TUMU PARAU HAAPIIRAA 43
HIMENE 90 Faaitoito te tahi i te tahi
A haapae i te manaˈo feaa e te toaruaru
“Ia papu ia outou te mau mea atoa.”—TES. 1, 5:21.
MANAˈO FAUFAA
E nafea ia haapae i te manaˈo e aita Iehova e mauruuru ra ia tatou, i ta tatou mau faaotiraa e taviniraa ia ˈna?
1-2. (1) Eaha ta te mau tavini a Iehova e uiui nei? (2) Eaha ta tatou e hiˈopoa i roto i teie tumu parau?
TATOU pauroa te feaa i te tahi taime. a Ei hiˈoraa, te ui ra paha te hoê taurearea e te tâuˈa mau ra anei Iehova ia ˈna. Aita ïa o ˈna i papu faahou no te bapetizoraa. Te feruri ra te hoê taeae paari i to ˈna apîraa. Ua tuu o ˈna i te Faatereraa arii na mua roa, eiaha râ te ohipa. Tera râ, ua fifihia to ˈna utuafare i te pae moni e te ui nei oia ua tano anei ta ˈna faaotiraa na mua ˈˈe. A feruri na i te hoê tuahine ruhiruhia tei paruparu roa. Te toaruaru ra paha oia no te mea eita ta ˈna e nehenehe faahou e rave mai na mua ˈˈe. Ua ui ê na anei oe: ‘Te tâuˈa mau ra anei Iehova ia ˈu? Mea hoona anei te mau haapaeraa ta ˈu i rave no Iehova? Mea faufaa noa anei au no Iehova?’
2 E nehenehe teie mau uiraa pahono-ore-hia e haaparuparu i to tatou faaroo. I roto i teie tumu parau haapiiraa, e hiˈo mai tatou e nafea te mau aratairaa Bibilia e tauturu mai ia uiui tatou (1) te tâuˈa mau ra anei Iehova ia tatou, (2) ua tano anei te mau faaotiraa ta tatou i rave na mua ˈˈe (3) e mea faufaa noa anei tatou no Iehova.
EAHA TE TAUTURU MAI IA FEAA TATOU?
3. Eaha te hoê ravea no te tinai i te feaa?
3 Hoê ravea o te tauturu ia tatou ia tinai i te feaa o te fariuraa ïa i roto i te Parau a te Atua no te imi i te mau pahonoraa o ta tatou mau uiraa. Ia na reira tatou, e puaihia, e paari tatou i te pae varua e e ineine tatou no te “mau papu i roto i te faaroo.”—Kor. 1, 16:13.
4. E nafea ‘ia papu ia tatou te mau mea atoa’? (Tesalonia 1, 5:21)
4 A taio i te Tesalonia 1, 5:21. Te parau ra te Bibilia: “Ia papu ia outou te mau mea atoa.” Ia ore ia papu maitai ia tatou te tahi manaˈo, e hiˈopoa ïa tatou eaha ta te Bibilia e parau ra. Ei hiˈoraa, ia feaa te hoê taurearea e mea tâuˈa anei na te Atua ia ˈna. E farii noa anei o ˈna i teie parau? Eita. E titauhia “ia papu [ia ˈna] te mau mea atoa” ma te haapii i roto i te Bibilia eaha mau na te manaˈo o Iehova.
5. E nafea ia itehia mai ta Iehova pahonoraa i ta tatou mau uiraa?
5 Ia taio tatou i te Parau a te Atua, e faaroo tatou ia Iehova ia paraparau mai. Tera râ, e titauhia te mau tutavaraa rahi. E imi e e haapii tatou i te mau irava Bibilia o te tauturu mai. E nehenehe tatou e rave i te mau maimiraa ma te faaohipa i te mau mauhaa haapiiraa ta te faanahonahoraa a Iehova e horoa mai. (Mas. 2:3-6) E pure tatou ia Iehova no te aratai i ta tatou mau maimiraa e ia itehia ia tatou te pahonoraa o ta tatou mau uiraa. I muri iho, e imi tatou i te mau aratairaa Bibilia e tano i to tatou tupuraa. E faufaahia atoa tatou a hiˈopoa ˈi i te aamu Bibilia o te mau tavini tei faaruru i te hoê â tupuraa.
6. E nafea te mau putuputuraa e tauturu ai ia tatou ia haapae i te feaa?
6 E faaroo atoa tatou ia paraparau mai Iehova i te mau putuputuraa. I reira tatou e faaroo ai i te oreroraa parau aore ra i te tahi pahonoraa o te tauturu mai ia haapae i te feaa. (Mas. 27:17) E hiˈopoa tatou e nafea ia haapae i te tahi mau manaˈo feaa.
TE TÂUˈA MAU RA ANEI IEHOVA IA OE?
7. Eaha paha ta vetahi e ui nei?
7 Ua ui ê na anei oe: ‘Te tâuˈa mau ra anei Iehova ia ˈu?’ Mai te peu e te haafaufaa ore nei oe ia oe, mea fifi paha ia tiaturi e nehenehe oe e riro ei hoa no te Atua poiete. Hoê â atoa paha manaˈo to te arii Davida. Ua faahiahia roa o ˈna a ite ai e te tâuˈa ra Iehova i te taata. Ua ui hoi oia: “E Iehova, eaha te taata e tâuˈa ˈi oe ia ˈna, te tamaiti a te taata nei, e haapao ai oe ia ˈna?” (Sal. 144:3) Ihea oe e ite ai i te pahonoraa o teie uiraa a Davida?
8. Ia au i te Samuela 1, 16:6, 7, 10-12, eaha ta Iehova e hiˈo i roto i te taata?
8 I roto i te Bibilia, te haapii ra tatou e ua tâuˈa atoa Iehova i te feia o tei haafaufaa-ore-hia. Ei hiˈoraa, ua tono oia ia Samuela i te utuafare o Iese no te faatahinu hoê o ta ˈna mau tamaiti ei arii no Iseraela. Ua titau Iese e hitu o ta ˈna mau tamaiti ia farerei ia Samuela, eiaha râ ia Davida te hopea. b O Davida râ ta Iehova i maiti. (A taio i te Samuela 1, 16:6, 7, 10-12.) Ua hiˈo Iehova i roto i te aau o Davida, oia hoi e taurearea paari oia i te pae varua.
9. Eaha te faaite mai ra e te tâuˈa mau ra Iehova ia oe? (A hiˈo atoa i te hohoˈa.)
9 A feruri na mea nafea Iehova i te faaiteraa e te tâuˈa mai ra oia ia oe. Ua horoa mai oia i te mau aˈoraa e tano iho â no oe. (Sal. 32:8) Te auraa ïa mea matau maitai o ˈna ia oe. (Sal. 139:1) A faaohipa ˈi i ta ˈna mau aˈoraa a ite atu ai oe i te mau maitai, ua papu roa ia oe e te hiˈo mai ra oia ia oe. (Par. 1, 28:9; Ohi. 17:26, 27) E tapao Iehova i ta oe mau tutavaraa, to oe mau huru maitatai e te hinaaro ra oia e faahoa ia oe. (Ier. 17:10) E e oaoa o ˈna ia riro atoa oe ei hoa no ˈna.—Ioa. 1, 4:19.
“Ia imi oe ia [Iehova], e vaiiho oia ia itehia mai oia e oe.”—Par. 1, 28:9 (A hiˈo i te paratarafa 9) c
UA TANO ANEI TE MAU FAAOTIRAA TA TATOU I RAVE NA MUA ˈˈE?
10. Eaha ta vetahi e uiui nei a feruri ai i ta ratou mau faaotiraa?
10 E uiui paha vetahi ua tano anei te mau faaotiraa ta ratou i rave na mua ˈˈe. Ua faaoti paha ratou e vaiiho i te tahi ohipa aore ra imiraa no te tavini atu â ia Iehova. A mairi ai te mau matahiti, e faaroo paha ratou e oraraa fanaˈo to te feia ta ratou i matau no te mea e faaotiraa ê ta ratou i rave. I reira ïa ratou e na ô ai: ‘Mea hoona anei ta ˈu mau haapaeraa i rave no Iehova? Aore ra ahani iho â paha vau i fetu ia monihia vau?’
11. No te aha tei papai i te Salamo 73 i haapeapea noa ˈi?
11 Ua uiui atoa paha oe mai tera. A hiˈo ïa i te huru o tei papai i te Salamo 73. Ua ite atu oia e oraraa fanaˈo to te feia aita e tavini ra ia Iehova, e au ra e aita e fifi to ratou. (Sal. 73:3-5, 12) Manaˈo ihora ïa oia e mea faufaa ore ta ˈna mau tutavaraa e tavini ia Iehova. “Ua haapeapea noa [o ˈna] i te mahana taatoa” no teie manaˈo toaruaru. (Sal. 73:13, 14) Eaha ta ˈna i rave no te haapae i te reira?
12. Ia au i te Salamo 73:16-18, eaha tei tauturu i te papai Salamo ia itoito faahou?
12 A taio i te Salamo 73:16-18. Ua haere te papai Salamo i te nao a Iehova. I reira oia i te taa-maitai-raa e noa ˈtu mea oaoa te oraraa o tera mau taata, aita e tiaturiraa papu to ratou no a muri aˈe. Aita ˈtura ïa oia i haapeapea faahou. Ua papu râ ia ˈna e o te taviniraa ia Iehova te faaotiraa maitai roa ˈˈe. Ua itoito faahou mai oia i te tavini noa ia Iehova.—Sal. 73:23-28.
13. Eaha te rave ia haapeapea oe no ta oe mau faaotiraa? (A hiˈo atoa i te hohoˈa.)
13 Eita atoa oe e haapeapea faahou maoti te Parau a te Atua. A haamanaˈo i te mau maitai ta oe e fanaˈo ra, mai ta Iehova haamaitairaa, ta te feia aita e tavini ra ia ˈna e ore e fanaˈo nei. Te oraraa fanaˈo i teie nei, tera noa to ratou tiaturiraa, aita ˈtu. Area oe, te haamaitai nei Iehova ia oe i teie nei e te fafau ra oia e rave rahi atu â haamaitairaa no a muri aˈe. (Sal. 145:16) A feruri atoa na, aita oe i ite mai te aha to oe oraraa ahani e faaotiraa ê ta oe i rave. Te mea papu râ, e oaoa noa te feia o te rave i te faaotiraa no to ratou here ia Iehova e i to ratou taata tupu.
A tiatonu i te mau haamaitairaa ta Iehova i fafau mai (A hiˈo i te paratarafa 13) d
MEA FAUFAA NOA ANEI OE NO IEHOVA?
14. No te aha vetahi e toaruaru ai, e eaha te uiraa e puta mai?
14 E ruhiruhia vetahi mau tavini a Iehova, mea maˈimaˈi aore ra e hapepa. E feaa paha to ratou manaˈo, a ui atu ai: ‘Mea faufaa noa anei au no Iehova?’
15. Ua papu i tei papai i te Salamo 71 i te aha?
15 Ua toaruaru atoa tei papai i te Salamo 71. Ua pure oia: “Eiaha e faarue ia ˈu ua ere anaˈe au i to ˈu puai.” (Sal. 71:9, 18) Ua papu noa râ ia ˈna e ia tavini oia i to ˈna Atua ma te taiva ore, e aratai e e turu Iehova ia ˈna. Ua haapii mai te papai Salamo e mauruuru Iehova i te feia o te tutava i te tavini ia ˈna noa ˈtu to ratou mau taotiaraa.—Sal. 37:23-25.
16. No te aha mea faufaa noa te mau ruhiruhia no Iehova? (Salamo 92:12-15)
16 Outou te mau ruhiruhia, a feruri eaha to Iehova manaˈo ia outou. E nehenehe ta ˈna e tauturu ia outou ia tavini ia ˈna ma te taiva ore noa ˈtu to outou mau taotiaraa. (A taio i te Salamo 92:12-15.) Eiaha e hiˈo i tei ore e maraa ia outou ia rave. A feruri râ i ta outou e nehenehe e rave. E itoitohia vetahi ê maoti to outou hiˈoraa maitai e to outou tâuˈaraa ia ratou. A faatia mea nafea Iehova i te tautururaa ia outou i tera rahiraa matahiti, e eaha te mau parau fafau Bibilia ta outou e tiai ru nei. Eiaha atoa e haamoˈe e mea faufaa roa no Iehova ta outou mau pure no vetahi ê. (Pet. 1, 3:12) Noa ˈtu eaha to tatou tupuraa, o tatou pauroa te nehenehe e pûpû i te tahi mea ia Iehova e ia vetahi ê.
17. No te aha eiaha e faaau ia tatou ia vetahi ê?
17 Ia toaruaru noa ˈtu oe no te mea eita ta oe e nehenehe e rave hau atu â no Iehova, a haamanaˈo e mea faufaa roa no ˈna ta oe e rave nei. E faaau paha oe i ta oe e rave nei i ta vetahi ê. Eiaha, no te mea eita Iehova e na reira. (Gal. 6:4) Ei hiˈoraa, ua ninii Maria i te monoˈi noˈanoˈa moni rahi i nia i te avae o Iesu. (Ioa. 12:3-5) Area te vahine ivi veve, e piti noa ïa moni huˈa haihai roa ta ˈna i tuu i roto i te afata moni o te hiero. (Luka 21:1-4) Aita râ Iesu i faaau i na vahine e piti, ua tapao noa oia i to raua faaroo. Mea faufaa mau â no Iehova ta oe e rave nei no to oe here ia ˈna, noa ˈtu mea haihai.
18. Eaha te rave ia feaa tatou? (A hiˈo atoa i te tumu parau tarenihia “ Irava Bibilia o te tauturu mai ia ore e feaa faahou.”)
18 Tatou pauroa te feaa i te tahi taime. Mai ta tatou râ i ite mai, e tauturu te Bibilia ia tatou ia haapae i te reira. No reira, a tutava i te tinai i te reira. Eita ïa oe e toaruaru faahou. Te tâuˈa mai ra iho â Iehova ia oe. Te mauruuru nei oia i ta oe mau haapaeraa, e e haamaitai iho â o ˈna ia oe mai ta ˈna i fafau. Ia papu noa ia oe e mea here e mea tâuˈa na Iehova pauroa ta ˈna mau tavini taiva ore.
HIMENE 111 Ia oaoa tatou i te Atua
a NO TE TAA MAITAI ATU Â: I roto i teie tumu parau, e hiˈo mai tatou i te mau manaˈo feaa e mea faufaa anei tatou no Iehova aore ra mea tano anei te mau faaotiraa ta tatou i rave na. E ere râ i te ereraa i te faaroo ia Iehova e i ta ˈna mau parau fafau.
b Noa ˈtu aita te Bibilia e faahiti ra ehia matahiti to Davida i to Iehova maitiraa ia ˈna, e au ra e e taurearea noa o ˈna.—A hiˈo i Te Pare Tiairaa o te 1 no Tetepa 2011, api 29, par. 2 (Farani).
