1-2. (1) Mea nafea te mau faatereraa i te patoiraa i te nunaa o Iehova, eaha râ ta to ˈna nunaa i rave? (2) No te aha tatou e oaoa ˈi noa ˈtu te hamani-ino-raa? (A hiˈo atoa i te hohoˈa i te api matamua.)

 I TEIE mahana, ua taotiahia aore ra ua opanihia ta tatou ohipa i roto hau atu 30 fenua na te ao nei. I roto i te tahi o tera mau fenua, ua tapeahia to tatou mau taeae e tuahine. Eaha hoi te ohipa ino ta ratou i rave? I te aro o Iehova, aita hoê aˈe. Ua tapeahia ratou no te mea noa ua taio, ua haapii ratou i te Bibilia, ua faaite ratou i to ratou tiaturiraa ia vetahi ê e ua putuputu ratou e to ratou mau taeae e tuahine. Noa ˈtu te patoiraa, aita teie mau tavini taiva ore a Iehova i faaô atu i roto i te mau ohipa poritita. Ua tapea ratou i to ratou hapa ore * e ua oaoa roa ratou i te na reiraraa.

² Peneiaˈe, ua ite outou i te hohoˈa o vetahi o teie mau Ite no Iehova itoito e to ratou mata ataata. No te aha ratou e oaoa ˈi? No te mea ua mauruuru Iehova i to ratou hapa ore. (Par. 1, 29:17a) Ua parau Iesu: “E oaoa te feia tei hamani-ino-hia no te parau-tia . . . A oaoa e a umere, e haamaitairaa rahi hoi ta outou.”—Mat. 5:10-12.

3. Mai tei faahitihia i roto i te Ohipa 4:19,20, eaha ta te mau aposetolo i rave a hamani-ino-hia ˈi ratou e no te aha?

³ Hoê â tupuraa ta to tatou mau taeae e tuahine e faaruru ra i to te mau aposetolo i te senekele matamua. I to ratou pororaa no nia ia Iesu, ua hamani-ino-hia ratou.  Ehia taime to te mau haava o te tiripuna teitei ati Iuda faaueraa i te mau aposetolo “eiaha roa e paraparau, eiaha atoa e haapii i te taata ma te iˈoa o Iesu.” (Ohi. 4:18; 5:27, 28, 40) Eaha ta te mau aposetolo i rave? (A taio i te Ohipa 4:19, 20.) Ua ite ratou e tiaraa teitei aˈe to te taata ‘tei faaue ia ratou ia haere e poro i te taata e ia faaite papu’ no nia i te Mesia. (Ohi. 10:42) Ma te itoito, pahono atura Petero raua Ioane no ratou pauroa e faaroo ratou i te Atua eiaha râ i teie mau haava e eita ratou e faaea i te paraparau no nia ia Iesu. Mai te huru ra e te parau ra ratou i teie mau haava: ‘E nehenehe anei outou e parau e mea faufaa aˈe ta outou mau faaueraa i ta te Atua?’

4. Ia au i te Ohipa 5:27-29, eaha te hiˈoraa maitai ta te mau aposetolo i vaiiho no te mau Kerisetiano mau e e nafea tatou e pee ai i to ratou hiˈoraa?

⁴ Te pee nei te mau Kerisetiano mau i te hiˈoraa maitai o te mau aposetolo, ma te auraro i te Atua ei Faatere, eiaha râ te taata. (A taio i te Ohipa 5:27-29.) No to ratou hapa ore, ua rutuhia te mau aposetolo. Ua faarue râ ratou i te tiripuna teitei ati Iuda “ma te oaoa, no te mea ua vaiihohia ratou ia hamani-ino-hia no te iˈoa o Iesu” e ua tamau ratou i te poro.—Ohi. 5:40-42.

5. Eaha te mau uiraa te titauhia ia tatou ia pahono?

⁵ E hiti mai paha te tahi mau uiraa mai teie: Mea nafea te mau aposetolo i te auraroraa i te Atua eiaha râ i te taata e i te hoê â taime e faatura ˈi i te faaueraa tumu “ia auraro . . . i te feia mana”? (Roma 13:1) E nafea tatou e nehenehe ai e “faaroo i te mau faatereraa e te feia mana” mai ta te aposetolo Paulo i parau, e i te hoê â taime e vai taiva ore ia Iehova, to tatou Faatere?—Tito 3:1.

6. (1) O vai “te feia mana” faahitihia i roto i te Roma 13:1 e eaha te titauhia ia tatou ia rave? (2) Eaha râ te tia ia haamanaˈo no nia i te mau tia faatere atoa?

⁶ A taio i te Roma 13:1. Te “feia mana” i roto i teie irava, o te mau tia faatere ïa e mana to ratou i nia i te tahi atu. Mea tia  ia auraro te mau Kerisetiano ia ratou. Te haapao ra teie “feia mana” ia ore te oraraa ia huehue, ia pee te taata i te mau ture e i te tahi taime e paruru ratou i te mau Ite no Iehova. (Apo. 12:16) No reira, mea tia ia aufau tatou i te mau tute e ia faaite i te mǎtaˈu e te faatura ia ratou. (Roma 13:7) Tera râ, e mana to te mau faatereraa no te mea noa ua horoa Iehova i te tiaraa mana ia ratou. O ta Iesu atoa ïa i haapapu a haavahia ˈi o ˈna na te tavana hau Roma Ponotio Pilato. I to Pilato parauraa ia Iesu e nehenehe o ˈna e faaoti e tuu ia ˈna aore ra e haapohe ia ˈna, pahono atura Iesu: “Aita to oe e mana i nia ia ˈu mai te peu aita taua mana ra i horoahia mai ia oe ra e te Atua.” (Ioa. 19:11) Mai ia Pilato, i teie mahana, mea taotiahia te mana o te mau tia faatere.

7. I roto i teihea mau tupuraa eita roa ˈtu tatou e auraro i te mau tia faatere e eaha te titauhia ia ratou ia haamanaˈo?

⁷ Mea tia ia pee te mau Kerisetiano i te mau ture ta te mau faatereraa i haamau ia ore te reira e ofati i te mau ture a te Atua. Eita tatou e faaroo ia anihia mai ia rave i te tahi ohipa ta te Atua e opani ra. Eita atoa tatou e faaroo ia opani ratou ia tatou ia rave i te hoê ohipa ta te Atua e farii. Ei hiˈoraa, e titau ratou ia haere te feia apî i te tamaˈi. * Aore ra e opani ratou i te Bibilia e i ta tatou mau papai. E opani atoa ratou i te ohipa pororaa e i ta tatou mau putuputuraa. Ia faaohipa te mau tia faatere i to ratou mana ma te tano ore e no te hamani ino i te mau pǐpǐ a Iesu, e haavahia ratou e Iehova. Te ite ra Iehova i te mau mea atoa ta ratou e rave ra!—Koh. 5:8.

8. Eaha te taa-ê-raa i rotopu i te taˈo “mana” e “hau ê” e no te aha mea faufaa ia taa tatou i te reira?

⁸ Te auraa o te taˈo “mana” o te hoê ïa tiaraa mana “maitai aˈe, rahi aˈe e teitei aˈe.” E ere râ te auraa, e tiaraa mana “maitai roa ˈˈe, rahi roa ˈˈe e teitei roa ˈˈe.” E tano ïa te reira i te tahi atu taˈo, oia hoi, “hau ê.” Noa ˈtu, ua faaohipahia te parau “te feia mana” no te mau faatereraa, te vai ra te hoê tiaraa mana teitei aˈe aore ra hau aˈe ia ratou. I roto i te Bibilia, e maha taime to te Atua pii-raa-hia “Tei Hau ê.”—Dan. 7:18, 22, 25, 27.

9. Eaha ta Daniela i ite orama?

⁹ Ua ite te peropheta Daniela i te tahi orama o te faaite ra i te tiaraa hau ê o Iehova. Ua ite na mua Daniela e maha tiapai animara o tei faahohoˈahia i te mau faatereraa i tahito ra, oia hoi, Babulonia, Medai Peresia, Heleni e Roma. Oia atoa te hau puai Beretane Marite o te faatere ra i teie mahana. (Dan. 7:1-3, 17) I muri mai, ua ite Daniela ia Iehova e parahi ra i nia i to ˈna terono i te raˈi. (Dan. 7:9, 10) Ua riro te orama ta Daniela i ite ei faaararaa no te mau tia faatere i teie mahana.

10. Ia au i te Daniela 7:13, 14, 27, ia vai mâ Iehova e horoa ˈi i te tiaraa mana e faatere i te fenua e eaha ta te reira e haapapu ra no nia ia ˈna?

¹⁰ A taio i te Daniela 7:13, 14, 27. E tatara te Atua i te tiaraa mana o te mau faatereraa atoa. E horoa o ˈna i te reira i “te hoê taata e au i te tamaiti a te taata” oia hoi, Iesu Mesia, e i “tei moˈa o Tei Hau ê,” oia hoi, na 144 000 feia faatavaihia o te faatere “a muri, e a muri noa ˈtu.”  (Dan. 7:18) Mea papu, o Iehova “Tei Hau ê” no te mea o ˈna anaˈe te nehenehe e rave i te reira.

11. Eaha ta Daniela i parau o te faaite ra i te tiaraa hau ê o Iehova i nia i te mau nunaa?

¹¹ Te tuati ra te orama ta Daniela i ite i ta ˈna i parau na mua ˈtu. Ua parau hoi o ˈna, ‘E tatara te Atua o te raˈi i te mau arii e e haamau o ˈna i te mau arii.’ Ua parau atoa o ˈna: “O Tei Teitei Roa ˈˈe te Faatere i te faatereraa arii a te huitaata e e horoa oia i te mana faatere i te taata ta ˈna e hinaaro.” (Dan. 2:19-21; 4:17) Ua tupu anei teie parau tohu i tahito ra? E.

12. Mea nafea to Iehova faaiteraa i to ˈna tiaraa hau ê i nia i te tahi mau arii i tahito ra? (A hiˈo i te hohoˈa.)

¹² Ua haapapu Iehova e mea teitei aˈe o ˈna i “te feia mana.” Teie mai e toru hiˈoraa. Ua faatîtî te Pharao no Aiphiti i te nunaa o Iehova e aita roa ˈtu o ˈna i hinaaro e tuu ia ratou. Tera râ, ua faaora Iehova ia ratou e ua haapohe oia ia Pharao i roto i te miti Uteute. (Exo. 14:26-28; Sal. 136:15) Ua faatupu Belesazara te arii no Babulonia i te hoê tamaaraa e ua faateitei o ˈna ia ˈna “i mua i te Fatu o te raˈi” e ua arue o ˈna “i te mau atua ario e auro,” eiaha râ ia Iehova. (Dan. 5:22, 23) Tera râ, ua faahaehaa te Atua i teie arii teoteo. I “tera iho â po,” haapohehia ihora Belesazara e horoahia ˈtura ta ˈna faatereraa arii i to Medai e to Peresia. (Dan. 5:28, 30, 31) Ua haapohe te arii Heroda Ageripa no Paretetina i te aposetolo Iakobo e ua tuu o ˈna i te aposetolo Petero i te fare tapearaa no te haapohe ia ˈna. Aita râ Iehova i vaiiho ia manuïa te opuaraa a Heroda. “Tairi ihora te melahi a Iehova ia ˈna” e pohe ihora oia.—Ohi. 12:1-5, 21-23.

13. A faataa mea nafea Iehova i te upootiaraa i nia i te taatoaraa o te mau tia faatere tei amui no te aro i to ˈna nunaa.

¹³ I tahito ra, ua faaite Iehova i to ˈna tiaraa hau ê i nia i te mau tia faatere tei amui no te aro i to ˈna nunaa. Ua aro o ˈna no Iseraela e ua tauturu oia ia ratou ia upootia i nia e 31 arii no Kanaana. Haru atura ratou e rave rahi tuhaa o te Fenua tǎpǔhia. (Ios. 11:4-6, 20; 12:1, 7, 24) Ua tauturu atoa Iehova i to ˈna nunaa ia upootia i nia i te arii Bene-hada no  Suria tei amui i e 32 arii no te aro ia Iseraela.—Arii 1, 20:1, 26-29.

14-15. (1) Eaha ta te arii Nebukanesa e te arii Dariu i parau no nia i te tiaraa Arii hau ê o Iehova? (2) Eaha ta te hoê taata papai salamo i parau no nia ia Iehova e to ˈna nunaa?

¹⁴ E rave rahi taime to Iehova haapapuraa e o ˈna Tei hau ê! I to te arii Nebukanesa no Babulonia faatietieraa ia ˈna no ‘to ˈna puai e to ˈna mana,’ ua faahanahana e ua faateitei o ˈna ia ˈna iho, aita o ˈna i faahoˈi i te hanahana i nia ia Iehova, o Iehova hoi te tia ia aruehia. I te pae hopea, tairi atura te Atua ia ˈna e ino ihora to ˈna upoo. Ua maitai mai râ o ˈna i muri aˈe, arue ihora i “Tei Teitei Roa ˈˈe” e farii atura o ˈna e “e mana faatere mure ore” to Iehova. Ua parau atoa o ˈna: “Aita e taata e nehenehe e tapea” i te ohipa a te Atua. (Dan. 4:30, 33-35) I te hoê taime, ua tamatahia te faaroo o Daniela, ua taorahia o ˈna i roto i te hoê apoo liona. I to te arii Dariu iteraa e ua faaora Iehova ia Daniela, horoa ˈtura te arii i teie faaueraa: “Ia mǎtaˈu e ia faatura te taata atoa i te Atua o Daniela. O ˈna hoi te Atua ora e e ora oia e a muri noa ˈtu. Eita roa ta ˈna faatereraa arii e haamouhia, e mea mure ore to ˈna mana arii hau ê.”—Dan. 6:7-10, 19-22, 26, 27, nota.

¹⁵ Ua parau te hoê taata papai salamo: “Ua faahuru ê Iehova i te mau opuaraa a te mau nunaa. Ua faahape oia i te mau opuaraa a te mau nunaa.” Ua parau atoa o ˈna: “E oaoa te nunaa o Iehova to ˈna Atua, te nunaa ta ˈna i maiti ei faufaa na ˈna.” (Sal. 33:10, 12) E tumu papu to tatou ia vai taiva ore ia Iehova!

16. Ia tupu te “ati rahi,” eaha ta tatou e nehenehe e papu e no te aha? (A hiˈo i te hohoˈa.)

¹⁶ Ua ite tatou eaha ta Iehova i rave i tahito ra. Eaha râ ta tatou e tiai ra no a muri aˈe? E nehenehe tatou e papu e e faaora Iehova i ta ˈna mau tavini taiva ore  i te roaraa o te “ati rahi.” (Mat. 24:21; Dan. 12:1) Tera ta ˈna e rave ia amui te mau faatereraa o teie ao, oia hoi, Goga no Magoga no te aro i to ˈna nunaa. Noa ˈtu mea rahi ratou, e 193 fenua o te tia ra no te Hau amui, eita ratou e upootia i nia i Tei Hau ê e ta ˈna mau nuu i te raˈi. Ua fafau hoi Iehova: “E faahanahana vau ia ˈu, e haamoˈa vau ia ˈu e e faaite au o vai au i mua i te mata o te nunaa e rave rahi. E e ite ratou o vau o Iehova.”—Ezk. 38:14-16, 23; Sal. 46:10.

17. Ia au i te Bibilia, eaha te tupu no te mau arii atoa o te fenua nei e no te feia o te vai taiva ore ia Iehova?

¹⁷ E tupu te tamaˈi Aramagedo i te taime e aro ai Goga no Magoga i te nunaa o Iehova. I reira ïa Iehova e haamou roa ˈi “i te mau arii atoa o te fenua nei.” (Apo. 16:14, 16; 19:19-21) I te pae hopea, “o te feia afaro anaˈe . . . te parahi i nia i te fenua, e o te feia hapa ore anaˈe te faaea noa i reira.”—Mas. 2:21.

18. Eaha ta e rave rahi Kerisetiano mau i ineine i te rave e no te aha? (Daniela 3:28)

¹⁸ Mai te tau mai â, e rave rahi Kerisetiano tei faaruru i te hamani-ino-raa. Ua ineine roa ratou i te horoa i to ratou ora no to ratou here ia Iehova, te Arii hau ê. Aita roa ˈtu ratou i hinaaro e taiva ia Iehova. Ua pee teie mau Kerisetiano i te hiˈoraa o na toru Hebera tei faaorahia mai roto mai i te umu auahi no to ratou taiva-ore-raa i to ratou Arii hau ê, Iehova.—A taio i te Daniela 3:28.

19. Eaha ta Iehova e tapao a haava ˈi i ta ˈna mau tavini e eaha te tia ia tatou ia rave i teie nei â?

¹⁹ Ua faahiti Davida i te faufaaraa ia tapea i te hoê haerea hapa ore i mua i te Atua ma te parau: “E haava Iehova i te mau nunaa. A haava ia ˈu e Iehova, e a haamanaˈo e taata parau-tia vau e te hapa ore.” (Sal. 7:8) Hau atu, ua parau Davida: “Ia paruru te hapa ore e te afaro ia ˈu.” (Sal. 25:21) E tutava anaˈe ïa i te vai taiva ore ia Iehova noa ˈtu eaha te tupu! A na reira ˈi, hoê â manaˈo to tatou e to te hoê taata papai salamo tei parau: “E oaoa te feia o te haere ma te hapa ore, o te haapao i te ture a Iehova.”—Sal. 119:1.