i te haapii i te Bibilia. E faaooo atoa paha vetahi ia tatou. Te manaˈo ra ratou e aita e faufaaraa to te Bibilia i teie mahana. E faaino atoa vetahi ia tatou no te mea te pee nei tatou i te mau aratairaa Bibilia no nia i te mea maitai e te mea ino. Te parau nei ratou e mea etaeta roa tatou e te manaˈo ra tatou e mea maitai aˈe tatou ia vetahi ê. No to Iehova râ here i te taata, te horoa ra o ˈna i te mau ravea ia fanaˈo ratou i te paari mau. Eaha ïa teie mau ravea?

2. Ihea e itehia ˈi te paari mau, eaha râ ta te rahiraa o te taata i faaoti i te rave?

² E horoa Iehova i to ˈna paari na roto i ta ˈna Parau, te Bibilia. E nehenehe te taata atoa e fanaˈo i tera buka. Te vai atoa râ ta tatou mau papai niuhia i nia i te Bibilia. Maoti Iehova, ua piahia te reira na roto hau atu 1 000 reo. E faufaahia te taata atoa ia taio e ia faaohipa ratou i te reira. Tera râ, aita te rahiraa e hinaaro e faaroo ia Iehova. I mua  i te hoê faaotiraa, e tiaturi ratou ia ratou iho aore ra e pee ratou i te aˈoraa a te taata. No te mea te pee ra tatou i te mau faaueraa Bibilia e faaino ratou ia tatou. I roto i teie tumu parau haapiiraa, e ite tatou no te aha ratou e patoi ai i te mau aˈoraa paari e vai ra i roto i te Bibilia. Na mua râ, e hiˈopoa tatou eaha te titauhia ia rave no te fanaˈo i te paari no ǒ mai ia Iehova.

3. Eaha te titauhia ia tatou ia rave no te fanaˈo i te paari mau?

³ Te paari, o te faaohiparaa ïa i te mea ta tatou e ite no te rave i te hoê faaotiraa maitai. No te fanaˈo râ i te paari mau, e titauhia ia rave hau atu â. Te na ô ra te Bibilia: “Te mǎtaˈu ia Iehova, o te haamataraa ïa o te paari, e te ite i Tei Moˈa Roa ˈˈe, o te maramarama ïa.” (Mas. 9:10) No reira, ia rave tatou i te hoê faaotiraa rahi, e titauhia ia tatou ia imi i “te ite i Tei Moˈa Roa ˈˈe,” oia hoi, te manaˈo o Iehova, ma te taio i te Bibilia e ta tatou mau papai. I reira noa tatou e fanaˈo ai i te paari mau.—Mas. 2:5-7.

4. No te aha o Iehova anaˈe te nehenehe e horoa mai i te paari mau?

⁴ O Iehova anaˈe te nehenehe e horoa mai i te paari mau. (Roma 16:27) No te aha mea tano ia parau e no ǒ mai ia ˈna ra te paari mau? Na mua roa, o ˈna te Atua poiete, ua ite maitai ïa o ˈna i te mau mea atoa ta ˈna i poiete. (Sal. 104:24) Te piti, e itehia to ˈna paari na roto i te mau mea atoa ta ˈna i poiete. (Roma 11:33) Te toru, ia horoa Iehova i te aˈoraa, e faufaahia te feia e pee ra i te reira. (Mas. 2:10-12) No te fanaˈo i te paari mau, mea tia ia farii tatou i na haapiiraa e toru no nia ia Iehova e ia vaiiho tatou i te reira ia aratai i ta tatou mau faaotiraa e ohipa.

5. Eaha te tupu ia ore te taata e farii e o Iehova anaˈe te nehenehe e horoa mai i te paari mau?

⁵ I roto i te pororaa, pinepine tatou i te farerei i te taata o te parau e mea nehenehe roa te mau mea atoa e haaati ra ia tatou. Tera râ, aita ratou e tiaturi nei i te hoê Atua Poiete. I to ratou manaˈo, ua tupu noa mai te mau mea atoa. Area vetahi, te tiaturi nei ratou i te Atua, aita râ ratou e haafaufaa ra i te mau faaueraa Bibilia, mea au aˈe na ratou e ora mai ta ratou e hinaaro. Eaha te faahopearaa? Ua maitai anei te oraraa o te taata a rave ai i ta ratou e hinaaro ma te ore e tâuˈa ia Iehova? Te oaoa mau ra anei ratou e e tiaturiraa papu anei to ratou no a muri aˈe? A hiˈo ai i te mau tupuraa na te ao nei e tu to tatou manaˈo i teie parau mau: “Aita e paari, aita e haroˈaroˈa, aita atoa e aˈoraa o te haafifi i te hinaaro o Iehova.” (Mas. 21:30) E turai te reira ia tatou ia feruri i nia i te faufaaraa ia tamau i te imi i te paari mau no ô mai ia Iehova! No te aha râ mea rahi o te ore e na reira ra?

6. Ia au i te Maseli 1:22-25, o vai te patoi ra i te paari no ǒ mai ia Iehova?

⁶ Mea rahi o te patoi nei i te paari no ǒ mai ia Iehova. Te faahiti ra te Bibilia e toru pǔpǔ taata o te patoi nei i te paari, te vai ra “te feia maˈua,” “te feia faaooo” e “te feia maamaa.” (A taio i te Maseli 1:22-25.) E hiˈopoa tatou no te aha na pǔpǔ taata e toru e patoi ai i te paari no ǒ mai i te Atua e eaha te rave no te ore e pee i to ratou huru.

7. No te aha vetahi e maiti ai i te riro ei “taata maˈua”?

⁷ E vare hanoa te “taata maˈua” e mea  ohie ia haavare ia ratou. (Mas. 14:15, nota) Pinepine tatou i te farerei i teie huru taata i roto i te pororaa. A feruri na i na mirioni taata te haavarehia ra e te mau tia haapaoraa e tia faatere. E inoino roa vetahi a ite ai e ua haavarehia ratou e teie mau tia. No te feia râ i faahitihia i roto i te Maseli 1:22, na ratou i maiti i te riro ei taata maˈua. (Ier. 5:31) Mea au aˈe na ratou e rave mai ta ratou e hinaaro. Aita ratou e hinaaro e haapii i te Bibilia aore ra e pee i te mau faaueraa Bibilia. Hoê â manaˈo to vetahi atu e to te hoê vahine no Kanada tei parau i te hoê Ite no Iehova: “Noa ˈtu ua haavarehia matou e to matou perepitero, o ˈna ïa tei hape e ere o matou!” Eita roa ˈtu tatou e hinaaro e pee i te huru o teie feia maˈua!—Mas. 1:32; 27:12.

8. Eaha te tauturu ia tatou ia fanaˈo i te paari mau?

⁸ Te faaitoito mai ra te Bibilia eiaha ia feruri mai te tamarii ra, ia feruri râ “mai te taata paari ra.” (Kor. 1, 14:20) E fanaˈo tatou i te paari mau ma te faaohipa i te mau faaueraa Bibilia i roto i to tatou oraraa. A na reira ˈi, e ite tatou e nafea te Bibilia e tauturu mai ai ia ape i te mau fifi e ia rave i te mau faaotiraa î i te paari. Mea maitai ia feruri tatou i te mau faaotiraa ta tatou i rave. Peneiaˈe te haapii ra tatou i te Bibilia e te apiti atoa nei i te mau putuputuraa. Mea maitai râ ia ui ia tatou no te aha aita tatou i rave atura i te mau taahiraa no te pûpû ia tatou ia Iehova e no te bapetizo ia tatou. Mai te peu ua bapetizo-aˈena-hia tatou, ua riro anei tatou ei taata poro aore ra ei taata haapii aravihi aˈe? Te pee ra anei tatou i te mau faaueraa Bibilia a rave ai i te hoê faaotiraa? Te faatupu ra anei tatou i te mau huru maitatai i nia ia vetahi ê? Mai te peu e titauhia ia tatou ia rave i te tahi mau tauiraa, mea tia ia haamanaˈo tatou i te mau faaararaa a Iehova o te tauturu i “te feia ite ore” ia fanaˈo i “te paari.”—Sal. 19:7.

9. E nafea te “feia faaooo” e faaite ai e te patoi ra ratou i te paari mau?

⁹ O te “feia faaooo,” te piti o te pǔpǔ taata o te ore e tâuˈa ra i te paari mau. E farerei atoa tatou i teie huru taata i roto i te pororaa. Mea au na ratou e faaooo ia vetahi ê. (Sal. 123:4) Ua tohu te Bibilia e itehia e rave rahi feia faaooo i te mau mahana hopea. (Pet. 2, 3:3, 4) Mai te mau hunoa a Lota, aita vetahi i teie mahana e faaroo ra i te mau faaueraa a te Atua. (Gen. 19:14) Mea rahi o te faaooo nei i te feia o te pee ra i te mau aratairaa Bibilia. E haapao noa te feia faaooo “i to ratou iho mau hinaaro ino.” (Iuda 7, 17, 18) Hoê â to ratou huru e to te mau apotata e to te feia e patoi ra ia Iehova.

10. Mai tei faahitihia i roto i Salamo 1:1, eaha te tia ia rave ia ore e riro mai te feia faaooo?

¹⁰ Eaha te haapapu ra e aita tatou e pee ra i te huru o te feia faaooo? Hoê ravea, o te oreraa ïa e haere na muri i te feia mauruuru ore o te faaino noa. (A taio i te Salamo 1:1.) Eita tatou e faaroo aore ra e taio i te tahi noa ˈˈe mea no ô mai i te mau apotata. Aita anaˈe tatou e vai ara, e nehenehe tatou e faatupu i te hoê huru feruriraa mauruuru ore no nia ia Iehova e te mau aratairaa ta ta ˈna faanahonahoraa e horoa mai. No reira, mea faufaa ia ui ia tatou iho: ‘Ia horoahia mai te hoê aratairaa aore ra faatanoraa apî e amuamu anei au? E faaino anei au i te mau faaotiraa a te mau matahiapo?’ E mauruuru roa Iehova, ia tutava tatou i te haapae roa i teie huru feruriraa.—Mas. 3:34, 35.

11. Eaha te huru o te “feia maamaa” i mua i te mau ture aveia a Iehova?

 ¹¹ O te “feia maamaa,” te toru o te pǔpǔ o te patoi nei i te paari mau. E haerea maamaa to ratou no te mea aita ratou e hinaaro e pee i te mau ture aveia a te Atua. Mea au aˈe na ratou e rave mai ta ratou e hinaaro. (Mas. 12:15) A na reira ˈi, te patoi ra ratou ia Iehova, te Atua î i te paari. (Sal. 53:1) Ia farerei tatou ia ratou i roto i te pororaa, pinepine ratou i te faaino ia tatou no te mea te pee ra tatou i te mau faaueraa Bibilia. E ere râ na ratou e horoa mai i te hoê oraraa maitai aˈe. Te parau ra te Bibilia: “Eita e noaa i te maamaa te paari mau. Aita ta ˈna e parau i te uputa o te oire.” (Mas. 24:7) Taa ê atu ia Iehova, aita te feia maamaa e nehenehe e horoa i te aˈoraa î i te paari. No reira Iehova e ani ai ia tatou ia “faaatea ê mai i te maamaa.”—Mas. 14:7.

12. Eaha te tauturu mai ia ore e riro mai te feia maamaa ra te huru?

¹² Mea taa ê tatou i te feia e patoi ra i te mau ture aveia a te Atua. Mea au na tatou i te mau huru raveraa a Iehova e i ta ˈna mau ture aveia. E haafaufaa ˈtu â tatou i te reira a feruri ai i nia i te mau maitai ta tatou e fanaˈo ra e i te mau faahopearaa ino ta te feia faaroo ore e ite. A hiˈo atoa na i te mau fifi ta e rave rahi e ite ra no to ratou patoiraa i te mau aˈoraa î i te paari a Iehova. I muri iho, a feruri i te oraraa oaoa ta outou e fanaˈo ra no te mea te faaroo ra outou i te Atua.—Sal. 32:8, 10.

13. Te faahepo ra anei Iehova ia tatou ia pee i ta ˈna mau aˈoraa î i te paari?

¹³ Te horoa ra Iehova i te ravea i te taata atoa no te fanaˈo i te paari mau, eita râ o ˈna e faahepo ia ratou ia farii i te reira. Papu, e faaite o ˈna i te mau faahopearaa ino ta te feia faaroo ore e ite. (Mas. 1:29-32) E faaruru te feia o te maiti i te faaroo ore ia Iehova “i te mau faahopearaa o to ratou haerea.” I muri aˈe, eita to ratou oraraa e maitai mai, e fifi roa ˈtu râ. E mauiui atoa ratou e i te pae hopea, e haamou Iehova ia ratou. No te feia râ o te pee ra e o te faaohipa ra i te mau aˈoraa î i te paari a Iehova, ua fafau Iehova: “Te taata o te faaroo ia ˈu, e parahi ïa ma te taiâ ore e eita oia e riaria i te ati.”—Mas. 1:33.

14-15. Eaha ta te Maseli 4:23 e haapii mai ra?

¹⁴ E faufaahia tatou ia faaohipa i te mau aˈoraa î i te paari a Iehova. Mai ta tatou i ite mai, te horoa ra Iehova i te ravea i te taata atoa no te fanaˈo i te paari mau. Ei hiˈoraa, i roto i te buka Maseli, te horoa mai ra Iehova i te mau aˈoraa no te oraraa. Ia faaohipa tatou i te reira e maitai mai to tatou oraraa. E hiˈo mai tatou e maha aˈoraa î i te paari.

¹⁵ A paruru i to oe aau. Te parau ra te Bibilia: “Hau aˈe i te tahi atu mau mea atoa, a paruru i to oe aau, tei to oe hoi aau to  oe ora.” (Mas. 4:23) A feruri na i te titauhia ia rave no te paruru i to outou mafatu. Mea faufaa ia amu tatou i te maa maitai, ia hautiuti i te tino e ia faaea i te amu i te maa e ino ai to tatou ea. Hoê â huru no te paruru i to tatou aau. Mea faufaa ia taio tatou i te Parau a te Atua i te mau mahana atoa, ia faaineine e ia horoa i te mau pahonoraa i te mau putuputuraa. Ia aravihi atu â tatou i roto i te taviniraa, e titauhia ia tatou ia tamau i te poro. E e haapae atoa tatou i te mau mea atoa o te nehenehe e tuino i to tatou ea pae varua mai te mau faaanaanataeraa faufau e te mau amuimuiraa iino.

16. E nafea te Maseli 23:4, 5 e tauturu ai ia tatou i teie mahana?

¹⁶ A mauruuru noa i te mau mea e vai ra ia outou. Teie te tahi aˈoraa Bibilia: “Eiaha e faarohirohi ia oe ia rahi ta oe mau taoˈa . . . Ia hiˈo atu oe i te reira, aita faahou, e hohora mau â hoi te reira i to ˈna na pererau mai te aeto a maue atu ai i te raˈi.” (Mas. 23:4, 5) Aita te mau taoˈa materia e vai noa mai. Tera râ, ua riro te moni ei haapeapearaa no te feia moni e no te feia veve. No reira ïa ratou e rave ai i te tahi mau mea o te tuino ra i to ratou roo, to ratou auhoaraa e o vetahi ê e to ratou ea. (Mas. 28:20; Tim. 1, 6:9, 10) I te tahi pae, e tauturu te paari ia tatou ia faatupu i te hoê feruriraa aifaito no nia i te moni. E tauturu atoa te reira ia tatou ia riro ei taata o te mauruuru e o te oaoa noa i te mau mea e vai ra ia ˈna, eiaha râ ei taata nounou taoˈa.—Koh. 7:12.

17. Mai tei faahitihia i roto i te Maseli 12:18, e nafea ta tatou mau parau e faaitoito ai ia vetahi ê?

¹⁷ A feruri hou a paraparau ai. Mai te peu eita tatou e haapao i ta tatou mau parau, e nehenehe te reira e haamauiui ia vetahi ê. Te faaite ra te Bibilia: “E au te parau feruri-ore-hia i te puta ˈoˈe, e rapaauraa râ te arero o te taata feruriraa paari.” (Mas. 12:18) Aita anaˈe tatou e hopoi haere i te parau no nia i te mau hape a vetahi ê, e vai hau noa ïa tatou e o ratou. (Mas. 20:19) Ia nehenehe ta tatou mau parau e faaitoito ia vetahi ê, e tamau tatou i te taio i te Bibilia e i te feruriruri i nia i te reira.  (Luka 6:45) A na reira ˈi, e riro ïa ta tatou mau parau mai “te puna o te paari” o te tamahanahana ia vetahi ê.—Mas. 18:4.

18. E nafea te irava o te Maseli 24:6 e tauturu ai ia tatou ia aravihi atu â i roto i te taviniraa?

¹⁸ A pee i te mau aratairaa a te faanahonahoraa. No te aha? Te pahono ra te Bibilia: “A aro i ta oe tamaˈi ma te aratairaa paari, e mea rahi anaˈe te taata aˈo, e manuïa te ohipa.” (Mas. 24:6, nota) E nafea teie irava e tauturu ai ia tatou ia aravihi atu â i roto i te taviniraa? Eita tatou e poro aore ra e haapii i te taata mai ta tatou e hinaaro, e tutava râ tatou i te pee i te mau aratairaa i horoahia mai. I te putuputuraa hebedoma, te fanaˈo ra tatou i te hiˈoraa o vetahi mau taata poro aravihi na roto i ta ratou mau oreroraa parau e te tahi atu mau tuhaa o te porotarama. Te horoa atoa mai ra te faanahonahoraa a Iehova i te tahi atu mau mauhaa no te taviniraa, mai te mau vea e video o te tauturu i te feia ia taa i te Bibilia. E tutava anaˈe ïa i te faaohipa i te reira.

19. Eaha to outou huru i mua i te mau aˈoraa î i te paari no ô mai ia Iehova? (Maseli 3:13-18)

¹⁹ A taio i te Maseli 3:13-18. Auê tatou i te mauruuru i te fanaˈo i te mau aˈoraa Bibilia! Maoti noa te reira e nehenehe ai tatou e fanaˈo i te oaoa mau. I roto i teie tumu parau haapiiraa, ua hiˈopoa tatou i te tahi mau aˈoraa paari o te buka Maseli. Papu e itehia te mau aˈoraa î i te paari a Iehova i roto i te buka Maseli, i roto atoa râ i te taatoaraa o te mau buka o te Bibilia. E titauhia ia tatou ia faaohipa i te reira i roto i to tatou oraraa. Eita te rahiraa o te taata e haafaufaa i te paari no ô mai ia Iehova. Area tatou, te haafaufaa ra ïa tatou i te reira no te mea ua papu ia tatou e “e oaoa te feia o te tapea maite i te [paari].”