I te overeraa te ati Iseraela e 40 matahiti i roto i te medebara, e mâna ta ratou maa. (Exo. 16:35) E piti atoa taime to Iehova horoaraa i te manu ei maa na ratou. (Exo. 16:12, 13; Num. 11:31) Tera râ, ua amu atoa te ati Iseraela i te tahi atu maa i roto i te medebara.

Ei hiˈoraa, i te tahi taime, ua aratai Iehova i to ˈna nunaa i “te tahi vahi faafaaearaa” i reira ratou e fanaˈo ai i te maa. (Num. 10:33) Te tahi o tera mau vahi, o te vahi haumârû ïa i Elima, “12 pape pihaa e 70 tumu tamara to reira,” eita e ore e maa to nia i te tumu tamara. (Exo. 15:27) Te faaite ra te buka Les plantes de la Bible no te maa tamara ra, “e itehia te reira i roto e rave rahi tuhaa fenua, . . . mea rahi teie maa i roto i te medebara, e nehenehe e amu ia ˈna e e hamani i te hinu. Ua riro to ˈna marumaru ei puhaparaa na e mirioni taata.”

Ua tapea atoa paha te ati Iseraela i te mau vahi haumǎrû rahi roa ˈ ˈe, i te vahi anei parauhia i teie mahana Feiran, e apoo pape atoa to reira. a Te na ô ra te tahi atu buka no taua vahi ra “e 130 kilometera te roa o te anavai i reira. Teie te anavai nehenehe, matau e te roa roa ˈ ˈe i Sinai.” Te parau-faa⁠hou-hia ra: “E 45 kilometera te atea i te muriavai, e ite mai outou i te hoê vahi haumǎrû rahi e te nehenehe, e 4,8 kilometera te roa, e tumu tamara anaˈe to reira. E tia tera vahi e 610 metera i nia i te faito o te miti. O te ô i Edene tera o Sinai. Mai te tau mai â, e rave rahi taata tei faaea i reira no tera rahiraa tumu tamara.”

I te faarueraa te ati Iseraela i Aiphiti, ua afai atoa ratou i te faraoa ota ôihia, te farii ôiraa e peneiaˈe te tahi atoa huero maa e te hinu. Papu, ua pau oioi te reira. Ua afai atoa te nunaa na muri ia ratou i “te mau nǎnǎ mamoe e puaaniho e te mau nǎnǎ puaatoro.” (Exo. 12:34-​39) No te fifi râ o te oraraa i roto i te medebara, ua pohepohe te rahiraa o te animara. Ua amu-atoa-hia paha te tahi pae e ua pûpû⁠hia te tahi atu ei tusia na Iehova, na te mau atua hape atoa râ. b (Ohi. 7:39-43) Ua faaaere râ te ati Iseraela i ta ratou mau animara, mai tei tohuhia  e Iehova ei faautuaraa i te nunaa tei ere i te faaroo: “E riro ta outou mau tamaiti ei tiai mamoe i te medebara e 40 matahiti.” (Num. 14:33) No reira, ua fanaˈo atoa paha ratou i te û e te iˈo animara i te tahi taime, aita râ te reira i ravai no te faaamu e toru mirioni taata no e 40 matahiti te maoro. c

Mea nafea te animara i te fanaˈoraa i te maa e te pape? d I tera ra tau, mea ûa roa paha i roto i te medebara i tupu ai te tahi maa aihere. I roto i te buka 1 o te Étu⁠de perspicace des Écritures, te faataahia ra e, a 3 500 matahiti na mua ˈtu, “mea ûa aˈe i Arabia i tera ra tau i teie mahana. Ia itehia te mau tahora pape rahi tei mǎrô i teie mahana, e tapao te reira e mea î tera mau tahora i te pape na mua ˈ ˈe.” Noa ˈtu râ, e vahi ano noa iho â te medebara e te riaria. (Deut. 8:14-16) Ahani aita Iehova i horoa semeio i te pape na to ˈna nunaa, e pohe te ati Iseraela e ta ratou mau animara.​—Exo. 15:22-25; 17:1-6; Num. 20:2, 11.

Ua parau Mose i te ati Iseraela e ua faaamu Iehova ia ratou i te mâna “ia ite [ratou] e eita te taata e ora i te maa anaˈe, e ora râ te taata i te mau faahitiraa atoa no roto mai i te vaha o Iehova.”​—Deut. 8:3.