1. E nafea “te mau mea pae varua” e hopoi mai ai i te oaoa mau?

 TE OAOA mau, o te hoê ïa huru aau o te vai i te roaraa o te oraraa o te hoê taata, e ere no te hoê taime poto noa. Ua parau Iesu i roto i ta ˈna Aˈoraa i nia i te mouˈa: “E oaoa te feia e hiaai ra i te mau mea pae varua.” (Mat. 5:3) Ua faahiti Iesu i “te mau mea pae varua” no te mea ua poietehia te taata e te hinaaro e ite e e haamori i to ratou Atua poiete ra, o Iehova. E “Atua oaoa” Iehova e oaoa atoa ïa te feia e haamori ra ia ˈna.—Tim. 1, 1:11.

2-3. (1) Ia au i te Aˈoraa a Iesu, o vai ma te nehenehe e fanaˈo i te oaoa mau? (2) Eaha ta tatou e hiˈopoa i roto i teie tumu parau haapiiraa?

² E oaoa anei tatou i te mau taime noa aita to tatou e fifi? Aita. I roto i ta ˈna Aˈoraa, ua parau Iesu e noa ˈtu te “oto nei” vetahi no te hoê hara ta ratou i rave aore ra no te tahi fifi ta ratou e faaruru ra, e nehenehe ratou e oaoa. Tera atoa ta Iesu i parau no “te feia tei hamani-ino-hia no te parau-tia” e tei pari-haavare-hia no te mea e pǐpǐ ratou na te Mesia. (Mat. 5:4, 10, 11) E nafea râ ia oaoa a faaruru ai i teie mau tupuraa?

³ Ua parau Iesu e e nehenehe tatou e fanaˈo i te oaoa mau ma te haamâha i to tatou mau hinaaro pae varua e ma te faafatata ˈtu ia Iehova. (Iak. 4:8) I roto i teie tumu parau haapiiraa, e hiˈopoa tatou e toru ravea no te fanaˈo i te oaoa mau.

4. Eaha te ravea matamua no te fanaˈo i te oaoa mau? (Salamo 1:1-3)

⁴ RAVEA MATAMUA: No te fanaˈo i te oaoa mau, e tia  ia tatou ia taio e ia haapii i te Bibilia. Ua faaau Iesu i te Bibilia i te maa. E titauhia i te taata oia atoa i te animara ia amu i te maa no te ora. O te taata anaˈe râ te nehenehe e taio i te Bibilia. Mea faufaa roa hoi te reira. No reira Iesu i parau ai: “Eita te taata e ora i te maa anaˈe, i te mau parau atoa râ no roto mai i te vaha o Iehova.” (Mat. 4:4) E tamau anaˈe ïa i te taio i te Bibilia i te mau mahana atoa. Ua parau te papai Salamo: ‘E oaoa te taata e mea au roa na ˈna i te ture a Iehova e o te taio maite ra i ta ˈna ture i te po e te ao.’—A taio i te Salamo 1:1-3.

5-6. (1) Eaha ta tatou i haapii i roto i te Bibilia? (2) E nafea te taioraa Bibilia e tauturu ai ia tatou?

⁵ No to ˈna here, ua faaite Iehova i roto i te Bibilia eaha te tia ia tatou ia rave no te fanaˈo i te hoê oraraa oaoa. Ua haapii tatou eaha te opuaraa a Iehova no te huitaata. Ua haapii atoa tatou e nafea ia faafatata ˈtu ia ˈna e eaha te rave ia nehenehe o ˈna e faaore i ta tatou mau hara. Ua ite atoa tatou eaha te a muri aˈe faahiahia mau ta ˈna i fafau. (Ier. 29:11) A haapii ai i tera pue parau mau Bibilia, e oaoa tatou.

⁶ E rave rahi aˈoraa î i te paari i roto i te Bibilia. Ia faaohipa tatou i teie mau aˈoraa, e oaoa iho â tatou. Ia toaruaru noa ˈtu tatou no te mau fifi o te oraraa, e tutava anaˈe i te taio i te Bibilia e i te feruriruri i nia i te reira. Ua parau hoi Iesu: “Mea oaoa aˈe te feia e faaroo e e haapao i te parau a te Atua!”—Luka 11:28.

7. E nafea oe e faufaahia ˈi i ta oe taioraa Bibilia?

⁷ A taio ai i te Parau a te Atua, a rave i  te taime ia faufaahia oe i ta oe i taio. Teie te tahi hiˈoraa. E tunu te hoê taata i te maa ta oe e au roa ˈˈe. No te poto râ o te taime aore ra no te mea te haapeapea ra oe no te tahi ohipa, horomii noa ˈtura oe i te maa a ore atu ai e rave i te taime no te amu maitai i te reira. I to oe râ paiaraa, feruri atura oe ahani oe i rave i te taime no te tamaa, e mauruuru ïa oe i ta oe maa. Hoê â huru ia taio tatou i te Bibilia. I te tahi taime, e taio noa tatou ma te ru. Aita ˈtura ïa tatou i rave i te taime no te fanaˈo i ta Iehova haapiiraa. A rave ïa i te taime no te taio i te Bibilia, a feruri i te tupuraa e i te reo o te mau taata e paraparau ra. A feruriruri i nia i te aamu ta oe i taio. A na reira ˈi, e faufaahia oe i ta oe taioraa.

8. E nafea “te tavini haapao maitai e te paari” e amo ai i ta ˈna hopoia? (A hiˈo atoa i te nota.)

⁸ Ua faatoroa Iesu i “te tavini haapao maitai e te paari” no te horoa i te maa pae varua i te taime tano e te fanaˈo ra tatou i te rahi o te maa pae varua. * (Mat. 24:45) Ua niuhia te mau mea atoa ta te tavini haapao maitai e faaineine ra i nia i te Bibilia. (Tes. 1, 2:13) Maoti tera maa pae varua e nehenehe ai tatou e taa i to Iehova manaˈo faahitihia i roto i te Bibilia. No reira tatou e taio ai i Te Pare Tiairaa, te A ara mai na! e te mau tumu parau i nia i te jw.org. E faaineine atoa tatou i te mau putuputuraa i te mau hebedoma atoa e e mataitai tatou i te JW Haapurororaa teata i te mau avaˈe atoa. Ia tamau tatou i te taio e i te haapii i te Bibilia, e nehenehe tatou e faaohipa i te piti o te ravea titauhia no te fanaˈo i te oaoa mau.

9. Eaha te piti o te ravea no te fanaˈo i te oaoa mau?

⁹ RAVEA PITI: No te fanaˈo i te oaoa mau, e tia ia tatou ia ora ia au i te mau ture aveia a Iehova. Te parau ra te hoê papai Salamo: “E oaoa te taata atoa o te mǎtaˈu ia Iehova, o te haere na to ˈna ra mau eˈa.” (Sal. 128:1) Eaha te auraa o te parau “mǎtaˈu ia Iehova”? O te faaiteraa ïa i te faatura rahi ia ˈna a ore atu ai e rave i te tahi noa ˈˈe ohipa o te haamauiui ia ˈna. (Mas. 16:6) No reira tatou e tutava ˈi i te ora ia au i te mau ture aveia a te Atua no nia i te mea maitai e te mea ino, mai tei faataahia i roto i te Bibilia. (Kor. 2, 7:1) E oaoa tatou a rave ai i te ohipa ta Iehova e au ra e a patoi ai i te mau mea ta ˈna e au ore ra.—Sal. 37:27; 97:10; Roma 12:9.

10. Ia au i te Roma 12:2, eaha ta tatou hopoia?

¹⁰ A taio i te Roma 12:2. Ua ite te hoê taata e mana to Iehova no te faaoti eaha te mea maitai e te mea ino, e titauhia râ ia ˈna ia pee i te mau ture aveia a Iehova. Ei hiˈoraa, ua ite paha te hoê taata e mana to te mau tia faatere no te taotia i te vitiviti o te faahororaa pereoo i nia i te purumu. Aita râ o ˈna e hinaaro e pee i tera ture. Ei faahopearaa, e faahoro vitiviti o ˈna i te pereoo. Hoê â huru no tatou. E faaite tatou na roto i to tatou haerea e te tiaturi mau ra tatou e o te mau ture aveia a Iehova te mea maitai roa ˈˈe no tatou. (Mas. 12:28) O ta Davida ïa i haapapu a parau ai: “Te faaite mai ra oe ia ˈu i te eˈa o te ora. Tei mua ia oe te oaoa rahi. E oaoa tei to rima atau ra e a muri noa ˈtu.”—Sal. 16:11.

11-12. (1) Ia toaruaru tatou, eaha te tia ia tatou ia vai ara? (2) E nafea te mau parau o te Philipi 4:8 e tauturu ai ia tatou ia maiti maitai i ta tatou mau faaanaanataeraa?

 ¹¹ Ia toaruaru tatou, e hinaaro paha tatou e rave i te tahi ohipa o te tauturu mai ia faaea i te haapeapea. Mea tano iho â te reira, tera râ, mea tia ia vai ara tatou no te ore e rave i hoê ohipa ta Iehova e au ore ra.—Eph. 5:10-12, 15-17.

¹² I roto i ta ˈna rata i te amuiraa no Philipi, ua ani Paulo ia ratou ia tamau i te haafaufaa i “te mau mea tia, te mau mea viivii ore, te mau mea e faatupu i te here . . . [e] te mau mea maitatai.” (A taio i te Philipi 4:8.) Noa ˈtu aita Paulo i faahiti i te faaanaanataeraa, e nehenehe tera irava e tauturu ia tatou ia maiti maitai i ta tatou mau faaanaanataeraa. A tamata na i te taui i te taˈo “te mau mea” i roto i te irava ma te faaohipa i te parau o “te mau himene,” “te mau hohoˈa teata,” “te mau poroi faatianianiraa” aore ra “te mau hauti.” A na reira ˈi, e taa ia outou eaha te mau mea ta Iehova e au e e au ore ra. E hinaaro iho â tatou e ora ia au i te mau ture aveia tia roa a Iehova. (Sal. 119:1-3) Maoti te hoê manaˈo haava mâ, e nehenehe tatou e faaohipa i te toru o te ravea titauhia no te fanaˈo i te oaoa mau.—Ohi. 23:1.

13. Eaha te toru o te ravea no te fanaˈo i te oaoa mau? (Ioane 4:23, 24)

¹³ RAVEA TORU: A tuu i te haamoriraa ia Iehova i te parahiraa matamua i roto i to outou oraraa. I te mea e o Iehova te Atua poiete, mea tia iho â ïa ia haamori tatou ia ˈna. (Apo. 4:11; 14:6, 7) Te auraa, o te haamoriraa ia Iehova te mea faufaa roa ˈˈe i roto i to tatou oraraa. Te hinaaro ra Iehova ia haamori tatou ia ˈna “ma te varua e te parau mau.” (A taio i te Ioane 4:23, 24.) E hinaaro tatou ia aratai te varua moˈa o te Atua i ta tatou haamoriraa e ia tuati te reira i te pue parau mau o te Bibilia. E tia ia tamau tatou i te haamori ia Iehova, noa ˈtu te ora ra tatou i te fenua ua opanihia te ohipa pororaa. I teie mahana, ua hau i te 100 taeae e tuahine tei tapeahia no te mea noa e Ite no Iehova ratou. * Noa ˈtu râ, te tamau ra ratou i te pure, i te haapii i te Bibilia e i te faaite ia vetahi ê o vai te Atua e eaha ta ta ˈna Faatereraa arii e rave no te huitaata. Ia pari haavare-hia aore ra ia hamani-ino-hia tatou, e nehenehe tatou e oaoa no te mea e tauturu Iehova ia tatou ia faaoromai tamau i te reira.—Iak. 1:12; Pet. 1, 4:14.

14. Eaha ta te hoê taeae apî no Tajikistan i faaruru e no te aha?

¹⁴ E rave rahi taeae e tuahine tei faaruru i te mau fifi, noa ˈtu râ ua fanaˈo ratou i te oaoa mau a faaohipa ˈi i na ravea e toru ta tatou i ite mai nei. Teie te hiˈoraa o taeae Jovidon Bobojonov e ora ra i Tajikistan, e 19 noa matahiti to ˈna. Aita o ˈna i farii i te rave i te tau faehau. I te 4 no Atopa 2019, ua tuuhia o ˈna tau avaˈe i roto i te fare tapearaa e ua hamani-ino-hia o ˈna. Ua haapurarahia tera tupuraa na te ao nei. Ua parauhia e ua taparahihia o ˈna no te mea aita o ˈna i hinaaro e faahanahana i te reva e aita atoa o ˈna i  hinaaro e oomo i te ahu faehau. I muri aˈe i to ˈna haavaraahia, afaihia ˈtura o ˈna i te hoê aua haavîraa tae roa ˈtu i te taime i farii ai te peretiteni o te hau fenua ia tuuhia o ˈna. I te roaraa o tera tupuraa, ua tapea noa Jovidon i to ˈna hapa ore e to ˈna oaoa. Eaha tei tauturu ia ˈna? Ua tamau o ˈna i te haapao i to ˈna mau hinaaro pae varua.

15. Mea nafea to Jovidon tamauraa i te haapii no nia ia Iehova a tapeahia ˈi o ˈna?

¹⁵ I te fare tapearaa, noa ˈtu aita ta ˈna e Bibilia e te tahi atu mau papai, ua tamau Jovidon i te haapii no nia ia Iehova. Ia afai te tahi mau taeae e tuahine i te maa na ˈna, e papai ratou i te irava mahana i nia i te mau pute maa. Mea na reira ïa o ˈna i te taioraa i te Bibilia i te mau mahana atoa e i te feruriruriraa i nia i te reira. I to ˈna matararaa mai, ua parau o ˈna i te feia aita i faaruru atura i teie huru tamataraa: “A faaohipa maitai i to outou taime no te haapii atu â no nia ia Iehova ma te taio i te Bibilia e i ta tatou mau papai.”

16. Ua tiatonu Jovidon i nia i te aha?

¹⁶ Ua ora to tatou taeae ia au i te mau ture aveia a Iehova. Aita o ˈna i rave i te ohipa tano ore. Ua tamau râ o ˈna i te tiatonu  i nia ia Iehova e te mau mea ta Iehova e au. Ua faahiahia roa Jovidon i te mau mea ta Iehova i poiete. I te mau poipoi atoa e faaroo o ˈna i te taˈi o te mau manu. I te po, e mataitai o ˈna i te avaˈe e te mau fetia. Ua parau o ˈna: “Ua oaoa e ua itoito noa vau maoti teie mau ǒ no ô mai ia Iehova.” Ia mauruuru tatou i te mau mea atoa ta Iehova e horoa mai, e oaoa to tatou nei aau e e tauturu te reira ia tatou ia faaoromai tamau.

17. E nafea te mau parau o te Petero 1, 1:6, 7 e tauturu ai i te hoê taata o te faaruru ra i te hoê â tupuraa e to Jovidon?

¹⁷ Ua tuu atoa Jovidon i te haamoriraa ia Iehova i te parahiraa matamua. Ua taa ia ˈna i te faufaaraa ia vai taiva ore i te Atua mau. Ua parau Iesu: “O Iehova to oe Atua ta oe e haamori, e ia ˈna anaˈe e pûpû ai oe i te hoê taviniraa moˈa.” (Luka 4:8) Ua hinaaro te mau raatira faehau ia faaea Jovidon i te tavini ia Iehova. Tera râ, ua tamau Jovidon i te pure i te mau mahana e te mau po atoa ma te ani ia Iehova i te tauturu no te ore e taiva ia ˈna. Ei faahopearaa, ua nehenehe o ˈna e oaoa e ua puai atu â to ˈna faaroo, noa ˈtu ua tapeahia e ua hamani-ino-hia o ˈna.—A taio i te Petero 1, 1:6, 7.

18. E nafea tatou e oaoa noa ˈi?

¹⁸ Ua ite Iehova eaha ta tatou e hinaaro mau ra no te fanaˈo i te oaoa mau. Ia pee outou i na ravea e toru, e nehenehe outou e oaoa noa ˈtu te mau fifi ta outou e faaruru ra. E parau atoa ïa outou mai te papai Salamo: “E oaoa te nunaa o Iehova to ratou Atua!”—Sal. 144:15.